Gutaim Tru Wanem Kain Pasin Bai Kamap?

TAIM God i kamapim gutaim long graun, bai gutpela taim tru i kamap. Dispela tok ‘gutaim’ i no makim tasol olsem ol pait bai pinis long olgeta hap, o ol lain bilong graun bai wok long lusim ol bom nogut bilong nuklia. Nogat. Sapos yumi skelim dispela tok ‘gutaim’ long Baibel, yumi inap save long dispela samting.

Long hap bilong Baibel ol i bin raitim pastaim long tok Hibru (“Olpela Testamen”) dispela tok gutaim em sha·lohmʹ. Long Stat 37:14 Jekop i kolim dispela tok taim em i tokim pikinini man bilong em, Josep: “Yu go lukim ol brata, ol i stap gut, o nogat? Na yu lukim ol sipsip tu, ol i orait, o nogat? Yu lukim pinis, orait yu kam bek na toksave long mi.”a Long Stat 41:16 Baibel i kamapim gen dispela tok (Sha·lohmʹ) na long tok Pisin ol i raitim olsem “amamas.”

Long Baibel, gutaim tru i no makim tasol olsem ol pait i pinis. Nogat. Em i makim tu olsem ol man i stap gutpela, olsem ol i no gat sik, na ol i stap bel isi na i no pret long samting bai bagarapim ol. Wastaua bilong Novemba i stori olsem ol man i no inap long stretim rot bilong kamapim gutaim. Krais Jisas, em “King bilong kamapim gutpela sindaun na bel isi,” em tasol inap long kamapim gutaim tru long dispela graun. (Aisaia 9:​6, 7) Tingim tok profet Baibel i mekim long taim Krais i bosim graun, long Song 72:​7, 8 Baibel i tok: “Na taim em i stap yet ol manmeri i ken bihainim stretpela pasin tasol. Taim mun i lait yet, planti gutpela samting i ken kamap. Em bai i stap king na bosim olgeta manmeri long hap bilong solwara i stap klostu na i go inap long solwara i stap longwe. Na mak bilong graun bilong en i ken stat long wara Yufretis na i go inap long olgeta hap bilong graun.” Yu tingim? Bai i no gat sik, na no gat pret, na ol man bai stap gutpela long olgeta hap bilong graun! Maski ol gavman i sainim ol pepa bilong kamapim gutaim, ol i no inap kamapim gutpela taim tru olsem. Tasol Kingdom bilong God inap mekim, na em bai kamapim sampela gutpela wok moa. Baibel i mekim ol tok profet long dispela gutaim em bai kamap long graun long bihain na sapos yumi kisim save long ol dispela tok, bai yumi amamas. Orait, nau yumi ken skelim sampela bilong ol dispela tok profet.

Pasin Bilong God long Pinisim Ol Samting Bilong Pait

Long Song 46:​8, 9 Baibel i tok: “Kaman! Yupela lukim wok Bikpela i mekim. Bai bel bilong yupela i kirap nogut long planti narakain samting em i mekim long graun. Em i save mekim i dai pait long olgeta hap graun. Em i save brukim olgeta banara na spia, na i save kukim ol hap plang long paia.” Dispela ol tok “banara” na “spia” na “hap plang” i olsem tok piksa na i makim ol samting bilong pait. Jehova i no tingting long pasim ol man long wokim planti samting bilong pait o kirapim ol long lusim olgeta samting bilong pait. Nogat. Em bai pinisim olgeta samting bilong pait​—⁠ol bikpela gan, na ol ka i gat bikpela masin-gan, na ol samting bilong tromoi roketbom, na olkain hanbom, na ol masket, na ol liklik gan​—⁠em bai pinisim olgeta samting em inap long bagarapim gutaim i laik kamap long dispela graun!

Tasol ol bom samting bilong pait i no as bilong pait. Planti taim pait i kamap long wanem ol man i gat pekato, na ol i save mekim pasin birua, na mangal, na ol i gat hatpela pasin. (Lukim Jems 4:​1-3.) Kingdom bilong God bai pinisim as bilong pait​—⁠em bai pinisim ol dispela pasin nogut tru i stap long ol man. Kingdom bai mekim olsem wanem? Long rot bilong skulim ol man bilong olgeta hap bilong graun. Baibel i tok: “Olgeta samting long graun bai i save tru long Bikpela [Jehova]. Dispela save bai inapim olgeta hap graun olsem solwara i inapim mak bilong en olgeta.”​—⁠Aisaia 11:⁠9.

