Yu Laik Painim Poroman Bilong Marit?
“SAPOS man na meri marit i pas gut wantaim, dispela i gutpela tru. Tupela i poroman wantaim na toktok gut wantaim na i stap amamas.” Sampela man i tok olsem. Olsem na planti milion man na meri ol i stap singel, ol i laik marit—ol i laik painim poroman.
Sampela i ting masin komputa inap helpim ol long painim gutpela poroman; sampela i ting ol sta inap mekim. Tasol gutpela sapos yumi larim God i helpim yumi, long wanem em i Man bilong wokim yumi na em i As bilong marit. (Jenesis 2:18-24) God i gat bikpela sori long yumi na em i gat bikpela save. Dispela samting i mas kirapim yumi long bihainim tok bilong Em bambai yumi inap painim gutpela poroman bilong marit. (Sam 19:7) Em i putim lo long Baibel, olsem:
“Maritim Kristen Man”
Bilong wanem yumi mas maritim Kristen tasol? Long wanem God Jehova i tingting long helpim yumi long i stap gutpela inap oltaim oltaim. Tok bilong aposel Pol, em i tok meri i mas “maritim Kristen man,” dispela tok i stret wantaim pasin bilong ol wokboi bilong Jehova long bipo, em ol i save maritim poroman i lotuim God Jehova, em i God tru. (1 Korin 7:39; Diuteronomi 7:3, 4) Sapos yumi mekim olsem, dispela bai helpim yumi long planti rot na yumi mas tingim gut dispela samting.
Olsem: Sapos yumi maritim poroman i lotuim God tru, dispela bai helpim yumi long i stap gut long Papa bilong yu mi long heven. (Skelim wantaim tok bilong Eklisiastis 4:9-12.) Sapos man na meri wantaim i Kristen, narapela inap strongim narapela na bai tupela wantaim inap sanap strong long kain kain traim. Tupela i stap wanbel, olsem na ol inap sakim ol samting i laik bagarapim marit bilong tupela. Tupela wantaim i lotuim Jehova na bihainim ol gutpela tok bilong em na dispela samting inap helpim tupela long stretim ol liklik kros na hevi i kamap, na bai tupela i wok gut wantaim na narapela i no ken resis long winim narapela. Tupela i givim bel long mekim wok bilong Jehova, na tupela i wok long bihainim gut ol pasin bilong Em, na dispela samting inap helpim marit bilong tupela long wok gut, na dispela bai litimapim nem bilong God.
Sampela yia bipo wanpela meri, nem bilong em Gloria, em i poromanim wanpela yangpela man i save go long ol miting Kristen na sampela taim em i bekim tok long Stadi Wastaua. Ol i givim tok long Gloria olsem em i no ken poromanim dispela man i no baptais yet, tasol em i “laikim tumas” dispela man na em i no harim tok. Tasol em i save, dispela tok ol i givim long em i stret. Olsem na wanpela taim em i beten strong long Jehova na askim Em long helpim em. Liklik taim bihain ol i painimaut olsem dispela yangpela man i save mekim pasin pamuk, olsem na Gloria i no poromanim moa dispela man. Bihain em i maritim wanpela gutpela Kristen man. Nau dispela man i wanpela elda na tupela pikinini bilong ol i mekim wok bilong Jehova. Gloria i tingim dispela samting em i bin mekim bipo, na em i tok: “Mi tenkyu long Jehova, long wanem em i helpim mi long abrusim planti hevi. Em yet i stiaim ol samting na mi kisim gutpela tok bilong soim rot long mi, na nau mi stap amamas na mi marit long gutpela man em i laikim mi tumas.”
Bilong Wanem Ol i Painim long Ausait?
Olsem na bilong wanem man o meri i dediket long Jehova i laik painim poroman long ausait? Ating em i no bilip olsem Jehova i save long ol samting em inap helpim tru yumi, na Em i laik helpim yumi? (Provep 3:1-7; Sam 145:16) Olsem wanem long yu? Yu bilip olsem Jehova em i “God bilong pasin tru”? (Sam 31:5) Sapos olsem, orait yu save, em i no ken giaman—olgeta tok em i givim long yumi i stret na em i bilong helpim yumi na yumi ken bilip long en. (Aisaia 48:17, 18) Tru tumas, Papa bilong yumi long heven em i gat bikpela sori long yumi na em i save givim tok long yumi bilong helpim yumi long i stap gutpela inap oltaim oltaim. Tasol ating sampela taim yumi no save tingting gut; yumi save tingting long nau tasol. Tasol taim yumi laik painim poroman bilong marit, yumi mas tingting long taim bihain tu, a?—Sam 37:11, 29.
