Strongim Pasin Wanbel Namel Long Ol Elda na Ol Wokman Bilong Kongrigesen
BIHAIN liklik long Pentikos long yia 33 wanpela hevi i bin kamap long nupela kongrigesen Kristen. Ol aposel i bin stretim rot bilong helpim ol meri, em man bilong ol i dai pinis na ol i sot long ol samting. I no longtaim na “ol disaipel i save tok Grik, ol i gat kros long ol disaipel i save tok [Hibru]. Ol i tok olsem, ‘Long olgeta de yupela i save helpim ol manmeri i sot long kaikai samting, tasol yupela i no save helpim ol meri bilong mipela, man bilong ol i dai pinis.’ ”—Aposel 6:1.
Bihain ol aposel i harim dispela tok. “Olsem na ol 12-pela aposel i singautim olgeta disaipel i kam, na ol i tokim ol olsem, ‘Sapos mipela i lusim wok bilong autim tok bilong God na mipela i wok long tilim kaikai, em i no stret. Olsem na ol brata, yupela i mas painim 7-pela man . . . i gat gutpela nem namel long ol manmeri, na Holi Spirit i pulap long ol, na ol i gat gutpela save. Na yumi ken putim ol dispela man bilong lukautim dispela wok.’ ”—Aposel 6:2, 3.
Stori hia i kamapim wanpela bikpela lo bilong stretim gut ol wok insait long kongrigesen Kristen. Sampela man i gat gutpela tingting ol i mekim ol kain kain wok insait long kongrigesen, na sampela narapela i mekim bikpela wok long samting bilong spirit. Dispela i no nupela samting. Long Israel bilong bipo, God i makim Aron na ol tumbuna pikinini bilong em bilong mekim wok pris na mekim ol ofa long God. Tasol Jehova i makim ol Livai long “ol i mas lukautim gut olgeta samting bilong haus sel,” bilong helpim ol. (Namba 3:5-10) Long nau i wankain, ol wokman bilong kongrigesen i helpim ol wasman bilong kongrigesen.
Wok Bilong Ol Elda na Wokman
Baibel i kolim ol bikpela mak ol elda na wokman bilong kongrigesen i mas inapim. (1 Timoti 3:1-10, 12, 13; Taitus 1:6-9) Ol i no resis wantaim, nogat, ol i gat wanpela tingting: ol i laik strongim kongrigesen. (Skelim Efesus 4:11-13.) Tasol wok ol i mekim insait long kongrigesen i narapela narapela. Namba 1 Pita 5:2 i tokim ol wasman: “Yupela i mas lukautim gut ol manmeri bilong God. Ol i stap olsem ol sipsip long han bilong yupela. Na yupela i mas amamas long mekim dispela wok . . . Na yupela i no ken mekim dispela wok bilong kisim pe tasol. Nogat. Yupela i mas i gat laik tru long mekim dispela wok.” Ol i mas tokaut long ai bilong God long olsem wanem ol i bin mekim dispela wok holi.—Hibru 13:17.
Na olsem wanem long ol wokman bilong kongrigesen? Baibel i tok ol i no mas save tumas long skulim ol man olsem ol wasman. Wok bilong ol i narapela kain long wok bilong ol elda. Yumi save long taim bilong ol aposel i gat planti wok ol i mas mekim long olgeta taim na em i no wok bilong spirit, ating kain wok olsem baim ol samting bilong raitim Baibel, o raitim raitim ol tok bilong Baibel.
Long nau ol wokman bilong kongrigesen i mekim yet planti bikpela wok insait long kongrigesen, olsem lukautim ol akaun na ol teritori bilong kongrigesen, lukautim ol nius na buk samting, na stretim ol samting long Haus Kingdom. Sampela wokman ol i gat gutpela save, olsem na ating sampela taim ol i ken mekim wok tisa long Buk-Stadi o lukautim sampela hap long Miting Bilong Wok Autim Tok na mekim pablik-tok.
Taim ol elda na wokman i wok wantaim long pasin wanbel dispela bai helpim gut kongrigesen long ol samting bilong spirit na long ol narapela wok tu. Olsem bai olgeta insait long kongrigesen i stap amamas, na ol i stap strong na mekim ol gutpela wok bilong spirit. Tingim tok Pol i bin raitim long ol Efesus: “Yumi mekim gut wok em i makim bilong yumi olgeta wan wan. Na em i save mekim yumi olgeta skru rop bun samting bilong bodi i pas gut wantaim na i bihainim pasin bilong laikim tru ol arapela, na long dispela pasin bodi i save kamap bikpela na strongpela.”—Efesus 4:16.
Ol elda na wokman i mas wok strong bilong stap wanbel olsem. Ol i mas i gat wankain tingting, wankain laik, na wok gut wantaim. Tasol dispela kain pasin wanbel i no inap kamap nating. Nogat. Yumi mas wok strong long kamapim na lukautim gut.
