Olsem Wanem Yu Inap Helpim Pikinini i Bin Lusim Jehova?

“Bel bilong yumi i mas gutpela, long wanem, . . . em i lus pinis, tasol nau yumi kisim em bek.”​—LUK 15:32.

1, 2. (a) Sampela yangpela i bin mekim wanem long tok i tru bilong ol Kristen? (b) Long kain taim olsem, papamama na pikinini inap pilim olsem wanem?

“MI LAIK lusim tok i tru!” Ol papamama i stap aninit long God na ol i bin wok strong long skulim ol pikinini long rot bilong ol Kristen, ol i save bel hevi stret taim ol i harim wanpela pikinini bilong ol i tok olsem! Tasol sampela pikinini, isi isi ol i save lusim tok i tru na ol i no tokaut long samting ol i laik mekim. (Hibru 2:1) Planti pikinini olsem, ol i kain olsem dispela pikinini man long tok piksa bilong Jisas, em i bin lusim papa na i go long wanpela longwe ples na em i tromoi olgeta mani samting em i bin kisim long papa, olsem hap samting bilong namba 2 pikinini.​—Luk 15:​11-16.

² Tru, planti Witnes Bilong Jehova i no gat dispela kain hevi, tasol ol Witnes i kisim dispela hevi, bel bilong ol i save bagarap stret. Na yumi ken tingim tu ol hevi inap painim dispela bikhet manki yet. Ating bel bilong em i wok long kotim em. Long tok piksa bilong Jisas, bihain dispela yangpela man “i kisim stretpela tingting,” na papa i amamas tru long dispela samting. Orait olsem wanem papamama na ol narapela insait long kongrigesen inap helpim ol yangpela i bin bikhet na bai ol i ken “kisim stretpela tingting”?​—Luk 15:17.

Wanem As na Sampela i Lusim Tok i Tru?

3. Wanem sampela as na sampela yangpela i lusim kongrigesen Kristen?

³ I gat planti handet tausen yangpela ol i amamas long mekim wok bilong Jehova insait long kongrigesen Kristen. Olsem na bilong wanem sampela i lusim tok i tru? Ating ol i pilim olsem ol i lus long kisim sampela gutpela amamas samting bilong dispela graun. (2 Timoti 4:10) O ol i ting i gat planti tambu tumas insait long banis sipsip bilong Jehova. Na i gat sampela samting moa inap mekim na yangpela i slek na i lusim lain sipsip bilong Jehova, olsem bel i gat tok, o em i gat laik long wanpela meri (o yangpela meri i gat laik long wanpela man), o em i laik bai ol wankrismas i ken orait long em. O ating em i lukim sampela pasin bilong papamama o bilong wanpela Kristen na em i ting ol i man bilong tupela maus, na long dispela as em i lusim wok bilong God.

4. Wanem as na sampela yangpela i slek na lusim Jehova?

⁴ Sampela taim, pasin bikhet bilong pikinini i makim olsem em i no strong long ol samting bilong spirit na i kamapim long ples klia tingting i stap long bel bilong em. (Sindaun 15:13; Matyu 12:34) Maski wanem samting i mekim na yangpela i lusim Jehova, sampela taim as bilong dispela i olsem: Em i no bin “kisim save long tok tru bilong God.” (2 Timoti 3:7) Nogut ol yangpela i mekim nating tasol long lotuim Jehova​—ol i mas wok long kisim pasin bilong pas gut wantaim em. Wanem samting bai helpim ol long mekim olsem?

Go Klostu Tru Long God

5. Ol yangpela i mas mekim wanem bambai ol i ken kisim pasin bilong pas gut wantaim God?

⁵ Disaipel Jems i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Bilong mekim olsem, yumi mas helpim ol yangpela long kisim pasin bilong laikim Tok Bilong God. (Song 34:8) Pastaim em i mas kisim “susu” tasol​—em ol as tok bilong Baibel. Tasol taim em i wok long kisim pasin bilong laikim Tok Bilong God na laikim swit bilong “strongpela kaikai”​—em ol strongpela tok bilong spirit​—i no longtaim tumas na em bai kamap strong long ol samting bilong spirit. (Hibru 5:​11-14; Song 1:2) Wanpela yangpela em i tokaut olsem em i bin givim bel olgeta long bihainim pasin bilong dispela graun, tasol bihain em i kirap laikim tru ol samting bilong spirit. Wanem samting i helpim em long tanim bel? Wanpela i bin tokim em long ritim Baibel olgeta, olsem na em i makim taim bilong ritim Baibel na em i mekim long olgeta taim. Em nau, ol yangpela i mas ritim Baibel long olgeta taim bambai ol i ken kisim pasin bilong pas gut wantaim Jehova.

