Pilim Tru Ol Gutpela Wok Bilong God Yumi Mekim
YUMI no ken ting ol wok bilong God yumi mekim i liklik samting. Taim ol pris bilong lain Juda bilong bipo i no pilim gutpela wok ol i mekim long tempel bilong Jehova, em i strong long stretim ol. (Malakai 1:6-14) Na taim sampela bilong lain Israel i kirapim ol Promisman long mekim nabaut long ol samting ol i orait long en bilong mekim wok bilong God, Jehova i krosim dispela ol Israel i mekim sin. (Amos 2:11-16) Ol Kristen tru i save mekim wok bilong God tu, na ol i ting em i bikpela samting. (Rom 12:1) I gat planti narapela narapela wok bilong God, na olgeta i bikpela samting.
Taim Jisas i stap yet long graun wantaim ol disaipel bilong em, em i lainim ol long autim tok long Kingdom bilong God. Bihain dispela tok ol i autim bai go long olgeta hap bilong graun. (Matyu 28:19, 20; Aposel 1:8) Dispela wok bilong autim tok i bikpela samting moa yet long taim bilong las de bilong dispela graun.
Olgeta Witnes Bilong Jehova i mekim dispela wok. Planti handet tausen i amamas long mekim dispela wok olsem painia. Bilong inapim ol bikpela wok long olgeta hap bilong graun, planti tausen i amamas long mekim wok bilong God long olgeta de long Betel, o mekim wok bilong raun olsem wasman sekit na wasman distrik, o mekim wok misineri. Ol man i laik mekim yet wok bilong God long olgeta de, wanem samting inap painim ol?
Taim i Gat Wok Long Helpim Famili
Paslain long man i kirap mekim wok bilong God long olgeta de, ating em i mas mekim sampela senis long sindaun bilong em. Olgeta man i no inap mekim olsem. Ating ol wok Baibel i tok man i mas mekim i pasim em long mekim wok painia samting. Tasol olsem wanem taim sampela hevi i kamap long famili, olsem lapun papamama i sik samting? Man i insait pinis long wok painia samting em i mas mekim wanem? Ol lo na tok bilong Baibel nau bai yumi stori long en i soim rot long yumi.
Olgeta samting yumi mekim i mas stret wantaim pasin pren bilong yumi wantaim Jehova. (Saveman 12:13; Mak 12:28-30) Yumi mas ting ol wok holi yumi kisim ol i bikpela samting tru. (Luk 1:74, 75; Hibru 12:16) Wanpela taim Jisas i tokim wanpela man i gat wok long senisim tingting bilong em long wanem wok i bikpela samting tru, na wanem wok i no bikpela tumas, olsem em i mas givim bel long autim tok long Kingdom bilong God. Dispela man i laik surikim taim bilong mekim dispela wok i go inap long papa bilong em i dai pastaim. (Luk 9:59, 60) Jisas i kamapim long ples klia tingting kranki bilong ol man i tok, ol i givim olgeta samting long God, tasol ol i no “mekim ol samting bilong helpim papamama.” (Mak 7:9-13) Aposel Pol tu i tok em i bikpela wok long “lukautim ol wanblut tru,” olsem papamama na ol lapun bubu.—1 Timoti 5:3-8.
Olsem wanem? Dispela i makim olsem taim i gat wok bilong lukautim wanpela long famili, ol man i mekim wok bilong God long olgeta de ol i mas lusim wok bilong ol bilong lukautim dispela man? I gat planti samting man i mas skelim bilong bekim dispela askim. Em samting man yet i mas tingim na pasim tok long bel long samting em bai mekim. (Galesia 6:5) Planti ol i laikim tru wok ol i mekim, tasol ol i ting ol i mas stap wantaim papamama na lukautim ol. Bilong wanem ol i ting olsem? Ating ol i go helpim papamama, long wanem, i no gat narapela long famili inap helpim ol, o kongrigesen i no inap givim kain helpim papamama i mas kisim. Sampela inap mekim yet wok painia maski ol i mas lukautim papamama. Na sampela narapela inap mekim gen wok bilong God long olgeta de taim i no gat wok moa long lukautim papamama. Tasol planti inap stretim dispela wok long ol narapela rot.