“God bai i skulim olgeta manmeri,” olsem na maski ol i gat narapela narapela skin, dispela i no ken kirapim ol long krospait o mekim pasin birua o tingting nogut long narapela. (Jon 6:45) Olgeta manmeri i stap long graun bai bihainim pasin bilong God olsem Baibel i stori long en, olsem: “God i save mekim wankain pasin long olgeta manmeri, maski ol i bilong wanem lain.” (Aposel 10:34) Kingdom bilong God bai pinisim narapela as bilong pait, em ol dispela boda i save brukim ol man i stap long narapela narapela kantri. ‘Long hap bilong solwara i stap klostu na i go inap long solwara i stap longwe, na i go inap long olgeta hap bilong graun,’ olgeta man bai givim bel long King Krais Jisas na wok gut wantaim em.​—⁠Song 72:⁠8.

Bilong helpim dispela gutaim long i stap oltaim, Kingdom bai pinisim tu ol lotu giaman, em wanpela samting i bin brukim ol man i stap narapela narapela lain. (Sefanaia 2:11) Olgeta manmeri bai wanbel long lotuim God wanpela tasol, em i God tru. (Aisaia 2:​2, 3) Pasin bilong stap brata brata bai kamap long olgeta hap bilong graun!

Bel Isi Insait long Famili

Sapos insait long famili ol i tok pait na toknogutim narapela, na narapela i tok long bagarapim narapela, bai gutaim na bel isi i no ken i stap long dispela graun. Long nau planti famili i save mekim kain pasin olsem. Na sampela famili ol i save birua tru, tasol ol i no kamapim dispela long ples klia; ol i pasim maus tasol na narapela i no toktok liklik long narapela. Bilong gutaim tru i ken kamap, insait long famili tu gutpela pasin bel isi i mas i stap. Taim Kingdom bilong God i lainim na skulim ol man, bai ol man na meri marit i lain long laikim tru poroman marit bilong ol na tingim gut em. (Kolosi 3:​18, 19) Baibel i tok, bai ol pikinini i lain long ‘bihainim tok bilong papamama long olgeta samting.’ (Kolosi 3:20) Bai i no gat ol yangpela man na meri i bikhet na givim hevi long papamama. Olgeta bai bihainim pasin bilong harim tok na pasin bilong stap wanbel. Bai yumi amamas long lukim ol pikinini, na bai yumi amamas taim ol i stap wantaim yumi.

Long nau, long planti famili, papa na mama wantaim i mas wok mani, long wanem famili i sot long mani samting, na dispela i putim bikpela hevi long famili. Tasol taim Krais i bosim graun, ol famili bai i no gat hevi long mani samting​—⁠bai ol i no gat wok moa long tromoi bikpela mani bilong baim paua na wara, na baim haus long mun, na baim takis, na bai i no gat hevi moa long planti man i no gat wok. Bai i gat planti gutpela wok ol man inap mekim na bai ol i amamas long mekim. Bai olgeta man i gat haus na ples bilong slip. Tok profet long Aisaia 65:​21-23 i tok klia long dispela samting, em i tok: “Ol manmeri bilong mi bai i wokim ol haus na stap long ol. . . . Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol . . . Na bai ol i amamas long ol samting ol yet i bin hatwok long kamapim. Wok ol i mekim bai i no inap lus nating. Na ol pikinini bilong ol bai i no inap painim bagarap, long wanem, ol i pikinini bilong dispela lain mi bin makim bilong mekim gut long ol. Na bai mi mekim gut long ol na long ol pikinini bilong ol na long ol lain bilong ol i kamap bihain.”

