Stap Amamas Long Mekim Wok Bilong God Long Olgeta De
OL TOK profet bilong Baibel i wok long kamap tru long nau, ol i kamapim klia olsem yumi stap long taim bilong las de bilong dispela graun, em ol manmeri i save givim baksait long God. Ol wokboi bilong God Jehova i save long dispela samting, olsem na ol i wok strong long autim gutnius bilong Kingdom. Winim 600,000 Witnes Bilong Jehova ol i stretim ol samting long i stap bilong ol bambai ol inap mekim wok bilong God long olgeta de. Sampela ol i save autim tok bilong Kingdom long olgeta de, em ol i kolim painia. Sampela ol i save mekim wok long Betel long nambawan ofis bilong Sosaiti Was Taua o long ol brens-ofis bilong en. Na sampela moa ol i misineri na wasman bilong raun.
Baibel i makim olsem long taim bilong las de “planti hevi nogut tru bai i kamap.” (2 Timoti 3:1-5) Dispela skripsa long Baibel ol i bin raitim long tok Grik, em i gat wanpela tok yumi ken tanim olsem ‘taim bilong kros pait.’ Olsem na yumi no ken ting, long taim bilong yumi i no gat hevi na kros pait samting bai kamap. Long sampela Kristen, ol hevi i bikpela tumas, olsem na ol i tingting, ‘Mi inap mekim yet wok bilong God long olgeta de o mi mas lusim?’
Wanem sampela hevi inap kirapim sampela long skelim gen wok bilong ol olsem painia, o man bilong wok long Betel, o wasman bilong raun, o misineri? Ating sampela i gat bikpela sik. O ol i gat wanpela wanblut i lapun o i gat sik na i mas i gat man bilong lukautim em long olgeta taim. O ating tupela marit bai i gat pikinini ol i mas lukautim. Sapos long dispela as wanpela i mas lusim wok painia samting, na i gat sampela wok em i mas mekim olsem Baibel i makim, em i no ken sem long lusim dispela wok bilong em.
Tasol olsem wanem sapos wanpela i no kisim amamas moa long mekim wok bilong God long olgeta de na long dispela as em i tingting long lusim? Ating painia i lukim olsem taim em i autim tok, i no gat planti man i laik harim, na em i tingting, ‘Bilong wanem bai mi wok yet long lusim planti laik bilong mi long mekim dispela wok long olgeta de na i no gat planti man i laik harim dispela tok?’ O ating wanpela i wok long Betel na em i no amamas tumas long wok em i mas mekim. O ating wanpela sik i mekim na bihain em i no amamas moa, tasol dispela sik i no pasim em long mekim wok painia. Orait, ol i ken mekim wanem na bai ol inap i stap amamas yet long dispela wok? Orait yumi ken harim tok bilong sampela em ol i bin mekim dispela kain wok inap planti yia.
Pasin Bilong Daunim Bel Hevi
Anny em wanpela meri bilong Swiselan, na long 1950 em i bin go long Wastaua Baibel Skul Bilong Gileat. Em i amamas long tingim wok misineri em bai mekim long narapela kantri. Orait taim ol i makim em bilong i go mekim wok long Betel long Yurop, em i bel hevi. Tasol em i orait long mekim dispela wok long Dipatmen Bilong Tanim Tok, na em i stap yet long dispela wok. Em i bin mekim wanem bilong daunim dispela bel hevi bilong em? Anny i tok: “Bipo i gat planti wok bilong mekim, na nau tu i gat planti wok. Ol dispela wok i bikpela samting, na ol tingting na laik bilong mi long wanem kain wok mi yet mi laik mekim, em i no bikpela samting.”
Sapos yumi bel hevi long wanpela wok yumi kisim, yumi ken wok long kisim tingting bilong Anny. Ol laik bilong yumi yet long wanem kain wok yumi laik mekim, em i no nambawan bikpela samting. Bikpela samting tru, em yumi mas mekim gut ol dispela kain kain wok, em i hap bilong dispela wok bilong autim tok bilong Kingdom long ol man. Sindaun 14:23 i tok: “Sapos yu wok hat, orait bai yu kisim gutpela pe.” Maski yumi kisim wanem kain wok, sapos yumi stap gut long dispela wok, dispela bai helpim wok bilong Kingdom long go kamap long olgeta hap. Na yumi inap belgut tru—yes, yumi inap kisim bikpela amamas—long mekim dispela wok God i givim long yumi.—Skelim wantaim 1 Korin 12:18, 27, 28.