Yu bilip tru olsem Kingdom i klostu pinis na klostu nau bai em i kirap mekim wok bilong stretim dispela graun? Yu laik i stap long dispela Paradais bilong olgeta hap bilong graun, em God i tok promis long kamapim? O yu givim bel long ol samting bilong dispela taim nau na yu laik amamas long ol dispela samting tasol? Yu laik painim wanpela poroman em inap givim planti samting na gutpela sindaun long yu? O yu laik painim poroman em i save tingim lotu i tru em i nambawan samting? (Matyu 6:33) Yu yet yu tingim wanem samting i nambawan bikpela samting? Gutpela sapos yumi skelim tingting tru i stap long bel bilong yumi, na ol tingting i kirapim yumi long mekim ol samting. Na sapos yumi gat sampela tingting i kranki, orait yumi ken stretim, na long dispela rot bai yumi no mekim ol samting Jehova i no ken amamas long en.—Skelim wantaim tok bilong Sam 78:40, 41.
Bel i Save Giaman
Jeremaia 17:9 (NW ) i toksave, olsem: “Bel bilong man i save giaman tru, winim olgeta narapela samting.” Olsem na oltaim yumi mas was gut long bel bilong yumi. Ol man i sakim ol tok bilong Baibel, em spirit holi i as bilong en, na ol i sakim ol gutpela tok ol elda o narapela man i givim long ol bilong kirapim tingting bilong ol, planti taim ol dispela man i bel hevi na krai planti long bihain. Yumi no ken lusim tingting long dispela samting.
Tasol ating bai wanpela man i tok: ‘Dispela tok i no stret. Mi save long wanpela brata em i marit long ausait na nau em wantaim meri bilong em, tupela wantaim i mekim wok bilong Jehova.’ Tru, sampela taim gutpela samting olsem i kamap, na yumi amamas tupela wantaim i “bihainim tok tru.” (3 Jon 4) Tasol dispela brata i maritim meri i no baptais, em i sakim tok, na yumi no save, ating bihain bai em i bihainim gen kain pasin bikhet olsem. Ating long narapela taim bihain bai em i pilim olsem save bilong em i winim save bilong God, na bai em i sakim tok bilong Baibel, na bai em i ting save bilong em yet inap helpim em. Tasol Baibel i tok, “yu mas bilip strong long Bikpela.” (Provep 3:5) Dispela i makim olsem yumi mas daun long laik bilong God long olgeta samting. Olsem na yumi laik lainim bel bilong yumi long bihainim gut tok, long ol liklik samting tu. (Luk 16:10) Sapos yumi sakim tok bilong God, yumi lainim bel bilong yumi long bihainim wanem kain pasin? Dispela brata em i no ‘maritim Kristen meri,’ ating nau em i pilim pasin kranki em i bin mekim, olsem em i bihainim save bilong em yet, na em i beten askim God long lusim tingting long rong em i bin mekim. Tasol yu laik marit long kain pasin olsem?
Tasol ating bai wanpela i tok: ‘Nau boipren bilong mi i save stadi na em i go long ol miting.’ Tru, tasol bilong wanem em i stadi? Em i laik marit long yu o em i laik kisim save long God Jehova na mekim wok bilong Em? Taim yutupela i wokabaut wantaim, ating oltaim bai yu tingting olsem: Wanem tingting tru i kirapim em na em i stadi? Na sapos yu marit long em, bai em i mekim wanem long bihain? Tasol ating bai yu wet inap long taim boipren bilong yu i kisim baptais pastaim na bai yutupela i marit liklik taim bihain. Sapos yu mekim olsem, ating yu “maritim Kristen man,” tasol yu ting yu bihainim tru dispela tok bilong Baibel?
Taim ol i laik givim wok long wanpela brata insait long kongrigesen, ol i tingting tasol long em i baptais o nogat? Nogat, a? ‘Pastaim ol i traim wok bilong em.’ (1 Timoti 3:10) Dispela samting inap givim save long yumi, a? Tru tumas, yumi mas tingting gut na lukim gut na harim gut. Marit em i bikpela samting, olsem na yu mas skelim gut poroman yu laik marit long em. Nogut bel i kirap nating na yu no lukim gut dispela man o meri. Na yu mas harim gut ol tok em i mekim. Em i save mekim ol tok i kamapim laik tru i stap long bel bilong em, olsem em i laik litimapim nem bilong God? Skelim pasin bilong em inap bikpela hap taim liklik—em i wok long kamap strong long spirit? Taim em i kamapim pinis strongpela bilip bilong em na ol gutpela pasin bilong spirit bilong God, orait nau em i taim bilong tingting long maritim em. Wanpela man i raitim liklik tok pani, olsem:
“Ol yangpela meri, mi laik tokim yu,
Na ating dispela em i tok tru,
Yu mas wok long painim poroman stret,
Na marit long em long taim i stret.”
