Ripot long Wok Bilong Kingdom
‘Kaikai i Mau’ Long Miyanma
◻ KANTRI Miyanma (bipo ol i kolim Bema) i gutpela tru, na i gat 1,500 man i autim gutpela tok bilong Kingdom. Ol i bin bung long sampela kibung na ol i mekim ol tok long tok Miyanma na Lusai na Haka na Sin, na 2,273 man i bung. Ol i kamapim sampela stori long ol man i gat pasin daun ol i laik harim tok bilong Kingdom, i olsem Jon i tok: “Olgeta kaikai bilong graun i mau pinis.”—Revelesen 14:15.
Samting i Kamap long Dinam
◻ Wanpela painia salim i raun autim tok long hap bilong Matupi na em i bungim wanpela sumatin i laik save long hel. Painia i lainim em long tok bilong Baibel, em i tok, hel em matmat tasol. Sumatin i kirap nogut, na em i laik go bek long ples bilong em, em Dinam, na tokim lain bilong em. Em i mekim olsem, na em i kamapim tok i tru long hel i wanem samting. Tambu bilong em i laik save gut, na em i kam bek wantaim sumatin long Matupi na bai em yet i ken toktok wantaim painia. Em i stap wanpela wik long Matupi na em i stadi wantaim painia. Bihain em i kam gen long Matupi na em i strong long painia i mas i kam long ples, long wanem, planti man i laik harim tok; olsem na 3-pela painia i go long Dinam. Ol i hatwok long wokabaut inap 12-pela aua.
Long Dinam ol man i laik planim wanpela man i dai, na ol man bilong ol narapela ples i kam. Ol i laik harim Baibel i tok wanem long hel, na ol i laik lukim ol painia. Tok i kirap long 7 klok nait na i go inap 11 klok. Wanpela man i gat tingting em i pasim tok na bai ol painia i ken slip. Moningtaim tok i kirap gen long 7 klok na i go inap nait. Ol i malolo liklik na bai ol i ken kaikai. Taim ol painia i laik go bek ol man i tokim ol long kam bek gen bihain. Ol painia i amamas long helpim ol dispela man i gat laik long harim gutpela tok bilong Kingdom. Tru tumas, kaikai i “mau pinis” long Miyanma!
Man i Kisim Tok i Tru long Buk Ol Man i Bin Tromoi
◻ Wanpela man bilong Miyanma i go lukim pren i wok bisnis long ol olpela pipia buk na pepa, na em i lukim wanpela buk em skin bilong en i lus. Em i kisim na em i kirap long kaunim na em i laikim tok bilong en. Buk hia em Harim Tok Bilong Bikpela Tisa, Sosaiti Was Taua i bin wokim. Man i raitim pas long Sosaiti, em i laikim sampela buk moa. Brens-ofis i salim wanpela painia i go lukim em. Painia i kirap stadi wantaim em, na i no longtaim na man i save em i painim pinis tok i tru. Em i wok long stretim ol pasin nogut bilong em na lusim ol god giaman bilong lotu Hindu. Bihain liklik em wantaim namba wan pikinini meri bilong em i dediket long Jehova na kisim baptais. Nau em i wok painia oltaim.
Tru tumas, “planti kaikai tumas i mau pinis long gaden, tasol i no gat planti wokman i stap bilong kisim” long Miyanma.—Matyu 9:37, 38.