Kingdom Bilong God Em Wanem Samting?
“Dispela gutnius bilong Kingdom . . . ”—MATYU 24:14.
LONG Bikpela Tok Long Maunten, Jisas i skulim ol man long pasin bilong beten, na wanpela bilong ol samting em i skulim ol man long beten askim God long en em olsem: “Kingdom bilong yu i mas i kam.” Planti milion manmeri i putim dispela beten long tingting na ol i save kolim planti taim. Wanpela ensaiklopidia i tok, dispela em i “nambawan beten em olgeta Kristen i save kolim long lotu bilong ol.” Tasol planti manmeri husat i save kolim dispela beten, ol i no save liklik long dispela Kingdom em wanem samting na em bai mekim wanem samting taim em i kirap mekim wok.—Matyu 6:9, 10.
Yumi no kirap nogut long dispela samting. Ol lida bilong ol lotu i holim nating nem Kristen i kamapim ol bekim long ol dispela askim, tasol ol bekim bilong ol i narapela narapela na i paulim tingting bilong ol man, na ol man i no inap kliagut long Kingdom em i wanem samting tru. Wanpela man i tok Kingdom Bilong God em “samting bilong spirit, . . . em samting i stap insait long man na em rot bilong em long i go klostu long God i gat laip . . . , samting i painim man na meri na ol i pilim olsem God i kisim bek ol.” Narapela man i tok gutnius bilong Kingdom em “ol tok bilong lotu.” Buk Catechism of the Catholic Church i tok: “Kingdom Bilong God em stretpela pasin na bel isi na amamas i stap long Holi Spirit.”
Lukim tok i stap long pes 2 bilong dispela nius na bai yu kliagut moa long Kingdom em wanem samting. Em i tok: “Kingdom Bilong God, em wanpela gavman tru i stap long heven. Klostu nau dispela Kingdom bai pinisim olgeta pasin nogut, na em bai mekim graun i kamap wanpela gutpela ples paradais.” Yumi ken stori long olsem wanem Baibel i strongim dispela tok.
Lain Husat Bai Bosim Graun Olgeta
Kingdom em wanpela gavman i gat wanpela king olsem bos bilong en. King bilong Kingdom Bilong God em Jisas Krais husat i kirap bek pinis. Long wanpela visen, profet Daniel i lukim Jisas i kisim wok king long heven, na em i tok: “Long dispela driman bilong mi long nait, mi lukim wanpela man i wankain olsem yumi man bilong graun. Em i stap namel long ol klaut na i wokabaut i kam klostu long mi. Na ol i kisim em i go long dispela Man bilong bipo bipo yet. Dispela Man bilong bipo bipo yet i mekim em i kamap king na i givim em strong na biknem. Na em bai i stap king i gat strong oltaim oltaim, na wok king bilong en bai i no inap pinis. Na olgeta manmeri bilong olgeta kantri na olgeta lain na olgeta tok ples bai i stap aninit long en.”—Daniel 7:13, 14.
Buk Daniel long Baibel i soim tu olsem God bai strongim dispela Kingdom, na dispela Kingdom bai pinisim olgeta gavman bilong graun, na i no gat narapela gavman bai daunim dispela Kingdom. Sapta 2 i stori long wanpela driman God i givim long king bilong Babilon, em driman we king i lukim wanpela traipela imis i makim ol strongpela gavman bilong graun, em narapela i kamap bihain long narapela. Profet Daniel i stori long mining bilong dispela driman. Em i tok, long taim bilong las de “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:28, 44.
I gat sampela narapela manmeri bai mekim wok king wantaim dispela King long Kingdom Bilong God. Taim Jisas i mekim wok bilong em long graun, em i tokim ol gutpela aposel bilong em olsem ol wantaim sampela narapela bai kirap bek na go long heven na sindaun long ol sia king. (Luk 22:28-30) Em i no tok long ol sia king tru tru, long wanem, Jisas i tok dispela Kingdom bai i stap long heven. Baibel i stori olsem dispela lain husat bai mekim wok king wantaim Jisas, ol i bilong “olgeta lain na olgeta tok ples na olgeta lain pipol na olgeta kantri.” Ol bai “kamap king na ol pris bilong God bilong mipela. Na ol bai stap king na bosim graun.”—Revelesen 5:9, 10.
As na Nius Bilong Kingdom Em i Gutpela
Krais Jisas i kisim wok bilong bosim “olgeta manmeri bilong olgeta kantri na olgeta lain na olgeta tok ples,” na ol wanwok bilong em “bai stap king na bosim graun.” Orait husat bai stap aninit long wok bos bilong dispela Kingdom? Em ol man husat i bihainim tok bilong gutnius em ol manmeri bilong God i wok long autim long nau. Na ol manmeri husat bai kirap bek bilong i stap laip long graun, ol tu bai i gat rot bilong kisim laip oltaim.
Baibel i stori gut long ol blesing ol manmeri bai kisim aninit long wok bos bilong Kingdom. Sampela bilong ol dispela blesing em olsem:
“Em i save mekim i dai pait long olgeta hap graun. Em i save brukim olgeta banara na spia, na em i save kukim ol hap plang long paia.”—Song 46:9.
“Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring.”—Aisaia 65:21, 22.
“[God] bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Revelesen 21:3, 4.
“Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.”—Aisaia 35:5, 6.
“Taim i laik kamap na olgeta man i stap long matmat ol bai harim nek bilong [ Jisas] na kam ausait. Ol man i bin mekim ol gutpela pasin, kirap bek bilong ol em bilong kisim laip.”—Jon 5:28, 29.
“Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:11.
Tru tumas, dispela em i gutnius! Na moa yet, ol tok profet bilong Baibel i kamap tru pinis i soim olsem klostu nau bai Kingdom i kirap bosim graun olgeta long stretpela pasin.