I Stap na Wok Bilong Jisas

Wanpela Kepten Bilong Ami Em i Gat Strongpela Bilip

Jisas i autim tok antap long maunten na long dispela taim em i gat wanpela yia 9-pela mun moa bilong inapim wok bilong em long graun.

Long dispela taim Jisas i lusim maunten i go daun na em i go insait long taun Kapaneam. Planti taim em i save go i stap long Kapaneam, olsem ples bilong em, na bihain em i go raun mekim wok bilong em. Taim em i stap long Kapaneam, sampela hetman bilong lain Juda i singautim em long mekim wanpela samting. Wanpela kepten bilong ami bilong Rom i bin salim ol i go long em. Kepten em i bilong narapela lain; em i no wanpela Juda.

Dispela kepten i gat wanpela wokboi na em i laikim tumas dispela wokboi bilong em. Nau bikpela sik i painim dispela wokboi na em i laik i dai. Kepten i laik bai Jisas i ken oraitim wokboi bilong em. Olsem na ol dispela Juda i strong long Jisas i mas helpim dispela kepten long hevi bilong em, ol i tok: “Em i gutpela man, inap long yu ken helpim em. Em i save laikim yumi Juda. Em yet i bin wokim haus lotu bilong yumi.”

Wantu tasol Jisas i kirap na em i go wantaim ol. Ol i kamap klostu pinis long haus na kepten i salim sampela pren bilong em i kam long Jisas na givim tok long em olsem: “Bikpela, maski yu hatwok tumas. Mi no gutpela man inap bai yu kam insait long haus bilong mi. Olsem mi tu mi ting mi no gutpela man inap bai mi go long yu tu.”

Kepten em i bikpela man na em i save bosim ol narapela man, tasol em i gat pasin daun na em i mekim tok olsem. Na tu em i tingim gut Jisas, long wanem ol Juda i no save bung wantaim ol man bilong ol narapela lain. Pita i tok: “Yupela yet i save, i tambu tru long wanpela man bilong Juda i stap wantaim man bilong arapela lain. Na i tambu long em i go klostu long em tu.”

Ating kepten hia em i no laik bai Jisas i kisim hevi sapos em i brukim dispela tambu. Olsem na em i salim ol pren bilong em i kam bringim tok long Jisas olsem: “Yu mekim tok tasol, na wokboi bilong mi bai i orait gen. Long wanem mi tu mi stap aninit long man i gat namba bilong givim wok long mi. Na mi yet mi gat soldia ol i stap aninit long mi. Na sapos mi tokim wanpela, ‘Yu go,’ orait em i save go. Na mi tokim narapela, ‘Yu kam,’ orait em i save kam. Na mi tokim wokboi bilong mi, ‘Yu mekim dispela wok,’ orait em i save mekim.”

Taim Jisas i harim dispela tok, em i kirap nogut na em i tok: “Mi tokim yupela, long Isrel yet mi no bin lukim wanpela man i gat kain bilip olsem.” Jisas i oraitim pinis wokboi bilong dispela kepten bilong narapela lain, na nau em i stori olsem bihain bai sampela man bilong ol narapela lain i kisim ol blesing, em ol Juda i no bilip ol i no laik kisim.

Jisas i tok olsem: “Bai planti manmeri i kam long hap san i kamap, na long hap san i go daun, na bai ol i sindaun long kaikai wantaim Ebraham na Aisak na Jekop insait long kingdom bilong heven. Tasol ol manmeri bilong kingdom, bai God i rausim i go long ples tudak. Long dispela hap bai ol i krai nogut na skrapim tit bilong ol.”

Dispela ‘ol manmeri bilong kingdom God i rausim ol i go long ples tudak,’ em ol Juda bilong skin God i opim rot long ol pastaim bilong kisim wok king wantaim Krais, tasol ol i sakim dispela blesing. Ebraham na Aisak na Jekop i makim Kingdom bilong God. Olsem na Jisas i laik tok olsem bai sampela man bilong ol narapela lain ol tu inap kisim wok king long heven na bai ol i “sindaun . . . insait long kingdom bilong heven.” Luk 7:​1-10; Matyu 8:​5-13; Aposel 10:⁠28.

◆ Bilong wanem sampela Juda i strong long Jisas i mas helpim wanpela kepten bilong ami bilong narapela lain?

◆ Ating i gat wanem samting na kepten i salim tok long Jisas, olsem: “Maski kam insait long haus bilong mi”?

◆ Wanem insait bilong ol laspela tok Jisas i mekim?