Sapos bel bilong yumi i giamanim yumi na yumi sakim ol dispela gutpela tok na tingting, wanem samting bai kamap? Hevi inap kamap. Yu mas tingim tok bilong Baibel i tok:
‘Samting Yu Planim, Dispela Bai Yu Kamautim’
Tingim ol samting i bin painim Jakelin (Jacqueline). Wanpela elda i givim sampela tok long em, long wanem em i poromanim wanpela yangpela man ausait. Jakelin i pilim olsem ol brata i putim strongpela lo tumas, olsem na em i no harim ol dispela tok, em Baibel i as bilong en. Bihain em i stori long dispela tingting kranki bilong em na em i tok: ‘Mi bihainim tingting bilong mi yet. Mi no bihainim tingting o tok bilong Jehova.’ Dispela yangpela man i kirap long stadi na bihain em i kisim baptais. Tripela mun bihain tupela i marit.
Kwiktaim hevi i kamap. Nau tasol tupela i marit na Jakelin i lukim sampela pasin nogut bilong dispela yangpela man em i no bin lukim bipo o em i no laik lukim bipo. Em i ting bai tupela i stap amamas na pas gut wantaim, tasol nogat. Kongrigesen i rausim man bilong em na em i lusim Jakelin na tupela liklik pikinini bilong ol. Nau Jakelin i gat bikpela hevi, long wanem em i mas wok mani long dispela taim nogut bilong nau, na em wanpela i mas mekim bikpela long dispela tupela pikinini; em i mas lukautim tupela long skin na helpim tupela long i stap amamas. Dispela hevi i painim Jakelin i givim wanem save long em? Em i tok: “Nau mi save, yumi mas bihainim tok. Tok ol i givim long yu, maski yu ting em i strongpela tok tumas o i no stret long yu, tasol yu mas tingim dispela tok em i kam long Jehova na yu mas bihainim tru.”—Galesia 6:7; Sam 86:11.
Tingim narapela meri, nem bilong em Maritza. Maritza i wok mani na long ples wok em i bungim dispela man bihain em i maritim em. Dispela man i soim Maritza planti samting bilong dispela graun em i no bin lukim bipo—na em i lukim olsem i no nogut tumas. Dispela man i bin winim bikpela skul, na em i gat gutpela pasin, na em i save long planti samting, olsem na Maritza i amamas long toktok wantaim em. Planti taim ol brata i givim toksave bilong Baibel long Maritza, tasol em i no harim. Em i “laikim tumas” dispela man.
Bihain liklik Maritza i no amamas moa long ol miting; em i les long harim tok bilong ol miting. Em i laik raun wantaim dispela poroman em i save toktok long kain kain samting. Taim tupela i no marit yet, dispela man i tok promis long Maritza olsem em i no ken pasim Maritza long i go long ol miting, na tru, em i no pasim em. Tasol isi isi Maritza yet i lusim ol miting, long wanem em i gat planti narapela wok em i laik mekim; ol samting bilong spirit i kamap olsem nambatu samting long tingting bilong em. Na bihain em i no i go moa long ol miting na em i no autim tok moa.
Olsem wanem long pasin bilong man bilong Maritza long toktok gut wantaim Maritza, em dispela pasin bilong em i save amamasim Maritza? Isi isi em i no toktok moa wantaim Maritza na bihain em i lusim Maritza na 4-pela pikinini bilong em, ol i gat 4-9 krismas, na em i katim marit. Maritza i kirap nogut tru na bel hevi i stap. Inap tripela yia em i stap nating, na bihain bel bilong em i stap isi liklik na em i kirap skelim ol samting i bin kamap na ol samting nau em i mas mekim. Em i save tingting olsem: ‘Taim yumi stap laip, yumi bilong karim hevi tasol.’ Tasol dispela tingting i no helpim em long i stap belgut na amamas, long wanem em i tingim taim bipo, taim em i stap amamas. Bipo em i save amamas long ol liklik samting tu—em i save amamas long gutpela win i mekim kol skin bilong em taim em i raun autim gutpela tok bilong Kingdom long ol man.
