Stap Klostu Long Oganaisesen Bilong Jehova
Em stori bilong John Barr
LONG Jun, 1986, mi go bek long ples. Mi kalap long balus long biktaun Glasgo na mi laik i go long Abadin. Taim mi stap long balus mi lukluk i go daun long gutpela ples Skotlan na long bikpela wara Klait, na mi tingting bek long yia 1906 na long liklik ples Bisopton i stap klostu long dispela wara, long hap bilong saut.
Long dispela ples long yia 1906, tumbuna mama bilong mi, Emily Jewell, em i kirap long kaunim wanpela buk Charles T. Russell i bin raitim (The Divine Plan of the Ages). Wantu tingting bilong em i op na em i save, Baibel i no tok ol man nogut i go long bikpaia. Liklik taim bihain, tupela bikpela pikinini meri bilong em, em Bessie na Emily (em mama bilong mi), tupela tu i kisim save long tok i tru, na ol i lusim tudak bilong ol tok giaman Yunaitet Fri Sios bilong Skotlan i bin lainim ol long en. Long 1908 tumbuna i kisim baptais bilong makim olsem em i dediket na em i laik bihainim laik bilong God. Liklik taim bihain, tupela pikinini meri bilong em tu i kisim baptais.
Papa bilong mi i mekim wok olsem dikon long dispela sios long Bisopton. Tasol i hatwok long em i bilipim tok bilong sios, em ol i save lainim ol man olsem God em i tripela, olsem God Triwan. Pasto i tok, wanpela Sande bai em i autim tok long dispela bilip long haus lotu bilong helpim papa. Tasol taim papa i harim ol tok pasto i mekim, papa i save, tok bilong God Triwan em tok giaman. Em i lusim misin na long yia 1912 em i kisim baptais bilong makim olsem em i dediket long Jehova. Liklik taim bihain papamama i go i stap long biktaun Abadin. Long dispela taim ol i gat tupela pikinini, em Louie na James. Mama i karim mi long Abadin long yia 1913.
Taim mi tingting bek long ol dispela, yia bipo, mi tingim bikpela wok papamama i bin mekim bilong “skulim” mipela tripela pikinini long ol tok bilong Jehova. Mi tingim dispela, samting na balus i wok long i go daun long ples bilong mi, long ol liklik maunten na ol wara, em mi save long en taim mi liklik yet. (Efesas 6:4) San i lait na long dispela gutpela moningtaim, mi tenkyu long Jehova long gutpela pasin papamama i bin mekim, em ol i bin skulim mi gut! Mi save dispela samting i bin helpim mi long i stap klostu long oganaisesen bilong Jehova long olgeta taim.
Lainim Ol Pikinini Taim Ol i Liklik Yet
Famili bilong mipela i pas gut wantaim na i stap amamas. Sapos sampela taim papamama i no wanbel, tupela i no save kros long ai bilong mipela ol pikinini. Dispela samting i kirapim mipela long harim gut tok bilong papamama, na mipela i stap bel isi.
Mi save amamas taim mi tingim ol samting mipela famili bin mekim long apinun. Mipela i save wokim amamas bilong mipela yet, olsem pilai musik na singsing na mekim sampela pilai. Na maski papa i gat planti wok, tasol long olgeta de em i save kaunim sampela tok bilong Baibel o bilong ol buk na nius bilong Sosaiti Was Taua long mipela. Na em i save kaunim sampela stori bilong ol narapela buk tu long mipela; sampela i stori nating bilong amamas tasol long en, na sampela i bilong lainim mipela. Olgeta dispela samting i helpim mipela famili long pas gut wantaim.
Long dispela taim bipo, i no gat narapela famili long “tok i tru” ol i stap long dispela hap bilong not long Skotlan. Olsem na taim Sosaiti i salim sampela brata i kam raun, ol i save slip long haus bilong mipela. Sampela brata olsem em Albert Lloyd na Herbert Senior na Fred Scott. Sampela brata bilong nambawan ofis long Bruklin, Nu Yok, ol tu i kam, olsem W. E. Van Amburgh na A. H. Macmillan. Taim mi pikinini yet na ol dispela brata i kam i stap wantaim mipela, mi save amamas tru.
