Ol i Stap Long Dispela Graun Tasol Ol i No Insait Long En
“Yupela i no man bilong dispela graun. . . . Olsem na ol manmeri bilong graun i save birua long yupela.”—JON 15:19.
1. Ol Kristen i stap olsem wanem long ol manmeri bilong dispela graun? Tasol ol manmeri bilong dispela graun i ting olsem wanem long ol?
LONG laspela nait bilong em long bung wantaim ol disaipel bilong em, Jisas i tokim ol: “Yupela i no man bilong dispela graun.” Taim em i toktok long ol man bilong dispela graun, em i tingim wanem ol lain? Long narapela taim paslain long dispela, em i bin tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Yumi save ol disaipel i insait long dispela lain manmeri bilong graun, long wanem, ol i namba wan lain bilong bilip long Jisas na bai ol i ken kisim laip i stap oltaim oltaim. Orait, bilong wanem nau Jisas i tok, ol disaipel bilong em i stap narapela kain long ol manmeri bilong dispela graun? Na bilong wanem em i tok tu olsem: “Yupela i no man bilong dispela graun . . . olsem na ol manmeri bilong graun i save birua long yupela”?—Jon 15:19.
2, 3. (a) Wanem “dispela graun” ol Kristen i no ken insait long en? (b) Baibel i tok wanem long “dispela graun” ol Kristen i no insait long en?
2 Bekim bilong ol dispela askim i olsem: Long Baibel dispela tok Grik koʹsmos i makim narapela narapela samting. Olsem yumi tok pinis long stori i kamap paslain long dispela, sampela taim dispela tok koʹsmos i makim olgeta manmeri bilong graun. Em ol manmeri bilong graun God i laikim ol tumas na Jisas i bin dai bilong helpim ol. Wanpela buk (The Oxford History of Christianity) i tok: ‘Ol Kristen i save kolim dispela tok ol manmeri bilong “dispela graun” bilong makim ol manmeri i stap longwe long God na ol i birua long em.’ Olsem wanem dispela tok inap makim olsem? Wanpela Katolik bilong raitim buk, em Roland Minnerath, em i tok long buk bilong em (Les chrétiens et le monde, olsem Ol Kristen na Ol Manmeri Bilong Dispela Graun), olsem: ‘Sampela taim dispela graun i makim olgeta hap em ol gavman i birua long God ol i mekim wok bilong ol long en na ol lain bilong dispela graun i birua long wok king bilong Krais, na long dispela as ol i wanpela lain birua i stap long olgeta hap na Satan i bosim ol.’ Dispela tok olsem “dispela graun,” em i makim olgeta manmeri i stap longwe long God. Ol Kristen tru i no bilong dispela graun, na dispela graun i birua long ol.
3 Klostu long yia 100 C.E., Jon i tingim ol manmeri bilong dispela graun taim em i tok: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa. Yumi save, olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.” (1 Jon 2:15, 16) Na em i tok tu olsem: “Yumi save, yumi stap pikinini bilong God, tasol dispela graun olgeta em i stap aninit long strong bilong Satan.” (1 Jon 5:19) Jisas yet i kolim Satan olsem “hetman i save bosim dispela graun.”—Jon 12:31; 16:11.
Ol Bikpela Gavman i Kamap
4. Ol bikpela gavman bilong graun i bin kamap olsem wanem?
4 Dispela graun bilong nau, olsem ol manmeri bilong graun i stap longwe long God, em i wok long kamap bihain liklik long Bikpela Tait long taim bilong Noa; long dispela taim planti tumbuna pikinini bilong Noa i no lotu moa long God Jehova. Wanpela man i gat nem long dispela taim bipo em Nimrot, em i man bilong wokim taun na “em i bikhet long Jehova na em i strongpela man bilong raunim ol animal.” (Stat 10:8-12, NW) Long dispela taim bipo, long klostu olgeta hap bilong graun i gat ol hetman i save bosim ol wan wan taun, na sampela taim ol hetman bilong tupela o 3-pela taun i save wok bung wantaim na ol i go pait long ol narapela taun ol i wok bung wantaim. (Stat 14:1-9) Sampela hetman bilong wanpela taun ol i daunim ol narapela taun na ol i kamap hetman bilong ol dispela taun tu, na long dispela rot ol i bosim bikpela hap graun i gat planti taun insait long en. Sampela taim wanpela hetman i wok long kisim planti ples i go i go na bihain em i kamap wanpela strongpela gavman i bosim olgeta hap.