Ol i Mekim Wok Bilong Ol
Taim i gat wok bilong lukautim papamama, sampela i mekim wok bilong God long olgeta de, ol inap mekim dispela wok na stap yet long wok painia bilong ol. Tingim sampela bilong planti man olsem.
Tupela marit i wok long nambawan ofis bilong ol Witnes Bilong Jehova ol i kirap wok long Betel long 1978, bihain long ol i bin mekim wok sekit na wok distrik. Brata i mekim bikpela wok insait long oganaisesen bilong God. Tasol i mas i gat man bilong helpim papamama bilong em tu. Long olgeta yia, inap 3-pela o 4-pela taim dispela tupela marit i wok long Betel ol i save go helpim papamama. Long olgeta taim ol i go i kam, ol i mas raun inap 3,500 kilomita. Bilong helpim papamama, tupela yet i wokim haus bilong papamama. Na ol i bin go lukim papamama taim ol bikpela sik i painim ol. Inap 20 yia nau, ol i bin mekim wok long ol de malolo bilong ol long mekim dispela wok. Ol i laikim tru papamama na ol i givim biknem long ol, tasol ol i tingim wok bilong God ol i save mekim long olgeta de em i wanpela gutpela samting tru.
Wanpela narapela brata i bin mekim wok olsem wasman bilong raun inap 36 yia, em i stori long wanpela bikpela hatwok tru i painim em, winim ol narapela samting i bin givim hatwok long em. Tambu mama bilong em i gat 85 krismas na em i wanpela gutpela wokmeri bilong Jehova, tasol em i mas i stap wantaim wanpela man em inap helpim em. Long dispela taim, klostu olgeta pikinini bilong em ol i ting ol i no inap kisim lapun mama bilong i stap wantaim ol. Wanpela wanblut i tokim dispela wasman bilong raun olsem em na meri bilong em i mas lusim wok bilong ol, na bilong helpim famili ol i mas lukautim mama. Tasol dispela tupela marit i no lusim gutpela wok bilong ol, na tu, ol i ting wok bilong lukautim mama i bikpela samting. Inap 9-pela yia, mama i stap wantaim ol klostu olgeta taim. Pastaim ol i stap long wanpela haus-ka, na bihain long narapela narapela haus ol sekit i larim ol i stap long en. Long dispela taim, brata i wanpela wasman distrik, na em i lusim bikpela hap taim long raun na mekim wok bilong em, na meri bilong em i stap wantaim mama na mekim gutpela wok bilong lukautim em long olgeta de. Long olgeta wik, bihain long ol miting long Sande, brata i kam long longwe rot bilong helpim tupela. Planti i save long i stap bilong dispela tupela marit, na ol i tok, ol i pilim tru gutpela wok tupela i mekim. Bihain sampela long famili tu i kirap mekim sampela wok bilong helpim mama. Planti tausen long lain bilong Jehova ol i kisim yet helpim long wok bilong dispela tupela marit i daunim laik bilong ol yet, long wanem, ol i no lusim wok bilong God ol i save mekim long olgeta de.
Famili i Wok Wantaim
Taim olgeta insait long famili i pilim tru wok bilong ol painia samting, ating bai ol i wok gut wantaim bambai sampela long famili inap mekim dispela wok.
Dispela pasin bilong famili long wok gut wantaim i bin helpim tupela marit bilong Kanada i save mekim wok misineri long Wes Afrika. Ol i no wet i go inap long taim wanpela bikpela hevi i kamap na ol i no ting wanpela hevi i no inap kamap, nogat. Paslain long ol i go long Wastaua Baibel Skul Bilong Gileat bilong redi long go long narapela kantri, dispela man i toktok wantaim liklik brata bilong em long wok bilong lukautim mama bilong ol sapos sik i kisim em o hap skin bilong em i bagarap. Liklik brata i soim olsem em i laikim tru mama bilong ol, na tu, em i ting wok misineri i bikpela samting, olsem na em i tokim brata bilong em olsem: “Mi gat famili na ol pikinini. Mi no inap i go longwe na mekim ol wok yu inap mekim. Olsem na sapos wanpela samting i painim mama, mi bai lukautim em.”
