Ol Taim na Ol De Jehova i Makim Bilong Nau
“Olgeta diwai i no save karim gutpela kaikai, em ol i save katim na tromoi long paia.”—MATYU 7:19.
1. Yumi tingim ol samting Jehova i bin mekim long ol bikpela man bilong bipo na nau yumi save long wanem samting?
YUMI tingim ol samting i bin kamap bipo na yumi save Jehova inap “senisim ol taim, na em i save rausim ol king na putim ol man i stap king.” (Danyel 2: 21, NW) Bipo, em i laik kamapim laik bilong em na em i daunim Fero, na Nebukatnesa, na Belsasa, na Herot Agripa Namba Wan, na sampela moa. Tasol ating sampela man bai tok: ‘Ol dispela samting i samting bilong bipo. Bilong wanem yumi mas tingim long nau?’ Tasol ol dispela samting i bin kamap long bipo em inap lainim yumi. Ol dispela samting i givim save long yumi, olsem: Jehova inap senisim ol taim na ol de bilong ol hetman bilong graun; em inap “rausim” ol king long taim stret olsem em i makim pinis.
2. Long nau em taim bilong Jehova i mekim wanem?
2 Nau long taim bilong yumi, em taim bilong Jehova i “rausim ol king na putim ol man i stap king.” God i “putim” pinis King bilong em, na liklik taim God bai rausim olgeta bikpela bos bilong dispela graun na rausim olgeta pasin bilong graun ol i bin bosim. Bilong wanem God i laik rausim ol? Long wanem, God i bin skelim ol, olsem em i mekim long Belsasa bilong Babilon long bipo, na ol i “sot long stretpela pasin.” God ‘i makim pinis hamas de kingdom bilong ol i ken i stap na nau em i laik pinisim.’ (Danyel 5:26, 27) Olsem na nau long taim bilong yumi Jehova bai belhat na em bai “pait wantaim ol king nabaut na bai em i winim pait na daunim ol tru. Em bai i bekim rong bilong ol lain manmeri.”—Sam 110:5, 6.
“Sot long Stretpela Pasin”
3, 4. Long nau, olsem wanem ol hetman bilong graun i “sot” long kamapim bel isi na gutaim?
3 Ol dispela hetman bilong graun i sot long wanem ol stretpela pasin? Ol i gat bikpela asua long ol samting nogut i bin painim ol man long taim bilong yumi, olsem: Bihain long yia 1914 inap wan handet milion manmeri i bin i dai long ol pait! Na long nau ol man i wokim ol bom nogut bilong nuklia na ol inap bagarapim olgeta man meri pikinini long graun. Ol gavman i redim pinis planti tausen roketbom na ol man i sambai na i redi long pairapim na sutim i go long ol bikpela taun i gat planti milion manmeri ol i sindaun long en.
4 Wanpela nius (Science) i tok, ‘Sapos bikpela pait i kirap na ol man i tromoi ol bom nuklia, dispela bai bagarapim klostu olgeta diwai sayor samting na ol animal. Na bai ol manmeri tu ol i bagarap.’ Wanpela bikman long Yurop em i tok, ‘Sapos pait nuklia i kamap i no ol biktaun tasol bilong kantri bai bagarap; nogat; kantri olgeta bai bagarap.’ Presiden bilong wanpela kantri long Latin Amerika i stori long ol samting ol man i mekim bilong lukautim kantri bilong ol na em i tok: ‘I olsem olgeta man i stap long wanpela sip i no strong tumas na i laik pas long rip ․․․ Sapos em i bagarap bai olgeta man i bagarap wantaim.’ Na wanpela nius bilong Japan i tok: ‘Long dispela taim pasin bilong i stap isi na sindaun gut wantaim, dispela pasin i stap longwe moa long yumi, winim olgeta taim bipo.’
5, 6. Ol lain bilong planti kantri ol i stap olsem wanem long kaikai samting?
