Tingting Bilong Pop long Las De
LONG yia 1984 tupela man i bin raitim wanpela buk i stori long wok politik bilong ol pop na tupela i kolim dispela buk Averting Armageddon (long tok Pisin i olsem Bilong Pasim Amagedon). Inap 17 yia pinis dispela tupela man, em Gordon Thomas na Max Morgan-Witts, ol i bin raitim stori long wok bilong ol pop. Sapos yumi skelim sampela tok ol i bin raitim, yumi inap save long tingting bilong ol bikpela man bilong Misin Katolik long las de.
Dispela tupela man i stori long sekreteri bilong Pop John Paul Namba 2, em Monsino Emery Kabongo, na tupela i tok, Kabongo i tok: ‘Pop em i olsem wanpela strongpela man bilong spirit, em i wok strong long pasim ol bikpela gavman bambai ol i no ken pait. Em i laik pasim pait nuklia bilong Amagedon.’
Ol bikpela man bilong misin i tingting planti, nogut ol wok ol man i mekim i bagarapim dispela graun na olgeta man i stap long en. Ol i no tingim pait bilong God, em Baibel i stori long en, em dispela pait bai pinisim ol man nogut tasol. Olsem na buk bilong dispela tupela man i tok:’Ol man i wok wantaim Kabongo, long skin i olsem ol i no pret o wok long pasim pait bilong Amagedon. Tasol ol i tingting planti long ol tok i bin kamap long bikpela bung bilong Kaunsil Bilong Ol Bisop, em ol i tok i no stret “ol lain man i mekim pasin birua, na bagarapim man, na mekim pretim ol man, na i no stret ol i bungim planti samting bilong pait, olsem ol gan samting na ol bom nogut bilong nuklia, na narapela lain i baim samting bilong pait i go long narapela lain.”’ Em, ol i tingting planti long dispela samting, olsem ol lain man i redi long pait, na pop tu i tingting long dispela samting. Thomas na Morgan-Witts i tok, pop i holim planti buk i stori long ol samting ol lain man i mekim bilong redi long pait (olsem International Defense Review na The Problems of Military Readiness na Surprise Attack: Lessons for Defense Planning). Tupela i tok moa olsem:
‘Long rum stadi bilong pop, klostu long ol pas i kolim ol tu bilong misin, i gat ol buk i stap, em ol i stori long samting pop i gat bikpela tingting long en long nau, em olsem: Baibel i tok i gat sampela samting bai kamap long pinis bilong wanpela taim na bihain bai God i kamapim kingdom bilong em long graun. John Paul i bilip strong olsem ․․․ paslain long yia 2,000 samting bai wanpela bikpela hevi i kamap, ating wanpela bikpela sik em bai kilim i dai planti man? o bai i no gat ren, no gat tru? o bai bikpela hangre tru i kamap long olgeta hap? o bai bikpela pait nuklia i kirap? Nau em i gat bikpela tingting long pait nuklia bai kamap. Planti taim em i tingting olsem: Ating mi kisim wok olsem het bilong Sios long las taim; liklik taim bai ol bom nuklia i mekim na bai graun i paia na pinis.’
Dispela buk i stori tu long wanpela “klok” ol saveman bilong saiens i bin putim bilong makim pinis o las de i klostu olsem wanem. Wanpela nius bilong ol saveman bilong saiens (Bulletin of the Atomic Scientists) i save stori long dispela “klok.” Taim ol i stori long dispela “klok” long pastaim, olsem long Desemba 1947, ol i putim han bilong klok i longwe long 12 klok inap 7-pela minit bilong makim yumi stap klostu olsem wanem long pait nuklia bilong Amagedon. Long yia 1972, taim sampela lain i pasim tok long ol i no ken hipim planti samting bilong pait (SALT), ol i surikim han bilong dispela “klok” i go bek liklik na i stap longwe long 12 klok inap 12-pela minit. Tasol long yia 1984, Thomas na Morgan-Witts i tok: ‘Nau han bilong dispela klok i stap klostu long 12 klok; i gat 3-pela minit moa tasol. Insait long 30 yia i go pinis i no gat wanpela taim klok i bin makim olsem pinis o las de i klostu tru olsem.’
Maski ol wok pop i mekim bilong pasim pait nuklia bilong Amagedon, tasol long Novemba long yia 1985 han bilong dispela “klok” i stap klostu yet long 12 klok. Tasol yumi no ken tingting planti olsem ol lain man bai bagarapim dispela graun na olgeta man i stap long en o nogat. Yumi mas tingim dispela “las de” em Baibel i tok bai “traim olgeta manmeri long olgeta graun,” na yumi mas wok long kisim save long rot God i makim bilong abrusim bagarap long dispela taim.—Revelesen 3:10.