Tingim God Taim Yu Yangpela Yet
“OL YANGPELA i no amamas: Em hevi bilong olgeta hap.” Dispela tok i kamap long wanpela nius (The Star) bilong Johanasbek, long Saut Afrika. Dispela nius i tok moa olsem: “Long nau planti yangpela long ol biktaun i bel hevi, long wanem i no gat planti wok, na long olgeta hap planti bisnis i bagarap. Long Miami, na Sen Salvado, na Managua, na Teran, na Keip Taun, ol man i kros long gavman na ol i bin bung bung long rot na mekim pait—na long ol dispela pait planti ol yangpela i bin i dai.”
Dispela tok i bin kamap long nius hia inap 10-pela yia bipo, na nau ol samting i go nogut olgeta. Bilong wanem planti yangpela long olgeta hap bilong graun i no amamas? Ol hevi bilong dispela graun i as bilong dispela samting. Long nau planti man tru i no gat wok. Na planti famili i bruk, olsem na ol yangpela i no inap i stap amamas na bel isi, a? Ol yet i no inap stretim ol dispela hevi bilong graun, olsem na sampela i kirap na kros long ol gavman samting. I no gat wanpela gutpela samting ol i wetim i kamap long bihain, olsem na ol i no i stap amamas.
Tasol ating ol lotu inap helpim ol yangpela long bilip na wetim gutpela samting i kamap? Nogat. Wanpela yangpela man i tok: “Tingting bilong mi i paul . . . mi gat planti pren ol i bilong narapela narapela lotu, na ol i wankain olsem mi. Tingting bilong mi i paul na mi no save mi mas bilip long wanem samting. Plis, yu inap helpim mi?” Wanem kain tok bai yu givim long kain yangpela olsem?
Ol yangpela i pas gut long tok bilong God na kongrigesen Kristen tru ol i no save paul nabaut na bel hevi olsem. Planti yangpela i no save wanem samting bai painim ol long bihain, tasol ol yangpela Kristen i save bilip long God Jehova na long ol tok i tru bilong em long Baibel. Olsem na ol bai inap abrusim bagarap taim dispela pasin bilong nau i pinis, na bai ol inap i stap oltaim oltaim. Bihain, taim i no gat pasin giaman na pasin nogut, ol inap i stap long “nupela graun” em “stretpela pasin tasol bai i stap long en.” (2 Pita 3:13; Jon 17:3) Sapos ol yangpela i laik i stap long dispela gutpela taim long bihain, orait Baibel i tok ol i mas tingim God, em Man “i bin wokim yumi olgeta.” (Saveman 12:1) Olsem na sapos yumi laik helpim tru ol, nambawan gutpela tok yumi ken givim long ol, em olsem: Yupela i mas insait long kongrigesen Kristen na stap strong insait long kongrigesen. Bilong wanem ol i mas mekim olsem?
Yupela planti yangpela manmeri insait long kongrigesen yupela i gat papamama Kristen na ol i save laikim yupela tumas na ol i laik helpim yupela. Insait long ol kongrigesen i gat ol elda i stap bilong helpim yupela long ol samting bilong spirit. Yu no ken ting ol dispela samting bilong helpim yu i liklik samting. Tok i tru bilong God wantaim save i kam long God bai helpim yu long stap bel gut na bel isi, na bai yu inap bilip na wetim gutpela samting em bai kamap tru long bihain. Olgeta dispela samting bai helpim yu long ‘bilip tru na i no gat asua long ai bilong God.’ Na bai bilip bilong yu i kain olsem wanpela anka i holimpas sip na sip i no ken bagarap long taim nogut.—1 Timoti 1:18, 19; lukim tu Hibru 6:19.
Klia long Ol Amamas Bilong Graun
Maski i gat planti ol blesing ol yangpela i ken kisim insait long kongrigesen, sampela i laik bihainim pasin bilong graun. Ol i ting ol i lus long sampela amamas ol inap painim long dispela graun ausait long kongrigesen Kristen. Tasol yu ting i gat wanpela gutpela samting bilong dispela graun em inap helpim yu?