5 Tasol ol lain man i wok yet long hipim planti samting bilong pait. Ol i tromoi bikpela mani tru (inap olsem 3 trilion kina) long olgeta yia long dispela samting! Wanpela bikman i tok, sapos yumi skelim mani ol i tromoi i olsem ol i tromoi bikpela mani tru long olgeta wan wan soldia, na ol i tromoi liklik mani tasol bilong helpim ol pikinini ol i go long skul. Wanpela ripot bilong Yunaitet Nesen i tok inap 450 milion manmeri ol i hangre, na oltaim dispela lain i wok long kamap bikpela moa. Ol i tok long Afrika na Esia long olgeta yia inap olsem 30 o 40 milion manmeri i lus olgeta long kaikai na ol i dai. Inap hap bilong dispela lain ol i liklik pikinini i no winim yet 5-pela krismas.
6 Wanpela bikman bilong wanpela bikpela kantri long Saut Amerika i tok: ‘Ol manmeri i wok mani, sapos yumi brukim ol i kamap tupela lain, wanpela lain ol i stap rabis tru.’ Na long narapela kantri planti man tru (inap 51 pesen) ol i no gat wok. Wanpela ripot i tok, ‘Inap 260 milion manmeri i stap long dispela hap na bikpela hevi tru i painim ol long nau.’ Na tripela nius bilong narapela narapela kantri i tokaut olsem planti man tru ol i stap rabis. (Het-tok bilong ol dispela nius i olsem: ‘Pasin Rabis i Kamap Bikpela,’ ‘Planti Man Moa Ol i Stap Rabis,’ ‘I Stap Rabis—Em Bikpela Hevi.’) Olsem wanem? Ol dispela ripot i kam long ol kantri i stap rabis na i no gat planti wok bisnis long en? Nogat. Dispela tripela nius i bilong Kanada na Amerika na Jemani. Olsem na dispela hevi i kamap tu long ol kantri i gat gutpela sindaun na planti wok bisnis long en.
7. Wanem sampela ol pasin nogut nau i stap?
7 Taim planti man i stap rabis, dispela i kamapim ol narapela hevi, olsem: Planti man i kamap raskol na ol i stil na pait na bagarapim man na mekim pretim ol man. Wanpela lain bilong Amerika (Federal Centers for Disease Control) i tok, long olgeta yia birua i painim planti man long Amerika o ol i kilim i dai skin bilong ol yet na inap olsem 50,000 ol i dai! Olsem na wanpela taim edita bilong wanpela nius bilong Nu Yok (The New York Times) i tok: ‘Gavman i no gat strong moa.’ Na narapela taim dispela edita i tok: ‘Long olgeta hap ol man i mekim nabaut long laik bilong ol yet tasol.’ Inap planti handet yia pinis ol man i bin mekim ol wok na kisim save na ol inap wokim kain kain masin samting, tasol ol gavman bilong graun ol i no inap helpim lain bilong ol long kisim ol samting ol i mas kisim bilong i stap laip.
8. Ol samting i bin kamap long bipo na long nau i kamapim long ples klia wanem samting?
8 Ol samting i bin kamap long bipo na long nau i kamapim long ples klia olsem ol man yet i no inap painim rot bilong stretim ol hevi. Ol hetman bilong wok politik na wok bisnis na lotu ol i no inap tru long helpim ol man bambai ol i ken sindaun gut wantaim na i stap wanbel na i stap amamas oltaim. Olsem na pasin bilong dispela graun i mas pinis! Na em bai pinis, long wanem em laik bilong Jehova. Baibel i tok: “Akis i stap pinis long as bilong diwai. Olgeta diwai i no save karim gutpela kaikai, em bai ol i katim na tromoi i go long paia”—Luk 3:9.
Na Ol i Gat Narapela Rong
9. Ol hetman bilong graun ol i ting olsem wanem long ol samting God i laik mekim?
9 Kaikai nogut ol lain bilong dispela graun na ol hetman bilong en i bin kamapim, em wanpela samting i mekim na Jehova i lukim ol i sot long stretpela pasin na ol i mas pinis. Na ol i gat narapela rong tu, em olsem: Ol hetman bilong dispela graun ol i bin givim baksait long Jehova, em Man bilong wokim olgeta samting na em i Nambawan Bikpela King bilong heven na graun. Ol i tingim ol samting ol yet i laik mekim na ol i no tingting liklik long ol samting God i laik mekim. Ol i no tingim laik bilong em o ol taim na ol de em i bin makim. Olsem na 1 Korin sapta 2 ves 8 i tok stret olsem: “I no gat wanpela hetman bilong dispela graun em i bin save as bilong dispela tok.” Na Sam 146:3 i tok: “Ol king na ol man bilong graun i no inap kisim bek yu. Olsem na nogut yu bilip long ol.”