5, 6. (a) Wanem ol dispela 7-pela bikpela gavman bilong graun em Baibel i stori long ol? (b) Baibel i tok piksa long ol dispela bikpela gavman bilong graun i olsem wanem samting? Ol i kisim we strong bilong ol long bosim graun?
5 Ol bikpela gavman bilong graun ol i bihainim pasin bilong Nimrot na ol i no lotuim Jehova, na dispela i kamap ples klia long pasin ol i bin mekim, em ol i mekim nogut long ol man na mekim ol pait nogut i bagarapim planti man. Ol dispela bikpela gavman i bosim graun, Baibel i tok piksa long ol olsem ol wel animal, na insait long planti handet yia Baibel i kamapim klia 6-pela bilong ol, em ol i bin mekim sampela bikpela samting long lain bilong Jehova. Ol dispela bikpela gavman i bin bosim graun em Isip, Asiria, Babilon, Midia wantaim Persia, Grik, Rom. Baibel i tok profet olsem bihain long Rom bai i gat namba 7 bikpela gavman i kamap. (Daniel 7:3-7; 8:3-7, 20, 21; KTH 17:9, 10) Dispela em i gavman bilong Inglan wantaim Amerika, em tupela gavman i pren wantaim, na bihain Amerika i kamap strong moa, winim Inglan. Gavman bilong Inglan i kirap long kamap strong bihain long taim strong bilong gavman bilong Rom i pinis olgeta.a
6 Buk Kamapim Tok Hait i tok piksa long 7-pela bikpela gavman bilong graun i olsem wanpela wel animal i gat 7-pela het na em i kamap long solwara, i makim ol manmeri bilong graun i no sindaun gut na i stap isi. (Aisaia 17:12, 13; 57:20, 21; KTH 13:1) Husat i givim strong na namba long dispela wel animal long i stap king? Baibel i bekim dispela askim: “Dispela snek i givim strong bilong em yet long dispela wel animal. Em i mekim em i stap king olsem em yet, na em i givim bikpela strong long em.” (KTH 13:2) Dispela snek em Satan tasol.—Luk 4:5, 6; KTH 12:9.
Kingdom Bilong God Bai Bosim Graun
7. Ol Kristen i bilip na wetim wanem samting? Olsem na ol i stap olsem wanem long ol gavman bilong dispela graun?
7 Klostu olsem 2,000 yia pinis, ol Kristen i bin beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Ol Witnes Bilong Jehova i save, Kingdom bilong God tasol inap kamapim gutaim tru long graun. Ol i save skelim gut ol tok profet bilong Baibel, olsem na ol i bilip tru olsem liklik taim nau na ol samting bilong dispela beten bai kamap tru, na klostu nau Kingdom bilong God bai kirap bosim olgeta samting long graun. (Daniel 2:44) Ol i stap gut long dispela Kingdom, olsem na ol i no insait long ol wok politik samting bilong ol gavman bilong dispela graun.