Stap Gut Wantaim Ol Narapela
Taim yumi mekim wok bilong God long olgeta de, yumi mas bung wantaim ol kain kain man—olsem taim yumi autim tok, o mekim wok long Betel, o long wanpela haus misineri, o taim yumi mekim wok olsem wasman bilong raun na yumi go lukim ol narapela narapela kongrigesen long olgeta wik. Olsem na sapos yumi wok long i stap gut wantaim ol narapela, dispela bai helpim yumi long i stap amamas. Tasol dispela taim bilong ‘kros pait’ Baibel i tok bai kamap long taim bilong yumi, em i save givim hatwok long ol man long i stap gut wantaim ol narapela. Orait, man i mekim wok bilong God em inap mekim wanem na bai em i no ken lusim amamas bilong em, maski wanpela i bin bagarapim bel bilong em? Ating stori bilong Wilhelm inap givim sampela gutpela tingting long yumi.
Wilhelm em i bin i go wok long wanpela Betel long Yurop long 1947. Bihain, inap sampela yia, em i mekim wok painia na wok wasman bilong raun. Wilhelm i tok: “Sapos mi wantaim meri bilong mi i lukim sampela samting mitupela i ting i no stret o mipela i tingting planti long en, mipela i save kamapim bel bilong mipela long Jehova na nau mipela i larim em yet i stretim dispela samting.”—Song 37:5.
Ating yu yet yu bin bel hevi long pasin bilong wanpela wanbilip Kristen, em i bin mekim sampela tok long yu i daunim yu, o em i no tingting gut pastaim na em i mekim dispela tok. Tasol yu mas tingting: Sampela taim yumi olgeta i save mekim sampela tok i no stret long mekim. (Jems 3:2) Olsem na long kain taim olsem, i gutpela sapos yu go klostu long Man bilong harim beten. (Song 65:2) Toktok wantaim Jehova long dispela samting, na nau larim dispela hevi i stap long han bilong em. Sapos God i laik senisim sampela samting, em bai mekim. Ol manmeri i save sindaun long ol haus misineri ol i mas tingim dispela samting sapos kain hevi olsem i kamap namel long ol, long wanem, dispela bai helpim ol long i stap amamas yet long wok bilong Jehova.
Taim Yumi Gat Sik
I no gat planti man em sik i no save painim ol. Maski man i hap yangpela yet na em i gat strong, bikpela bel hevi o sik inap painim em. Sampela ol i mekim wok bilong God long olgeta de, tasol sik i painim ol na ol i mas lusim dispela wok. Tasol ol i wok yet long mekim gutpela wok tru olsem man bilong autim tok bilong Kingdom. Sampela ol inap mekim yet wok bilong God long olgeta de, maski ol i gat sik. Yumi ken tingim Hartmut na Gislind.
Hartmut na Gislind ol i tupela marit, na inap 30 yia ol i bin mekim wok olsem painia, misineri, na wok bilong raun na lukim ol kongrigesen. Sampela taim bikpela sik i bin painim tupela, na dispela i mekim na sampela taim i olsem strong bilong ol i pinis. Tasol ol i bin mekim gutpela wok tru na ol i strongim bel bilong ol narapela em ol i karim wankain hevi. Orait tupela i gat wanem tok bilong givim long yumi? Ol i tok: “Lukluk i go long ol samting bilong bihain—i no long ol samting i bin kamap bipo. Long olgeta samting i painim yu, wok long painim rot bilong mekim yet wok bilong yu. Ating long olgeta wan wan de bai yu painim wanpela rot bilong litimapim nem bilong Jehova. Taim rot i op olsem, orait mekim dispela wok, na kisim amamas long en.”
Na yumi ken tingim stori bilong Hannelore. Em i gat wanpela kain sik i bin kamap oltaim long em insait long 30 yia em i mekim wok painia, wok misineri, wok bilong raun wantaim man bilong em, em wanpela wasman bilong raun, na wok long Betel. Hannelore i tok: “Mi save tingim bikpela tok Satan i bin kamapim, em i tok, ol man i save mekim wok bilong Jehova taim i no gat hatwok long mekim. Sapos mi karim ol hevi na sanap strong yet, mi inap insait long wok bilong kamapim long ples klia olsem tok bilong Satan i giaman.” Dispela tingting em inap kirapim strong yumi long mekim yet dispela wok. Na tingim dispela samting: Taim ol traim i painim yu na yu stap gut long Jehova, dispela i bikpela samting long em.—Jop 1:8-12; Sindaun 27:11.
