Lotu i Bin Helpim Yumi o Nogat?
MARIA i stap sister Katolik inap 21 yia. Em i go bikpela namel long ol manmeri i save givim bel long lotu. Taim em i stap pikinini yet, long olgeta nait em i save beten bilong helpim ol narapela man! Tasol em i lukim planti man i stap rabis, na planti man i karim pen na hevi, na i no gat stretpela kot. Maski lotu i bosim ol man inap planti tausen yia pinis, tasol ol dispela hevi i stap yet. Maria i lukim dispela samting na em i tingting olsem: ‘Ating lotu i bin helpim yumi o nogat?’
Planti lotu ol i save kirapim ol manmeri long bihainim ol lo na stretpela pasin. Tasol planti man i ting lotu i save kamapim ol hevi, na i givim bikpela hatwok moa long yumi, na i no helpim yumi. Sampela man i lukim ol samting lotu i mekim na ol i tok: “Lotu tasol em i as bilong pasin nogut tru narapela man i mekim long narapela man.” (Nius National Review) “Lotu i nambawan as bilong ol pait i kamap long nau; pasin bilong mangal nogat.” (Nius Toronto Star) “Ol Kristen i baptais pinis ol i bin bagarapim ol Juda long Jemani long taim bilong Hitler.”−Nius The Tampa Tribune.
Olsem na planti man i ting olsem lotu i no helpim yumi. Ol i lukim pinis wok nogut lotu i kamapim. Wanpela nius (The Christian Century) i tok: “Lotu Sinto, em lotu bilong ol Japan, em i helpim tru ol wok bilong mekim pait, na i kirapim ol Japan long ting olsem i stret ol i mekim pait.” Planti lotu ol i bin mekim olsem, a? Ol i bin “helpim tru ol wok bilong mekim pait.” Tingim ol lain bilong lotu Buda na lotu Hindu long Sri Lanka−ol i bin kilim i dai planti man na bekim nogut long ol man. Na tingim ol samting nogut ol Katolik na Talatala i bin mekim long kantri Aialan−narapela i birua long narapela na ol i bin kilim i dai planti man i no gat asua. Long planti hap bilong graun, lain bilong narapela lotu i pait wantaim lain bilong narapela lotu! Wanpela nius i tok, “Long hap bilong India, inap planti handet yia pinis, ol Hindu na Moslem na Sik na ol narapela lain bilong lotu, ol i bin pait na kapsaitim blut bilong planti man long lain bilong ol.”−Nius U.S. News & World Report.
Sampela man ol i no ting olsem lotu i kirapim ol man long mekim pasin nogut, tasol ol i ting lotu i no gat strong bilong kirapim ol man long mekim gutpela pasin. Wanpela nius (National Catholic Reporter) i tok, ‘Ol olpela lotu i no bin helpim ol man long ol samting ol i laik kisim na ol samting ol i sot long en.’ Na wanpela nius (Liberty) i tok, ol man i save tingim pris o pasto i olsem “man bilong givim blesing, na man bilong mekim ol i kamap holi, na man bilong singautim God long mekim gut long ol,” tasol ol i ting em i mekim ol dispela wok long taim bilong lotu tasol. Ol i ting lotu i no ken bagarapim ol, tasol em i no ken helpim ol tumas. Yu gat wankain tingting long lotu o olsem wanem?
Lotu long nau i wankain olsem long taim Jisas i stap long graun. Jisas i tok, ol bikpela man bilong lotu long taim bilong em, ol i litimapim nem bilong God long maus tasol. Em i tok, pasin bilong ol i putim hevi antap long ol man na i no helpim ol. Em i tok: “Ol i save pasim karamap i hevi na putim antap long sol bilong ol man, tasol ol yet ol i no laik holim liklik long pinga tasol bilong helpim ol man long karim.” (Matyu 23:4) Long nau, lotu i tok promis long mekim bikpela wok bilong helpim ol man, tasol ol i no mekim. Olsem na ating lotu i no inap helpim yumi?