6, 7. Olsem wanem papamama inap helpim pikinini long kisim pasin bilong laikim Tok Bilong God?

⁶ Em i bikpela samting tru long ol papamama i mas helpim pikinini long kisim pasin bilong laikim Tok Bilong God! Wanpela yangpela meri i bin poroman wantaim ol yangpela i save bikhet nabaut, maski papamama i bin mekim famili-stadi wantaim em long olgeta taim. Em i stori long famili-stadi bilong em olsem: “Taim papa i mekim askim, mi save ritim nating ol bekim, na mi no save lukluk long pes bilong em.” Ol papamama i gat gutpela tingting ol i no save inapim ol paragraf bilong stadi na em tasol, nogat. Ol i mekim stadi long pasin i skulim gut famili. (2 Timoti 4:2) Bilong amamas long stadi, pikinini i mas pilim olsem em i insait tru long en. Yu ken mekim sampela askim bilong kamapim tingting bilong em na larim em i kamapim tingting bilong em long dispela. Wok long kirapim em long stori long ol samting em i ken mekim bilong bihainim ol dispela tok yupela stadi long en.a

⁷ Na tu, mekim stadi long pasin i kirapim tingting bilong ol pikinini. Long taim i stret long mekim, kirapim ol pikinini long mekim sampela pilai i makim ol samting i bin kamap olsem Baibel i stori long en. Helpim ol long lukim long tingting ol ples na mak bilong graun i stap long ol hap em yupela i stori long en insait long stadi, na yu ken mekim wok long ol mep samting tu. Em nau, sapos papamama i wokim gut tingting, famili-stadi bai gutpela na i kirapim tingting bilong ol pikinini, na i no bihainim wankain pasin tasol. Na i gutpela sapos papamama i skelim pasin bilong ol yet​—ol i pas gut wantaim Jehova o nogat. Taim ol i wok strong long i go klostu long Jehova, orait ol inap helpim ol pikinini tu long mekim olsem.​—Lo 6:​5-7.

8. Olsem wanem beten inap helpim man long go klostu long God?

⁸ Beten tu i save helpim ol pikinini long go klostu long God. Wanpela yangpela meri i gat 15 krismas samting em i hatwok long makim rot em i laik bihainim​—em bai bihainim rot bilong ol Kristen o em bai bung wantaim ol pren bilong em i no gat wankain bilip olsem em. (Jems 4:4) Orait em i mekim wanem? Em i tokaut olsem: “Mi beten long Jehova na kamapim bel bilong mi long em. Em namba wan taim bilong mi long mekim olsem.” Em i bilip olsem Jehova i bin harim beten bilong em na helpim em, long wanem, bihain em i painim wanpela pren insait long kongrigesen Kristen em inap toktok gut wantaim em. Em i pilim olsem Jehova i wok long stiaim em, olsem na em i kirap mekim ol samting bambai em i ken pas gut wantaim God. Ol papamama inap helpim ol pikinini taim ol i wok long stretim pasin bilong ol yet long beten na mekim i kamap gutpela. Taim ol papa o mama i mekim beten bilong famili, ol i ken kamapim tru bel bilong ol na bai ol pikinini inap pilim olsem papamama i pas gut wantaim Jehova.

Isi Long Ol Tasol No Ken Larim Ol

9, 10. Olsem wanem Jehova i stap olsem gutpela piksa na i no les kwik long ol bikhetlain bilong Israel?

⁹ Taim wanpela yangpela i slek na isi isi em i laik lusim Jehova, ating em i laik i stap wanpis, na taim papamama i laik toktok wantaim em long ol samting bilong spirit em i wok long sakim ol. Long kain taim olsem, papamama i ken mekim wanem? Yumi ken tingim samting Jehova i bin mekim long lain Israel. Ol “i save bikhet,” tasol Jehova i no les kwik long ol na lusim ol hariap​—em i karim dispela hevi inap 900 yia, na bihain em i larim ol i bihainim rot nogut ol i laikim. (Kisim Bek 34:9; 2 Stori 36:​17-21; Rom 10:21) Planti taim ol i “traim” Jehova, tasol em i “marimari” long ol. “Planti taim em i pasim kros bilong em, na em i no belhat long ol.” (Song 78:​38-42) God i mekim stretpela pasin olgeta long ol. Ol papamama i laikim tru pikinini bilong ol, ol i save bihainim pasin bilong Jehova na ol i no les hariap long helpim pikinini taim em i no kirap kwik long harim tok bilong ol.