Tupela marit i wok misineri long Saut Amerika, na famili bilong meri i wok gut wantaim tupela bilong lukautim lapun mama bilong meri. Wanpela susa bilong em na man bilong susa i lukautim mama i go inap long taim dispela susa yet i kisim wanpela sik i laik bagarapim em. Orait, wanem samting i kamap nau? Bilong helpim tupela marit long i stap bel isi, tambu man i raitim pas long ol na em i tok: “Taim mi na ol pikinini i stap laip, yupela i no ken lusim wok misineri bilong yupela.” Sampela helpim moa i kam taim narapela susa wantaim man bilong em i salim haus bilong ol na ol i go sindaun long hap mama i stap long en bilong lukautim em, na ol i mekim olsem i go inap mama i dai. Tru tumas, ol i gat pasin bilong wok gut wantaim! Olgeta i helpim wok misineri.
Ol Papamama i Givim Pikinini Long Jehova
Planti papamama i pilim tru long bel olsem wok bilong God em i bikpela samting. Wanpela bilong ol nambawan gutpela samting ol papamama i ken givim long Jehova, em pikinini bilong ol yet. (Sindaun 3:9) Planti papamama Kristen i strongim pikinini bilong ol long mekim wok bilong God long olgeta de. Na sampela i pilim wankain olsem Hana i bin givim pikinini man bilong em Samuel long Jehova long mekim “wok bilong Bikpela oltaim.”—1 Samuel 1:22, 28.
Wanpela kain mama olsem, em i raitim pas i go long pikinini meri bilong em long Afrika. Em i tok: “Mipela i tok tenkyu long Jehova long gutpela wok yu bin kisim. I no gat narapela wok mipela i laik yu mekim.” Na narapela taim mama i tok: “Tru, mipela i mas daunim laik bilong mipela long stap klostu long yu, tasol mipela i amamas tru taim mipela i lukim olsem Jehova i lukautim yu!”
Wanpela misineri long Ekwado i tingim gen ol samting i bin kamap taim ol i mas stretim wok bilong lukautim lapun papamama bilong em, na em i tok: “Mi ting nambawan bikpela samting i helpim mi na meri bilong mi, em ol beten bilong papa bilong mi. Taim em i dai pinis mama bilong mi i tokim mipela olsem: ‘Long olgeta wan wan de papa bilong yu i bin beten long Jehova long larim yupela i stap long hap yupela i mekim wok misineri long en.’ ”
Tupela lapun marit long Kalifonia, Yunaitet Stets, ol i amamas long wanpela pikinini man bilong ol i mekim wok bilong God long olgeta de. Dispela pikinini man na meri bilong em ol i stap long Spen taim mama bilong man i dai. Ol narapela long famili i ting ol i mas stretim rot bilong lukautim papa. Ol i mekim wok mani na ol i mekim bikpela long pikinini bilong ol, olsem na ol i ting ol i no inap lukautim papa. Olsem na ol i strong na tokim tupela marit i mekim wok bilong God long olgeta de long kam bek long ples na lukautim papa. Tasol maski papa i gat 79 krismas, em i no save sik tumas, na tu, em i gat stretpela tingting long ol samting bilong spirit. Long wanpela bung bilong famili bihain long sampela i kamapim tingting bilong ol, papa i sanap na em i tok strong olsem: “Mi laik ol i go bek long Spen na mekim wok bilong ol.” Ol i go bek, tasol ol i mekim bikpela wok tu bilong helpim papa. Nau ol i mekim wok sekit long Spen. Bihain long dispela bung bilong famili, ol narapela insait long famili ol i pilim tru wok tupela marit i mekim long narapela kantri. Bihain long sampela yia, wanpela pikinini man i kisim papa bilong lukautim em i go inap long papa i dai.
