Pinis—Bilong Wanem samting?

“PINIS!” Yu tingim wanem samting taim yu harim dispela tok? Yu tingim las de? Yu ting graun bai paia na bagarap? O Namba Tri Pait Bilong Olgeta Hap bai kamap? Yu ting dispela graun bai pinis? Sapos yu ting olsem, yu gat wankain tingting olsem bilong planti man. Ol saveman bilong saiens na ol nius na televisen samting i tokaut olsem ol i ting bagarap i laik painim ol man. Ol i ting bikpela bagarap tru i laik kamap na bai dispela graun na olgeta man i stap long en ol i pinis.

Bikpela man bilong Yunaitet Nesen, em Sekreteri-Jeneral Javier Pérez de Cuellar, taim em i kilim dispela wok em i tok: ‘Baibel i stori long pinis bai kamap, tasol nau dispela i no wanpela stori nating bilong Baibel; nogat; dispela samting inap kamap tru. No gat wanpela taim bipo em bagarap inap painim olgeta man.’ Em i ting dispela bagarap bai kamap long wanem rot? Em i save ol lain man i resis long bungim planti samting bilong pait na em i ting, bai bikpela pait i kamap na bai ol i tromoi ol bom nogut nogut bilong nuklia na bagarapim dispela graun na olgeta samting i stap long en. Bilong strongim dispela tok em i bin mekim long Yunaitet Nesen, em i tok: ‘Long olgeta hap inap olsem 500,000 saveman bilong saiens i putim save bilong ol i go bilong wokim ol nupela samting bilong pait i moa nogut na em inap kilim i dai planti man moa.’

Ol narapela tu i save long dispela hevi i kamap long nau. Wanpela profesa, nem bilong em Hans Jonas (bilong New School for Social Research), em i tokaut olsem: ‘Mi pret, nogut ol samting ol man i gat save long wokim em i bagarapim ol.’ Em i ting pinis bai kamap, long wanem ol man i bagarapim win na wara na graun, na em i tingim tu bikpela bagarap ol bom nogut bilong nuklia inap kamapim.

Na wanpela man bilong raitim stori bilong ol samting i kamap long graun, nem bilong em Golo Mann, em i tok: ‘Yumi no ken mekim narapela pait bilong olgeta hap. Sapos kain pait olsem i kamap, yumi no ken kolim olsem wanpela pait. Yumi no ken tok em Namba Tri Pait Bilong Olgeta Hap; nogat; yumi mas tok, las de i kamap pinis. Ating bai graun i paia na bagarap olgeta.’—Nius Die Zeit bilong Hambek, long Ogas 30, 1985.

Tru tumas, ol man inap bagarapim ol yet. Pinis i laik kamap, tasol yu ting ol man bilong graun i as bilong en? Baibel i tok, Nogat. Baibel i tok, God Jehova yet, em “God I Gat Olgeta Strong,” em bai “bagarapim ol man i bin bagarapim graun.” (Revelesen 11:17, 18) Olsem na sapos yumi save Baibel i tok wanem long las de, ating dispela bai givim nupela tingting long yumi, na bai yumi amamas.

Wanem Samting Tru Bai Pinis?

Long wanpela pas aposel Pol i raitim long ol Tesalonaika, em i stori long las de. Em i tok: “God bai i mekim stretpela pasin olsem: Bai em i bekim hevi long ol man i save givim hevi long yupela. Na em i laik tekewe dispela hevi nau yupela i karim, . . . Bai em i mekim olsem long taim Bikpela Jisas wantaim olgeta strongpela ensel bilong en i lusim heven na i kamap ples klia wantaim bikpela paia. Long dispela taim bai em i bekim pe nogut long ol man i no save long God na i no bihainim gutnius bilong Bikpela bilong yumi Jisas. Ol dispela man bai ol i kisim pe nogut olsem: . . . bai ol i lus olgeta.”—2 Tesalonaika 1:6-10.

Olsem na pinis o las de i olsem taim Krais Jisas i kamap ples klia long taim bilong “bikpela hevi tru.” (Matyu 24:21) Wanpela buk (An Expository Dictionary of New Testament Words) i stori long insait bilong tok Grik apokaʹlypsis ol i tanim long tok Pisin olsem “revelesen” o “kamap ples klia.” Dispela buk i tok, dispela tok Grik i makim “Bikpela bilong yumi Krais Jisas taim em i kam bilong givim strafe bilong God long ol man nogut,” em taim bilong “Amagedon” o pait bilong “bikpela de bilong God I Gat Olgeta Strong,” olsem Baibel i kolim.—Revelesen 16:14, 16; 19:11-21.a

Tru Baibel i tok, long “las de” bai i gat “hevi,” na em taim bilong “bekim pe nogut” na taim bilong ‘kisim strafe.’ Tasol Baibel i tok tu, long las de ‘hevi bai tekewe’ long ol man i no gat asua na ol i bin karim hevi. Baibel, em Tok Bilong God, i tok promis long yumi, olsem: “I no longtaim na bai ol man nogut i lus olgeta.” (Sam 37:10) Olsem na long las de olgeta pasin nogut na man nogut bai pinis. Bikpela senis bai kamap na olgeta man i gat gutpela bel bai ol inap i stap nambawan tru. Olsem na ol i no ken pret long pinis o las de i laik kamap.

Taim las de i kamap i no olsem olgeta man bai pinis. Nogat. Las de em rot bilong stretim ol hevi bilong ol man. Olsem wanem? Yu wantaim famili bilong yu, yupela i laik i stap long nupela taim i gat stretpela pasin tasol i stap long en, na bai yupela inap i stap bel isi na amamas?

Tasol dispela las de Baibel i tok long en, tru em i klostu pinis nau? Sapos olsem, orait ating yumi inap save wanem taim tru bai em i kamap?

[Futnot]