¹⁰ Man i save isi long narapela na i no les kwik, em i no lusim pasin bilong bilip olsem tupela inap kamap wanbel gen. Jehova i stap olsem gutpela piksa long pasin bilong isi long man na i no les kwik. “Planti taim” em i salim ol wokman bilong em i go long ol Israel bilong givim tok long ol. Jehova “i sori long ol,” maski ol “i wok long tok bilas long ol man God i salim i kam long ol, na ol i ting tok bilong ol i samting nating.” (2 Stori 36:​15, 16) Em i tokim ol Israel: “Yupela olgeta wan wan i mas tanim bel na lusim rot nogut yupela i bihainim.” (Jeremaia 25:​4, 5) Tasol Jehova i no lusim ol stretpela lo bilong em. Ol wokman bilong em i tokim ol Israel long “tanim bel” na kam bek long God na bihainim ol lo bilong em.

11. Papamama i ken mekim wanem na bai ol i no les kwik long helpim pikinini i laik lusim stretpela rot, tasol ol i strong na i no larim em tasol?

¹¹ Ol papamama i ken bihainim pasin bilong Jehova na i no ken les hariap long helpim pikinini i laik lusim stretpela rot. Ol yet i ken mekim ol samting bambai rot i op long ol i ken toktok gut wantaim em. “Planti taim” ol i ken singautim pikinini long kam bek long rot bilong tok i tru, tasol taim ol i mekim olsem, ol i mas holimpas ol stretpela lo bilong stiaim tingting.

Taim Yangpela i Raus Long Kongrigesen

12. Papamama i gat wanem wok bilong mekim long wanpela pikinini i yangpela yet na i sindaun wantaim ol tasol em i raus long kongrigesen?

¹² Olsem wanem sapos pikinini i yangpela yet na i sindaun wantaim papamama na em i mekim wanpela bikpela rong, tasol em i no tanim bel na long dispela as ol i rausim em long kongrigesen? Pikinini i sindaun yet wantaim papamama, olsem na tupela i gat wok yet long skulim na stretim em long pasin i stret wantaim Tok Bilong God. Ol inap mekim olsem wanem?​—Sindaun 6:​20-22; 29:17.

13. Olsem wanem papamama i ken traim long putim tok i go daun long bel bilong pikinini i laik lusim stretpela rot?

¹³ Sapos i gat rot, i gutpela moa sapos papamama i ken skulim na stretim em taim tupela i stadi wantaim em long Baibel na i no gat narapela i stap. Papamama i no ken skelim pikinini long pasin bikhet bilong em​—ol i mas wok strong long save long tingting i stap long bel bilong em. Wanem ol samting i mekim na em i gat sik bilong spirit? (Sindaun 20:5) Ol inap mekim sampela tok i go daun tru long lewa bilong em? Ol i ken kamapim wanem ol tok bilong Baibel na em bai pilim tru? Aposel Pol i tok: “Tok bilong God em i gat laip, na em i wok strong i stap. Em i sap moa, na i winim bainat i gat tupela sap. Dispela tok i save sutim man na i go insait tru. . . . Olsem na em i save gut tru long olgeta tingting na laik bilong bel bilong yumi.” (Hibru 4:12) Yes, nogut papamama i tokim pikinini olsem em i no ken mekim rong gen​—dispela tok tasol i no inap. Ol i ken mekim sampela samting moa, olsem wok long kirapim na helpim pikinini long kamap orait gen.

14. Taim pikinini i mekim rong, wanem namba wan samting em i mas mekim bilong kamap wanbel gen wantaim Jehova? Olsem wanem papamama i ken helpim pikinini long mekim olsem?

