Yumi Mas Mekim Wanem na Bai Jehova i “Laikim Olgeta Pasin” Bilong Yumi?

LONG NAU wan wan man tasol i laik bai tingting na ol tok na pasin bilong ol i gutpela long ai bilong God. Na sampela ol i tok ol i laik mekim pasin God i laikim, tasol ol i maus nating tasol. Tru tumas, long nau planti man “i save sakim pasin God i laikim”1 Tesalonaika 2:15.

Sampela man i tok ol i Kristen ol i ting sapos ol i was gut na ol i no kalapim ol Tenpela Lo, orait ol i mekim pasin God i laikim. Tasol i no olsem! Man bilong makim pasin yumi mas bihainim, em Krais Jisas, em i tok long God, olsem: “Oltaim mi save mekim ol samting em i laikim.” (Jon 8:29) Yes, em i mekim sampela samting na long dispela rot em i mekim pasin Papa bilong em i laikim. Yumi mas mekim wok. Yumi ken save long dispela samting sapos yumi kaunim beten aposel Pol i mekim bilong helpim ol wanlotu bilong em long Kolosi. Em i beten askim God long helpim ol bambai ol inap “wokabaut olsem man tru bilong [Jehova], na bai em i laikim olgeta pasin bilong [ol]. Na bai [ol] i mekim planti kain gutpela wok.”—Kolosi 1:9, 10.

Tasol tru yumi inap wokabaut stret na bai Jehova i “laikim olgeta pasin” bilong yumi? Long nau yumi ol Kristen yumi gat sin na yumi no inap wokabaut stret olgeta. Tasol yumi ken wok strong long mekim. Oltaim yumi ken tingting long mekim olgeta pasin God i laikim. Pol i tok, ol Kristen i mas “mekim planti kain gutpela wok,” olsem na yumi save i gat sampela wok yumi mas mekim. Mipela i no ken kolim olgeta dispela wok hia, tasol mipela laik kolim sampela samting yumi mas mekim, na bai dispela i kirapim tingting bilong yu na sapos yu mas stretim sampela pasin yu mekim, orait yu ken save Jehova bai blesim ol wok yu mekim bilong bihainim ol pasin Em i laikim. Tru tumas, yumi mas was gut long ol tingting na toktok na pasin bilong yumi bambai Jehova i ken “laikim olgeta pasin” bilong yumi.

Olsem Wanem long Tingting Bilong Yumi?

Baibel, em Tok Bilong God, i tok, “i no gat wanpela samting God i bin wokim na em inap hait long pes bilong em. Nogat. Olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.” (Hibru 4:13) Ol man na ol spirit nogut ol i no inap save long tingting i stap long bel bilong yumi, tasol God i save. Olsem na yumi mas was gut long tingting bilong yumi bambai God i ken laikim olgeta tingting bilong yumi, a? Gutpela sapos yumi givim askim long skin bilong yumi yet, olsem: Taim mi no putim tingting long wanpela wok mi mekim, mi save tingting long wanem samting? Olgeta taim tingting bilong mi i save go long wanem samting?

Na yumi ken askim olsem: Mi save tingting nating olsem driman long kisim bikpela mani kago o bikpela nem? 0 mi bel nogut i stap na tingim tingim ol rong narapela man i bin mekim long mi? 0 oltaim mi tingting long ol amamas bilong maritpasin? 0 oltaim mi wok long tingim rot bilong kamap maniman?

Sapos ol kain tingting olsem i pulap long tingting bilong yumi, yu ting God i ken ‘laikim olgeta tingting’ bilong yumi? Nogat, a? Olsem na yumi mas beten strong na askim God long helpim yumi na yumi mas rausim ol dispela kain tingting; yumi mas wok long tingim ol pasin i gutpela, na i stret, na i klin. Dispela kain tingting i mas pulap long tingting bilong yumi. (Filipai 4:8) Gutpela sapos yumi bosim gut tingting bilong yumi na yumi tingim tasol ol samting bilong lotuim Jehova! Tingim Kingdom bilong Em i klostu pinis. Tingim sampela gutpela tok bilong Baibel nau tasol yu bin kisim save long en. Tingim sampela tok i laik kamap long ol miting. Tingim gut ol tok yu mas mekim long ol miting sapos yu insait long sampela soim samting. Tingting tu long ol samting yu ken mekim bambai yu inap autim gut tok. Yu no ken lusim tingting long namba wan samting, em olsem: Yu wanpela wokman bilong God.

