Bilong Wanem Ol Man i Pret Long Apokalips?
LONG nius Time, wanpela man bilong raitim tok bilong lotu, em Damian Thompson, em i tok: ‘Inap planti yia, ol man i bihainim bilip fandamental ol i bin tokaut olsem, klostu nau wanpela kain bikpela hevi bai painim olgeta lain man. Nau ol i kirap nogut, long wanem, ol man i wok long kompyuta, na ol bikpela bisnisman, na ol lain politik, em bipo ol i no bilip tumas long ol dispela stori na ol i bin tok bilas long en, ol yet i tokaut long ol dispela stori.’ Em i tok, ol man i pret olsem long yia 2000 bai olgeta kompyuta i no inap wok, olsem na ‘ol man em bipo ol i bin tingting tasol long ol samting bilong graun, nau ol i tingim Taim Bilong Wan Tausen Yia bai kirap. Ol i pret ol bikpela hevi bai kamap olsem planti planti man tru bai pret na longlong nabaut, na ol gavman bai i no inap wok, na bikpela pait bai kamap bilong kisim kaikai, na ol balus bai paul na bam long ol haus i go antap tru.’
Na tu, narapela samting i save mekim ol man i tingting planti, em wok bilong sampela liklik lain lotu, em sampela taim ol i kolim ol olsem “lain apokalips.” Long Janueri 1999, stori bilong wanpela nius bilong Frans i gat het-tok olsem: “Jerusalem na Ol Krai Bilong Apokalips.” Nius i tok: ‘Ol lain sekyuriti bilong Israel ol i tok inap olsem 100 manmeri ol i sindaun long maunten Oliv o klostu long en, na ol i wetim kambek bilong Jisas o bagarap bilong dispela graun.’—Nius Le Figaro.
Wanpela buk (1998 Britannica Book of the Year) i kamapim wanpela bikpela ripot long ‘Ol Lain Bilong Bilip Long De Graun Bai Bagarap.’ Ripot i stori long ol liklik lain bilong lotu em ol i save bagarapim skin bilong ol yet, olsem lain Dua Bilong Heven, na Tempel Bilong Ol Man, na Lain Bilong Tempel Sola, na Aum Sinriko (Bikpela Tok Tru). Long 1995, dispela lain Aum Sinriko i bin tromoi ges nogut long ples bilong ol tren long Tokyo, na ges i kilim i dai 12-pela manmeri na planti tausen ol i kisim sik long en. Wanpela profesa bilong lotu long Yunivesiti Bilong Sikago, em Martin E. Marty, em i stori long dispela ripot olsem: ‘Taim kalenda i kamap long yia 2000, ating dispela bai kirapim ol man long tokaut long kain kain tok profet na kamapim sampela nupela lain. Sampela inap kamap ol lain nogut bilong bagarapim ol man. Nogut yumi no tingim dispela taim.’
Ol Stori Long Apokalips Ol Man i Pret Long En
Apokalips, o Kamapim Tok Hait, em nem bilong laspela buk bilong Baibel em Jon i bin raitim klostu long yia 100 C.E. Planti tok profet na tok piksa i pulap long dispela buk, olsem na dispela tok “apokalips” em i wanpela tok bihain ol i kirap long kolim long sampela kain buk ol i bin raitim paslain tru long taim Jon i bin raitim Buk Kamapim Tok Hait long Baibel. Ol tok piksa long ol stori nating bilong ol dispela buk i bin kirap long Persia bilong bipo na paslain long dispela taim. Olsem na wanpela buk (The Jewish Encyclopedia) i tok, ‘planti bilong ol dispela stori nating ol i bin kamapim long ol dispela buk Juda ol i kolim apokalips, i kamapim klia olsem Babilon i as bilong en.’
Inap 200 yia samting paslain long Krais i go inap long yia 200 C.E., i gat planti buk apokalips bilong ol Juda. Wanpela saveman bilong Baibel em i kamapim as na ol i bin raitim ol dispela buk, em i tok: ‘Ol Juda i bin brukim taim i go long tupela hap. Wanpela em taim bilong nau i gat pasin nogut tasol long en. Olsem na ol Juda i bin wetim pinis bilong ol samting bilong dispela taim. Na narapela em taim bai kamap bihain i gat gutpela pasin tasol long en, em gutpela taim bilong God i gat bel isi i stap long en, na gutpela sindaun, na stretpela pasin. Olsem wanem dispela taim bilong nau bai senis na kamap olsem dispela taim bilong bihain? Ol Juda i bilip olsem dispela senis i no inap kamap long rot bilong wanpela lain bilong graun, olsem na ol i wetim God i kamapim dispela senis. Dispela de God bai kam, ol i bin kolim De Bilong Bikpela, na em taim bilong bikpela pret tru, na bagarap, na taim bilong kot. Dispela ol hevi i olsem mak bilong nupela taim i kamap. Olgeta buk apokalips bilong ol Juda i toktok long ol dispela samting.’
I Stret Ol i Pret Long Apokalips?
Buk Kamapim Tok Hait long Baibel i stori long “pait long dispela bikpela de bilong God I Gat Olgeta Strong,” o Armagedon. Dispela pait bai i bagarapim ol man nogut, na bihain i gat wanpela taim bai kirap, i gat wan tausen yia bilong en. Long dispela taim ol bai tromoi Satan long hul i no gat as na Krais bai skelim ol man long kot. (KTH 16:14, 16; 20:1-4) Namel long ol yia olsem 500 i go inap 1500 C.E., sampela man i kisim tingting kranki long ol dispela tok profet, long wanem, “Santu” Ogastin bilong lotu Katolik (354-430 C.E.), em i bin tok olsem Taim Bilong Wan Tausen Yia i bin kirap taim mama i karim Krais, na bihain long en Laspela Kot bai kamap. I olsem Ogastin i no bin tingting tumas long dispela hap taim, tasol taim yia 1000 i laik kamap, ol man i pret moa. Ol saveman i no wanbel olsem planti man i bin pret long dispela apokalips bilong bipo, o nogat. Tasol maski planti man i pret o nogat, i no gat as na ol i pret.
Na i wankain tu long nau, ol lotu na ol bisnis samting i pret olsem yia 2000 o 2001 bai kamapim bikpela bagarap i nogut tru. Olsem wanem? I stret ol i pret? Na tok bilong Buk Kamapim Tok Hait long Baibel, em i samting yumi mas pret long en o samting yumi mas wetim? Plis kaunim stori i kamap bihain long dispela.
[Piksa long pes 4]
Long bipo yet, pret bilong ol man long Apokalips i no gat as bilong en
[Kredit Lain]
© Cliché Bibliothèque Nationale de France, Paris
[Piksa Kredit Lain long pes 3]
Maya/Sipa Press