Stiaim Ol Baibel-Stadi i Kam Long Oganaisesen Bilong Yumi
1 Winim 100 yia pinis, ol Witnes Bilong Jehova i bung insait long wanpela oganaisesen bilong mekim dispela bikpela wok bilong autim tok. Ol i save autim dispela tok long winim 200 tok ples long 210 samting kantri, na dispela tok i wok long mekim planti milion manmeri bilong olgeta hap ol i stap wanbel.
2 Hia long Papua Niugini, dispela video Jehovah’s Witnesses—The Organization Behind the Name i bin helpim planti Baibel-stadi, maski ol i no save gut long tok Inglis, long pilim tru bikpela wok autim tok ol Witnes Bilong Jehova i save mekim long nau long olgeta hap bilong graun. Dispela video i bekim ol dispela askim: Ol Witnes Bilong Jehova ol i husat tru? Olsem wanem ol i save stretim na stiaim wok bilong ol? Na olsem wanem ol i kisim mani bilong mekim wok bilong ol? Ol man i lukim dispela video, ol i kisim save olsem, “ol Witnes Bilong Jehova i bin kisim skul olsem wanpela oganaisesen bilong helpim ol man long bilip strong long Baibel,” na video i kirapim ol long lukim long ai bilong ol yet dispela oganaisesen bilong yumi. Wanpela meri i wok long stadi em i lukim dispela video, na nau aiwara bilong em i kapsait, long wanem, em i amamas na pilim tru ol samting em i lukim, na em i tok: “Man i no ken hatwok long save olsem dispela em oganaisesen bilong God tru, Jehova.”—Skelim wantaim 1 Korin 14:24, 25.
3 Narapela meri i bin stadi longtaim long Baibel, tasol em i save lusim stadi na kirap gen, na em i no ting bilip bilong God Triwan em i bilip giaman. Bihain em na man bilong em i lukim video bilong yumi. Ol i amamas tru long ol samting ol i lukim, na long dispela nait yet ol i lukim tupela taim. Long narapela stadi, meri i kamapim laik bilong em long kamap wanpela Witnes. Em i tok, em i bin tingting tumas long bilip bilong em long God Triwan, na em i no bin tingim oganaisesen bilong yumi na ol manmeri i stap insait long en. Long rot bilong video em i luksave olsem em i painim pinis oganaisesen tru bilong God. Em i laik kirap stret long mekim wok autim tok. Taim ol i stori long em long ol samting em i mas mekim bilong kamap wanpela pablisa i no baptais, em i tok: “Nau tasol mi bai kirap long mekim ol dispela samting.” Em i rausim nem long lotu bilong em, na em i kirap long mekim wok autim tok, na em i kamap save meri tru long tokaut olsem bilip bilong God Triwan em i giaman.
4 Taim ol Baibel-stadi i save long oganaisesen bilong Jehova na bung wantaim lain bilong en, kwiktaim ol i save kamap strong long ol samting bilong spirit. Taim ol 3,000 disaipel i kisim baptais long de Pentikos, ‘ol i strong long harim tok bilong ol aposel, na long kam bung wantaim.’ (Ap 2:42) Em i bikpela samting long helpim ol Baibel-stadi long mekim olsem long nau. Olsem wanem yumi ken helpim ol?
5 Mekim Wok Bilong Yu: Olgeta wan wan man bilong kamapim disaipel ol i mas save olsem em wok bilong ol long stiaim Baibel-stadi i kam long oganaisesen bilong God. (1 Ti 4:16) Tingim olgeta wan wan stadi olsem rot bilong i go klostu long dispela de bilong amamas taim nupela man i kisim baptais bilong makim dediket bilong em long Jehova. Wanpela askim ol bai kamapim long taim bilong kisim baptais em: “Yu save, taim yu dediket na baptais pinis dispela samting i makim yu, yu wanpela Witnes Bilong Jehova na yu insait long oganaisesen bilong God, em spirit bilong em i bosim?” Olsem na em i bikpela samting long Baibel-stadi i mas save, em i no inap mekim wok bilong God sapos em i no bung na wok wantaim kongrigesen Kristen tru.—Mt 24:45-47; Jo 6:68; 2 Ko 5:20.
6 Wok yet long skulim Baibel-stadi long ol samting bilong kongrigesen na oganaisesen bilong ol Witnes Bilong Jehova long olgeta hap. Mekim olsem long olgeta wan wan stadi, kirap long namba wan stadi. Kirap long namba wan stadi, singautim Baibel-stadi long kam long ol miting, na mekim yet long olgeta taim.—KTH 22:17.
7 Mekim Wok Long Ol Tul Sosaiti i Givim: Tupela gutpela tul bilong mekim wok long en bilong mekim ol Baibel-stadi em buklet God i Laik Yumi Mas Mekim Wanem? na buk Save i Bringim Man Long Laip Oltaim. Tupela buk i kamapim klia olsem yumi gat wok long bung wantaim kongrigesen. Long pinis bilong stadi 5, buklet Yumi Mas Mekim Wanem? i tok: “Yu mas wok long kisim save long Jehova na bihainim ol samting em i laik yu mas mekim. Bilong helpim yu long mekim olsem, go long ol miting long Haus Kingdom bilong ol Witnes Bilong Jehova.” Planti taim buk Save i kirapim Baibel-stadi long bung wantaim ol Witnes long ol miting. Sapta 5, paragraf 22, i tok: “Ol Witnes Bilong Jehova . . . i laik bai yu bung wantaim ol na lotu long God ‘long spirit na long pasin i tru.’ (Jon 4:24)” Sapta 12, paragraf 16, i tok: “Taim yu stadi yet long Baibel na yu go oltaim long ol miting bilong ol Witnes Bilong Jehova, bai bilip bilong yu i kamap strong moa.” Sapta 16, paragraf 20, i tok: “Olsem na yu mas kisim pasin bilong go oltaim long ol miting bilong ol Witnes Bilong Jehova.” Na em i tok moa: “Dispela bai helpim yu long save gut long God na bihainim dispela save long olgeta samting yu mekim, na bai yu stap amamas. Taim yu insait long lain brata Kristen i stap long olgeta hap bilong graun, dispela bai helpim yu long i stap klostu long Jehova.” Sapta 17 i stori gut long olsem wanem wanpela i ken i stap gut insait long lain bilong God. Taim yumi stadi wantaim ol narapela, em wok bilong yumi long kamapim gut ol dispela hap bilong stadi.