Wanpela wokman bilong God i bin i stap insait long wok autim tok inap 40 yia na em i tok: ‘Wanpela samting tasol mi bel hevi long en, em olsem: Ol samting mi bin mekim taim mi no save yet long tok i tru. Long dispela taim mi bilong dispela graun na mi save bihainim pasin bilong dispela graun. Taim mi winim 18 krismas na mi tingim ol samting mi bin mekim, mi pilim olsem i stap bilong mi i no gat as bilong en. Mi stap bilong mekim nating tasol; mi no tingim wanpela gutpela wok mi laik mekim. Ol amamas bilong graun em mi ting mi kisim amamas long en i save mekim na mi bel hevi; mi no kisim amamas tru. Mi wok long painim tok i tru. Wanpela yia bihain mi painim pinis, na mi kirap mekim wok bilong autim tok long olgeta de. Mi no gat mani, na mi no gat bikpela save long tok i tru, tasol mi bilip tru olsem Jehova bai helpim mi. Nau taim mi tingting i go bek long ol samting mi bin mekim, em mi bin lusim planti yia long mekim wok bilong God long olgeta de, mi amamas tru. Mi no laik lusim ol gutpela samting mi kisim taim mi mekim wok bilong Jehova na wok long kisim gen ol amamas bilong dispela graun.’ Dispela tok i kamapim tingting bilong planti tausen Witnes Bilong Jehova.
Orait, bilong wanem yu laik kisim ol samting ol narapela Kristen i lusim pinis? Bilong wanem yu aigris long ol samting bilong dispela graun em i bilong bagarap? (1 Jon 2:15-17) Yupela ol yangpela, ating yupela i ting taim yupela i mekim wok bilong Jehova dispela i pasim yupela na yupela i lus long kisim ol amamas bilong graun? Tasol yu ting yu bihainim savepasin sapos yu ting papamama na ol elda i pasim yu tumas taim ol i laik helpim yu long amamasim Jehova na kisim laip oltaim?
Sapos wanpela mama i salim pikinini bilong em i go long stua na i tokim em long lukluk gut taim em i laik brukim rot, yu ting dispela mama i putim strongpela lo tumas long pikinini? Dispela mama i sori long pikinini na i laik helpim em, a? Sapos pikinini i sakim tok bilong mama bilong em na ka i kilim em i dai, bai yu ting olsem mama i bin putim strongpela lo tumas long pikinini? Ating bai yu ting i gutpela sapos mama i bin putim strongpela lo moa yet long pikinini na mekim sampela samting moa bilong lukautim em bambai em i no ken bagarap, a? Em i wankain long ol lo bilong God. God i putim ol dispela lo long yumi, long wanem em i sori long yumi na em i laik helpim na lukautim yumi; i no bilong pasim yumi.
Maski yu kamap bikpela insait long wanpela famili Kristen, dispela samting tasol i no inap helpim yu long sakim ol samting bilong dispela graun i laik pundaunim yu. Yu yet yu mas bilip olsem ol tok bilong God long Baibel i tru. Sapos yu bilip tru olsem na yu laikim tumas Man i bin wokim olgeta samting, dispela bai kirapim yu long givim skin bilong yu long God bilong mekim wok bilong Em, olsem dediket long Em. Sapos yu bilip tru olsem, dispela bai helpim yu long redi oltaim long bekim tok long ol man i askim yu long as bilong gutpela samting yu wetim i stap. (1 Pita 3:15) Yu mas bihainim ol tok bilong Baibel na larim ol dispela tok bilong God i stiaim tingting na wokabaut bilong yu, na bai yu inap i stap amamas tru. (Josua 1:8; Buk Song 119:9) Sapos yu laik painim gutpela sindaun long bihain, yu mas lain.
Ol Samting Bilong Lainim Yu
Yupela ol papamama Kristen, yupela laik lukim pikinini bilong yupela i kamap strong na i stap wanbel wantaim yupela long lotu i tru. Papa i gat bikpela wok long “stretim gut ol pikinini” na “skulim ol long tok bilong Bikpela.” (Efesus 6:4) Tasol yupela inap tingim sampela samting moa yupela inap mekim bilong lainim gut ol pikinini? Yupela save poromanim gut ol pikinini bilong yupela? Yupela i save wok wantaim ol? Yupela i save bung wantaim ol na mekim sampela samting bilong painim gutpela amamas?