Inap long nau mi pilim gutpela pasin bilong papamama bilong mi, em tupela i save singautim ol dispela man i kam i stap long haus bilong mipela. Dispela samting i strongim mipela famili, na taim mi liklik yet mi pilim tru olsem mi insait long wanpela bikpela lain brata i stap long olgeta hap bilong graun. Sapos papamama i helpim ol pikinini long pas gut wantaim long pasin sori na laikim tumas ol brata, ol i helpim tru ol pikinini!
Mi Winim Wanpela Hevi Bilong Mi Yet
Taim mi pikinini yet, mi man bilong sem. Mi wok long i go bikpela na i hatwok moa yet long mi bungim ol man na toktok wantaim ol. Dispela pasin bilong sem i kamap olsem wanpela bikpela hevi bilong mi. Dispela pasin i mekim na mi hatwok long kamapim bilip bilong mi na autim gutpela tok bilong Kingdom.
Namba Wan Pait Bilong Olgeta Hap i pinis na bihain liklik, tumbuna mama bilong mi na mama bilong mi i kamap namba wan Witnes long biktaun Abadin bilong go long haus bilong ol man na autim tok. Taim mipela i pikinini yet, mipela save bihainim ol na putim ol liklik nius o pepa aninit long dua bilong ol haus. Tasol taim mi bikpela inap long mi yet mi go long ol haus na autim tok, dispela pasin bilong mi long sem sem i givim bikpela hatwok long mi. Tasol mi winim dispela hevi. Mi no ken lusim tingting long wanpela Sande long Novemba 1927. Long dispela Sande, long belo bek, mi tokim papa mi laik go wantaim em long ol haus na autim tok. Long namba wan taim mi lukim aiwara i kamap long ai bilong papa−bel bilong em i amamas tru na em i laik krai!
Bikpela Hevi i Kamap long Famili Em i Kirapim Tingting Bilong Mi
Mipela famili i stap bel isi i go inap long apinun long Jun 25, 1929. Long dispela taim mi gat 16 krismas. Mama wantaim susa bilong mi i bin autim tok long san olgeta na long apinun tupela i hariap i kam bek long haus bambai ol i ken redim kaikai bilong papa. Wantu wanpela motobaik i spid i kam na bamim mama. Motobaik i pulim mama i go long rot inap 37 mita. Mama i kisim bikpela bagarap long het na ol dokta i tok ol i ting em bai i dai. Tasol susa bilong mi, Louie, em i lukautim gut mama na mama i no i dai. Bihain mama i kamap gutpela liklik na em inap mekim ol wok bilong em olsem long bipo. Em i stap olsem i go inap long taim em i dai long yia 1952.
Dispela bikpela hevi i kamap long famili i kirapim tingting bilong mi−mi wok long skelim gut ol samting mi laik mekim long bihain. Mi kirap long stadi gut long Baibel na mi bilip tru long tok i tru. Long dispela taim mi dediket long Jehova bilong mekim wok bilong Em. Sampela yia bihain rot i op na mi kisim baptais bilong makim dediket bilong mi.
Mi Kirap Mekim Wok Painia
Mi lusim skul long yia 1932 na mi kirap long lain long kamap wanpela ensinia bilong paua na bilong ol masin. Long Englan, long dispela taim bipo, ol brata i no save kirapim ol yangpela long mekim wok painia olsem nau ol i mekim. Tasol bihain mi yet mi pilim olsem mi mas givim strong bilong mi bilong mekim wok bilong Jehova−mi mas mekim wok painia.
