Askim

◼ Taim wanpela famili bilong Kristen i dai pinis na ol dokta i laik katim skin bilong em bambai ol i ken save wanem samting tru i mekim na em i dai, i stret Kristen i ken orait long ol i mekim olsem o nogat?

Baibel i no mekim sampela tok long dispela samting, tasol i gat sampela tok bilong Baibel Kristen i ken tingim, na bai em inap skelim gut ol samting na save long ol samting i stret em i ken mekim.

Sampela taim ol dokta i save katim skin bilong man i dai pinis bambai ol i ken save wanem sik tru i kilim em i dai, na dispela samting inap helpim ol long save long ol samting sik i mekim insait long skin bilong man. Sampela lotu i bihainim sampela tok i no stret wantaim Baibel na ol i no orait long ol dokta i mekim olsem. Wanpela buk bilong Misin Katolik i tok: “Ol i mas mekim pasin holi long skin bilong man i dai pinis, long wanem bipo skin bilong em i olsem haus bilong tewel bilong em . . . na long taim bilong kirap bek bai skin i kirap bek wantaim tewel, bilong i stap oltaim . . . Ating i gat liklik hap taim namel long taim man i dai na tewel i lusim skin bilong em.” Tasol Baibel i makim olsem taim man i dai em i dai tru na em i no gat laip moa; em i no gat tewel. (Jenesis 2:7; 7:21-23; Levitikas 21:1, 11) Orait, olsem wanem long skin bilong man i dai pinis? Baibel i stori long ol man na ol animal na i tok: “Ol i bilong graun, na ol i go bek long graun.” (Eklisiastis 3:18-20, NW ) Long taim bilong kirap bek, God i no ken kirapim bek olpela bodi em longtaim pinis i tanim i kamap graun gen; nogat; em bai givim nupela bodi long man long laik bilong Em.—Lukim 1 Korin 15:38, 47, 48.

Narapela tok bilong Baibel long man i dai pinis, em yumi ken tingim taim yumi skelim pasin bilong katim skin bilong man i dai pinis bilong kisim save long as bilong i dai bilong em, em olsem: God i givim lo long ol Isrel na em i tok: “Yupela i no ken katim nabaut skin bilong yupela bilong sori long man i dai pinis, na yupela i no ken katim mak long skin bilong yupela. Mi Jehova.” (Levitikas 19:28, NW; Diuteronomi 14:1, 2; Jeremaia 47:5; Maika 5:1) Lain bilong God ol i no ken bihainim pasin bilong ol lain i stap klostu long ol, em ol i save katim nabaut skin bilong ol bilong makim olsem ol i sori long man i dai pinis, o bilong bihainim narapela pasin bilong lotu giaman. Dispela lo i strongim ol Isrel long lukautim gut skin bilong ol, em samting God i bin wokim.—Sam 100:3; 139:14; Jop 10:8.

Ol Kristen tu i mas lukautim gut laip na bodi bilong ol, em ol i bin givim long God olsem ofa. (Rom 12:1) Sampela i ting dispela samting i mas bosim tingting bilong ol long pasin bilong katim skin bilong man i dai pinis bilong kisim save long as bilong i dai bilong em. Ol i pilim olsem sapos i no gat narapela strongpela samting, orait ol i no ken larim ol dokta i katim skin bilong famili bilong ol em i dai pinis. Ol i save, sampela taim ol dokta i save kisim blut bilong man i dai pinis na putim long skin bilong man i stap laip yet o mekim narapela wok long en, na ol i no laik helpim dispela pasin.

Orait, bilong wanem sampela Kristen i bin orait long dokta i katim na glasim skin bilong famili bilong ol em i dai pinis? Ol i save Baibel i no kamapim sampela tok long dispela samting. Na ating ol i tingim ol samting ol Isrel i larim ol dokta bilong Isip i mekim long Jekop na Josep taim tupela i dai pinis, em ol i save mekim sampela samting bambai bodi i no ken bagarap na ating ol i save rausim sampela hap bel tu. (Jenesis 50:2, 3, 26) Sampela taim lo bilong kantri i tok ol dokta i mas katim skin bilong man i dai pinis bambai ol i ken save wanem samting tru i mekim na em i dai. Olsem: Sapos wanpela yangpela man i no gat sik na em i dai nating, ating bai lo i tok ol dokta i mas katim na glasim skin bilong em bambai ol i ken save wanem samting tru i mekim na em i dai. Sapos lo bilong kantri i tok ol dokta i mas katim skin bilong man i dai pinis, orait ol Kristen i mas tingim tok bilong Baibel i tok “olgeta man i mas i stap aninit long ol gavman.”—Rom 13:1, 7; Matyu 22:21.

Na sapos dokta i bin lukautim wanpela sikman na nau em i dai, ating dokta i save wanem sik i kilim dispela man i dai, tasol sapos ol i katim na glasim skin bilong em, dispela inap givim sampela save moa long ol. Sapos papa o mama i dai, ating ol pikinini i laik save wanem sik tru i as bilong dispela bambai ol i ken save wanem kain sik i stap insait long famili bilong ol. Dispela save inap helpim ol long tingim ol samting ol yet i mas mekim na ol marasin samting ol i mas kisim bambai dispela sik i no ken bagarapim ol tu. Sapos ol dokta i katim skin bilong man i dai pinis na ol i kisim save olsem wanpela samting long ples wok bilong em i bin givim sik long em na dispela sik i kilim em i dai, orait ating bai famili bilong dispela man inap kisim kompensesen. Olsem sampela man i wok insait long—graun bilong kisim samting bilong wokim paia ol i kolim coal-das bilong dispela samting i save go insait long wetlewa bilong ol na givim sik long ol. Sapos kain man olsem i dai pinis na ol dokta i katim skin bilong em na kisim save olsem em i gat dispela sik, ating bai famili bilong em inap kisim kompensesen. Na sampela i pilim olsem sapos ol dokta i katim na glasim skin bilong famili bilong ol em i dai pinis, dispela inap helpim ol long i stap bel isi, long wanem bai ol i save tru wanem samting i bin mekim na em i dai na wanem samting i no bin mekim. Ating dispela bai helpim sampela man ol i no bilong famili tu. Ating famili bilong man i dai pinis i pilim olsem sapos dokta i katim na glasim skin bilong em, dispela bai helpim dokta long kisim sampela save moa long dispela sik na long rot bilong stretim, na bai em inap helpim ol narapela man i gat dispela kain sik.

Olsem na i stret ol Kristen i mas tingim gut skin bilong ol na lukautim gut, tasol i gat sampela samting moa ol i ken skelim taim ol i tingting long orait long ol dokta i katim skin bilong man i dai pinis o nogat.