Ol Wokman Bilong Kongrigesen i Mekim Bikpela Wok
1 Long pes 57, buk Lo Bilong Yumi Bilong Mekim Wok Autim Tok i tok long ol wokman olsem: “Ol i bin dediket na strongpela bilip bilong ol i kamap ples klia, long wanem ol i wok strong long autim tok bilong Kingdom na helpim na strongim ol narapela.” Tru tumas, ol wokman bilong yumi ol i stap gutpela piksa long ol samting bilong spirit na yumi ken bihainim pasin bilong ol. Taim yumi wok wantaim ol na ol elda, dispela bai helpim yumi long ‘pas gut wantaim na bihainim pasin bilong laikim tru ol arapela, na long dispela pasin bodi i save kamap bikpela na strongpela.’—Ef 4:16.
2 Ol wokman i save mekim bikpela wok insait long kongrigesen. Tingim ol gutpela wok ol i mekim! Ol i save lukautim ol akaun, ol buk samting, ol magasin, ol sabskripsen, na ol teritori; ol i mekim wok atendan, mekim wok long saun, na helpim wok bilong stretim ol samting bilong Haus Kingdom. Ol i save mekim ol tok long Skul Bilong Wok Autim Tok na Miting Bilong Wok. Ating sampela bilong ol i save mekim ol pablik-tok o lukautim sampela miting insait long kongrigesen. Wankain olsem ol hap bilong bodi, ol wokman i save mekim ol wok bilong helpim yumi.—1 Ko 12:12-26.
3 Taim ol wokman i wok gut wantaim ol elda na narapela i tingim narapela, dispela i save strongim ol narapela long mekim wankain pasin. (Kl 2:19) Taim ol i mekim gut wok bilong ol long olgeta wan wan wik, na taim ol i tingim na mekim gut long ol narapela, ol i save helpim kongrigesen long kamap strong moa long ol samting bilong spirit.
4 Yumi ken mekim wanem bilong kamapim klia olsem yumi pilim tru bikpela wok ol wokman i mekim? Yumi mas save gut long ol wok ol i mas mekim na redi long wok gut wantaim ol taim ol i askim yumi long helpim ol. Long toktok o wok yumi mekim, yumi ken kamapim long ol olsem yumi pilim tru wok bilong ol. (Snd 15:23) I stret yumi mas tingim tru ol brata i mekim bikpela wok bilong helpim yumi.—1 Te 5:12, 13.
5 Baibel i kolim wok bilong ol wokman bilong kongrigesen na mak ol i mas winim bilong kamap wanpela wokman. (1 Ti 3:8-10, 12, 13) Wok holi ol i mekim i wanpela bikpela samting tru bilong helpim kongrigesen long wok gut. I stret yumi ken strongim ol dispela man long olgeta taim, long wanem, olgeta i “wok strong long mekim wok bilong Bikpela.”—1 Ko 15:58.