Mi tingim yet wanpela tok mipela lainim long sampela Wastaua (tok Inglis) bilong 1938, em dispela tok i lainim mi olsem sapos yumi stap klostu long oganaisesen bilong Jehova na bihainim tok bilong en, dispela inap helpim tru yumi.Ol dispela Wastaua i stori long Jona na long ol samting i painim em taim em i ranawe na em i no laik mekim wok Jehova i givim long em. Mi pilim tru dispela tok na long bel bilong mi, mi pasim tok olsem: Wanem wanem wok oganaisesen bilong Jehova i laik givim long mi, mi no ken sakim. Mi no save long ol wok bihain bai mi kisim, em ol bai traim bel bilong mi, bai mi truim dispela tok promis mi bin mekim o nogat.
Mi beten askim God long soim rot long mi bambai mi ken mekim wok bilong em na wantu mi kisim wanpela pas i kam long brens-ofis bilong Sosaiti long London. Mi kirap nogut. Ol i singautim mi i go mekim wok long Betel. Rot i op na mi amamas long i go mekim dispela wok. Olsem na long yia 1939, long mun Epril, mi kirap mekim wok long Betel na mi wok wantaim Brata Harold King, bihain em i kamap wanpela misineri long ples Saina na ol komyunis i givim planti yia kalabus long em, long wanem em i autim tok. Mitupela i wokim ol pikap. Long dispela taim bipo ol Witnes i save kisim pikap i go long haus bilong ol man na putim plet i gat toktok long en, na ol man i harim sampela stori long Baibel.
Mitupela Harold i save tingting long ol kain kain man ol bai harim tok bilong Kingdom long rot bilong ol dispela pikap mipela i wokim. Olsem na mipela i no lusim tingting long as bilong dispela wok mipela i mekim. Bihain mi kisim narapela narapela wok long Betel, tasol oltaim mi wok long tingim as bilong ol dispela wok mi mekim, em bilong helpim wok bilong autim gutpela tok bilong Kingdom. Dispela i helpim mi na mi amamas long mekim ol dispela wok.
Sampela Gutpela Wok Mi Kisim
Mi kirap mekim wok long Betel long London na liklik taim bihain ol i makim mi bilong kamap wasman bilong wanpela kongrigesen (nau ol i kolim dispela kain wasman olsem wasman siaman). I gat planti pablisa long dispela kongrigesen, winim 200. Bipo mi stap wasman bilong liklik kongrigesen i gat 10-pela pablisa tasol! Na bihain ol i givim wok long mi bilong lukautim ol maikrafon na spika samting long wanpela bikpela kibung long Lesta long yia 1941. Bipo mi no save tumas long mekim dispela wok.
Bihain ol i givim wok long mi olsem wasman bilong raun, nau ol i kolim dispela kain wasman olsem wasman sekit. Dispela wok i kirap long Janueri 1943 na long dispela taim, long Englan, i gat 6-pela wasman sekit tasol i stap. Pastaim ol i tok mi ken mekim dispela wok inap wanpela mun tasol, tasol mi mekim i go inap 3-pela yia olgeta. Long dispela taim nogut bilong Namba Tu Pait Bilong Olgeta Hap, ol i givim narapela wok tu long mi, em wok bilong lukautim tripela bikpela kibung−bipo mi no bin mekim wok olsem.
Wok sekit long dispela taim bipo i narapela kain. Oltaim mipela i raun raun, na long taim bilong pait long Englan i hatwok long raun. Sampela taim mi kikim wilwil na mi raun lukim ol kongrigesen. Long dispela taim bipo, mipela ol wasman sekit i save lukim planti kongrigesen long wanpela wik, i no wanpela tasol olsem long nau. Sapos ol kongrigesen i liklik, sampela taim mipela i go lukim 6-pela long wanpela wik!
