Namba 8 Hap—Mekim Ol Baibel Stadi i Save Helpim Ol Man
Stiaim Ol Sumatin i Kam Long Oganaisesen
1 Yumi stadi wantaim ol man bilong skulim ol long ol samting bilong bilip na tu long helpim ol long kam insait long kongrigesen Kristen. (Sek. 8:23) Buklet Ol Witnes Bilong Jehova—Ol i Husat? Ol i Bilip Long Wanem Samting? inap helpim yumi long mekim olsem. Givim wanpela kopi long ol nupela sumatin bilong Baibel, na kirapim ol long ritim. Na tu, lusim sampela minit long olgeta wik bilong stori long ol long oganaisesen bilong Jehova.
2 Ol Miting Bilong Kongrigesen: Nambawan rot bilong ol Baibel sumatin i ken lain long tingim tru oganaisesen bilong God em long bung wantaim yumi long ol miting bilong kongrigesen. (1 Ko. 14:24, 25) Olsem na yu ken kirap tokim ol long ol miting na stori long wan wan bilong ol 5-pela miting i save kamap long olgeta wik. Yu ken kolim nem bilong pablik tok bai kamap long narapela wik. Soim ol hap bilong Wastaua em kongrigesen bai skelim long Stadi Wastaua na buk em yupela i stadi long en long Buk Stadi Bilong Kongrigesen. Stori long Skul Tiokratik Bilong Autim Tok na Miting Bilong Wok Autim Tok. Taim yu gat tok bilong mekim long skul, ating yu ken mekim traim wantaim ol. Yu ken tokim ol long ol gutpela tok yu bin harim long ol miting. Mekim wok long ol piksa i stap insait long ol buk na nius bilong yumi bilong helpim ol long lukim long tingting wanem samting i save kamap long ol miting. Kirap long namba wan taim yu mekim stadi wantaim ol Baibel sumatin, yu mas singautim ol i kam long miting.
3 Taim Memorial, o kibung, o visit bilong wasman sekit i kam klostu, lusim sampela minit long stori gut long sumatin na kirapim laik bilong em long redi long ol dispela bung. Wok long bekim ol kain askim olsem: Bilong wanem yumi gat dispela nem ol Witnes Bilong Jehova? Bilong wanem yumi save kolim ol ples yumi save mekim miting long en olsem Haus Kingdom? Wanem ol wok bilong ol elda na ol kongrigesen sevan? Olsem wanem yumi save stretim na mekim wok autim tok long ol teritori? Olsem wanem yumi kisim ol buk na nius bilong yumi? Ol Witnes Bilong Jehova i kisim mani we bilong mekim wok bilong ol? Brens ofis na Gavening Bodi i mekim wanem wok bilong lukautim wok?
4 Ol Vidio Bilong Skulim Ol Man: Narapela rot bilong ol Baibel sumatin i ken luksave long gutpela oganaisesen bilong Jehova em long rot bilong ol vidio bilong yumi. Yu ken mekim wok long ol dispela vidio: To the Ends of the Earth, Our Whole Association of Brothers, na United by Divine Teaching. Wanpela meri i save kisim ol magasin na ol narapela buk bilong yumi inap 5-pela yia, em i krai taim em i lukim vidio Jehovah’s Witnesses—The Organization Behind the Name. Em i trastim ol Witnes i save go lukim em, tasol taim em i lukim dispela vidio pinis, em i pilim olsem em inap trastim oganaisesen bilong ol tu. Ol i kirapim stadi wantaim em, na long wik bihain em i go long ol miting long Haus Kingdom.
5 Long rot bilong lusim sampela minit long olgeta wik na long rot bilong ol buk na nius na vidio samting, yumi inap stiaim ol Baibel sumatin long i kam long oganaisesen em Jehova i mekim wok long en long nau.
[Askim Bilong Stadi]
1. Bilong wanem i gutpela long stori long sumatin long oganaisesen bilong Jehova long olgeta wik taim yupela i stadi?
2. Olsem wanem yu ken kirapim ol Baibel sumatin long i kam long ol miting?
3. Wanem ol samting bilong oganaisesen em yumi ken stori long sumatin?
4, 5. Olsem wanem ol vidio bilong yumi inap helpim ol sumatin long kliagut long oganaisesen?