8. Ol gavman i ting olsem wanem long Kingdom bilong God bai bosim graun, olsem Baibel i tok profet long Song 2?
8 Sampela kantri i tok ol i save bihainim ol lo bilong lotu. Tasol ol samting ol i mekim i kamapim klia olsem ol i no tingim Jehova em i King bilong heven na graun na em i bin putim Jisas olsem King long heven na em i gat namba long bosim graun. (Daniel 4:17; KTH 11:15) Wanpela Song i olsem tok profet em i tok: “Ol king bilong olgeta hap graun, ol i redi long pait. Na ol hetman i bung na painim rot bilong daunim Bikpela na dispela man em i makim bilong bosim ol manmeri bilong en [Jisas]. Ol i tok olsem, ‘Yumi brukim hankap bilong tupela. Yumi rausim ol baklain tupela i pasim yumi long en.’ ” (Song 2:2, 3) Ol gavman i no orait long wanpela samting bilong God olsem “hankap” o “baklain” i pasim ol long bosim kantri bilong ol. Olsem na Jehova i tokim Jisas, em dispela King em i bin makim: “Askim mi, na bai mi givim olgeta lain manmeri long yu, na bai yu bosim olgeta hap graun. Bai yu bosim ol long strongpela han bilong yu. Na bai yu brukim ol liklik liklik, olsem man i brukim sospen graun.” (Song 2:8, 9) Tasol ol manmeri bilong graun em Jisas i bin dai bilong helpim ol, Jehova i no ken “brukim” ol liklik liklik na pinisim ol olgeta, nogat.—Jon 3:17.
Abrusim “Mak” Bilong “Wel Animal”
9, 10. (a) Buk Kamapim Tok Hait i givim wanem toksave long yumi? (b) Taim man i gat “mak bilong wel animal,” dispela i makim wanem samting? (c) Ol wokboi bilong God i orait long kisim wanem mak?
9 Ol tok hait Jisas i kamapim long aposel Jon i toksave olsem klostu long taim ol lain bilong dispela graun i pinis, em ol lain i stap longwe long God, ol dispela lain bai wok long subim moa yet ol man long mekim ol samting ol i laikim, na ol bai strong long “putim wanpela mak long han sut na long pes bilong olgeta manmeri, maski ol i manmeri nating o ol i gat nem, na maski ol i gat planti mani o ol i stap rabis, na maski ol i stap fri o ol i wokboi na wokmeri nating. Na sapos man i no gat dispela mak bilong nem bilong wel animal o sapos em i no gat namba bilong nem bilong en, orait em i no inap baim samting long ol arapela manmeri na ol i no inap baim samting long em.” (KTH 13:16, 17) Wanem insait bilong dispela tok? Taim man i kisim mak long han sut, dispela i makim olsem em i mekim ol wok bilong helpim ol lain i bin putim dispela mak long em. Orait, olsem wanem long mak i stap long pes bilong man? Wanpela buk (The Expositor’s Greek Testament) i tok: ‘Dispela em i wanpela tok piksa long pasin bilong putim wanpela mak long pes bilong ol soldia o wokboi nating; na em i makim tu pasin bilong ol lain bilong lotu long putim nem bilong wanpela god long pes bilong ol olsem samting bilong lukautim ol na bai ol samting nogut i no ken painim ol.’ Pasin na tok bilong planti manmeri i makim olsem ol i gat dispela mak long pes bilong ol na i makim olsem ol i “wokboi” o “soldia” bilong dispela “wel animal.” (KTH 13:3, 4) Olsem wanem long ol long bihain? Wanpela buk (Theological Dictionary of the New Testament) i tok: “Ol birua bilong God i larim ol i putim [mak] bilong wel animal long pes na long wanpela han bilong ol, em dispela namba i gat nem bilong wel animal long en. Dispela [mak] i givim planti rot long ol long mekim ol wok bisnis na kisim planti mani samting, tasol dispela [mak] i mekim na belhat bilong God i stap long ol na ol i no ken stap insait long kingdom bilong wan tausen yia, KTH 13:16; 14:9; 20:4.”
