Sapos God i Bosim Graun, Em Gutpela

OL SAMTING ol gavman i bin mekim i kamapim long ples klia olsem ol sinman i no inap bosim gut ol narapela man. Wanpela bikman bilong Englan (Lord Acton) em i tok: ‘Taim man i kamap bikman na kisim strong, dispela inap bagarapim pasin bilong em; na sapos em i kamap nambawan bikman na em i gat strong bilong bosim olgeta samting, dispela inap bagarapim moa yet pasin bilong em.’ Olsem na Baibel i tok: “Sampela bikman i wok long daunim ol arapela manmeri na mekim nogut long ol.”—Saveman 8:9.

Pastaim God Jehova i bin givim strong long ol man bilong bosim ol animal, tasol em i no givim strong long ol bilong bosim ol man. God i tokim namba wan Pikinini bilong em long heven, olsem: “Nau yumi wokim ol manmeri bai ol i kamap olsem yumi yet. Bai yumi putim ol i stap bos bilong ol pis na ol pisin na bilong olgeta kain animal na bilong olgeta samting bilong graun.” (Stat 1:26) Dispela Man bilong wokim ol manmeri em i Bos bilong ol. Orait, olsem wanem na bihain dispela samting i senis?

Taim namba wan man i stap long Gaden Iden, em i bikhet long God—em i no laik bai God i stap Bos bilong em. Kirap long dispela taim na i kam inap long nau ol manmeri i bin mekim wankain pasin. (Stat, sapta 3) Dispela pasin i kamap long ples klia long lain Israel long bipo, em dispela lain God i bin kisim ol i stap lain bilong em yet. Taim ol Israel i tok ol i laik makim wanpela man bilong graun i kamap king bilong ol, Jehova i tokim profet bilong em, Samuel, olsem: “Yu no ken ting ol i les long yu na ol i laik rausim yu. Nogat. Ol i no laik mi stap king bilong ol, na ol i rausim mi.”—1 Samuel 8:7.

Taim God i bosim ol Israel em i mekim gut long ol. Moses i stap olsem mausman bilong Jehova, na long rot bilong Moses, Jehova i bin givim ol gutpela lo long ol Israel bilong lukautim ol. Sapos ol i bihainim ol dispela lo, bai ol i abrusim planti sik, na bai ol i sori long ol lapun na ol meri em man bilong ol i dai pinis na ol pikinini i no gat papamama. Lo bilong God i tok, ol i mas tingim gut ol samting bilong ol narapela man na ol i no ken bagarapim, na ol i mas mekim stretpela pasin long wok bisnis bilong ol. Lo i tambuim ol long mekim pasin wantok, na long mekim tok giaman long kot, na long kisim o givim grismani. God i bosim ol long stretpela pasin tru.

Na Jehova i no tingting long bosim ol Israel tasol, em i tok promis olsem em bai bosim olgeta manmeri. Em i tok em bai pinisim wok bos bilong ol sinman, na em bai givim strong long pikinini bilong em bilong bosim olgeta man. God i tok profet long dispela samting long maus bilong Esekiel, em i tok: “Bai ples i stap nating inap long taim wanpela man i kam. Mi bin makim dispela man na em bai i bosim.”—Esekiel 21:27.

God i bin makim Krais Jisas bilong bosim ol man olsem helpim bilong Em yet, em i Nambawan Bikpela King. Kingdom bilong God long han bilong Krais, em i nambawan gutpela rot bilong bosim olgeta manmeri, olsem na Krais i bin lainim ol disaipel long beten askim God long dispela Kingdom. Em i tok: “Yupela i mas mekim kain [beten] olsem, ‘Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.’”—Matyu 6:9, 10.