Mipela save mekim wok olsem: Lusim slip na kirap long 5:30 long moningtaim; kisim liklik kaikai; raun i go long kongrigesen. Long 8 klok, kirap lukim ol ripot samting bilong kongrigesen. Long belo bek, autim tok. Long apinun, bung wantaim ol brata i lukautim kongrigesen na toktok wantaim ol inap wanpela aua, na bihain mekim tok long kongrigesen. Mi save slip long 11 klok nait; na sapos mi raitim ripot long kongrigesen bai mi go slip long biknait samting. Mipela makim olgeta Mande bilong raitim pinis ol ripot, na bilong stadi, na bilong redi long wik antap.
Ating yu bai tok, ‘Olaman! Yupela i mekim planti wok!’ Tru, tasol mipela i amamas long mekim, long wanem mipela save mipela i strongim ol brata long dispela taim bilong pait, na helpim ol long i stap klostu long oganaisesen. Mipela pilim tru olsem mipela i helpim ol kongrigesen long “kamap strong moa” long bilip.−Aposel 16:5.
Mi Wok Gen long Betel
Long Epril 1946 ol i singautim mi i go wok gen long Betel. Mi amamas long mekim olsem, tasol taim mi raun lukim ol kongrigesen inap 3 yia hap, dispela i bin strongim mi long spirit. Dispela wok i bin helpim mi long save gut long oganaisesen bilong Jehova. Mi pilim olsem mi bin mekim ol samting olsem Sam 48:12, 13 i stori long en: “Yupela mas wokabaut long maunten Saion, na raunim banis bilong taun na kaunim ol taua bilong en. . . . lukim gut ol strongpela haus bilong en.” Mi bin wokabaut raun lukim lain bilong God na dispela i kirapim mi long laikim moa yet “ol Kristen brata.”−1 Pita 2:17.
Taim mi kirap wok gen long Betel mi lukautim wok bilong wokim ol buk na nius, na bihain mi insait long wok bilong wokim ol plet ain i gat rait bilong ol buk na nius long en. Na bihain moa, olsem long Septemba 1977, mi kisim wanpela gutpela wok tru−ol i singautim mi i go insait long Lain Bilong Bosim Ol Witnes, long Bruklin, Nu Yok, long Amerika.
Mi no ken haitim: Sampela taim mi pilim olsem mi laik ‘ranawe’ long sampela wok mi bin kisim, long wanem i hatwok long mi mekim. Tasol taim mi pilim olsem, mi save tingim Jona na pasin kranki em i mekim, na mi save tingim tingim gutpela tok promis i stap long Sam 55:22: “Olgeta hevi yu karim, em yu mas givim long Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” Mi save bihainim dispela tok na tru tumas, Jehova i bin strongim mi!
Jehova i no save tokim yumi long mekim wanpela wok yumi no inap mekim. Tasol olgeta wok em i givim long yumi, yumi inap mekim long strong bilong Em tasol. Na narapela samting bilong helpim yu long mekim ol wok bilong yu, em olsem: Sapos yu laikim tru ol brata, bai ol i helpim yu na sambai long yu; bai ol i “wok gut wantaim” yu.−Sefanaia 3:9, NW.
Ol Gutpela Poroman
Tru, i gat sampela brata bai ol i stap olsem gutpela poroman tru bilong yu. Wanpela gutpela poroman bilong mi, em Brata Alfred Pryce Hughes, em i dai pinis long yia 1978. Stori bilong em i stap long Wastaua (tok Inglis) bilong Epril 1, 1963. Inap planti yia em i stap wasman bilong brens long Englan, na bihain em i stap long Komiti Bilong Brens. Ol brata sista long Englan i laikim tru em, long wanem em i save bihainim gut tok bilong oganaisesen bilong Jehova, na em i stap gut long dispela oganaisesen, na em i laikim tru olgeta brata. Na em i laikim tru wok bilong autim tok. Inap long taim em i dai, maski em i gat wanem wanem bikpela wok, tasol em i no lusim wok bilong autim tok. Mi wok wantaim ol gutpela brata, olsem Pryce, na dispela i strongim mi long i stap klostu long oganaisesen bilong Jehova na wok strong long autim tok.