10 Bilong sakim ol lain i strong long em i mas kisim “dispela mak,” man i mas i gat strongpela bel tru na pasin bilong sanap strong na karim hevi. (KTH 14:9-12) Tasol ol wokboi bilong God ol i gat dispela kain strong, olsem na planti taim ol man i birua long ol na sutim tok giaman long ol bilong bagarapim nem bilong ol. (Jon 15:18-20; 17:14, 15) Ol i no putim mak bilong wel animal long pes bilong ol, nogat. Aisaia i mekim tok piksa olsem ol bai i raitim wanpela nem long han bilong ol, olsem “Mi Bilong Jehova.” (Aisaia 44:5, NW) Na tu, ol i “bel nogut na i wari” long ol pasin nogut ol lotu i mekim, em ol i bikhet na lusim pinis bilip tru, olsem na ol i kisim “mak” long pes bilong ol i makim olsem ol inap tru long abrusim bagarap taim Jehova i givim strafe long ol lain bilong dispela graun.—Esekiel 9:1-7.
11 God i larim ol gavman bilong ol man i bosim graun i go inap long taim Kingdom bilong Krais long heven i kirap na bosim dispela graun. Wanpela buk bilong Profesa Oscar Cullmann (The State in the New Testament) i stori long God i larim ol gavman politik i stap. Buk i tok: “Dispela tingting olsem ol gavman politik i bilong i stap liklik taim tasol, dispela i as na ol Kristen bilong pastaim i no gat wanpela tingting tasol long gavman—i olsem narapela tingting i pait wantaim narapela tingting. Mi laik tok gen, i olsem ol i gat dispela kain tingting. Yumi ken lukim Rom 13:1, ‘Olgeta man i mas i stap aninit long ol gavman . . . ’ na skelim wantaim Kamapim Tok Hait 13: dispela wel animal i kirap insait long hul i no gat as na i kam antap, em i makim gavman.”
“Wel Animal” na “Sisar”
12. Ol Witnes Bilong Jehova i gat wanem stretpela tingting long ol gavman bilong ol man?
12 I no stret yumi tok, olgeta man i holim wok gavman i olsem wokboi bilong Satan. Planti man olsem ol i bin kamapim klia olsem ol i man bilong bihainim lo, olsem namba wan gavman Sergius Paulus, em Baibel i tok em i “man i gat gutpela tingting.” (Aposel 13:7) Sampela gavman ol i no pret long helpim ol liklik lain bambai ol inap kisim ol samting i stret ol i kisim; ol i bihainim maus bilong bel God i bin givim long ol, maski ol i no bin save long Jehova na ol samting em i laik mekim bilong kamapim laik bilong em. (Rom 2:14, 15) Yumi no ken lusim tingting olsem Baibel i kolim dispela tok “ol manmeri bilong graun” long tupela pasin, olsem: ol manmeri bilong graun, em God i save laikim tru ol na yumi tu i mas laikim tru ol, na ol manmeri bilong graun i stap longwe long Jehova na Satan em i god bilong ol, na yumi mas i stap narapela kain long ol. (Jon 1:9, 10; 17:14; 2 Korin 4:4; Jems 4:4) Olsem na ol wokboi bilong Jehova i gat stretpela tingting long ol gavman bilong graun. Yumi no insait long ol samting bilong politik, long wanem, yumi mekim wok olsem mausman bilong Kingdom bilong God na yumi dediketim pinis laip bilong yumi long God. (2 Korin 5:20) Tasol yumi save bihainim maus bilong bel na daun long ol man i gat namba long bosim yumi.
13. (a) Jehova i save ting olsem wanem long ol gavman bilong ol man? (b) Ol Kristen i mas daun olsem wanem long ol gavman bilong ol man?
13 Dispela stretpela tingting i wankain olsem tingting bilong God Jehova yet. Taim ol bikpela gavman bilong graun, na ol gavman bilong ol liklik kantri tu, i mekim wok nogut long namba bilong ol long bosim ol man, na ol i mekim hatpela pasin long lain bilong ol, o mekim nogut long ol man i lotuim God, orait dispela tok profet bilong Baibel i kolim ol olsem wel animal, em i stret tru long ol. (Daniel 7:19-21; KTH 11:7) Tasol taim ol gavman bilong sampela kantri i mekim laik bilong God na ol i putim ol polis samting bambai ol man i mas bihainim lo na i stap gut, na ol i mekim long stretpela pasin, orait God i tingim ol dispela gavman i olsem ol “wokman” bilong em. (Rom 13:6) Jehova i laik bai lain bilong em i mas daun long ol gavman bilong ol man na stap aninit long ol, tasol ol i no aninit olgeta long ol. Taim ol man i laik bai ol wokboi bilong God i mas mekim ol samting em lo bilong God i tambuim, o taim ol i tambuim ol samting em God i laik bai ol wokboi bilong em i mas mekim, orait ol wokboi bilong God i save bihainim pasin bilong ol aposel, olsem: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:29.
