Bekim Bilong Fopela Askim Long Pinis Bai Kamap

JISAS KRAIS i bin mekim tok profet olsem, long wanpela taim bihain “bai las de i kamap.” Em i stori long dispela taim na i tok: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.”​—Matyu 24:​14, 21.

Ol tok bilong Jisas long las de, wantaim ol narapela ves bilong Baibel i toktok long dispela samting, i kamapim sampela bikpela askim. I gutpela yu opim Baibel bilong yu na ritim ol tok i bekim ol dispela askim.

1 Wanem Samting Bai Pinis?

Baibel i no tok dispela graun yet bai bagarap, nogat. Man bilong raitim song i tok: “Yu bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.” (Song 104:5) Na tu, Baibel i no tok olgeta samting i gat laip long graun bai paia na pinis olgeta, nogat. (Aisaia 45:18) Jisas yet i bin kamapim klia olsem sampela manmeri bai abrusim bagarap taim pinis i kamap. (Matyu 24:​21, 22) Sapos olsem, orait Baibel i tok wanem samting bai pinis?

Ol gavman bilong dispela graun bai pinis. God i bin kirapim profet Daniel long raitim tok olsem: “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”​—Daniel 2:44.

Woa na pasin bilong bagarapim win na wara samting bai pinis. Long Song 46:​9, Baibel i stori long samting God bai mekim, olsem: “Em i save mekim i dai pait long olgeta hap graun. Em i save brukim olgeta banara na spia, na em i save kukim ol hap plang long paia.” Na Baibel i tok tu olsem, God bai i “bagarapim ol man i bin bagarapim graun.”​—KTH 11:18.

Pasin raskol na pasin i no stret bai pinis. Baibel i tok promis olsem: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.”a​—Sindaun 2:​21, 22.

2 Wanem Taim Pinis Bai Kamap?

God Jehova i makim pinis “taim” bilong pinisim olgeta pasin nogut na putim Kingdom, olsem gavman bilong em, long mekim wok. (Mak 13:33) Tasol Baibel i kamapim klia olsem yumi no inap skelim na makim wanem de stret pinis bai kamap. Jisas i tok: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.” (Matyu 24:36) Tasol Jisas na ol disaipel i bin tok profet long ol samting bai kamap long graun klostu long taim God bai pinisim ol pasin nogut bilong dispela graun. Taim olgeta samting nau yumi bai stori long en i kamap long wankain taim na long olgeta hap bilong graun, yumi ken save pinis i klostu.

Ol bikpela senis long wok politik, long ol samting bilong graun, na long sindaun bilong ol man, ol i wok long i go nogut moa, winim olgeta taim bipo. Bilong bekim ol askim bilong ol disaipel long pinis bai kamap, Jisas i tok: “Ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king. Long sampela hap bai graun i guria, na bai ol i gat taim bilong bikpela hangre. Dispela ol samting em i olsem pen i save kamap pastaim long meri i laik karim pikinini.” (Mak 13:8) Aposel Pol i tok: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu long ol manmeri i mekim gutpela pasin long ol. Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas bilong dispela graun, na ol bai i no laikim God.”​—2 Timoti 3:​1-5.

Wok bilong autim tok i kamap long olgeta hap bilong graun long planti tokples. Jisas i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”​—Matyu 24:14.

3 Wanem Samting Bai Kamap Bihain Long Pinis?

Baibel i no tok olgeta gutpela man bai lusim graun na i go long heven bilong i stap oltaim oltaim, nogat. Tasol Jisas i bin skulim ol man olsem laik bilong God long pastaim tru bai kamap. Jisas i tok: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5; 6:​9, 10) Ol man i dai paslain long pinis i kamap, Baibel i tok promis olsem bihain ol bai i kirap bek. (Jop 14:​14, 15; Jon 5:​28, 29) Orait, wanem samting bai kamap bihain long pinis?