8 Buklet Ol Witnes Bilong Jehova—Ol i Wanbel na Mekim Wok Bilong God Long Olgeta Hap Bilong Graun, em i gutpela tul ol i bin kamapim bilong givim save long ol man long dispela wanpela oganaisesen tasol Jehova i mekim wok long en long nau bilong kamapim laik bilong em. Ol stori i stap long en, long wok autim tok, ol miting, na oganaisesen bilong yumi, ol bai kirapim man long bung wantaim yumi long lotuim God. Taim yumi kirapim pinis Baibel-stadi, i gutpela yumi ken givim dispela buklet long Baibel-stadi bambai em yet i ken kaunim. Yumi no gat wok long stadi wantaim em long dispela buklet olsem yumi save mekim bipo.
9 Sampela bilong ol video Sosaiti i bin wokim, ol i gutpela tul bilong stiaim ol Baibel-stadi i kam long oganaisesen bilong yumi. Long nau i no gat ol video long tok Pisin o Hiri Motu, tasol maski ol Baibel-stadi i save liklik o i no save long tok Inglis, samting ol i lukim em bai helpim yet ol. Long planti hap ol Baibel-stadi i gat televisen na masin bilong lukim video. Olsem na sapos rot i op, i gutpela long ol i ken lukim olgeta video bilong yumi. Sampela bilong ol dispela video em: (1) United by Divine Teaching, em i kamapim ol stori bilong gutpela pasin wanbel i bin stap long ol kibung intenesenel long Isten Yurop, Saut Amerika, Afrika, na Esia; (2) To the Ends of the Earth, em i stori long Wastaua Baibel Skul Bilong Gileat i bin i stap inap 50 yia na i soim olsem wanem ol misineri i bin helpim wok autim tok bilong olgeta hap; na (3) Jehovah’s Witnesses—The Organization Behind the Name.
10 Putim Mak Bilong Go Long Olgeta Miting: Yumi mas tokim ol sumatin olsem yumi mas kisim skul long rot bilong Baibel-stadi yumi wan wan i save mekim long haus, na tu, long taim planti i bung long ol miting bilong kongrigesen. (Jo 6:45) Nupela stadi i mas kisim save long ol tok bilong Baibel na long oganaisesen wantaim. Bilong kisim dispela kain save, em i bikpela samting long kam long ol miting. (Hi 10:23-25) Kirap kwik long singautim man long kam long ol miting bilong kongrigesen. Sampela nupela i save kirap kam long ol miting paslain long ol i stadi. Tru tumas, yumi yet i laik i stap olsem gutpela piksa long kam long olgeta miting.—Lu 6:40; Fl 3:17.
11 Stori wantaim Baibel-stadi long ol miting na olsem wanem yumi save mekim ol miting bambai bel bilong em i ken stap isi taim em i kam long namba wan miting bilong em. Sampela man i save sem taim ol i go long wanpela nupela hap, olsem na em i gutpela long go wantaim Baibel-stadi long Haus Kingdom taim em i go long namba wan miting. Em bai i no sem sapos yu stap wantaim em taim em i bungim ol narapela long kongrigesen. Bikpela samting em olsem: Yu mas mekim gut long em, mekim ol samting na bai em i amamas na bel bilong em i ken i stap isi.—Mt 7:12; Fl 2:1-4.
12 Kirapim Baibel-stadi long kam kwiktaim long wanpela bikpela de kibung, o kibung sekit, o kibung distrik. Ating yu ken stretim rot na bai em i ken kam wantaim yu long ka o PMV samting.
13 Helpim Em Long Laikim Tru Oganaisesen: Buk Lo Bilong Yumi Bilong Mekim Wok Autim Tok, pes 91, i tok: “Sapos yu laikim tumas oganaisesen bilong Jehova, orait taim yu toktok wantaim ol man bai yu kamapim dispela laik bilong yu, na dispela bai helpim ol tu long tingim oganaisesen bilong Jehova na laikim tumas, na dispela bai kirapim ol tu long kisim save moa long Jehova na bai ol i ken save gut long em.” Long olgeta taim mekim ol gutpela tok tasol long kongrigesen bilong yu. (Sng 84:10; 133:1, 3b) Long ol beten yu mekim long taim bilong stadi, toktok long kongrigesen na Baibel-stadi i gat wok long bung wantaim ol long olgeta taim.—Ef 1:15-17.
14 Tru tumas, yumi laik bai ol nupela i pilim tru olsem ol i gat ol gutpela poroman na ol i ken stap gut long ol samting bilong spirit insait long lain bilong God. (1 Ti 3:15; 1 Pi 2:17; 5:9) Yumi ol Witnes Bilong Jehova, yumi mas wok strong tru long stiaim ol sumatin bilong Baibel i kam long oganaisesen bilong yumi.
[Rait long pes 3]
Ol Baibel-stadi i save kamap strong hariap long ol samting bilong spirit taim ol i save long oganaisesen
[Rait long pes 4]
No ken wet long singautim ol Baibel-stadi long i kam long ol miting