Long Oktoba 29, 1960 mi kisim wanpela gutpela poroman tru, em wanpela strongpela sista painia, em i bin skul long Namba 11 Klas bilong Skul Giliat na em i kamap misineri long kantri Aialan. Long Oktoba 9, 1960 mi maritim dispela sista, em Mildred Willett, na inap long nau em i wok wantaim mi long Betel.
Mama bilong Mildred i dai long yia 1965 na paslain liklik long taim em i dai, em i givim wanpela gutpela tok long Mildred, em i tok: ‘Yu no ken tingting nogut long Jehova.’ Mildred i no lusim tingting long dispela tok bilong mama bilong em, olsem na taim mi gat bikpela wok na mi mas lusim planti aua long mekim, Mildred i stap bel isi. Em i save mi mekim wok bilong Jehova na em i no tingting nogut long Jehova. Dispela samting i helpim mi long lukautim gut wok bilong mi na amamas long mekim. Mitupela i amamas tu long wok wantaim long autim tok, na planti gutpela samting i bin painim mipela.
Mipela i bin stadi wantaim wanpela yangpela man na meri bilong em na kwiktaim tupela i dediket na kisim baptais na mekim wok bilong autim tok long olgeta taim. Mitupela i amamas tru! Tasol bihain gen, wantu ol i lusim ol miting na ol i no bung moa wantaim ol brata. Mi tupela Mildred i bel hevi; mipela i pilim olsem mipela i no bin lainim gut tupela. Oltaim mipela i save beten askim Jehova long helpim tupela bambai ol i ken mekim ol samting bilong kamapim bel bilong ol, ol i laikim tok i tru. Tenpela yia bihain, tupela i raitim pas long mipela na tokim mipela ol i kirap gen long bung wantaim na wok wantaim ol brata na i gat Buk-Stadi long haus bilong ol. Mitupela i amamas tru.
Long pas bilong tupela, dispela yangpela man, nem bilong em Will, em i tok: “Mi laik tok tenkyu long yutupela, long wanem yupela i bin wok strong long helpim mipela . . . Mi bin lusim tok i tru, long wanem mi no givim bel tru . . . Nau mipela i kam bek pinis insait long oganaisesen bilong Jehova na bel bilong mipela i amamas tru . . . Mi tingim gutpela wok yutupela i bin mekim na mi raitim dispela pas. Jehova i mas wok yet long blesim ol wok yutupela i mekim.”
Na wanpela mama i raitim pas long mitupela na stori long pikinini man bilong em, Maik (Mike). Em i tok: ‘Ating ol ensel i wokim rot na Maik i sindaun klostu long yupela.’ Wanem insait bilong dispela tok? Nau mi ken stori: Maik i kam long wanpela kibung wantaim mama bilong em na liklik brata bilong em, tasol em i no givim bel long tok i tru. Mildred i lukim em i sindaun em wanpela tasol na em i go toktok wantaim em. Bihain mitupela i singautim em wantaim liklik brata bilong em i kam long Betel bilong lukim ol wok mipela save mekim.
Bihain Maik i kam na ol samting em i lukim i kirapim em long stadi. Na wanem samting i kamap? Nau em i wanpela elda long kongrigesen, na meri bilong em wantaim tupela pikinini man bilong em, olgeta ol i save autim tok. Sampela yia bipo, meri bilong Maik i raitim pas na em i tok: ‘Maik i bin stori long mi long taim em i bungim yutupela . . . em i pilim tru gutpela pasin yupela i bin mekim, em yutupela i tingim em na toktok wantaim em.’
Taim mitupela meri bilong mi i kisim kain tenkyu olsem long sampela man mipela i bin helpim ol, olsem Will na Maik, bel bilong mipela i pilim tru na mipela i tenkyu long Jehova! Ol dispela ‘pas i litimapim nem bilong mipela’ ol i olsem gutpela prais mipela i kisim−ol i hap bilong bikpela amamas yumi inap kisim sapos yumi stap klostu long oganaisesen bilong Jehova.−2 Korin 3:1-3.