Em i tok: ‘Sori tru! Sapos mi bin harim tok bai ol dispela hevi i no painim mi!’ Long rot bilong sampela wanskul bilong ol pikinini bilong em, em i bungim gen ol Witnes. Ol i helpim em long laikim gen tok i tru na long givim bel long Jehova. Nau em wantaim ol pikinini bilong em i save autim tok. Maritza i givim bel tru long tok olsem: “Yu mas lain long bihainim rot Jehova i soim long yu. Yu mas save, long maus bilong ol man yu mi no tingim, Jehova i save tokim yumi long laik bilong em.” Olsem Krais Jisas i tok: “Yupela i mas lukaut gut, bai yupela i harim gut tok.” (Luk 8:18) Tru tumas, yumi mas tingting gut, na lukim gut, na harim gut!
Taim yu go long miting long Haus Kingdom, lukim ol manmeri i stap long miting. Bai yu lukim planti man na meri Kristen ol i marit na ol i stap amamas. Ol i save amamas long i stap wantaim na toktok wantaim. Tasol ating bai yu lukim sampela marit, ol yet i kam long miting, tasol poroman bilong ol i no kam, long wanem em i no bilip. Ol i laik tru bai poroman bilong ol i stap wantaim ol! Planti taim ol i mas lusim miting kwiktaim na ol i no inap toktok wantaim ol brata sista. Nogut yu sakim dispela toksave i tok yu mas ‘maritim Kristen tasol,’ na bai wankain hevi i painim yu. Gutpela sapos yu bihainim gut ol tok bilong Jehova na yu abrusim hevi!—Sam 119:9; Provep 28:26.
Wet long Jehova
Tasol ating yu bai tok, ‘Mi no inap painim wanpela poroman long kongrigesen. Wan wan tasol i gat wankain krismas olsem mi.’ Ating em i stret. Tasol yu bilip tru olsem Jehova i laik bai yu stap amamas? “Em yet i save lukautim yupela.” (1 Pita 5:6, 7) Na yu tingim tok bilong Provep i tok: “God wanpela inap givim yumi meri i gat gutpela tingting”? (Provep 19:14) Olsem na sapos yu laik painim gutpela poroman bilong marit, gutpela sapos yu beten askim Jehova long helpim yu, a?—Filipai 4:6, 7.
Yu tingim Hana long Baibel? Em i laik tru long kamapim pikinini. Orait, em i mekim wanem? Em i beten strong askim Jehova long helpim em. Em i bilip tru long Jehova. Em i beten pinis na putim dispela hevi long han bilong Jehova na bihain em i wet tasol long Jehova. Jehova i harim beten bilong Hana na bihain em i helpim Hana. Gutpela samting tru i painim Hana—em i karim wanpela pikinini man.—1 Samuel 1:9-11, 18-20; Sam 62:8.
Ating long kongrigesen bilong yu i no gat planti brata sista ol i gat wankain krismas olsem yu, tasol olsem wanem long ol kibung sekit na kibung distrik? Yumi save go long ol dispela kibung bilong kisim ol samting bilong spirit. Tasol sapos yu mekim wok volantia long kibung, bai yu amamas, long wanem bai yu inap mekim sampela wok bilong helpim ol brata sista na bai yu bungim planti brata sista ol i save givim bel long mekim wok bilong Jehova. Long kain taim olsem ating bai yu inap painim wanpela poroman bilong marit long em.
Tasol sapos long dispela taim yu no inap painim gutpela poroman bilong marit, orait, yu mas beten askim Jehova long helpim yu bambai yu inap wokabaut stret olsem man o meri i singel na bihainim klinpela pasin. Na taim yu stap singel yet, yu ken lain long bihainim ol gutpela pasin na mekim ol wok em inap helpim yu long kamap gutpela man o meri marit long bihain na kamap gutpela papa o mama. (Galesia 5:22, 23) Planti ol i bin mekim wok painia na dispela samting i bin helpim ol long lain gut olsem. Wok painia em nambawan gutpela wok bilong givim taim na strong bilong yu long mekim!
Sapos yu laik painim poroman bilong marit, orait bai yu kirap painim we? Yu mas painim poroman insait long lain bilong Jehova na bai yutupela i wanbel long ol wok yupela i laik mekim, na bai yutupela wantaim i laik mekim wok bilong Jehova oltaim. (2 Timoti 2:22) Na sapos Jehova i blesim yu na yu kisim gutpela poroman em i save pret long God, orait yu mas wok strong bambai marit bilong yupela i ken litimapim nem bilong God bilong yumi, em i gat bikpela sori long yumi.
[Rait long pes 31]
‘Sori tru! Sapos mi bin harim tok bai ol dispela hevi i no painim mi!’