Ol Wel Abus Bilong Revelesen—Bilong Wanem Yumi Mas Kaunim Stori Bilong Ol?
HAP bilong Revelesen long Baibel i mekim planti tok piksa. Sampela tok piksa bilong en i stori long wanpela bikpela snek na tripela wel abus. Sampela man i kaunim stori bilong ol dispela wel abus na ol i pret. Tasol sampela man i tok ol dispela wel abus i driman nating bilong wanpela lapun man. Orait, bilong wanem yu mas kaunim stori bilong ol wel abus bilong Revelesen? Long wanem em samting bilong helpim yu long i stap amamas.
Tru, taim aposel Jon i raitim ol tok bilong Revelesen 1,900 yia bipo, em i lapun pinis. Olsem na ating ol dispela wel abus Jon i stori long en em tingting nating bilong wanpela lapun? Nogat. Na Jon i no namba wan lapun man i bin lukim kain piksa o driman olsem. Bipo lapun Danyel em i bin lukim sampela wel abus olsem driman o piksa, na ol dispela samting em i lukim i makim stret ol senis bihain i kamap long ol bikpela gavman bilong graun. (Danyel sapta 7 na sapta 8) Krais Jisas i save, spirit bilong God i as bilong ol tok Danyel i raitim; em i tok Danyel i wanpela profet na em i kolim sampela tok bilong Danyel.—Matyu 24:15.
Jisas i tokim ol disaipel, taim em i dai pinis, bihain bai God i givim sampela tok moa long ol. (Jon 16:12, 13) Planti samting i bin kamap tru olsem Revelesen i tok long en, olsem na yumi save, God i as tu bilong ol tok aposel Jon i raitim long ol dispela wel abus.—2 Timoti 3:16.
Namba wan tok bilong Revelesen i olsem: “Bipo dispela tok em i stap hait, na Jisas Krais i bin kamapim ples klia. God i soim dispela [olsem mak] long Jisas, bilong em i ken soim long ol wokboi bilong en ․․․ Em i salim ensel bilong en i kam long mi Jon, mi wokboi bilong en, na em i givim tok long mi.” (Revelesen 1:1) Ol dispela tok i olsem tok hait na Jisas i soim long Jon olsem piksa. Olsem na ol dispela wel abus Jon i lukim na stori long en long Revelesen ol i no wel abus tru; nogat; ol i olsem piksa na ol i makim sampela samting. Yumi no ken pret long kaunim Stori bilong ol. Dispela tok piksa i givim gutpela save long ol Kristen bambai ol i ken i stap gut long ai bilong God. Olsem na aposel Jon inap raitim tok olsem: “Man i save ritim dispela tok bilong God em i tok long samting i laik kamap bihain, na ol arapela man i save harim dispela tok, na ol man i save bihainim dispela tok bilong God mi bin raitim, dispela olgeta man ol i ken amamas. Long wanem taim i laik kamap nau, na ol dispela samting God i tok pinis long mekim, bai em i mekim.” Tru tumas, sapos yu save long ol samting ol dispela wel abus i makim, dispela inap helpim yu long i stap amamas long nau na long bihain.—Revelesen 1:3.