Askim

◼ Long lain Isrel bilong bipo, taim 49 yia i go pinis, yia Jubili i kamap (em i olsem namba 50 yia). Na taim God i wokim ol samting, em i mekim insait long 7-pela hap taim, na ol dispela hap taim i kamap olsem 49,000 yia, na i olsem wik bilong God long wokim ol samting. Olsem wanem? Dispela namba 50 yia bilong ol Isrel i makim taim bai kamap bihain long dispela 49,000 yia, o nogat?

Yia Jubili i bin kam bihain long 49 yia, olsem na dispela inap mekim na yumi ting, em i makim dispela taim bai kamap bihain long 49,000 yia, em dispela wik bilong wok bilong God. Tasol samting tru bilong helpim ol man em God i orait long ol, olsem ol samting yia Jubili bilong ol Isrel i makim, dispela bai kamap long dispela 1,000 yia em laspela tausen yia bilong dispela bikpela hap taim bilong 49,000 yia na Jubili i no makim taim bai kamap bihain long dispela 49,000 yia. Nogat. Yumi ken stori moa long dispela samting:

Namba wan samting em olsem: Lo bilong Moses i tok, olgeta namba 7 yia i mas i stap olsem sabat, em yia bilong graun i ken malolo; ol i no ken planim kaikai, o brukim graun, o kisim kaikai long gaden. Na taim namba 7 Sabat i pinis (em namba 49 yia) i mas i gat narapela yia moa, em yia Jubili, em namba 50 yia. Na long dispela yia graun i mas malolo yet, na bikpela toksave bai kamap olsem ol man i mas fri. Ol Hibru i bin baim ol yet i go long ol man, bilong wok kalabus long ol, nau ol i mas kamap fri na dinau bilong ol i mas pinis. Na ol famili i bin baim graun bilong ol i go long ol man, nau ol i mas kisim bek dispela graun bilong ol. Olsem na Jubili em taim bilong ol man i mas lusim kalabus na kisim bek graun bilong ol.—Levitikas 25:1-46.

Na namba tu samting em olsem: Sapos yumi kisim save long truim bilong ol tok profet bilong Baibel na yumi save yumi stap long wanem taim nau, orait nau yumi inap save, dispela samting i makim olsem ol wan wan de God i bin mekim wok (Jenesis 1) em i olsem 7,000 yia, na Krais bai stap king inap 1,000 yia, na taim dispela i pinis, em bai pinisim ‘de malolo’ bilong God, em laspela “de” bilong dispela wik bilong wok. (Revelesen 20:6; Jenesis 2:2, 3) Long dispela as yumi ken tok, dispela wik olgeta bilong God i wokim ol samting em i olsem 49,000 yia.

Dispela 49 yia paslain long Jubili bilong ol Isrel, sampela man i bin skelim dispela wantaim wik bilong God i bin wokim ol samting, olsem 49,000 yia. Olsem na ol i ting yia bilong Jubili (em namba 50 yia) em i mas makim samting bai kamap bihain long pinis bilong wik bilong God i wokim ol samting.

Tasol yia Jubili em taim bilong ol man i aut long wok kalabus, na taim ol man i kisim bek graun bilong ol. Wik bilong wok em samting bilong dispela graun bilong yumi, tasol taim God i wok long redim dispela graun na bai man i stap long en, em i no bin baim graun i go long wanpela man na graun i stap kalabus na nau God i mas baim bek. Nogat. Ol man i stap kalabus na God i mas baim bek ol. Na ol man i no bin stap inap 49,000 yia long graun. Nogat. Ol i bin stap inap 6,000 yia tasol. Baibel i tok, God i wokim Adam tupela Iv, na bihain tupela i bikhet long God na nau sin i kalabusim ol na ol i no gutpela moa na dai i painim ol. Rom 8:20, 21 i tok, God Jehova i laik helpim ol man i save bilip long em na bai ol i ken lusim dispela samting i save kalabusim ol, na taim em i mekim, tru i olsem “God i tekewe olgeta samting long dispela kalabus bilong bagarap nau ol i stap long en, na bai olgeta samting i stap gut Tumas [olsem ol] pikinini bilong God.”—Na lukim tu Rom 6:23.

I gat liklik lain bilong i go long heven, na kirap long Pentikos 33 C.E. God i no tingim moa ol sin bilong ol. Jubili bilong dispela lain i kamap pinis na ol i kisim amamas long en. Tasol Baibel i tok ol narapela bilipman bai kamap fri insait long 1,000 yia bilong Krais i stap king na bosim graun. Long dispela taim Krais bai mekim wok long ofa bilong em long baim bek ol man. Taim dispela 1,000 yia i pinis ol man bai stap namba wan olgeta, no gat sin o dai i stap long ol. Krais bai pinisim dai, em laspela birua. (Em dispela dai Adam i bin putim long ol man.) Na nau Krais bai givim Kingdom i go bek long Papa bilong em long pinis bilong dispela 49,000 yia, em pinis bilong dispela wik bilong wok.—1 Korin 15:24-26.

Olsem na ol bilipman bilong i stap laip long graun ol bai kamap fri long dispela 1,000 yia Sabat liklik taim bai kirap, em yia Jubili i bin makim. Ol bai kamap gutpela aninit long wok king bilong Krais, em “Pikinini Bilong Man em i bosim sabat.”—Matyu 12:8.