10, 11. (a) Man i mas mekim wanem na bai em i ken save long Jehova? (b) Olsem wanem lain bilong Jehova inap save, long sampela samting na ol narapela man i no save long en?
10 Provep 3 ves 5 na 6 i tok, “Yu mas bilip strong long [Jehova]. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na bai em i soim yu stretpela rot long bihainim.” Ol manmeri bilong dispela graun i stap olsem long tudak, ol i no gat save na i no gat wanpela gutpela samting ol i ken wetim i kamap. Tasol ol man i bilip strong long Jehova ol i no stap olsem. Spirit bilong Jehova i givim save long ol na ol i save long ol samting Em i laik mekim na ol taim na ol de em i makim bilong helpim ol. Aposel 5:32 i tok, Jehova i save givim spirit holi bilong em long ol man i “bihainim tok bilong em.”
11 Olsem na ol wokboi bilong God i save long sampela samting ol hetman bilong graun ol i no save long en. Ol i save long ol samting Jehova i laik mekim na long ol taim na ol de em i makim bilong helpim ol. Namba Wan Pas Pita I Raitim sapta 1 ves 11 i tok, spirit holi i stap long ol wokboi bilong Jehova bipo na ol i wok long askim olsem: “Wanem taim bai em i kam?” Na “Wanem samting bai i kamap long dispela taim?” Spirit bilong God i givim save long ol long dispela. Olsem Pol i tok: “Yupela i save pinis long dispela taim nau yumi stap long en.” (Rom 13:11) Ol wokboi bilong Jehova long nau ol i save bihainim tok bilong em. Olsem na spirit holi bilong God i givim save long ol na ol i save, dispela taim nau em wanem taim long ai bilong God. Emos 3:7 (NW) i tok: “Taim Nambawan Bikpela King Jehova i laik mekim wanpela samting, pastaim em i save tokaut long ol boi bilong em, em ol profet.”
Na Ol i Gat Narapela Rong Tu
12, 13. Jehova i tingim wanem narapela rong bilong ol man bilong dispela graun na ol hetman bilong ol?
12 I gat narapela samting tu na Jehova i lukim ol hetman bilong dispela graun i sot long stretpela pasin na em i mas bagarapim ol. Ol hetman bilong bipo, olsem Fero na Belsasa na Herot, ol i bin mekim wanem? Ol i birua long ol wokboi bilong Jehova na mekim nogut long ol na kilim sampela i dai. Olsem na ol i gat asua long ai bilong Jehova.
13 Na i wankain tu long nau. Planti hetman bilong dispela graun ol i bin mekim nogut long ol wokboi bilong Jehova na kilim sampela i dai. Ol dispela hetman i “toknogutim Nambawan Bikpela, na ․․․ putim hevi long ol manmeri bilong Nambawan Bikpela.” (Danyel 7:25, NW; 11:36) Tasol Aisaia 54:17 (NW) i tok: “Olgeta samting ol man i mekim bilong daunim yupela, ol dispela samting bai lus nating.” Olsem na God bai daunim olgeta birua olsem em i bin daunim Fero na Nebukatnesa na Belsasa na Herot long bipo. Tasol bai em i lukautim lain bilong em na ol i no ken bagarap; bai ol i stap gutpela.
Taim Bilong Pinis i Klostu
14, 15. (a) Nau yumi stap long wanem taim? (b) Maski ol samting ol hetman i laik mekim, tasol wanem samting liklik taim bai kamap?
