I Stap na Wok Bilong Jisas

Planti Sameria i Bilip

OL DISAIPEL i go kisim kaikai long taun Saika na taim ol i kam bek ol i lukim Jisas i sindaun yet long arere bilong dispela hul wara bipo Jekop i wokim. Tasol nau em i toktok wantaim wanpela meri bilong Sameria. Taim ol disaipel i kam bek, dispela meri i lusim baket bilong em, na em i go bek long taun.

Em i tingim tru ol tok bilong Jisas na em i tokim ol man, “Yupela i kam lukim wanpela man. Em i tokim mi long olgeta samting mi bin mekim bipo.” Na bilong kirapim tingting bilong ol bambai ol i laik save long Jisas, meri i tok: “Ating em i Krais, o?” Dispela askim i mekim wok bilong en—ol i kirap i go lukim Jisas.

Long dispela taim, ol disaipel i tokim Jisas, em i mas kisim sampela kaikai ol i bin kisim i kam. Tasol Jisas i tokim ol: “Mi gat sampela kaikai yupela i no save long en.”

Ol disaipel yet i tok, “Ating wanpela man i bringim kaikai long em?” Jisas i tokim ol: “Kaikai bilong mi em i olsem: Mi bihainim laik bilong dispela em i bin salim mi na mi kam. Na mi mas pinisim wok bilong em. Yupela i save tok olsem: “I gat 4-pela mun yet na taim bilong kamautim kaikai bai i kamap.’” Na bihain em i tok, “Man i wok long kamautim kaikai, em i kisim pe bilong en na em i bungim kaikai bilong laip i stap gut oltaim oltaim.” Em i tok long wok bilong bungim ol man.

Ating Jisas i save pinis long gutpela samting bai kamap long wok dispela meri bilong Sameria i mekim bilong autim tok—olsem planti man bai ol i harim tok bilong dispela meri na bai ol i bilip. Taim ol man bilong taun Saika i kam long em long hul wara, ol i askim em long i stap wantaim ol na toktok moa wantaim ol. Olsem na em i stap tupela de long dispela ples.

Planti Sameria moa ol i harim tok bilong Jisas yet na ol i bilip. Na ol i tokim dispela meri: “Mipela i no harim tok bilong yu tasol na olsem mipela i bilip long dispela man. Nogat. Mipela yet i harim tok bilong en, na mipela i save, dispela man tasol em i man bilong kisim bek olgeta manmeri bilong graun.” Dispela meri bilong Sameria i makim gutpela pasin yumi ken bihainim, olsem yumi ken autim tok bilong Krais na kirapim tingting bilong ol man bambai ol i laik kisim sampela save moa!

Jisas i tok i gat 4-pela mun moa na bai taim bilong kamautim kaikai i kamap—ating em i tok long taim bilong kamautim bali. Long Palestain dispela taim i kamap long mun Mas samting, olsem na Jisas i mekim dispela tok long Novemba o Disemba. Olsem na yumi save, bihain long Pasova bilong yia 30 C.E. Jisas wantaim ol disaipel bilong em ol i bin i stap inap 8-pela mun samting long hap bilong Judia. Ol i lainim ol man na givim baptais long ol. Nau ol i laik lusim dispela hap na i go bek long ples bilong ol long Galili. Wanem samting bai painim ol long Galili? Jon 4:27-42.

◆ Meri bilong Sameria i mekim wanem wok bilong autim tok? Wanem samting i kamap?

◆ Olsem wanem kaikai bilong Jisas i samting bilong taim bilong kamautim kaikai?

◆ Olsem wanem yumi inap save hamas mun Jisas i stap long Judia bihain long Pasova bilong yia 30 C.E.?

[Piksa i karamapim pes olgeta long pes 17]