Yu Tenkyu Long Jisas Long Ol Samting Em i Mekim?
PASIN bilong tok “Tenkyu” em i gutpela rot bilong kamapim bel bilong yumi olsem yumi pilim tru gutpela pasin narapela man i mekim long yumi. Planti man i save tok “Tenkyu,” tasol ol i no pilim tru gutpela pasin man i bin mekim. Ating ol i tok tenkyu long wanem planti man i save mekim olsem taim narapela man i givim samting long ol o em i mekim gut long ol. I stret ol i mekim, tasol ol i mekim nating tasol.
Taim yumi kisim wanpela gutpela presen, ating wanpela samting yumi laikim tru, i stret yumi mas pilim tru gutpela pasin bilong man i givim dispela presen long yumi, na yumi mas tok tenkyu long em. Taim man i givim wanpela presen long yumi, yumi save amamas; ating yumi sot long dispela samting na nau dispela man i givim long yumi. Sapos dispela presen i helpim yumi long tupela rot olsem, orait em wanpela gutpela presen tru. Tasol sapos bihain yumi no tingim moa dispela presen o yumi no mekim gutpela wok long en, dispela i makim olsem yumi no pilim tru gutpela pasin bilong man i givim dispela presen long yumi; taim yumi tok tenkyu long em, yumi tok nating tasol. Olsem na tingting bilong yumi long dispela presen na ol samting yumi mekim long en, dispela i makim olsem yumi pilim tru gutpela pasin bilong man i givim dispela presen long yumi o nogat.
Man bilong wokim olgeta samting, em Jehova, em i givim wanpela gutpela presen tru long yumi. Em i givim Pikinini bilong Em long yumi olsem presen. Jon 3:16 i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Sapos yumi pilim tru dispela presen God i givim long yumi, bai yumi inap i stap amamas tru na bai dispela presen i helpim yumi long ol samting yumi sot long en. Tasol Jehova i givim dispela presen long yumi, olsem na bilong wanem yumi mas tok tenkyu long Jisas?
Ol Samting Jisas i Mekim Bilong Helpim Yu
Ating bai yu tok: “Jisas i mekim wanem bilong helpim mi?” Mama i no karim yu yet na Jisas i bin mekim wanpela samting bilong helpim yu. Em i mekim wanem? Em i stap long heven, tasol em i lusim heven na em i kamap man long graun. Wanpela nupela meri, nem bilong em Maria, i karim em na em i kamap man long graun. (Luk 1:26-33) Em bikpela samting tru em i bin mekim. Olsem wanem em i bikpela samting? Orait, yu laik lusim gutpela ples yu stap bel isi na amamas long en, na lusim ol gutpela pren bilong yu na i go i stap long wanpela hap i gat planti hevi long en na ol raskol o sik nogut o bagarap inap painim yu, na yu stap namel long ol man i laik kilim yu i dai? Ating bai yu tok, “Mi no laik tru long mekim olsem!” Tasol Jisas i bin mekim olsem.—Jon 17:5; Filipai 2:5-8.
Jisas i no gat pekato, long wanem em i no gat papa long graun; God Jehova em i papa bilong em. (Luk 1:34, 35) Em i no bin popaia liklik long tingting o long toktok o long pasin bilong em. Em i gutpela olgeta. Maski em i stap namel long ol sinman na ol man i birua long em, tasol em inap tokim ol birua: “Yupela ting mi bin mekim sin, a? Sapos yupela ting olsem, orait yupela mas kotim mi long dispela samting.” I no gat wanpela man inap kotim em, long wanem em i no bin mekim sin. Aposel Pita i tok: “Em i no bin mekim sin, na ol i no painim wanpela tok giaman long maus bilong em.” (Jon 8:46; 1 Pita 2:22) Orait, nau yumi ken stori moa long ol samting Jisas i mekim bilong helpim yumi bambai yumi ken pilim tru.
Bihain Jisas i givim gutpela laip bilong em bambai em inap helpim ol manmeri. Em i gutpela olgeta, olsem na em inap i stap oltaim oltaim, tasol em i lusim laip bilong em bilong helpim yumi. Jisas yet i tok: “Pikinini Bilong Man ․․․ i kam bilong helpim ol [man], na bilong givim laip bilong em bilong baim bek planti manmeri.” (Matyu 20:28) Ol Aposel bilong em tu i stori long dispela samting, olsem: “Tasol yumi lukim Jisas. Bipo long sotpela taim tasol em i stap aninit long ol ensel, bilong kamapim marimari bilong God na i dai bilong helpim olgeta man.” (Hibru 2:9) Jisas i lusim laip bilong em bilong helpim ol manmeri, i no gat pasin bilong laikim arapela man i winim dispela pasin. Jisas i givim nambawan gutpela presen long yumi; em i givim rot long yumi bambai yumi inap kisim laip oltaim.—Jon 3:16; 15:13.
Ating bai yu tok, ‘Tru, Jisas i bin mekim planti samting bilong helpim mi, tasol mi ken mekim wanem bilong tenkyu long em?’