Long heven, Jisas bai mekim wok olsem King long Kingdom Bilong God. Profet Daniel i tok: “Long dispela driman bilong mi long nait, mi lukim wanpela man i wankain olsem yumi man bilong graun [em Jisas taim em i kirap bek pinis]. Em i stap namel long ol klaut na i wokabaut i kam klostu long mi. Na ol i kisim em i go long dispela Man bilong bipo bipo yet [God Jehova]. Dispela Man bilong bipo bipo yet i mekim em [Jisas] i kamap king na i givim em strong na biknem. Na em bai i stap king i gat strong oltaim oltaim, na wok king bilong en bai i no inap pinis.”​—Daniel 7:​13, 14; Luk 1:​31, 32; Jon 3:​13-​16.

Ol manmeri i stap aninit long Kingdom Bilong God bai i gat gutpela helt, gutpela sindaun, na ol bai stap laip oltaim oltaim. Profet Aisaia i tok: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring.” (Aisaia 65:​21-23) Aposel Jon i stori long dispela taim, na i tok: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—KTH 21:​3, 4.

4 Yu Mas Mekim Wanem Bilong Abrusim Bagarap Taim Pinis i Kamap?

Aposel Pita i tokaut olsem sampela man i stap long taim bilong pinis, ol bai lap na tok bilas long dispela tingting olsem God bai kirap na pinisim ol pasin nogut bilong dispela graun. (2 Pita 3:​3, 4) Tasol Pita i tok strong long ol man i stap long taim bilong yumi olsem ol i mas mekim ol samting nau bai yumi stori long en.

Kisim skul long ol samting i bin kamap long bipo. Pita i tok: “Ol manmeri bilong bipo tu, ol i bin givim baksait long God, na em i no larim ol. Nogat. Em i mekim bikpela tait i kamap long ol, na ol i lus. Tasol Noa em i man bilong tokaut long stretpela pasin. Na God i lukautim em wantaim 7-pela manmeri, na ol i stap gut.” (2 Pita 2:5) Pita i tok long ol man i save tok bilas, olsem: “Ol i no laik tingting gut na save long dispela samting. Bipo tru God i bin tok na skai i kamap. Na God i kisim wara na mekim graun i kamap namel long wara. Na bihain God i tok na em i mekim wara i kamap gen na bikpela tait i karamapim dispela graun, na graun i bagarap olgeta. Na nau, long wankain tok bilong God tasol, skai na graunb i stap na i wetim paia i kamap na i bagarapim ol. Skai na graun i wetim de bilong bikpela kot i kamap, na ol man i bin givim baksait long God, ol bai i bagarap olgeta.”​—2 Pita 3:​5-7.

Bihainim ol lo bilong God long stretpela pasin. Pita i tok, ol manmeri i laik abrusim bagarap long taim pinis i kamap, ol bai “wokabaut long pasin holi na bihainim olgeta pasin bilong God.” (2 Pita 3:11) Em nau, Pita i toktok long “wokabaut long pasin holi” na “bihainim olgeta pasin bilong God.” Olsem na yumi no inap tok tasol olsem yumi gat bilip o yumi kirap wantu long stretim pasin bilong yumi long ai bilong God bambai yumi ken abrusim bagarap, nogat. I gat sampela samting moa yumi mas mekim.

Wanem ol wok na pasin i stret long ai bilong God? Bilong save long dispela, i gutpela yu skelim ol samting yu save pinis long en wantaim ol tok bilong Baibel long dispela samting. Ol Witnes Bilong Jehova bai amamas long helpim yu. Askim ol long soim yu long Baibel bilong yu yet long as bilong ol tok ol i mekim bilong bekim ol askim bilong yu. Taim yu mekim olsem, dispela inap helpim yu long strongim bel na yu no ken pret long ol samting bai kamap bihain, maski ol samting i kamap long nau i wok long pretim ol man.

[Ol Futnot]

[Rait long pes 7]

Graun yet bai no inap pinis, tasol ol man i wok long bagarapim graun, ol bai pinis