Samting Ol Elda i Ken Mekim
Bikpela samting em i olsem: Ol elda i no ken ting elda na wokman bilong kongrigesen i kain olsem bos na wokboi, o bikman na man i wok kalabus. Ol elda i tingim ol wokman olsem wokman bilong God, ol i stap wanbel wantaim. (Skelim 1 Korin 3:6-9.) Rom 12:10 i tok: “Yupela i mas strong long litimapim nem bilong ol arapela.” Olsem na ol elda i no ken mekim samting i makim olsem ol i daunim ol wokman. Ol i laik strongim ol long mekim gutpela wok na ol i no laik givim hevi long ol. Taim ol elda i mekim gutpela pasin long ol wokman, ol bai wok strong na ol i amamas long wok bilong ol long kongrigesen.
Ol elda i gat wok long lukautim lain sipsip bilong God, na ol i no ken lusim tingting olsem ol wokman bilong kongrigesen i olsem sipsip tu. Tru, ol wokman i mas stap olsem strongpela Kristen. Tasol sampela taim ol elda i mas strongim ol, wankain olsem ol narapela long kongrigesen. Ol elda i mas i gat laik tru long helpim ol long kamap strong moa long samting bilong spirit.
Olsem aposel Pol, taim em i bungim yangpela man Timoti, wantu em i save Timoti inap kamap strongpela Kristen, olsem na em “i laikim Timoti i go wantaim em.” (Aposel 16:3) Timoti i poromanim Pol long taim em i raun long planti hap, na dispela i skulim em gut tru. Olsem na sampela yia bihain Pol inap tokim ol Kristen long Korin olsem: “Mi bin salim Timoti i kam long yupela. Em i olsem pikinini bilong mi, na mi laikim em tru. Em i save lukautim gut wok bilong Bikpela. Bai em i kirapim gen tingting bilong yupela long ol pasin mi save mekim long i stap pas wantaim Krais”!—1 Korin 4:17.
Olsem wanem? Yupela ol elda i larim ol wokman i mekim gutpela wok long save bilong ol insait long kongrigesen? Yupela i helpim ol long kamap strong moa na skulim ol long pasin bilong mekim tok long pletfom na long stadi gut long Baibel? Sapos ol i winim mak, yupela i kisim ol i go wantaim yupela taim yupela i go lukim ol brata sista bilong helpim ol? Yupela i wok wantaim ol long wok autim tok? Long tok piksa Jisas i mekim long ol wokboi i kisim mani, bikman i tokim gutpela wokboi: “Yu gutpela wokboi, yu bin mekim gutpela wok tumas.” (Matyu 25:23) Long wankain pasin yupela save givim gutpela tok long ol wokman bilong kongrigesen na litimapim nem bilong ol taim ol i mekim gut wok bilong ol long pasin daun? (Skelim Sindaun 3:27.) Sapos yupela i no mekim, nogut ol i pilim olsem yupela i no amamas long wok bilong ol.
Bilong wok gut wantaim, ol elda na wokman i mas toktok gut wantaim—em bikpela samting. (Skelim Sindaun 15:22.) No ken givim nating o tekewe nating wok bilong ol wokman, dispela i mas i gat as bilong en. Ol elda i ken beten na toktok wantaim long wanem wanem wok brata i ken mekim bilong helpim gut kongrigesen. (Skelim Matyu 25:15.) Taim ol elda i makim wok bilong wanpela brata ol i mas tokim em gut long ol samting em i mas mekim. Sindaun 11:14 i tok: “Sapos ol lida . . . i no inap stiaim ol manmeri long gutpela rot, orait kantri bai i bagarap.”
I no gutpela sapos yu toksave tasol long brata long kisim ples bilong narapela brata na lukautim ol akaun o magasin o ol buk samting. Sampela taim brata i kisim nupela wok i painim ol pepa i stap nabaut o ol i no stret. Em bikpela hevi ya! Namba 1 Korin 14:40 i tok: “Tasol yupela i mas bihainim stret ol gutpela pasin bilong lotu.” Ol elda i mas kirap na skulim ol brata long pasin bilong mekim ol wok insait long kongrigesen, na ol yet i mas stap olsem gutpela piksa long bihainim dispela. Olsem: Ol elda i mas makim wanpela elda bilong skelim ol akaun bilong kongrigesen long olgeta 3-pela mun. Sapos ol i no mekim, hevi inap kamap, na tu dispela i no strongim ol wokman long bihainim ol lo bilong oganaisesen long mekim wok.
Tasol olsem wanem sapos wanpela brata i no mekim gut wok bilong em? Orait, no ken pinisim em nating long dispela wok, gutpela ol elda i ken toktok wantaim em. Ating ol i no skulim em gut long dispela wok. Na sapos em i gat hevi yet long inapim dispela wok, ating sapos ol i makim em long mekim narapela wok, em inap mekim gut.
