Ripot Long Wok Bilong Kingdom
Painim Ol Man i Hatwok Long Painim Ol
OL WITNES BILONG JEHOVA i wok strong long painim olgeta man ol inap bungim na autim tok bilong Kingdom long ol. Sampela taim ol i mas wok strong tru bilong painim ol man em wan wan taim ol i save stap long haus. (Mak 13:10) Wanpela painia salim long wanpela kantri bilong Saut Amerika i kamapim wanpela ekspiriens long dispela samting olsem.
“Wanpela taim mi kisim save olsem wanpela bikman bilong gavman bai kam raun na lukluk long dispela hap em mi na meri bilong mi i mekim wok painia long en. Em wanpela bilong ol dispela man i no save stap long haus, olsem na mi raitim wanpela pas long em na salim wantaim sampela nius na buk bilong Baibel, olsem buklet God i Laik Yumi Mas Mekim Wanem? na ol buk Mankind’s Search for God na Save i Bringim Man Long Laip Oltaim. Long pas mi stori gut long wok bilong ol wan wan buk.
“Mi gat laik tru long save em i gat wanem tingting long ol dispela buk na nius, olsem na mi askim em long mi laik toktok wantaim em. Sampela wik bihain em i tok orait long mi ken bung wantaim em, na mi kisim wanpela video Jehovah’s Witnesses—The Organization Behind the Name i go wantaim. Mipela toktok inap 2-pela aua. Taim mi lukim pinis video wantaim gavena, mi askim em olsem em i gat wanem tingting long piksa. Em i tok: ‘I no gat wanpela oganaisesen long dispela graun i kain olsem oganaisesen bilong yupela. Mi laik bai mi gat sampela man kain olsem yupela, em ol inap helpim mi long ol wok em gavman bilong mi i laik kamapim!’ Bihain em i askim mi olsem mi bin i go pinis long nambawan ofis bilong oganaisesen bilong yumi, o nogat. Mi tokim em, kirap long taim mi gat 14 krismas dispela em wanpela mak mi laik winim, tasol mi no gat rot bilong go raun lukim nambawan ofis bilong yumi long Brooklyn, New York. Em wanpela bilong ol dispela mak i hatwok tru long winim. Em i lukluk strong long mi inap liklik taim. Bihain em i tok em i laik bai mi gat rot bilong go lukim. Em yet i stretim ol pepa samting bilong mipela ken i go na em i givim tiket bilong balus long mipela olsem presen!
“Nau dispela gavena i save kisim nius Wastaua na Kirap! long olgeta taim. Mipela tingting strong olsem i no longtaim na bai mipela kirapim Baibel-stadi wantaim em.”