Mekim Wok long Nambawan Ofis
Edita bilong wanpela nius long Bruklin i stori long ol 3,500 Witnes i wok long nambawan ofis long Bruklin, Nu Yok, na long ol gaden bilong Sosaiti i stap longwe long biktaun Nu Yok inap 160 kilomita, na em i tok: ‘Ol yet ol i olsem wanpela lain.’ Tru tumas, ol manmeri spirit i bin makim ol, ol i olsem wanpela lain bilong spirit long ai bilong Jehova. Long nau, planti tausen tausen manmeri bilong ol lain bilong dispela graun ol i kam bung wantaim dispela lain bilong spirit na ol i tokim ol: “Mipela bai go wantaim yupela, long wanem mipela harim ol i tok God i stap wantaim yupela.”−Sekaraia 8:23, NW; 1 Pita 2:9.
Mi wantaim meri bilong mi, mitupela i amamas tru mipela i insait long bikpela lain brata ol i wok long Nambawan Ofis. Inap 8-pela yia pinis mipela i bin wok wantaim ol na long tingting bilong mi, dispela 8-pela yia i nambawan gutpela taim long ol yia mi bin mekim wok bilong God. Long wanem mipela i stap long nambawan ofis, em ples bilong redim ol kaikai bilong spirit na salim i go long olgeta hap bilong graun; na long dispela ples yu inap lukim spirit bilong Jehova i wok long stiaim tingting bilong ol brata na helpim ol long tingim gut ol bikpela wok ol i mas mekim. Na long dispela ples yu inap lukim olsem Jehova i blesim wok bilong autim tok bilong Kingdom na kamapim ol disaipel. Ol samting i bin painim mi insait long dispela hap taim i kirapim mi long i stap klostu moa yet long oganaisesen bilong Jehova.
Mi stori long wan wan samting i bin painim mi, tasol ating ol dispela samting mi bin stori long en inap helpim yu long save bilong wanem mi tenkyu long Jehova long ol gutpela brata bilong yumi ol i stap long olgeta hap bilong graun. Taim mi raun long balus i go long Abadin long dispela moningtaim long Jun 1986, mi tingim ol gutpela samting i bin painim mi insait long lain bilong Jehova na mi tenkyu long Em. Gutpela sapos sampela taim yumi tingim ol gutpela wok Jehova i bin mekim bilong helpim yumi.−Sam 40:5.
Balus i pundaun long ples balus long Abadin na susa bilong mi, Louie, em i wetim mi i stap. Em i stap gut long wok bilong Jehova inap 60 yia pinis. Mi tenkyu long Jehova long dispela samting tu, long wanem aposel Pol i tok, Jehova i laik bai yumi “lukaut gut” long wok bilong yumi. (1 Korin 4:2) Sapos wanpela long famili i stap gut long Jehova, dispela i save strongim tru ol narapela insait long famili!
Bipo Moses i beten na em i tok: “Yu skulim mipela gut bai mipela . . . i gat gutpela save tru.” (Sam 90:12) Mitupela Mildred i wok long i go lapun na nau mipela i save tru, yumi no ken ting save bilong yumi yet inap helpim yumi. Yumi mas larim gutpela save bilong Jehova i soim rot long yumi bambai yumi inap mekim ol wok i kamapim long ples klia olsem yumi laikim tru Jehova na ol brata. Sapos yumi stap klostu long oganaisesen bilong Jehova, bai Jehova i soim dispela rot long yumi.
[Piksa long pes 27]
John Barr (long paslain, han kais) long yia 1930 samting, wantaim susa, na brata, na papamama bilong em
[Piksa long pes 30]
John Barr long nau, wantaim meri bilong em, Mildred