Ripot long Wok Bilong Kingdom
Ol i Painim Pinis As Bilong Senisim Pasin Bilong Ol
INAP ol raskol na ol man bilong pait i senisim pasin bilong ol? Wanem samting inap helpim ol long mekim olsem? Sol bilong Tarsus i bin senisim tru pasin bilong em. Pastaim em i bin bagarapim ol Kristen, tasol bihain em yet i bin kamap wanpela Kristen. Na bihain em i kamap aposel Pol. (Galesia 1:13, 14; 1 Timoti 1:13) Long Kenya tu kain senis olsem i bin kamap.
◻ Long Nairobi, long hap bilong Kenya, wanpela lain raskol i bin salim wanpela yangpela man bilong lain bilong ol i go long wes Kenya bilong painim rot bilong hansapim ol man na stilim mani samting long ol haus mani. Em i go slip long haus bilong wanpela lapun man na em i lukim sampela olpela nius Kirap! long haus bilong lapun man. Yangpela man i givim bel tru long kaunim ol dispela nius na em i lusim tingting olgeta long wok bilong em, em lain bilong em i salim em long mekim. Taim em i kaunim olgeta nius pinis, em i tokim lapun em i laik kisim sampela moa. Lapun man i tok, wanpela i save kam long pos ofis long olgeta tupela wik. Kirap long dispela taim yangpela man i askim dispela lapun man long i go long pos ofis olgeta de long painim sampela nius moa. Na yangpela man i kirap wokim tingting long lusim olgeta pasin nogut bilong em bambai em inap bihainim ol samting em i bin kaunim long ol nius na em bai inap kamap wanpela Witnes Bilong Jehova. Em i kirap tokim ol man i stap klostu olsem em i wanpela Witnes Bilong Jehova. Bihain wanpela man bilong autim gutnius long olgeta taim i autim gutnius long dispela hap na em i kirap nogut long harim tok bilong yangpela man i tok em i wanpela Witnes Bilong Jehova. Yangpela man i kirap stadi long Baibel, na em i kamap strong na nau em i kamap wanpela man bilong autim gutnius long olgeta taim. Stretpela save em i kisim long Baibel i helpim em long senisim pasin bilong em.
◻ Wanpela man bilong Ajentina tu i painim pinis as bilong senisim pasin nogut bilong em. Inap olsem 20 yia, em i bin mekim nogut long meri bilong em, em i wanpela Witnes Bilong Jehova. Sampela i stori olsem em i bin wokim hul klostu long haus na putim kruse i stap, long wanem em i laik kilim stilman i wok long stilim ol kakaruk bilong em na bai em i planim dispela stilman bilong dispela hul. Pasin nogut bilong em i kirapim ol man i stap klostu long abrusim em.
Wasman sekit i kam lukim dispela man na em i tok long kirapim Baibel-stadi wantaim em, na wasman sekit i kirap nogut taim dispela man i orait long dispela. Wasman sekit i stadi wantaim dispela man long buklet Stap Amamas Oltaim long Graun! Dispela man i kamap strong long ol samting bilong spirit na em i kisim ol stretpela save bilong Baibel. Nau em i wok long i go long olgeta miting. Em i laikim tru olgeta miting na em i amamas long bung wantaim ol brata, olsem na em i tok: “Dispela em lain mi laik i stap long en.”
Ol man i stap klostu i lukim dispela senis i kamap long dispela man na ol i askim meri bilong em, wanem dokta i wok long helpim man bilong em. Taim meri bilong em i tokim ol olsem dispela senis i kamap long wanem man bilong em i stadi long Baibel wantaim ol Witnes Bilong Jehova, wanpela meri i stap klostu i pilim tru dispela samting na em i tok em i laik kisim wanpela Baibel. Narapela meri i kisim sabskripsen bilong wanpela nius bilong yumi.
Stretpela save bilong Baibel i helpim gut dispela tupela man na nau i gat as tru long tupela i senisim pasin bilong tupela. Dispela stretpela save bilong Baibel inap helpim yu tu sapos yu laik bai i stap bilong yu i gat gutpela as bilong en long nau, na yu ken wet long kisim laip oltaim long nupela taim em God i promis long en.—Jon 17:3.