14. Jisas i tok wanem long ol Kristen i mas daun long ol gavman bilong ol man? Pol i tok wanem long dispela samting?
14 Jisas i bin tok ol disaipel bilong em bai i gat wok ol i mas mekim long ol gavman na long God taim em i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Matyu 22:21) Spirit bilong God i stiaim Pol na em i raitim tok olsem: “Olgeta man i mas i stap aninit long ol gavman. . . . Tasol sapos yu mekim pasin nogut, orait yu mas pret. Yu save, gavman i holim bainat, na em i no holim nating. Em i wokman bilong God, bilong bekim pe nogut long man i mekim pasin nogut. Olsem na yumi mas aninit long gavman. Na yumi no ken pret long dispela pe nogut tasol na bihainim tok bilong em. Nogat. Yumi mas save long bel bilong yumi yet olsem dispela pasin i stret, olsem na yumi bihainim. Long dispela as tasol yupela i save tromoi takis tu.” (Rom 13:1, 4-6) Kirap long taim bilong ol aposel na i kam inap nau, ol Kristen i mas tingim gut ol samting gavman i tok long ol i mas mekim. Ol i mas skelim gut long tingting na bai ol i ken save, sapos ol i bihainim dispela tok bilong gavman, ol bai mekim sampela samting i no stret long lotu bilong ol, o dispela samting gavman i tok long ol i mas mekim i stret tasol na ol i mas givim bel long bihainim dispela tok.
Ol i Givim Bel Long Mekim Wok
15. Olsem wanem ol Witnes Bilong Jehova i save bihainim maus bilong bel na ol i bekim dinau bilong ol long Sisar?
15 “Ol gavman” politik em ol “wokman” bilong God taim ol i mekim ol wok God i orait long ol i mekim, na wanpela wok em bilong “bekim pe nogut long ol man i mekim pasin nogut, na bilong litimapim nem bilong ol man i mekim gutpela pasin.” (1 Pita 2:13, 14) Ol wokboi bilong Jehova i save bihainim maus bilong bel na ol i save givim takis long Sisar i stret long mak em i singaut long en, na ol i save mekim olgeta samting i stret wantaim maus bilong bel em Baibel i skulim pinis, bambai ol i ken “bihainim tok bilong ol [king na gavman]. Na oltaim ol i mas redi long mekim olgeta kain gutpela wok.” (Taitus 3:1) Wanpela “gutpela wok” em bilong helpim ol narapela man taim wanpela bikpela bagarap i kamap. Planti man i bin tokaut long gutpela pasin ol Witnes Bilong Jehova i bin mekim long ol narapela man long ol dispela taim.—Galesia 6:10.