Long Pensilvenia, Yunaitet Stets, wanpela lapun brata bilong liklik lain i bin mekim wok painia inap 40 yia na em i winim 90 krismas taim meri bilong em i kisim bikpela sik na i dai. Em i gat wanpela pikinini man na 3-pela pikinini meri, na planti pikinini bilong spirit. Wanpela pikinini meri bilong em i bin mekim wok bilong God long olgeta de inap 40 yia. Em i bin mekim wok misineri wantaim man bilong em, na wok bilong raun long ol kongrigesen, na wok long Betel. Em i stretim rot bambai papa i kisim helpim. Ol brata tu i helpim em na ol i kisim papa i go long ol miting long Haus Kingdom. Bihain long man bilong sista i dai, sista hia i askim papa, em i laik em i lusim Betel bilong lukautim em o nogat. Papa i save pilim tru ol samting bilong spirit, na em yet i ting i gat ol narapela rot bilong lukautim em. Olsem na em i tok: “Em bai nogut tru sapos yu lusim Betel, na em bai nogut moa sapos mi larim yu long mekim olsem.”
Ol Kongrigesen i Helpim Ol
Sampela kongrigesen i helpim gut wok bilong lukautim lapun papamama bilong ol man i mekim wok bilong God long olgeta de. Ol i amamas tru long ol man i bin mekim kain wok olsem inap planti yia pinis. Tru, ol kongrigesen i no ken mekim olgeta wok em Baibel i tok famili i mas mekim, tasol ol inap mekim planti samting na ating ol pikinini i no gat wok long lusim wok painia samting bilong ol.
Tupela marit bilong Jemani i bin mekim wok misineri long narapela kantri inap 17 yia, na bikpela hap bilong dispela taim ol i bin mekim wok bilong raun. Long dispela taim lapun mama bilong man i mas kisim helpim. Long olgeta yia long taim bilong malolo ol i go helpim mama. Ol Witnes i stap klostu long lapun mama, ol tu i sori long em na helpim em. Orait, taim tupela marit i stap wantaim mama taim em i gat bikpela sik, ol elda bilong kongrigesen i stretim rot long bung wantaim ol. Ol i save gut long ol samting dispela tupela marit i save mekim bilong helpim mama. Na ol i pilim tru wok bilong spirit dispela tupela marit i mekim. Olsem na ol elda i stori long sedyul ol i bin wokim bilong lukautim mama, na ol i tok: “Yupela i no inap mekim sampela wok moa bilong lukautim mama antap long wok yupela i mekim; mipela bai helpim yupela bambai yupela inap i stap long Spen na mekim wok bilong yupela.” Inap 7-pela yia nau, ol dispela elda i bin mekim olsem.
Kirap long 1967 i kam inap nau wanpela brata i wok long Senegal, na em tu i bin kisim gutpela helpim long kongrigesen papa bilong em i stap long en. Taim bikpela hevi i kamap, dispela man—meri bilong em i amamas long wok gut wantaim em—em wanpela i go long Yunaitet Stets bilong helpim papamama bilong em. Em i mas i stap long ples inap sampela mun. Em i hatwok tru, tasol taim em i bin mekim ol samting em inap mekim, kongrigesen i kirap helpim em bambai em inap mekim yet wok misineri. Inap 18 yia, dispela kongrigesen i mekim pasin sori na helpim ol lapun long planti rot. Pastaim ol i helpim papa (maski em i no luksave moa long planti bilong ol) na bihain ol i helpim mama. Olsem wanem? Dispela i mekim na pikinini man i no gat wok long lukautim papamama? Nogat tru. Planti taim em i lusim Senegal na kam long ples long taim bilong malolo na mekim olgeta samting em inap mekim bilong helpim papamama. Tasol planti long dispela kongrigesen ol i amamas long save olsem wok ol i mekim i helpim dispela tupela marit i save wok strong long mekim yet wok bilong God long olgeta de long Senegal.
Jisas i tok, ol man i lusim olgeta samting bilong mekim wok bilong autim gutnius, ol bai kisim planti handet brata, susa, mama, na ol pikinini. (Mak 10:29, 30) Dispela i save kamap tru namel long ol wokman bilong Jehova. Tupela marit i wok long Benin, Wes Afrika, ol i pilim tru dispela samting taim tupela Witnes long kongrigesen bilong papamama bilong tupela ol i tok, ol i no ken tingting planti long papamama. Ol i tok: “Papamama bilong yupela ol i papamama bilong mipela tu.”
Tru tumas, i gat planti rot yumi inap soim olsem yumi pilim tru ol wok bilong God. Olsem wanem? I gat sampela rot yu inap mekim olsem moa yet?
[Ol Piksa long pes 26]
Ol i save mekim wok bilong God long olgeta de