Taim yu laik bihainim stretpela tingting long ol samting yu mas mekim long sik bilong yu, tingim tupela samting long tok profet bilong Krais Jisas em i tok long pinis bilong dispela taim yumi stap long en. Jisas i tok profet long ol bikpela sik bai kamap long ol narapela narapela hap. Na em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:3, 14; Luk 21:11) Jisas i save, long taim bilong las de sik bai givim hatwok long lain bilong em. Tasol em i save, ol man i gat strongpela skin na ol man i gat bikpela sik tu ol bai mekim dispela wok bilong autim tok. Sapos yumi inap mekim yet wok bilong God long olgeta de, maski yumi gat sik, Jehova bai i no ken lusim tingting long dispela pasin bilong yumi long laikim tumas nem bilong em.—Hibru 6:10.
Stap Amamas, Maski Ol Man i Les Long Harim Tok
Pasin ol man i mekim taim yumi autim tok bilong Kingdom long ol, olsem ol i laik harim o nogat, dispela inap givim bel hevi long yumi. Wanpela man i bin mekim wok bilong God inap planti yia em i tok: “Sampela painia tu ol i save hatwok long kirapim tok wantaim ol man bilong haus.” Na em i tok: “Yumi olgeta i mas wok strong bambai amamas bilong yumi i no ken pinis.” Tru tumas, taim ol man i les long harim tok, dispela inap daunim amamas bilong yumi long mekim dispela wok. Olsem na taim painia i autim tok na planti taim ol man i les long harim, em inap mekim wanem bambai em i ken amamas yet long mekim dispela wok? Sampela man bilong autim tok inap planti yia ol i laik tokim yumi long sampela samting ol yet i bin traim na em i wok gut, olsem:
Taim ol man i les long harim tok, dispela i save givim hatwok long yumi, tasol i no olsem wok bilong yumi i lus nating. Maski planti man i les long harim tok bilong Baibel, dispela i no as na yumi ken lusim wok painia samting. Maski ol i no laik harim, yumi ken amamas yet long wok bilong yumi sapos yumi makim bikpela hap taim liklik long stadi gut long Baibel. Ol tok bilong Baibel em inapim yumi na bai “yumi i redi long mekim olgeta kain gutpela wok,” na wanpela em wok bilong autim tok long ol man i pasim yau na i no laik harim gutnius. (2 Timoti 3:16, 17) Bipo ol man i no laik harim tok bilong profet Jeremaia, tasol dispela i no pasim em long autim tok. (Jeremaia 7:27) Taim yumi stadi long Baibel wantaim ol buk na nius Kristen, dispela inap helpim tru yumi sapos yumi tingim gut ol tok i save strongim bilip bilong yumi na helpim yumi long save long ol samting yumi ken mekim taim ol man i les long harim tok.
Tru, taim ol man i les long harim tok, dispela i save givim hatwok long yumi. Tasol yumi ken skelim tingting bilong yumi long ol man yumi autim tok long ol. Bilong wanem ol i les long harim? Long sampela hap bilong Yurop, wanpela as na planti man i no laik harim tok bilong Baibel, em ol i save tingim wok nogut ol lotu giaman i bin mekim long bipo yet na i kam inap nau. Long nau ol man i pilim olsem ol i no gat wok long lotu, na ol i no laik insait liklik long lotu. Yumi mas redi long senisim sampela tok bilong yumi na yumi ken toktok wantaim ol man long ol samting i save painim ol, olsem planti man i no gat wok mani, sik, pasin raskol, sampela lain i no orait long ol narapela lain, ol man i wok long bagarapim graun na wara samting, na i olsem ol kantri i laik kirapim pait.
Taim yumi kirapim tok long man bilong haus, pastaim yumi ken kolim wanpela samting ol man bilong dispela hap i save tingim. Dietmar i bin traim long mekim olsem taim em i autim tok long wanpela ples na ol man i no laik harim. Wanpela man bilong ples i tokim em, long asde wanpela bagarap i bin kamap long dispela ples. Orait, bihain long en, long olgeta haus Dietmar i go long en long dispela ples, em i tokaut long ol man olsem em i sori tru long dispela hevi i bin kamap. Em i tok: “Wantu ol man i kirap long toktok. Olgeta man i tingim dispela bagarap i bin kamap. Long dispela de mi bin toktok gut wantaim planti man, long wanem, mi soim ol olsem mi tingim ol samting i save painim ol.”