14 Orait, dispela taim nau em wanem taim long ai bilong God? Em taim bilong pinis bilong pasin bilong dispela graun. I olsem san bilong dispela pasin i laik go daun. Taim bilong tudak na taim bilong kol i klostu. Olgeta samting i truim tok profet bilong Baibel na ol taim na ol de God i bin makim, dispela i kamapim long ples klia olsem yumi stap long “las taim.” (2 Timoti 3:1-5; Matyu 24:3-14) Olsem na yumi mas tingim gut toksave bilong Jisas, em i tok: “Yupela i mas beten, bai yupela i no mas ranawe long taim bilong kol.” (Matyu 24:20) I no longtaim na bai taim bilong bikpela hevi tru i kamap na bai i no gat taim moa bilong mekim ol samting bambai God i ken belgut long yumi.
15 Taim bilong pinisim ol man i bagarapim nem bilong God, dispela taim i kam klostu hariap. Long dispela taim bai God i rausim olgeta hetman bilong dispela graun. Ol samting ol i tingting long mekim na i no inap kamap gutpela, ol dispela samting bai pinis. Tru, ating bai ol i wok long mekim gut bel bilong ol man, olsem ating bai ol i sainim sampela pepa na pasim tok long lusim ol samting bilong pait bambai ‘gutaim’ i ken kamap; na bai ol i makim sampela yia i olsem “yia holi.” Tasol dispela samting i no ken helpim ol. Amagedon i wok long i kam klostu na i no gat wanpela samting inap pasim.—Revelesen 16:13-16.
16. Wok bilong bosim graun, Jehova i givim dispela wok long husat?
16 Yu tingim tok bilong Danyel 2:21? Dispela ves i tok, Jehova i save “rausim” ol king na ‘putim man i stap king.’ Ol ami bilong Jehova long heven bai givim strafe bilong em long ol man nogut long Amagedon, na dispela Man em i bin putim em i stap King, em bai bosim ol. Dispela Man em Pikinini bilong em Krais Jisas, nau em i kisim pinis biknem na bikpela namba long heven. Revelesen 19:16 i kolim Jisas olsem “King bilong olgeta king, na Bikpela bilong olgeta bikpela man.” Danyel 7:14 (NW) i tok, God i givim “wok king na biknem na kingdom long em, na olgeta lain manmeri na ol kain kain tok ples bai ol i mekim wok bilong em. Em bai i stap king inap long taim bihain bihain; wok king bilong em i no ken pinis. Na kingdom bilong em i no ken bagarap.”—Lukim tu Danyel 2:44.
17, 18. (a) Baibel i kolim wanem samting bai painim ol man i no laik aninit long God na dispela Man em God i makim bilong bosim graun? (b) Husat moa i save, taim i sot pinis?
17 Baibel i kolim klia strafe bilong ol man i no laik daun long Jehova na long dispela Man em i putim em i stap King. Baibel i tok: “Mi lukim wanpela ensel i sanap long ai bilong san. Em i singaut strong long olgeta pisin i flai antap long skai, na em i tok, ‘Yupela i kam bung long dispela bikpela kaikai bilong God! Bai yupela i ken kaikai mit bilong bodi bilong ol king, na mit bilong ol kepten bilong ol soldia, na mit bilong ol strongpela man, na mit bilong ol hos wantaim ol man i sindaun long hos. Bai yupela i kaikai mit bilong bodi bilong olgeta man, ol man i stap fri wantaim ol man i wok slev, na ol man nating wantaim ol man i gat nem.”—Revelesen 19:17, 18.
18 Jeremaia 25:33 (NW) i stori long dispela samting na i tok: “Na long dispela taim, ol man Jehova i kisim ol i dai pinis, skin bilong ol bai stap nabaut long olgeta hap bilong graun. I no gat sampela man bai krai long ol, na ol man i no ken bungim skin bilong ol o planim ol. Ol bai stap olsem pekpek long graun.” Tru tumas, i no gat bikpela hap taim moa bilong Seten na dispela pasin nogut em i bin kamapim long graun. Na em i save long dispela samting! Revelesen 12:12 i tok, em i save “em i gat sotpela taim tasol.”