¹⁴ Taim yangpela i mekim rong, em i mas mekim ol samting bambai em i ken kamap wanbel gen wantaim Jehova. Namba wan samting bilong mekim, em i mas “senisim tingting nogut bilong [em], na tanim bel.” (Aposel 3:19; Aisaia 55:​6, 7) Bilong helpim dispela pikinini i stap long haus na bai em i ken tanim bel, papamama i mas “daunim belhat na painim ol gutpela rot bilong skulim” pikinini i save sakim tok. (2 Timoti 2:​24-26) Ol i mas “krosim” em long pasin Baibel i makim. Tok Grik ol i tanim olsem “krosim,” yumi inap tanim tu olsem “kamapim klia tru.” (KTH 3:19; Jon 16:8) Olsem na dispela tok “krosim” i makim olsem papamama i mas kamapim klia tru long pikinini olsem pasin em i bin mekim em i wanpela sin. Tru, i hatwok long mekim. Sapos inap, papamama i ken mekim ol tok pikinini inap pilim gut long bel, na mekim long olgeta rot i stret wantaim tok bilong Baibel bambai pikinini i ken save tru olsem em i bin mekim rong. Tupela i mas strong long helpim em long pilim tru olsem em i mas nolaik tru long pasin nogut na laikim tru gutpela pasin. (Amos 5:​15, NW ) Olsem na ating bai ‘tingting bilong em i kamap klia gen, na em bai i lusim umben bilong Satan.’

15. Beten i gat wanem wok bilong helpim man i bin mekim rong na em i ken kamap wanbel gen wantaim Jehova?

¹⁵ Bilong kamap wanbel gen wantaim Jehova, beten em i bikpela samting. Tru, yumi no ken “beten” bilong helpim wanpela man bipo em i bin bung wantaim kongrigesen Kristen tasol em i bikhet na mekim rong na ol man i lukim olsem em i wok long mekim yet na em i no tanim bel. (1 Jon 5:​16, 17; Jeremaia 7:​16-20; Hibru 10:​26, 27) Tasol papamama i ken beten askim Jehova long givim gutpela tingting long ol na bai ol i ken save long samting ol i mas mekim. (Jems 1:5) Sapos pikinini i raus pinis em i mekim pasin i makim olsem em i tanim bel, tasol em i no inap ‘sanap long ai bilong God,’ olsem beten long God, orait papamama inap beten olsem, sapos God i lukim olsem i gat as na em i ken lusim rong bilong pikinini, laik bilong God i ken kamap. (1 Jon 3:21) Taim pikinini i harim ol dispela beten, dispela inap helpim em long lukim olsem Jehova em i God bilong marimari.b​—Kisim Bek 34:​6, 7; Jems 5:16.

16. Olsem wanem yumi inap helpim famili bilong ol yangpela i bin raus long kongrigesen?

¹⁶ Sapos wanpela yangpela i baptais pinis na em i raus long kongrigesen, orait ol manmeri bilong kongrigesen “i no ken i stap wantaim em.” (1 Korin 5:11; 2 Jon 10, 11) Bihain dispela inap helpim em long “kisim stretpela tingting,” na em bai kam bek insait long banis sipsip bilong God na stap gut. (Luk 15:17) Tasol maski em i kam bek o nogat, ol manmeri bilong kongrigesen i ken wok long strongim bel bilong famili bilong dispela yangpela i raus pinis. Yumi olgeta i ken wok long painim rot bilong mekim pasin “sori” na pasin “marimari” long ol.​—1 Pita 3:​8, 9.

Ol Narapela i Ken Helpim Em

17. Ol lain bilong kongrigesen i mas tingim gut wanem samting taim ol i laik helpim wanpela pikinini i wok long lusim stretpela rot?

¹⁷ Olsem wanem long wanpela yangpela em i no raus long kongrigesen Kristen tasol em i no strong moa long bilip? Aposel Pol i tok: “Sapos wanpela hap bodi i pilim pen, olgeta hap i save pilim pen wantaim.” (1 Korin 12:26) Ol narapela i ken mekim ol samting bilong helpim dispela yangpela. Tasol yumi mas tingting gut na mekim, long wanem, sapos yangpela i gat sik bilong spirit, em inap paulim ol narapela yangpela. (Galesia 5:​7-9) Long wanpela kongrigesen, sampela manmeri i bikpela pinis ol i laik helpim sampela yangpela em ol i no strong moa long ol samting bilong spirit na ol i singautim ol dispela yangpela i kam long ol bung bilong paitim gita samting na singsing wantaim. Ol yangpela i mekim olsem na ol i kisim amamas long ol dispela bung, tasol pasin bilong ol i mekim na narapela i paulim narapela na bihain ol i no bung moa wantaim kongrigesen. (1 Korin 15:33; Jut 22, 23) Samting bilong helpim wanpela pikinini i gat sik bilong spirit, i no ol bung bilong amamas i no gat sampela i stap bilong bosim, em ol i strong long ol samting bilong spirit, nogat. Em i mas bung wantaim ol lain em ol bai helpim em long kisim pasin bilong laikim ol samting bilong spirit.c