Ol elda inap strongim pasin wanbel sapos ol i save mekim pasin daun. Filipai 2:3 i kirapim ol Kristen olsem: “Yupela i no ken tingting long yupela yet tasol . . . Nogat. Yupela i mas daunim yupela yet na yupela i mas ting pasin bilong ol arapela i winim pasin bilong yupela.” Olsem na sapos wanpela atendan long Haus Kingdom i makim sia bilong elda i ken sindaun long en, gutpela sapos elda i bihainim tok. Em i no ken ting, em i wanpela elda na em i no gat wok long bihainim dispela tok. Ating atendan i laik bihainim wanpela tok olsem i gutpela sapos yumi senisim ples sindaun bilong yumi long sampela taim; tasol atendan i mas tingim, i no gat lo long dispela samting.a Sapos ol elda i makim wokman long mekim wanpela wok, nogut wanpela elda i kirap na i strong long wokman i mas senisim pasin bilong em long mekim dispela wok na i no gat as bilong senisim.
Ol Wokman—Kamapim Pasin Wanbel
Aposel Pol i tok: “Olsem tasol ol wokman bilong sios i mas tingting stret long wok bilong ol.” (1 Timoti 3:8) Sapos ol i tingim tru wok bilong ol—olsem wanpela wok holi—dispela bai helpim ol long abrusim pasin bilong bel nogut. Sapos yu wanpela wokman bilong kongrigesen, yu amamas long mekim ol wok bilong yu? (Rom 12:7, 8) Yu givim bel long kamap olsem wanpela saveman long dispela wok bilong yu? Ol brata inap bilip olsem yu save mekim gut wok bilong yu? Yu redi na amamas sapos ol i givim wok long yu? Wanpela wokman long wanpela kantri bilong Afrika i holim tripela narapela narapela wok long kongrigesen. Wanem tingting bilong em? Em i tok: “Tru, mi mas wok strong, tasol planti wok i no kilim man i dai.” Tru tumas, man i redi long givim samting, em i stap amamas tru.—Aposel 20:35.
Na tu, yu ken kamapim pasin wanbel sapos yu wok gut wantaim ol elda. Hibru 13:17 i tok: “Ol lida bilong yupela ol i laik helpim yupela . . . Na bihain bai ol i mas tokim God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait ol bai i amamas na mekim wok bilong ol, na ol bai i no inap bel hevi.” Tru, ol elda i no gutpela olgeta na ating i no hatwok long painim sampela popaia long ol. Tasol sapos yumi tingting long painim ol liklik liklik popaia long ol elda dispela bai mekim na narapela i no bilip long narapela. Em inap daunim amamas bilong yu na nogutim ol narapela insait long kongrigesen. Olsem na aposel Pita i tok: “Yupela yangpela man i mas aninit long ol hetman. Na yupela olgeta i mas bihainim pasin bilong daunim yupela yet na i stap aninit long ol arapela manmeri bilong God. . . . Olsem na yupela i mas daunim laik bilong yupela yet na stap aninit long strongpela han bilong God.”—1 Pita 5:5, 6.
Dispela tok inap helpim yu tru sapos yu pilim olsem ol elda i no tingim yu bilong givim sampela wok bilong kongrigesen long yu. Ating yu bin wok strong long kamap wanpela wasman bilong kongrigesen tasol ol i no makim yu. (1 Timoti 3:1) Pasin daun inap helpim yu long ‘wet strong long God i helpim yu.’ (Krai 3:24) Maski long bel nogut long ol elda—dispela i no helpim yupela long wok gut wantaim—askim ol long yu mas wok strong long wanem ol samting. Sapos yu gat laik tru long harim na bihainim tok ol i givim long yu, dispela bai soim ol yu wok long kamap strong long ol samting bilong spirit.
Pasin daun olsem God i laikim inap helpim wokman long daun long ol elda maski em i gat bikpela save long sampela samting o em i bin go long bikpela skul na em i gat gutpela sindaun. Nogut em i laik winim ol elda o kamapim tumas save bilong em. Sindaun 11:2 i tokim yumi: “Ol man i gat gutpela tingting i save daunim ol yet.” Brata i gat pasin daun em i save, em i no save long olgeta samting. Em i redi long wok isi, na em i no tingting long kamapim save bilong em long ai bilong ol man, em i laik mekim wok long gutpela save bilong em bilong helpim ol elda. Pasin daun bai helpim em tu long save, maski em i gat bikpela save long ol samting bilong graun, ating em i sot yet long gutpela tingting na save long ol samting bilong spirit—ating ol elda i winim em long dispela samting.—1 Korin 1:26–2:13; Filipai 1:9.
Yupela ol elda na wokman i mekim bikpela wok. Taim yupela i wok wantaim yupela i ken strongim olgeta insait long kongrigesen. Bilong mekim olsem yupela mas wanbel na wok gut wantaim, na “stap aninit tru long ol arapela Kristen na mekim pasin isi long ol. Yupela i no ken belhat kwik long ol long taim ol i rongim yupela. Yupela wan wan i mas givim bel bilong yupela long ol na karim hevi ol i givim yupela. Holi Spirit em i givim yumi pasin bilong i stap wanbel, na dispela pasin em i olsem rop i pasim yumi na yumi stap wanlain.”—Efesus 4:2, 3.
[Ol Futnot]
[Piksa long pes 27]
Ol elda i no tingim ol wokman bilong kongrigesen olsem boi bilong ol. Nogat. Ol i tingim ol olsem wanwok bilong ol