Wanpela samting i bin helpim sampela Kristen, em olsem: Ol i wok long tingim sampela tok bilong Baibel ol i holim long tingting, o ol i mekim sampela singsing bilong Kingdom. Bilong helpim em long tingting gut, wanpela wokman Kristen i tingim liklik tok olsem:

“O God, helpim mi long bihainim

Pasin yu orait long en.

Mi no laik liklik long bikhet,

long wanem pasin bilong yu i stret.”

Tru tumas, yumi mas wok long mekim beten wankain olsem bilong King Devit bipo, em i tok: “Bikpela, ․․․ Mi laik bai ․․․ tingting bilong mi i ken i orait long ai bilong yu.”—Sam 19:14.

Olsem Wanem long Ol Tok Bilong Yumi?

Na taim Devit i beten em i tok tu, olsem: “Mi laik bai tok bilong mi ․․․ i ken i orait long ai bilong yu.” (Sam 19:14) Tok bilong Jems 3:2-12 i laikim yumi olsem: Man i gutpela olgeta em tasol inap bosim gut tru maus bilong em. Tasol yumi mas wok strong long bosim maus bilong yumi bambai Jehova i ken ‘laikim olgeta toktok’ bilong yumi.

Long olgeta de yumi mekim planti tok long kain kain samting; yumi no inap toktok tasol long ol samting bilong Baibel. Tasol maski wanem samting yumi toktok long en, oltaim yumi mas tingting long mekim ol tok Jehova i ken laikim. Yumi no ken tru mekim tok swea o tok doti o tok nogut. Papa bilong yumi long heven i no ken laikim ol kain tok olsem. Olsem na ol dispela kain tok i no ken kamap liklik long maus bilong yumi.—Efesas 5:3, 4.

Na tu sapos yumi laik bai Man i bin wokim yumi em i ken amamas long ol tok yumi mekim, orait yumi no ken tok nogut long wanpela man o mekim tok baksait. Gutpela sapos ol man inap mekim tok long yumi, olsem: “Em i no save krungutim gutnem bilong narapela man, na i no save mekim nogut long ol pren, na i no save autim kain kain tok win long ol arapela man.” Maski ol man i mekim pasin i no stret long yumi, tasol yumi mas was gut na yumi “no ken tok nogut long wanpela man.”—Sam 15:3; Taitas 3:2.

Taim yumi kaikai wantaim ol narapela man rot i op bilong yumi ken mekim ol gutpela tok na bai Jehova i ‘laikim olgeta toktok’ bilong yumi! Taim bilong kaikai i no taim bilong mekim ol tok kros o tok i mekim nogut bel bilong narapela man. I gat planti gutpela samting yumi ken toktok wantaim ol man long en! Taim yumi go kaikai wantaim sampela man o yumi singautim sampela man i kam kaikai wantaim yumi, yumi mas mekim ol gutpela tok bilong strongim ol narapela man. Planti taim ol man bilong toktok ol i mekim planti tok na ol strongpela Kristen i no inap mekim. Olsem wanem? Yu singautim wanpela Kristen i kam kaikai wantaim yu, em i bin mekim wok painia inap planti yia pinis? O ating em i gat gutpela save long ol tok bilong God long Baibel? Orait, bihainim gutpela save na kirapim em long kamapim ol gutpela tingting bilong em. Dispela bai helpim olgeta manmeri i stap wantaim yu long dispela taim. Baibel i tok: “Tingting bilong man i olsem wanpela hul wara i daun moa. Tasol man i gat gutpela save, em inap pulim dispela tingting i kam antap.”—Provep 20:5.

Na tu, sapos yumi laik bai Jehova i ken orait long olgeta tok bilong yumi, yumi mas painim rot bilong autim tok long kain kain taim na ples na tokim ol man long nem na Kingdom bilong God. Ol wokman Kristen inap mekim gutpela wok long dispela rot. Tasol namba wan rot bilong mekim ol tok Jehova i ken laikim na bilong helpim ol narapela man, em olsem: Yumi mas i go long ol haus na autim tok bilong Kingdom.—Aposel 20:20.

Bilong Jehova i ken ‘laikim olgeta toktok’ yumi mekim taim yumi autim tok, yumi mas wok long autim gut tok. God i givim wok long yumi bilong autim “gutnius” bilong Em, na olsem Pol, taim yumi autim tok “i no bilong man i ken laikim wok bilong [yumi]. Nogat. Bilong God tasol i ken laikim.” Na yumi mas mekim wok long maus bilong yumi long taim bilong ol miting tu na autim bilip bilong yumi. Dispela bai kirapim ol narapela man long mekim pasin sori na ol gutpela wok.—1 Tesalonaika 2:4; Hibru 10:23-25.

