Gutpela Mi Senisim Lotu Bilong Mi?

BALUS i lusim ples balus long Okinawa na i go antap. I gat 101 pasendia ol i sindaun i stap na wantu kepten i lukim tripela balus bilong skelim klaut na ren samting ol i kam stret long rot bilong dispela balus. Kwiktaim em i stiaim balus i go long han kais bambai ol i no ken bam, na em yet wantaim ol pasendia ol i abrusim bagarap. Wanpela nius long hap bilong not long Japan i bin stori long dispela balus klostu i bagarap. Dispela samting i bin kamap i makim stret bikpela senis man i mas mekim long sampela taim bambai em i no ken bagarap.

Tasol planti man i no laik senisim lotu bilong ol. Ol i pret tru long mekim. Ol i pret long bihainim nupela rot ol i no save gut long en. Wanpela meri, em Misis Tachi, em i bin stadi wantaim ol Witnes Bilong Jehova na lainim tok bilong Baibel, na em i tok: “Planti manmeri mi save long ol, ol i tingting planti long ol lotu na long pasin bilong ol lotu long singaut singaut long mani. Tasol taim mipela i liklik yet mipela i lain long bihainim ol bikpela de bilong lotu na long mekim ol bung na pasin bilong lotu. Taim mipela mekim bung bilong lotu Budis bilong tingim man i dai pinis [hoji], mipela i no tingim as bilong dispela bung bilong lotu. Nogat. Mipela i tingting tasol long gutpela amamas mipela save kisim wantaim ol famili bilong mipela na ol narapela man long dispela taim. Taim mi tingting long bihainim nupela rot na lusim ol dispela pasin bilong bipo, mi pret, na mi pret moa yet long ol famili bilong mi, nogut ol i givim baksait olgeta long mi.” Ating ol manmeri long hap yu stap long en ol tu i gat wankain pret.

Na i gat ol narapela pret tu bilong ol. Long planti kantri ol man i pret long senisim lotu bilong ol, nogut God i givim strafe long ol. Wanpela meri i kirap long lainim tok bilong Baibel long Japan, tasol sik i painim em na sampela hevi i kamap insait long famili bilong em na ol wanblut i tokim em, ol dispela hevi i painim em long wanem ‘em i no lotu moa long ol tumbuna’ na ol i kros long em i laik bihainim ‘lotu bilong narapela kantri.’

Na sampela man i pret long senisim lotu bilong ol, nogut poroman marit bilong ol o papamama bilong ol i kros. Long planti kantri long hap bilong Is, ol i ting em i bikpela samting long ol i mas pas gut long papamama na long famili. Olsem na taim man i marit ol i ting olsem meri bilong em i mas bihainim lotu bilong famili bilong man bilong em. Maski man tupela meri i no tingim tumas lotu, tasol bilong amamasim famili, tupela i mas holim yet lotu bilong papamama. Ol i save tingim dispela samting em i bikpela samting tru. Wanpela yangpela man na meri marit, tupela i bin stadi long Baibel, tasol bihain ol i lusim stadi, long wanem famili i bung wantaim na tok strong long tupela i no ken lainim tok bilong Baibel, olsem na tupela i pret na lusim stadi. Bihain dispela yangpela man i kirap long stadi gen na em i tok: “Mitupela i bin pret long man. Mitupela i pilim olsem mipela i mas bihainim laik bilong papamama. Mipela i save, sapos mipela i senisim lotu bilong mipela na kirap bihainim nupela lotu, dispela bai bagarapim bel bilong papamama na mekim ol i bel hevi na mipela i no laik mekim olsem.”

Na narapela samting i mekim ol man i pret na ol i no laik senisim lotu bilong ol, em olsem: Ol i no laik bai ol narapela man i ting ol i narapela kain. Dispela yangpela man na meri, em tupela i bin lusim stadi, taim papamama i toktok wantaim tupela, papamama i tok, ol i laik bai tupela i no ken lainim tok bilong Baibel, nogut ol man i ting tupela i narapela kain, na nogut tupela i no inap insait moa long ol samting ol narapela man long hap bilong ol i mekim, na bai ol man i givim baksait long ol na i no laik pren moa wantaim ol.

Em nau, ol kain strongpela pret olsem i mekim na ol man i tingting planti long senisim lotu bilong ol. Olsem na planti man i kirap bihainim tingting olsem: Maski wanem wanem lotu man i bihainim, dispela i no bikpela samting. Ol i save tok, “Olgeta lotu i gutpela na ol i olsem narapela narapela rot i go kamap long wanpela ples tasol.”

Tasol sampela man ol i bin senisim lotu bilong ol. Wanem samting i mekim na ol i senisim lotu bilong ol? Sampela i tingting tasol long pinisim sik long skin bilong ol o long kisim mani samting na ol i kirap bihainim nupela lotu, tasol ol i holim yet ol bilip na pasin bilong olpela lotu bilong ol. Tasol sampela ol i senisim tru tingting na bilip bilong ol. Olsem na ating yu laik save, ‘I gat gutpela as tru na mi mas senisim lotu bilong mi? I gat wanem as na sampela man i bin senisim lotu bilong ol? Sapos mi senisim lotu bilong mi, dispela inap helpim mi tru?’ Mipela laik bai yu skelim tok i kamap bihain long dispela na bai yu ken save long bekim bilong ol dispela askim.

[Piksa long pes 3]

Bilong wanem ol manmeri i save holimpas ol pasin bilong lotu bilong ol tumbuna?