Insait Bilong Ol Tok i Kam Long Olgeta Hap
No Gat Sik AIDS long Blut Bilong Haus Sik o Olsem Wanem?
Wanpela mausman bilong wanpela lain bilong pasim ol sik (Centers for Disease Control) em i tok, ‘Ol sikman i no ken tingting planti long kisim sik AIDS taim dokta i katim ol o givim blut long ol long narapela taim.’ Tasol wanpela sikman i gat 60 krismas, ating em i no wanbel long dispela tok. Taim ol dokta i katim em ol i givim blut long em na long rot bilong dispela blut sik AIDS i kisim em.
Wanpela nius (The New York Times) i Stori long olsem wanem dispela samting i bin kamap. Nius i tok, wanpela man bilong mekim pasin Sodom, em i givim dispela blut long haus sik. Ol dokta i glasim, tasol nau tasol dispela man i bin mekim dispela pasin na ol samting i makim blut i gat sik AIDS long en i no kamap yet long blut bilong em, olsem na ol dokta i no save i gat sik AIDS long dispela blut na ol i kisim na bihain ol i givim long dispela sikman. Tasol 3-pela mun bihain dispela man bilong mekim pasin bilong Sodom em i givim blut gen long haus sik na nau ol dokta i lukim sik AIDS i stap long dispela blut na ol i no kisim.
Ol dokta i painim pinis nupela rot bilong glasim blut bambai ol i ken save, blut i gat sik AIDS long en o nogat. Ol i ting blut long ol haus sik i no gat sik AIDS long en, long wanem ol inap glasim gut. Tasol nau ol i save, sapos ol samting bilong makim blut i gat sik AIDS long en i no kamap yet long blut, orait dispela samting ol i mekim em i no wok na sampela blut ol i givim long ol sikman i gat sik AIDS long en. Kirap long yia 1977 ol i kisim save long 21,000 manmeri i gat sik AIDS na planti ol i bin kisim dispela sik long rot bilong blut ol dokta i givim long ol long haus sik.
Ol man i bihainim lo bilong God ol i abrusim ol dispela sik i painim ol man i kisim blut long haus sik. Olsem wanem? Long wanem ol i “abrusim” blut. Ol i no save kisim blut. Lo bilong God i tok, “Yupela i no ken kaikai blut. Yupela i no ken kaikai abus ol man i pasim nek bilong en na i dai,” long wanem blut i stap yet long en. Ol dispela man i klia long blut, long wanem em i lo bilong God, tasol dispela samting i helpim ol long i stap gutpela long skin tu. Lain bilong bosim kongrigesen Kristen bilong pastaim ol i tok: “Sapos yupela i lukaut gut na yupela i abrusim ol dispela pasin, em bai i gutpela. Gutbai. Yupela i ken i stap gut.”−Aposel 15:28, 29.
Ol Katolik i Bilipim Tok Bilong Evolusen
Long Epril 1986 bikpela lain manmeri i bung long Vatiken na Pop John Paul Namba 2 i tokim ol, ‘Bilip bilong misin i no pait wantaim dispela tok olsem bodi bilong man i bin kamap long rot bilong evolusen.’ Bilong wanem “bilip bilong misin” i no pait wantaim dispela tok? Long wanem misin Katolik i tok, man i gat bodi na em i gat tewel, na misin i tok, God i wokim tru tewel bilong man; em i no wokim tru bodi bilong man.
Tasol Jenesis 2:7 i tok, God i kisim graun na wokim man long en na em i putim win bilong laip i go insait long nus bilong man na man i kamap laip. Baibel i no tok God i givim tewel long man; Baibel i tok God i givim laip long em. (Lukim 1 Korin 15:45.) Long Esikiel 18:4 (NW Baibel i tok, “Man i mekim rong em bai i dai.” Olsem na taim man i dai, em i dai tru, no gat wanpela liklik hap bilong em i stap laip. Em i no gat tewel.
Taim misin Katolik i tok bodi bilong man i bin kamap long rot bilong evolusen, ol i sakim tok bilong Jenesis long Baibel, em Krais Jisas yet i bilip olsem tok bilong Jenesis i stret. (Matyu 19:4-6) Ol Kristen i mas bihainim tingting bilong husat?