Painim Jehova Nau
19. Taim olpela pasin i pinis, wanem gutpela taim bai kamap?
19 Taim “bikpela hevi tru” i pinisim pinis olgeta pasin Seten i bin kamapim, orait bihain bai wanem samting i kamap? Nupela Taim bilong Jehova bai kamap. Kingdom bilong heven long han bilong Krais bai bosim graun na bai gutpela stretpela pasin i kamap. Long dispela Nupela Taim pasin nogut na pait na pasin i no stret na pen na hevi na sik bai i pinis, na bai ol man i no i dai moa. Skin na tingting bilong olgeta man bai kamap nambawan olgeta. Gutpela taim tru bai kamap!—Sam 37:10, 11, 29; Revelesen 21:4.
20, 21. Long nau, planti man i mekim wanem bilong painim Jehova?
20 Tasol taim olpela pasin i no pinis yet na Nupela Taim i no kamap yet, nau em i taim bilong Jehova i mekim bikpela wok bilong helpim ol man i gat pasin daun. Nau em i taim bilong Em bilong bungim ol man ol i laik kisim save long em, na ol i laik bihainim tok bilong em, na ol i laik daun long dispela Man em i bin putim em i stap King. Ol i mekim olsem na Jehova i lukautim ol. Jehova i olsem “wanpela strongpela haus. Ol stretpela man i ken ran i go long en na stap gut.”—Provep 18:10.
21 Long nau bikpela lain manmeri ol i mekim olsem—ol inap olsem planti milion. Na ol i bilong olgeta lain bilong graun. Sekaraia sapta 8 ves 20 na 21 (NW) i stori long ol dispela manmeri, olsem: “Bihain planti man na ol man bilong planti taun bai ol i kam; na ol man bilong narapela taun bai tokim ol man bilong narapela taun, olsem: ‘Kam, yumi go askim Jehova long helpim yumi; yumi go painim Jehova.”’ Na ves 23 i tok: “Long dispela taim bihain [olsem long taim bilong yumi] tenpela man bilong olgeta tok ples ol bai holim lap lap bilong wanpela Juda [em ol manmeri spirit holi i bin makim ol na ol i litimapim nem bilong Jehova], na ol bai tok: ‘Mipela bai go wantaim yupela, long wanem, mipela harim ol i tok God i stap wantaim yupela.”’
22. Yumi mas save long wanem samting na bai yumi no ken bagarap long taim Jehova bai kamapim kros bilong em? Na yumi mas mekim wanem?
22 Olsem na yu mas bung wantaim lain bilong Jehova na lotuim Em na bai yu inap i stap gut. Yu mas insait long nambawan bikpela wok bilong nau, em wok bilong bungim na lainim ol manmeri ol bai abrusim bagarap long Amagedon na i stap oltaim long paradais long graun. Tingim gut dispela taim God em bin makim long nau na bihainim tok bilong Aisaia 55:6 (NW) i tok: “Yupela ol manmeri, taim yupela inap painim yet Jehova, yupela i mas wok yet long painim em! Singaut long em taim em i stap klostu yet.” Yes “painim Jehova, yupela ol man bilong graun i gat pasin daun na i save bihainim tok bilong em. Bihainim stretpela pasin na pasin daun. Na olsem ating bai yupela i gat ples hait long de bilong kros bilong Jehova.”—Sefanaia 2:3, NW.
Sampela Askim Bilong Helpim Yumi long Tingim Ol Tok
◻ Ol hetman bilong graun i bin mekim wanem ol samting na long ai bilong God ol i “sot long stretpela pasin”?
◻ Olsem wanem na ol wokboi bilong Jehova i save long ol taim na ol de Jehova i bin makim, tasol ol hetman bilong graun i no save long en?
◻ Bilong wanem i stret strafe bilong Jehova i mas painim ol hetman bilong dispela graun?
◻ Long ai bilong Jehova nau em wanem taim?
◻ Bilong wanem nau yumi mas wok long painim Jehova? Olsem wanem yumi ken painim em?
[Piksa long pes 20]
Planti manmeri nau ol i bilip bai ol i abrusim bagarap taim pasin bilong dispela graun i pinis
[Rait long pes 22]
Ol “BEL ISI BILONG GOD” KIBUNG DISTRIK BILONG 1986/1987
(Lukim Wastaua)