Askim

Man i mas i gat hamas krismas na bai em inap kamap wokman bilong kongrigesen?

Baibel i no makim hamas krismas man i mas winim na bai em i ken holim dispela wok.

Long bipo long lain Israel sampela taim God i bin makim krismas man i mas winim pastaim na bai em i ken mekim wok. Em i mas i gat 20 krismas na bai em i ken go long ami; manki i no ken stap soldia olsem sampela i save mekim long sampela hap long nau. Na long lain Livai ol Kohat i mas i gat 30 krismas i go inap 50 krismas na bai ol i ken mekim wok long haus sel, long wanem, em i bikpela wok. (Namba 4:​3, 47) Ol Livai i ken kirap mekim sampela wok taim ol i gat 25 krismas sapos wok i no bikpela tumas, tasol ol i mas winim 30 krismas na bai ol inap mekim bikpela wok olsem brukim haus sel na karim ol samting na sanapim gen haus sel. (Namba 8:​24-26) Bihain ol i gat haus lotu, na i no gat ol dispela hatwok moa, olsem na ol Livai i ken mekim wok long haus lotu taim ol i gat 20 krismas tasol.​—⁠1 Stori 23:⁠24.

Taim Jehova i lusim lain Israel bilong skin na em i kisim ol Israel bilong spirit, em i makim krismas bilong man na bai em i ken kamap wokman bilong kongrigesen Kristen, o nogat?

Long Misin Katolik, dikon o wokman i aninit long pris. Wanpela buk (Bingham’s Antiquities of the Christian Church) i tok: ‘Man i mas i gat 30 krismas na bai em i ken kamap bisop o elda, na em i ken stap dikon (wokman) taim em i gat 25 krismas. Em lo bilong misin. Taim Sios i kirap na i kam inap nau, em i olsem tasol.’

Tasol Baibel i kolim wanem ol mak man i mas winim na bai em i ken holim wok? 1 Timoti 3:​8-10, 12, 13 tasol i kolim sampela mak: “Ol wokman bilong [kongrigesen] i mas tingting stret long wok bilong ol. Ol i no ken i stap man bilong tupela maus. Ol i no ken spak. Ol i no ken tingting long pulim mani samting bilong ol man. Ol i mas save olsem ol i no gat asua long ai bilong God, na ol i mas holim strong dispela tok tru God i bin soim long yumi ol man i bilip long em. Pastaim yupela i mas traim wok bilong ol. Na sapos ol i mekim gutpela wok, orait ol i ken i stap wokman bilong [kongrigesen]. Wokman bilong [kongrigesen] em i mas i stap man bilong wanpela meri tasol, na em i mas bosim gut meri pikinini bilong em yet. Ol man i stap wokman bilong [kongrigesen] na i mekim gutpela wok, ol bai i gat gutpela nem. Na ol bai i no pret long tokaut long bilip bilong ol long Krais Jisas.”

Dispela tok i no makim hamas krismas man i mas kisim na bai em i ken kamap wokman bilong kongrigesen. Olsem na taim ol elda i bung bilong tingim husat sampela man bilong kongrigesen ol inapim mak na bai ol inap kamap wokman bilong kongrigesen, ol elda i ken save, Baibel i no tok ol i mas i gat 20 o 25 o 30 krismas, nogat. Baibel i kolim ol man i holim dispela wok olsem “ol man i stap wokman,” olsem na yumi save manki i no inap holim dispela wok. Na Baibel i tok ating sampela man i marit na i gat pikinini taim em i kamap wokman bilong kongrigesen.

Na Baibel i tok, ol elda “i mas traim wok bilong [man]” pastaim​—⁠em i gat save na em inap holim dispela wok o nogat. Em i mas bihainim pasin bilong Kristen i bikpela pinis inap longtaim liklik. (Em i mas baptais inap l yia o moa.) Em i mas amamas long mekim ol wok ol i tokim em long mekim, na em i mas inap long mekim. Sapos wanpela yangpela man i “tingting stret” na em i bihainim ol dispela narapela mak hia na em i gat pasin daun, ating ol elda i ken tingim em inap long kamap wokman bilong kongrigesen, maski em i no winim yet 20 krismas. Ating sampela ol narapela i mas winim sampela krismas moa na bai ol ‘i gat gutpela nem na ol bai i no pret long tokaut long bilip bilong ol.’