Ol Gutpela Samting Bai Kamap Long Graun Taim Kingdom Bilong God i Bosim
BAIBEL i tok: “Pasin bilong bilip em i olsem: Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru.” (Hibru 11:1) Yumi stori pinis olsem winim 500 yia paslain long taim bilong Krais, God i bin kirapim Daniel long raitim ol tok profet long ol bikpela gavman bai kamap i go pinis kirap long taim bilong Daniel na i kam inap long nau. Ol samting i bin kamap stret tru olsem ol dispela tok profet i makim na dispela i strongim tru bilip bilong yumi olsem ol narapela tok profet bilong Daniel tu bai kamap tru, na klostu nau bai Kingdom bilong God long han bilong Krais Jisas i senisim ol gavman bilong dispela graun.
Bikpela senis tru bai kamap—bai gutpela samting tru i painim ol man! God i tingim dispela taim bihain na em i tok: “Harim. Mi mekim olgeta samting i kamap nupela.” (Kamapim Tok Hait 21:5) Sapos yumi skelim sampela tok profet spirit bilong God i bin kamapim long dispela gutpela taim bilong amamas, dispela bai helpim yumi long save olsem wanem olgeta samting bai kamap “nupela,” olsem narapela kain tru long ol samting i bin kamap taim ol gavman bilong ol man i bin i bosim graun. Tru tumas, Baibel i tok bikpela senis tru bai kamap long dispela graun na long sindaun bilong ol man:
Pasin raskol na pasin bilong pretim na bagarapim man bai pinis. “Ol man nogut bai i bagarap olgeta. . . . na bai ol man nogut i lus olgeta.” Ol man i stap laip “bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.”—Buk Song 37:9, 10; Maika 4:4.
Ol manmeri i no ken bruk moa long narapela narapela lain na ol i no ken pait. “Olgeta lain manmeri bai i no ken pait moa, na bai ol i no skul moa long pait.”—Aisaia 2:4.
Sot long haus, no gat ples slip, no gat wok, ol dispela hevi bai pinis. “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. . . . Na bai ol i amamas long ol samting ol yet i bin hatwok long kamapim.”—Aisaia 65:21, 22.
Bai i no gat hangre moa olsem i bin kamap long sampela hap bilong Afrika long nau. Bai olgeta manmeri i gat planti kaikai. “Planti rais na wit samting i ken kamap long ol gaden bilong ol manmeri, inap olsem i save kamap long Lebanon.” “Planti gutpela kaikai i kamap pinis long graun bilong mipela. God, em i God bilong mipela, em i bin mekim gut tru long mipela.”—Buk Song 72:16; 67:6, 7.
Bai i no gat sik moa, na bai ol manmeri inap i stap oltaim na amamas long ol dispela blesing. Taim Jisas i stap long graun, i stret ol man i ken tok, “ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas i harim toktok.” Tasol gutpela samting moa yet bai kamap long dispela gutpela taim bilong bihain—bai God i truim tok promis bilong em, olsem: “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—Luk 7:22; Kamapim Tok Hait 21:4.
Em gutpela senis tru! Olgeta hevi bilong ol man bai i pinis na bai olgeta manmeri i stap amamas! Mipela laik kirapim yu long stap aninit long Kingdom bilong God long nau bambai yu inap kisim ol dispela gutpela blesing taim dispela nupela gavman i kirap bosim graun na dispela bikpela senis tru i kamap long wok bilong bosim graun.
[Piksa long pes 14]
Ol manmeri nau ol i stap ol i ken wetim ol gutpela blesing bilong bihain—bai pait na pasin raskol na pasin rabis na sik na dai tu i pinis. Yu laik i stap long dispela gutpela taim bilong bihain?