18. Olsem wanem yumi ken bihainim pasin bilong papa bilong pikinini long tok piksa bilong Jisas?

¹⁸ Taim wanpela yangpela i lusim kongrigesen na bihain em i kam bek long Haus Kingdom o em i kam long wanpela kibung, ating em bai sem o pret liklik. Orait yumi mas mekim wankain pasin amamas long em olsem papa bilong dispela pikinini long tok piksa bilong Jisas, a? (Luk 15:​18-20, 25-32) Wanpela yangpela i bin lusim kongrigesen Kristen na bihain em i kam long wanpela kibung distrik, na em i tok: “Mi ting olgeta bai givim baksait long kain man olsem mi, tasol ol brata sista i kam na tok amamas long mi. Bel bilong mi i pilim tru dispela pasin ol i mekim.” Em i kirap stadi gen long Baibel na bihain em i kisim baptais.

No Ken Les

19, 20. Bilong wanem yumi mas holim stretpela tingting long wanpela pikinini i bin lusim Jehova?

¹⁹ Bilong helpim wanpela pikinini i bin lusim Jehova na bai em i ken “kisim stretpela tingting,” papamama i mas isi long em, na dispela inap givim hatwok long papamama na ol narapela. Tasol no ken les. “Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet.” (2 Pita 3:9) Em nau, Baibel i tok pinis, Jehova i laik bai ol man i tanim bel na stap laip. Olsem na em yet i bin kirap na wokim rot bambai ol man i ken kamap wanbel gen wantaim em. (2 Korin 5:​18, 19) Pasin bilong em long isi long ol man, dispela i mekim na planti milion manmeri i kisim stretpela tingting.​—Aisaia 2:​2, 3.

²⁰ Olsem na ol papamama i mas mekim olgeta samting i stret wantaim Baibel bilong helpim pikinini bilong ol i yangpela yet long kisim stretpela tingting, a? Bihainim pasin bilong Jehova na no ken les kwik taim yu mekim ol samting bilong helpim pikinini bilong yu long kam bek long Jehova. Yu mas strong long holimpas ol lo bilong Baibel bilong stiaim tingting, na wok strong long kamapim ol pasin bilong Jehova olsem pasin sori, stretpela pasin, na gutpela tingting na save, na beten askim em long helpim yu. Planti bikhetman em bel bilong ol i strong pinis long mekim pasin bikhet, ol i bin pilim tru pasin sori bilong Jehova long singautim ol i kam bek, na ol i mekim olsem, na ating pikinini man o pikinini meri bilong yu bai kam bek insait long banis sipsip bilong God na stap gut.​—Luk 15:​6, 7.

[Ol Futnot]

Yu Inap Tingim?

• Ating i gat wanem as na sampela yangpela i lusim kongrigesen?

• Olsem wanem yumi ken helpim ol yangpela long kisim pasin bilong pas gut wantaim Jehova?

• Bilong wanem papamama i no ken les kwik long helpim pikinini i bin lusim Jehova, tasol ol i mas strong na no ken larim em tasol?

• Ol lain bilong kongrigesen i ken mekim wanem bilong helpim wanpela pikinini i bin lusim Jehova na bai em i ken kam bek?

[Piksa long pes 15]

Ritim Tok Bilong God em bikpela samting bilong kisim pasin bilong pas gut wantaim Jehova

[Piksa long pes 15]

Beten bilong papamama inap helpim pikinini long pilim tru olsem tupela i pas gut wantaim Jehova

[Piksa long pes 17]

Taim wanpela pikinini i lusim Jehova na bihain “em i kisim stretpela tingting,” givim gutpela tok amamas long em

[Piksa long pes 18]

Mekim ol samting bilong helpim pikinini bilong yu long kam bek long Jehova