Ripot long Wok Bilong Kingdom

Gutnius Bilong Kingdom i Kam long Australia

WANKAIN long 211 ol narapela ples long graun, ol Witnes Bilong Jehova long Australia tu i givim bel na wok strong tru long autim tok bilong Kingdom. I gat olsem 50,000 Witnes long Australia, na ol i kisim planti gutpela blesing long dispela wok ol i mekim. Inap planti yia nau, ol man bilong ol narapela tok ples na skin i kam sindaun long Australia. Olsem na nau i gat 58 kongrigesen bilong ol dispela kain ples i save putim ripot bilong wok autim tok. Brens ofis bilong Sosaiti Was Taua i stori long sampela ekspiriens bilong strongim ol brata sista.

Ranaweman Bilong Vietnam

Wanpela man Vietnam, nau em i stap long Australia em i bin kamap bikpela insait long wanpela lotu em ol i save lotu long ol tumbuna i dai pinis, na lotu Buda na Konfusias. Na tu em i kisim save long ol pasin na tingting bilong ol man bilong hap bilong Esia na Yurop. Inap 1975 em i wok olsem wanpela soldia bilong ami bilong Saut Vietnam. Long 1979 ol dokta i katim han kais bilong em long wanem em i gat sik long dispela han. Ol dispela hevi i olsem kalabusim em na em i gat strongpela laik long ranawe na painim bel isi long narapela hap. Long 1983 em na 24 narapela man i ranawe lusim Vietnam long wanpela liklik bot. Tasol hevi i bungim ol. Ol raskol bilong solwara i mekim nogut long ol na inap sikspela de ol i drip long solwara long Saut Saina na san i kukim ol, na i mekim olsem inap ol i kam inap long Malesia. Inap faipela mun em i stap long refuji kem bilong ol ranaweman na bihain ol i larim em i go long Australia. Tripela mun bihain em i kisim tok i tru. Em i amamas tru long tok bilong Jisas long Jon 8:​32, long wanem em i gat bikpela laik long painim bel isi na kamap friman. Jisas i tok: “Na yupela bai i save long tok tru, na tok tru bai i mekim yupela i kamap fri.” Ol brata i mekim gutpela pasin long em na nau em i kamap wanpela Witnes Bilong Jehova. Nau em i wok strong long helpim ol man i save mekim tok ples Vietnam bambai ol tu i ken save long dispela tok i tru i save mekim man i kamap fri.

Wanpela Meri Aborijini i Harim Tok i Tru

Long hap bilong not-wes Australia wanpela yangpela brata painia na poroman bilong em i go autim tok long wanpela ples bilong ol Aborijini ol i kolim woolshed, na ol i bungim wanpela meri. Tupela i kamapim as bilong raun bilong ol, na bihain meri hia i kisim ki i pas long sen long nek bilong em, na i opim wanpela draipela bokis ain. Tupela brata i kirap nogut long lukim nius i gat ol piksa long en, em Sosaiti Wastaua i wokim, na wanpela olpela Baibel i stap namel long ol laplap bilong em. Ol i sindaun long graun na nau ol i kirapim stadi long rot bilong wanpela nius Wastaua bilong em. Maski meri hia i no inap rit rait, em i lukautim gut ol dispela nius em i kisim bipo olsem ol samting i dia tumas. Na nau em i amamas long wanem ol brata i stadi wantaim em long olgeta wik.

Popaia long Tanim Namba long Telefon

Long biktaun Sidni, i gat olsem 3 milion manmeri long en, wanpela liklik pikinini meri i gat tripela krismas i pilai wantaim telefon na em i tanim wanpela namba nating. Dispela namba em i tanim i bilong wanpela sista Witnes. Dispela Witnes i bekim tok long telefon na pastaim em i ting tumbuna pikinini bilong em i telefon. Nau mama bilong liklik meri i kisim telefon na i tok sori long dispela sista. Tupela i toktok yet i stap long telefon na sista i autim tok long dispela meri. Wantu dispela meri i tok: “Mi wet yet long ol Witnes i kam gen long haus bilong mi. Mi laik kamap wanpela Witnes Bilong Jehova!” Na em i stori moa olsem tupela mun i go pinis, em i go long Peru long lukim anti bilong em wantaim famili bilong em, nau ol i kamap Witnes. Em i kirap nogut long pasin bilong ol. Em i tok: “Ol pikinini bilong ol dispela lain bilong mi, pastaim ol i bikhet tru, tasol nau ol i gat gutpela pasin tru!” Tupela i stretim rot long kirapim wanpela Baibel-stadi, na nau meri i wok yet long kisim save long tok i tru. Na olgeta dispela samting i kamap long wanem pikinini meri bilong em i popaia long tanim namba long telefon.