Pasin yupela i mekim i bikpela samting long ol pikinini i ken lukim. Sapos yupela i laik bai ol i tingim tok i tru i bikpela samting, orait yupela yet i mas laikim tok i tru. (3 Jon 2-4) Sapos yupela i laik bai ol pikinini i harim gut tok bilong oganaisesen bilong Jehova na ol elda, orait yupela yet i mas mekim olsem.
Wok bilong lainim ol pikinini em i wok bilong ol papamama, tasol ol elda tu i gat wok long helpim ol yangpela insait long kongrigesen. Taim ol i lukautim lain sipsip bilong God, ol i mas lukautim tu ol pikinini sipsip. (1 Pita 5:1-3) Jehova i makim gutpela pasin bilong lukautim ol sipsip insait long kongrigesen—em i lukautim tu ol pikinini sipsip! (Aisaia 40:11) Ol elda i mas bihainim pasin bilong Jehova na mekim pasin sori long ol yangpela na tingim gut ol, na bai ol yangpela i amamas long i stap insait long kongrigesen. Sampela yangpela i tok ol i laik bai ol elda i toktok moa wantaim ol na helpim ol long wok autim tok.
Bilong lainim gut yangpela, em i no ken save tasol long ol tok bilong Baibel—long bel bilong em, em i mas nolaik tru long ol samting God i no laikim, na em i mas laikim tru ol samting God i laikim. (Amos 5:14, 15) Bilong helpim em long tingim God taim em i yangpela yet, papamama i mas skulim em gut long ol stretpela pasin bilong Jehova. (Sindaun 22:6; 2 Timoti 3:16) Papamama i mas stretim pikinini. Sampela papamama i tingting long i stap pren bilong pikinini na ol i no laik stretim pikinini; taim pikinini i mekim rong ol i larim em tasol, o ol i tok em liklik rong tasol. Ol i bihainim pasin bilong ol manmeri bilong dispela graun. Tasol sapos papamama i laikim tru pikinini, taim ol i harim tok olsem pikinini i bikhet o mekim nabaut, bai ol i stretim em. (Sindaun 13:24) Sapos papamama Kristen i tingting long i stap pren bilong pikinini na ol i larim em tasol, ol i bihainim tingting kranki. Ating bihain bai pikinini i lus, long wanem, ol i no bin stretim em.—Sindaun 22:15.
Tingim Gutpela Wok Yu Ken Mekim
God Jehova i wokim yumi bilong kisim amamas long mekim wok bilong em. Tingim bikpela wok moa yet yupela yangpela inap mekim. Bikpela hap lain bilong olgeta manmeri bilong graun ol i yangpela manmeri i gat 20 krismas o ol i no winim yet 20 krismas. Ol dispela yangpela i no save ol i mas mekim wanem. I no gat wanpela gutpela samting ol i wetim i kamap, tasol yupela ol yangpela Kristen i wetim gutpela samting em bai kamap tru, na yupela inap tokim ol narapela yangpela long dispela gutpela samting. Sapos yupela i bihainim gutpela pasin Kristen na wok strong long mekim wok bilong Jehova, ating bai yupela i helpim planti yangpela long bihainim tok i tru. Na bai yupela i helpim ol long wokabaut long rot i go long laip.
Sapos yu tingting long givim skin bilong yu yet bilong mekim wok bilong Jehova, yu tingting long mekim gutpela wok. No gat wanpela wok i winim dispela wok. Olsem wanem? Yu tingting long mekim wok bilong autim tok oltaim na helpim ol manmeri long kisim laip? Yu ken mekim wok painia, o wok long wanpela brens-ofis bilong Sosaiti Was Taua, em ples bilong wokim ol buk na nius bilong Baibel. Maski yu no inap mekim olsem, yu mas mekim lotu bilong Jehova i kamap namba wan samting long laip bilong yu. Yu gat gutpela wok yu ken mekim. Yu mas “wok strong long mekim wok bilong Bikpela” i go inap long taim dispela pasin bilong nau i pinis.—1 Korin 15:58.
Olsem na yupela ol yangpela Kristen, yupela i mas wok strong i go yet. Nau yu mas tingim Man i bin wokim yu, na taim em i pinisim ol man bilong dispela graun i no tingim em, bai em i lukautim yu na yu no bagarap. Tru tumas, Jehova bai lukautim yu long dispela taim, na em bai givim gutpela blesing long yu—bai yu inap i stap oltaim oltaim long bihain.