I Stap na Wok Bilong Jisas

Em i Mekim Ol Tok Piksa Bilong Lainim Ol

TAIM Jisas i krosim ol Farisi em i stap long Kapaneam. Bihain liklik, long dispela de tasol, em i lusim haus na em i wokabaut i go long Raunwara Galili. Dispela raunwara i stap klostu na planti manmeri i save bung long dispela hap. Em i kalap long wanpela bot na i go liklik na em i autim tok long ol manmeri i stap long nambis. Em i mekim ol tok piksa bilong lainim ol. Ol tok piksa bilong em i stori long ol samting ol man i save long en.

Pastaim em i mekim wanpela tok piksa long wanpela man i go tromoi pikinini kaikai long gaden. Sampela pikinini kaikai i pundaun long rot na ol pisin i kam kaikai. Na sampela i pundaun long hap i gat ston, na i no gat planti graun long en. Graun i no daun tumas, olsem na kaikai i no gat rop na taim san i kukim, em i go drai. Na sampela pikinini kaikai i pundaun namel long rop i gat nil na rop i gat nil i karamapim na i no karim kaikai. Tasol sampela i pundaun long gutpela graun na i karim kaikai, sampela i karim 100, na sampela i karim 60, na sampela i karim 30.

Jisas i mekim narapela tok piksa na em i tok, Kingdom bilong God i olsem wanpela man i tromoi pikinini kaikai i go long graun. Na long olgeta nait dispela man i slip, na long san em i kirap na wokabaut. Na dispela pikinini kaikai em i kamap na i go bikpela olsem wanem, em dispela man i no save. Graun yet i wok na dispela i kamap na i karim kaikai. Na bihain kaikai i bikpela pinis, orait dispela man i kisim.

Na Jisas i mekim narapela tok piksa, em namba 3, na em i stori long wanpela man i tromoi gutpela pikinini kaikai long gaden bilong em, tasol taim em i slip wanpela birua i kam na em i tromoi pikinini bilong gras nogut namel long wit. Ol wokboi bilong dispela man i tokim em, ‘Ating yu laik bai mipela i kamautim dispela gras nogut?’ Tasol em i tokim ol, ‘Nogat. Nogut yupela i bungim gras nogut na yupela kamautim wit wantaim. Larim tupela i kamap wantaim inap long taim bilong kisim kaikai, na bai mi tokim ol man bilong mekim dispela wok, “Yupela bungim gras nogut pastaim na kukim, na bungim wit na putim long haus kaikai bilong mi.” ’

Jisas i mekim tok yet long bikpela lain manmeri i bung long nambis na em i mekim tupela tok piksa moa. Em i tok, “kingdom bilong heven” i olsem pikinini bilong wanpela kaikai ol i kolim mastet, em wanpela man i planim. Pikinini bilong mastet i no olsem ol narapela pikinini kaikai. Em i liklik tumas. Tasol bihain em i kamap bikpela na em i winim olgeta narapela kain kaikai long gaden. Em i kamap diwai, na ol pisin i kam sindaun long han bilong en.

Ating sampela man bilong nau bai tok, i gat sampela pikinini kaikai i liklik moa yet, winim pikinini kaikai bilong mastet. Tasol Jisas i no wok long lainim ol man long ol kain pikinini kaikai samting. Nogat. Long ol pikinini kaikai ol man bilong Galili i save long en long taim bilong Jisas pikinini kaikai bilong mastet em i liklik tru. Olsem na ol i kisim gut as bilong tok piksa bilong Jisas long samting i liklik na i kamap bikpela tru.

Na long laspela tok piksa Jisas i tok, “kingdom bilong heven” i olsem yis, em wanpela meri i kisim na tanim wantaim bikpela dram plaua, na bihain dispela plaua olgeta i solap.

Jisas i mekim pinis dispela 5-pela tok piksa na bihain em i salim ol manmeri i go, na em yet i go bek long haus em i slip long en. I no longtaim na ol 12-pela aposel bilong em wantaim sampela man moa ol i kam long em. Matyu 13:​1-9, 24-36; Mak 4:​1-9, 26-32; Luk 8:​1-8.

◆ Ol dispela tok piksa Jisas i mekim long bikpela lain manmeri, em i mekim long wanem taim? Na em i stap we na em i mekim?

◆ Jisas i mekim wanem 5-pela tok piksa long ol?

◆ Bilong wanem Jisas i tok pikinini kaikai bilong mastet i liklik tumas, winim olgeta narapela pikinini kaikai?