Sapos yu inap i stap long wanpela ples em ol man i no bagarapim, na i no gat pairap bilong ol ka na masin samting bilong ol taun, na i no gat ol smel nogut bilong taun, bai yu amamas, a? Sapos yu inap i stap long wanpela hap graun i gat planti diwai​—⁠em graun bilong yu yet​—⁠na ol man i bin planim kaikai pinis, na planim ol purpur na diwai long en na mekim i kamap naispela tru, bai yu amamas, a? Bai yu inap pulim win em i klinpela na gutpela tru, na bai i no gat pairap bilong ka samting o smok nogut bilong faktori. Nogat. Bai yu harim tasol krai bilong ol pisin, na pairap bilong wara i ron i kam daun long maunten, o si i bruk long nambis. Dispela bai mekim skin na tingting bilong yu i malolo na bai yu amamas tru. Long nau sampela man tasol i gat kain gutpela sindaun olsem. Tasol taim Kingdom bilong God i bosim graun, bai olgeta manmeri inap long kisim gutpela sindaun na amamas long dispela ol gutpela samting. No gat wanpela man bai stap rabis, o hangre, o i stap nogut.​—⁠Song 72:​13, 14, 16.

Na tu Baibel i tok promis olsem: “God bai i rausim ol man i save mekim pasin nogut na i no save bihainim em.” (Sindaun 2:22) Olsem na bai i no gat pasin nogut o pasin raskol i stap. Bai yu no ken tingting planti long ol man nogut bai bagarapim liklik pikinini bilong yu taim em i go pilai, o ol man bai hait i stap na i laik stilim pikinini; na bai i no gat man i dring spak na i draiv spit tru i kam kilim i dai pikinini, o ol lain i spak long drak na i raun na i laik bagarapim pikinini. Nogat. Bai ol pikinini inap amamas na pilai i stap, no gat wanpela samting bilong pretim ol o bagarapim ol.

Gutaim na i Stap Bilong Yu Yet

Tasol maski yu gat gutpela sindaun, olsem long ples Paradais, sapos sik kensa o narapela sik i wok yet long bagarapim yu na yu pilim pen i stap, bai yu no stap gutpela, a? Olsem na bilong gutaim tru i ken kamap, olgeta kain sik na i dai tu i mas pinis. Dispela inap long kamap o nogat? Taim Jisas i stap long graun em i wokim planti mirakel na dispela i kamapim long ples klia strong bilong em long oraitim ol sikman. (Matyu 8:​14-17) Krais i stap king long heven na em bai inap wokim ol mirakel long olgeta hap bilong graun. Baibel i tok promis olsem: “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.”​—⁠Aisaia 33:24; 35:​5, 6.

Krais bai i pinisim ol sik, na em bai wok long pinisim ol narapela hevi tu bilong ol man. Aposel Pol i tok klia long wok king bilong Krais, olsem: “Krais i mas i stap king i go inap em i daunim olgeta birua bilong en. Em i pinisim pinis olgeta arapela birua, orait em bai i pinisim dai tu.” (1 Korin 15:​25, 26) Kirap long taim bilong Adam, i dai i bin kamapim bikpela hevi long ol man, tasol Krais bai pinisim i dai. Krais yet i tok: “Taim i laik kamap na olgeta manmeri i stap long matmat ol bai i harim maus bilong Pikinini [Krais], na ol bai i lusim matmat na i kam ausait.” (Jon 5:​28, 29) Planti milion manmeri i bin i stap nogut i go inap long taim ol i dai, bai ol i kirap bek na bai ol inap insait long wok bilong kamapim gutaim long graun.

Olsem wanem? Yu bai stap long dispela taim na insait long dispela wok? Ol Witnes Bilong Jehova i laik bai yu kisim sampela save moa long Baibel long dispela samting.b Yu no ken ting gutaim i no inap kamap. Nogat. Em bai kamap tru. Sapos yu wok strong long lain na bihainim tok bilong God, orait yu ken save tru, “God, em i as bilong pasin bilong bel isi, em bai i stap wantaim yupela”​—⁠inap oltaim!​—⁠Filipai 4:⁠9.

[Ol Futnot]

[Piksa long pes 5]

Jehova bai pinisim pait “long olgeta hap graun”

[Kredit Lain]

USAF Official Photo

[Piksa long pes 6]

Man na meri marit bai lain long stap bel isi wantaim