Yu Save Tingting Planti Long i Stap Bilong Pikinini Bilong Yu?
TRU TUMAS yu mekim! Yu save long nau i gat planti samting em inap bagarapim ol pikinini bilong yu, olsem sik na pasin bilong smok spakbrus samting, na pasin bilong bikhet na sakim tok. Ol papamama i save wari long ol pikinini bilong ol, na ol i save tingting planti long i stap bilong ol.
Long bipo tu ol papamama i save tingting planti long i stap bilong pikinini bilong ol. Baibel i kamapim dispela samting. Yu tingim Jekop? Em i salim pikinini man bilong em, Josep, i go lukim ol narapela pikinini man bilong em bambai em i ken save ol i stap gut o nogat. (Jenesis 37:13, 14) Jop tu i tingting planti long i stap bilong ol pikinini man bilong em. Maski ol dispela pikinini i bikpela pinis na ol i marit na i gat pikinini, tasol em i tingting olsem: “Nogut ol pikinini man Bilong mi i bin mekim rong na toknogutim God long bel Bilong ol.”—Jop 1:4, 5, NW.
Jisas i gutpela olgeta, tasol Josep tupela Maria i tingting planti long i stap bilong dispela pikinini bilong tupela! Taim Jisas i gat 12-pela krismas, ol i tingting planti long i stap bilong em, long wanem em i lus. Tasol dispela pikinini bilong tupela i mekim gutpela pasin i litimapim nem bilong tupela na tupela i no ken sem. Orait, nau yumi ken stori long ol samting i bin kamap long dispela taim bipo, na yumi ken tingim gutpela save ol dispela samting inap givim long ol papamama long nau.
Pikinini i Lus
Sapos yu gat pikinini, yu inap pilim tingting i stap long bel bilong Maria taim em i painim pinis Jisas na em i krosim Jisas na i tok: “Pikinini, bilong wanem yu mekim olsem long mitupela? Bel bilong mi tupela papa bilong yu i hevi tumas na mitupela i wok long painim yu.” Josep tupela Maria i bin wok long painim em inap long tripela de. Tupela i tingting planti, long wanem em i gat 12-pela krismas tasol.—Luk 2:48.
Olsem wanem na Jisas i lus? Ating Josep tupela Maria i no lukautim em gut? Wanpela man bilong stori long Baibel em i sutim tok long Maria tupela Josep na em i tok: ‘Tupela i save ol i holim wanpela gutpela samting tru. Olsem wanem na bikpela hap taim liklik i lus pastaim na ol i kirap long painim em? Ating mama bilong em i no sori long em na wari long em?’ Tasol sapos yumi skelim gut dispela stori long Baibel yumi ken save, tupela i no gat asua.
Baibel i kamapim long ples klia olsem Maria em i gutpela meri na gutpela mama. Taim ensel Gebriel i tokim Maria, Maria bai karim Jisas, ensel i tok: “Bel bilong God em i gutpela long yu.” (Luk 1:28, 30) Maria i redi long mekim dispela bikpela wok God i laik givim long em olsem bilong karim dispela pikinini man em i narapela kain, na mekim bikpela long em, na skulim em. Em i meri bilong pasin daun na em i bilip strong long God. Taim em i karim pinis Jisas em i mekim olgeta samting “olsem rait i stap long lo bilong Bikpela” i tok.—Luk 1:38, 45-48; 2:21-23, 39.
Josep, dispela man em i maritim Maria na em i kamap waspapa bilong Jisas, em tu em i gutpela stretpela man, em i bin toktok wantaim ensel bilong Jehova fopela taim. (Matyu 1:19, 20; 2:13, 19, 22) Yumi no ken lusim tingting olsem Jehova yet i bin makim Josep tupela Maria bilong mekim bikpela long dispela Pikinini bilong em, em i laikim tumas em. Yumi save, God i makim man na meri em tupela inap lukautim gut dispela pikinini na helpim em long kisim ol gutpela save bilong God.
Ol papamama long nau tu ol i save tingting planti long i stap bilong pikinini bilong ol, bai ol i stap gutpela o nogat, long wanem pasin bikhet na pasin nogut i kamap bikpela. Na ol i save, pikinini bilong ol i no gutpela olgeta olsem Jisas. Tasol ol samting Josep na Maria na Jisas i bin mekim em inap lainim yumi.