16 Ol Witnes Bilong Jehova i save laikim tru ol narapela man na ol i pilim olsem nambawan gutpela wok ol inap mekim em bilong helpim ol man long kisim stretpela save long laik bilong God, em i laik kamapim “nupela skai na nupela graun” i gat stretpela pasin i stap long en. (2 Pita 3:13) Taim ol i skulim ol man long ol stretpela lo bilong Baibel na ol yet i bihainim, ol i save helpim gut ol manmeri bilong graun—ol i save helpim planti man na ol i lusim pasin bilong bikhet na sakim lo. Ol wokboi bilong Jehova i save bihainim lo na daun long ol bikman bilong gavman, na ol man i holim wok bilong gavman, na ol jas, na ol man i bosim taun, na ol i givim biknem long ‘ol man i stap bikman.’ (Rom 13:7) Ol papamama Witnes i amamas long wok gut wantaim tisa bilong ol pikinini bilong ol na ol i helpim ol pikinini long stadi gut bambai ol inap kisim wanpela wok mani long bihain bilong lukautim ol yet na bai ol narapela man i no gat hatwok long lukautim ol long ol samting bilong skin. (1 Tesalonaika 4:11, 12) Insait long ol kongrigesen bilong ol, ol Witnes i nolaik tru long pasin bilong bel nogut long ol man bilong ol narapela lain o skin, o mekim gut long ol man i gat nem na daunim ol man i no gat nem, na ol i ting em i bikpela samting tru long strongim ol famili long pas gut wantaim. (Aposel 10:34, 35; Kolosi 3:18-21) Olsem na long pasin bilong ol, ol i kamapim long ples klia olsem ol tok ol man i sutim long ol, olsem ol i save brukim ol famili o ol i no save helpim ol wanples, ol dispela tok i giaman tasol. Em nau, tok bilong aposel Pol i stret tru, em i tok: “God i laik bai yupela i mas mekim gutpela pasin tasol, olsem bai yupela inap pasim maus bilong ol krankiman i no gat save, na ol i save tok nogut long yupela.”—1 Pita 2:15.
17. Ol Kristen i mas mekim wanem na bai ol i ken “bihainim gutpela tingting na mekim ol stretpela pasin” long “ol man i stap ausait long sios”?
17 Olsem na maski ol disaipel bilong Krais “i no bilong dispela graun,” ol i stap yet namel long ol manmeri bilong graun na ol i mas wok yet long “bihainim gutpela tingting na mekim ol stretpela pasin” long “ol man i stap ausait long sios.” (Jon 17:16; Kolosi 4:5) Jehova i larim yet ol gavman i mekim wok olsem wokman bilong em, olsem na yumi mas daun yet long ol. (Rom 13:1-4) Tru, yumi no insait long ol samting bilong wok politik, tasol yumi save beten bilong helpim “ol king na olgeta gavman,” na yumi mas mekim moa yet taim ol dispela king na gavman i mas tingim sampela samting ol bai mekim na dispela inap pasim rot bilong i stap fri long mekim lotu. Bai yumi wok yet long mekim olsem na “bai yumi olgeta i ken sindaun gut na i stap bel isi, na yumi ken bihainim tru olgeta pasin God i laikim” bambai God i ken “kisim bek olgeta [kain] manmeri.”—1 Timoti 2:1-4.
[Futnot]
a Lukim buk Kamapim Tok Hait—Bikpela Samting Bilong En i Laik Kamap!, sapta 35, em Sosaiti Wastaua bilong Nu Yok i wokim.
Ol Askim Bilong Tingim Gen
◻ Wanem “dispela graun” ol Kristen i insait long en? Tasol wanem “dispela graun” ol i no ken insait long en?
◻ Dispela “mak” bilong “wel animal” i stap long han o long pes bilong man, em i makim wanem samting? Ol wokboi bilong Jehova i stap gut long em ol i gat wanem ol mak?
◻ Ol Kristen tru i gat wanem stretpela tingting long ol gavman bilong ol man?
◻ Wanem sampela samting ol Witnes Bilong Jehova i save mekim na i save helpim gut ol manmeri bilong graun?
11. Husat i save larim ol gavman bilong ol man i bosim graun inap long taim Kingdom bilong God i kam bilong bosim graun?
16. Ol Witnes Bilong Jehova i save mekim wanem ol gutpela wok bilong helpim ol gavman na ol narapela man?
[Ol Piksa long pes 16]
Baibel i tok ol gavman bilong ol man i olsem wokman bilong God na wanpela wel animal tu
[Piksa long pes 17]
Ol Witnes Bilong Jehova i save mekim pasin sori na tingim ol man, olsem na ol i save helpim gut ol lain bilong ples ol i sindaun long en