Mekim Olgeta Pasin na Wok Jehova i Laikim

Bilong Jehova i ken “laikim olgeta pasin bilong yumi, yumi mas was gut long ol samting yumi mekim long olgeta de, ol samting yumi mekim bilong painim amamas tu. Tru tumas, long taim yumi painim amamas tu, yumi mas tingim God. Ating yu pilim olsem dispela i strongpela tok tumas? Tasol nogat, long wanem Pol i tok: “Sapos yupela i kaikai na dring, o yupela i mekim narapela samting, yupela mas mekim dispela olgeta samting bilong litimapim nem bilong God.” Olsem na taim yumi painim amamas tu, yumi mas painim gutpela amamas na mekim pasin God i laikim.—1 Korin 10:31; Rom 8:8.

Na yumi mas was gut long skel na taim bilong mekim. Bilong Jehova i ken “laikim olgeta pasin” yumi mekim, yumi no ken lusim bikpela hap taim tumas long painim amamas; yumi no ken tingim amamas i nambawan bikpela samting. Nogut yumi laik tumas long lukim televisen o i go lukim spot samting na yumi lusim ol miting Kristen o wok bilong autim tok.—Matyu 6:33.

Bilong Jehova i ken “laikim olgeta pasin” yumi mekim, yumi mas mekim gutpela pasin long ol brata Kristen bilong yumi, taim yumi gat rot o ol i sot long samting. Baibel i tok: “Yupela i no ken lusim tingting long mekim gutpela pasin long ol manmeri. Na samting i stap long yupela, em yupela i mas skelim hap long man i sot, bilong helpim em. God i laikim tumas dispela kain ofa.” Aposel Pol i tok, gutpela pasin ol Kristen long Filipai i mekim long em, dispela “i olsem ofa i gat gutpela smel, na [ol] i givim long God. God i save kisim kain ofa olsem, na bel bilong en i gutpela.”—Hibru 13:16; Filipai 4:18.

Ol pikinini i mas mekim wanem na bai Jehova i “laikim olgeta pasin” bilong ol? Pol i kolim bikpela samting ol i mas mekim, em olsem: Ol i mas bihainim tok bilong papamama “long nem bilong Bikpela.” Pol i tok tu: “Yupela pikinini, yupela i mas bihainim tok bilong papamama bilong yupela long olgeta samting. Bikpela em i laikim pasin olsem.”—Efesas 6:1-3; Kolosi 3:20.

Olgeta wokboi bilong God ol i dediket pinis, ol i bin kisim planti blesing long Jehova na long oganaisesen bilong em, olsem na ol i laikim tumas Em na ol i laik tenkyu long em. Dispela samting i kirapim ol long tingting oltaim long mekim olgeta pasin Jehova i laikim. Tru tumas, sapos yumi pilim tru ol gutpela samting God i bin mekim bilong helpim yumi na yumi laikim tumas Em na yumi laik tenkyu long em, orait “nogut [yumi] lusim nating marimari bilong em.” (2 Korin 6:1) Na tu i stret yumi mas tingting oltaim long mekim olgeta pasin Jehova i laikim, long wanem em i Nambawan Bikpela King bilong heven na graun. Na sapos yumi mekim olgeta pasin Jehova i laikim, yumi mekim savepasin, long wanem dispela inap helpim yumi long nau na em inap helpim yumi long kisim laip i stap oltaim long bihain.—1 Timoti 4:8.

Olsem na yumi laik was gut long.olgeta tingting na toktok na pasin na wok bilong yumi. Na sapos Jehova i helpim yumi bai yumi inap mekim olsem na mekim olgeta pasin Em i laikim. Yumi no ken les long mekim. Yumi mas bihainim gutpela tok Pol i givim long ol Kristen long Tesalonaika, em i tok: “Orait, ol brata, nau mipela i tok strong moa yet long yupela long nem bilong Bikpela Jisas. Mipela i bin soim yupela olgeta pasin yupela i mas wokabaut long en bilong bihainim laik bilong God. Nau Yupela i save bihainim dispela pasin. Tasol yupela i mas mekim moa yet.”—1 Tesalonaika 4:1.

[Piksa long pes 26]

No ken larim amamas i pasim yu long mekim wok Kristen