Wanem Samting Bai Kamap Bihain?
BILONG WANEM BEKIM BILONG DISPELA ASKIM I BIKPELA SAMTING? Tingting bilong man long wanem samting bai kamap long bihain dispela i save stiaim pasin em i bihainim long nau. Olsem: Ol man i save ting olsem i no gat gutpela samting bai i kamap bihain ol i gat dispela tingting: “Yumi kaikai na dring, long wanem, tumora bai yumi dai.” (1 Korin 15:32) Man i gat kain tingting olsem, em i save kaikai na dring planti tumas, na em i save tingting planti—ol dispela samting i no save mekim man i stap bel isi tru.
Tru, sapos yumi ting olsem ol samting bai kamap bihain i kamap long strong bilong ol man tasol, bai i no gat gutpela samting i kamap. Ol man i bagarapim win, wara na graun, winim olgeta taim bipo. Ol man i pret long pait nuklia bai kamap na ol lain teroris i wok long kamapim bikpela bagarap. Planti bilion man long olgeta hap ol i gat sik na ol i stap rabis. Maski i olsem, i gat as tru na yumi ken wetim gutpela samting bai kamap bihain.
Ol man i no inap tokaut long wanem samting tru bai kamap long bihain, tasol God Jehova i tok long em yet olsem, “taim wanpela samting i no kamap yet, mi save tokaut long dispela samting bai i kamap na bai i go pinis olsem wanem. Bipo yet mi bin tok long ol samting bai i kamap, na bihain ol dispela samting i kamap tru olsem mi bin tok.” (Aisaia 46:10) Jehova i tok wanem long ol samting bai kamap long bihain?
Tok Baibel i Mekim
Jehova bai i no inap larim ol man i bagarapim dispela graun olgeta na ol samting i stap long en. Baibel i tok promis olsem God bai “bagarapim ol man i bin bagarapim graun.” (KTH 11:18) Long rot bilong Kingdom bilong em long heven, Jehova bai rausim olgeta samting nogut long graun na kamapim gen ol gutpela samting em i tingting pinis long kamapim. (Stat 1:26-31; 2:8, 9; Matyu 6:9, 10) Ol tok bilong Baibel nau yumi kamapim bai soim yumi long ol samting bai kamap bihain, na ol i stori long ol samting bai painim olgeta man long graun.
Song 46:8, 9. “Kaman! Yupela lukim wok Bikpela i mekim. Bai bel bilong yupela i kirap nogut long planti narakain samting em i mekim long graun. Em i save mekim i dai pait long olgeta hap graun. Em i save brukim olgeta banara na spia, na em i save kukim ol hap plang long paia.”
Aisaia 35:5, 6. “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas. Na ol wara bai i kamap long ples wesan nating na ran i go long olgeta hap.”
Aisaia 65:21, 22. “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring.”
Daniel 2:44. “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”
Jon 5:28, 29. “Taim i laik kamap na olgeta manmeri i stap long matmat ol bai i harim maus bilong [ Jisas], na ol bai i lusim matmat na i kam ausait.”
KTH 21:3, 4. “God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”
Olsem Wanem Bekim Bilong Baibel i Mekim Bel Bilong Man i Stap Isi Tru?
Ating pastaim bai i hatwok long bilip olsem ol gutpela samting nau yumi stori long en bai kamap tru. Tasol God i mekim ol dispela tok promis, na i no ol man. Na God Jehova “i no save giaman.”—Taitus 1:2.
Sapos yu lain long bilip long ol tok promis bilong God na yu bihainim lo bilong em long i stap bilong yu, bai yu stap bel isi maski ol bikpela hevi i painim yu. Ol hevi olsem woa, stap rabis, sik, hevi bilong lapun na yu save olsem klostu dai bai painim yu—dispela ol samting bai i no inap tekewe bel isi bilong yu. Bilong wanem? Long wanem, yu bilip tru olsem Kingdom Bilong God bai pinisim olgeta dispela hevi.
Olsem wanem yu ken kisim dispela kain bilip long samting bai kamap bihain? Yu mas ‘larim God i mekim tingting bilong yu i kamap nupela’ na bai yu inap long save tru long “ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:2) Ating yu laik kisim sampela save moa long ol samting i soim olsem ol tok promis bilong Baibel i tru na yu ken bilip long en. Kain wok painimaut olsem em i gutpela. I no gat planti samting yu inap mekim long laip bilong yu na dispela bai mekim na bel bilong yu bai i stap isi moa.
[Ol Piksa long pes 8, 9]
Baibel i tok wanem samting bai kamap long bihain?