Wanem wanem hap yumi save painim ol man, yumi mas autim tok bilong Kingdom long ol. Sapos yumi autim tok long kain kain taim na ples, dispela inap kamapim gutpela samting, na bilong lainim yumi yet long mekim dispela wok, yumi ken mekim wok long ol tok em ol buk na nius bilong Baibel i kamapim. Yumi inap kisim amamas taim wanpela man i givim sampela gutpela tok long yumi, o taim yumi tilim sampela Wastaua na Kirap! long man bilong haus. Sapos yumi bin go bek na lukim man i gat laik long harim tok, na yumi kirapim Baibel-stadi pinis wantaim em, orait yumi ken askim em: “Yu save long narapela man em i laik stadi long Baibel?” Dispela inap mekim na bai yumi kirapim Baibel-stadi long narapela man. Tasol maski dispela samting i no kamap, yumi mas wok yet i go, na yumi mas beten na wetim Jehova, na maski ol man i les long harim tok, yumi no ken larim dispela samting i daunim yumi na yumi bel hevi.
Ol Narapela i Strongim Yumi
Inap 30 yia Jürgen na Christiane i bin mekim wok painia na wok bilong raun. Wanpela taim ol i kisim wok bilong autim tok long wanpela hap ol man i les long harim tok bilong Baibel na tingting bilong ol i pas. Man! Jürgen wantaim meri bilong em i krai tru long wanpela inap strongim bel bilong ol! Tasol ol narapela long kongrigesen i no pilim dispela samting na ol i no strongim bel bilong tupela. I gat wanem as bilong dispela, em yumi no save.
Olsem na Jürgen i pilim pinis olsem “sampela painia ol i gat hatwok tru. Ol elda na ol narapela pablisa ol i mas wok strong moa long strongim bel bilong ol dispela painia.” God i bin tokim Moses long strongim bel bilong Josua. (Lo 3:26-28) Na ol Kristen tu, narapela i mas wok long strongim bel bilong narapela. (Rom 1:11, 12) Ol pablisa bilong Kingdom ol i mas strongim bel bilong ol painia—ol i mas givim gutpela tok long ol i strongim bel bilong ol, na sampela sampela taim ol i ken i go wantaim ol long autim tok.
Amamas Long Jehova—Em Bai Strongim Yumi
Ol Kristen i bin winim planti yia tru long wok painia o wok misineri, o wok long Betel, o wok bilong raun na lukim ol kongrigesen, ol i bin lukim olsem klostu olgeta hevi i painim ol, ol i save stap sotpela taim tasol, tasol sampela hevi ol i stap longtaim. Na maski i gat ol wan wan hevi i olsem ol i no ken pinis, yumi no ken larim ol dispela hevi i tekewe amamas bilong yumi. Ramon i bin mekim wok bilong God long narapela kantri inap 45 yia samting, na em i tok, taim ol hevi i daunim yumi na yumi stap bel hevi, “yumi mas tingim planti blesing yumi bin kisim, na yumi mas tingim ol narapela—inap planti planti tausen—em ol i save karim ol bikpela hevi long sindaun bilong ol, winim yumi.” Tru tumas, ol pen na hevi i wok long painim ol wanbilip bilong yumi long olgeta hap, na Jehova i save tingim tru yumi olgeta.—1 Pita 5:6-9.
Olsem na sapos yumi gat rot long mekim wok bilong God long olgeta de na stap oltaim long dispela wok, yumi mas bilip na wetim Papa bilong yumi long heven na bai yumi inap amamas yet long mekim dispela wok. Jehova i save strongim ol wokboi bilong em, na yumi olgeta i mas tingim dispela samting: ‘Yumi mas amamas long Bikpela na bai em i strongim yumi.’—Nehemia 8:10.
[Piksa long pes 21]
“Dispela wok i bikpela samting, na ol tingting na laik bilong mi long wanem kain wok mi yet mi laik mekim, em i no bikpela samting”
[Piksa long pes 22]
“Mipela i save kamapim bel bilong mipela long Jehova na nau mipela i larim em yet i stretim”
[Ol Piksa long pes 23]
“Long olgeta samting i painim yu, wok long painim rot bilong mekim yet wok bilong yu. Ating long olgeta wan wan de bai yu painim wanpela rot bilong litimapim nem bilong Jehova”
[Piksa long pes 23]
“Sapos mi karim ol hevi na sanap strong yet, mi inap insait long wok bilong kamapim long ples klia olsem tok bilong Satan i giaman”
[Ol Piksa long pes 24]
“Sampela painia ol i gat hatwok tru. Ol elda na ol narapela pablisa ol i mas wok strong moa long strongim bel bilong ol dispela painia”
[Piksa long pes 24]
“Yumi mas tingim planti blesing yumi bin kisim”