Yu Save Bihainim Lek Bilong Jisas?
SAPOS yu laikim tru wanpela man bai yu bihainim pasin bilong em. Ol pikinini i save bihainim pasin bilong papamama. Planti yangpela manmeri ol i save bihainim pasin bilong ol man i gat nem long musik o long piksa wokabaut samting. Ol man i bikpela pinis, ating ol i save bihainim pasin bilong ol bikpela man bilong bisnis na wok politik. Tasol hamas man ol i wok long bihainim pasin long nambawan bikpela man i bin i stap long graun, em Krais Jisas?
Wanpela oganaisesen (Gallup) i bin skelim dispela samting na ol i tok: ‘Bikpela lain long Amerika (olsem 8-pela long olgeta 10-pela) ol i tok ol i wok long bihainim pasin bilong Jisas.’ Liklik lain tasol (inap 12 pesen) i tok ol i “wok strong tru” long bihainim.
Orait, i gat wanem samting na yumi mas bihainim Jisas, winim olgeta narapela bikpela man? Wanpela samting em olsem: ‘Em i bin tanim tingting bilong planti man, winim olgeta narapela man i bin i stap long graun.’ Wanpela bikpela buk (The World Book Encyclopedia) i tok olsem. Tasol Jisas i no kisim ol bikpela lain ami i go pait na subim ol man long tanim tingting olsem planti narapela bikpela man i bin mekim. Nogat. Na em i no tromoi bikpela mani na mekim planti samting bilong grisim ol man long tanim tingting olsem sampela evanselis i gat nem long nau ol i save mekim. Na em i no helpim wanpela lain politik. Strong bilong tok bilong em na pasin bilong em long mekim tok, dispela i tanim tingting bilong ol man.−Matyu 7:28, 29; Jon 7:46.
Jisas i kirapim planti man long senisim tru pasin bilong ol na senisim tingting bilong ol long ol samting bilong spirit. I no gat narapela bikpela man i bin helpim gut ol man olsem Jisas, a? I no gat narapela hetman long dispela graun em yumi inap tok long em, olsem: “Em i holi na i no gat wanpela rong i stap long em. Em i klin olgeta. Em i no olsem sinman liklik. Nogat. Em i narakain tru.” (Hibru 7:26) Olsem na Jisas i makim pasin i nambawan olgeta−i narapela kain tru long pasin bilong olgeta narapela man i bin i stap long graun!
Tasol sampela man i tok, ‘Yumi sinman na yumi no gat strong; olsem wanem yumi ken bihainim gutpela pasin tru bilong Jisas?’ Wanpela man bilong raitim stori bilong bipo (em H. G. Wells long buk The Outline of History) em i tok, long bipo yet ol man i pilim olsem ol i no inap bihainim pasin bilong Krais. Em i tok: ‘Man i laik bihainim tru Krais, em i mas kirap long wokabaut long narapela kain rot; em i mas lusim olpela pasin bilong em; em i mas bosim gut tingting na laik bilong skin; i olsem em i laik kisim amamas i bikpela tumas.’ Na dispela man i tok moa olsem: ‘Olsem na inap long nau bel bilong yumi i liklik tumas na i no inap long dispela man bilong Galili [Krais].’
Tasol yu ting dispela tok i stret? Tru, yumi no inap bihainim pasin bilong Jisas inap tru. Tasol Pita i tok, ‘Krais i soim pasin bilong em long yumi bai yumi ken bihainim.’ (1 Pita 2:21) Olsem na yumi inap bihainim pasin bilong Jisas. Yumi inap bihainim gut, tasol yumi no inap bihainim gutpela olgeta. Orait, Jisas i soim wanem pasin long yumi bai yumi ken bihainim? Olsem wanem yumi ken bihainim?