Gutpela pasin Jisas i bin mekim long ol man i makim gutpela wok bos em bai mekim. Em i save sori long ol man. Baibel i tok: “Em i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Jisas i gat bikpela sori tru long ol disaipel bilong em na em i kamapim dispela long ples klia taim em i tok: “Na nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela.” (Jon 13:34) Em i laikim tru ol manmeri, olsem na em i dai bilong baim bek ol. Dispela ofa inap helpim ol manmeri i bilip long en, na bai sin bilong ol i tekewe na sik na i dai i no ken painim ol moa.—1 Jon 2:1, 2; Kamapim Tok Hait 21:1-4.

Long rot bilong spirit holi God i givim tingting long profet Aisaia na Aisaia i stori long gutpela wok bos God bai mekim long rot bilong Krais Jisas, em God bai bosim ol man long stretpela pasin na kamapim gutaim, na bai ol i stap bel isi. Profet Aisaia i tok: “Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, na em bai i gat ol dispela nem, ‘Man bilong givim gutpela tingting tru’ na ‘God i gat bikpela strong’ na ‘Papa bilong i stap oltaim’ na ‘King bilong kamapim gutpela sindaun na bel isi.’ Dispela king bai i stap senis bilong King Devit, na em bai i sindaun long sia king bilong Devit na bosim ol manmeri. Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim. Long wanem, dispela king em i king bilong mekim gutpela na stretpela pasin tasol, na dispela pasin bilong en bai i mekim em i stap strongpela king, nau na olgeta taim bihain. Bikpela I Gat Olgeta Strong i gat strongpela laik tru long mekim gut long ol manmeri bilong en, olsem na em bai i mekim ol dispela samting i kamap.”—Aisaia 9:6, 7.

Sampela man ol bai stap olsem helpim bilong gavman bilong God long graun, na bai ol i bihainim ol gutpela pasin sori bilong Jisas wankain olsem ol wasman long ol kongrigesen Kristen tru long nau i mekim. Ol dispela wasman i no mekim hatpela pasin long bosim ol man olsem ol pris pasto i save mekim; nogat; ol i save sori long ol manmeri i kain olsem sipsip na ol i wok long helpim ol wankain olsem Jisas i bin mekim. Profet Aisaia i stori long ol dispela man i givim bel long God na em i tok: “Harim. I gat wanpela king bai i kamap, na dispela king wantaim ol bikman bilong kantri bai ol i bihainim gutpela na stretpela pasin tasol na bosim gut ol manmeri.” (Aisaia 32:1) Ol dispela man em God i putim ol i stap wasman long nau, bai ol i mekim wankain wok bilong God long nupela taim long bihain.—Buk Song 45:16.

Bikpela Senis Klostu Bai Kamap!

Tasol bikpela senis tru i mas kamap pastaim na bai Kingdom bilong God i ken bosim olgeta manmeri na i no gat narapela gavman i stap. Taim dispela senis i kamap, bai ol manmeri i no bruk bruk moa long narapela narapela lain. Ol planti gavman bilong ol man, em ol i stap birua birua, bai ol i pinis, na bai i gat wanpela stretpela gavman bilong heven i bosim ol manmeri, na bai ol i stap wanbel na bel isi. Profet Daniel i tokaut long dispela samting, olsem: “Na taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:44.

God yet i mas bosim graun—i no gat narapela rot bilong stretim ol hevi bilong gavman i painim ol man long nau. Pasin bilong dispela graun i go nogut tru na nau bagarap inap painim olgeta man meri pikinini na bai ol i pinis olgeta long graun! I no gat wanpela wok ol man i tingting long mekim em inap stretim dispela hevi. Olsem na sapos yumi laik bihainim gutpela tingting, yumi mas tingim dispela rot Baibel i kolim bilong stretim ol hevi, na yumi mas bilip na wetim dispela gutpela taim i klostu pinis, em taim bilong God tasol i bosim graun, na ol manmeri i gat stretpela bel bai ol i kisim blesing.

[Piksa long pes 6]

‘Wanpela king bai i kamap, na em bai bihainim stretpela pasin tasol na bosim gut ol manmeri’