“Goan, Yumi Go Long Haus Bilong [Jehova]”
(Namba Wan Hap)
1 Devit i amamas tru long bihainim dispela tok: “Goan, yumi go long haus bilong [Jehova].” (Sng 122:1) Dispela “haus” bilong Jehova, em haus lotu long Jerusalem, em i ples bung bilong olgeta man i laik lotuim trupela God. Na em i ples hait bilong stap gut na bel isi. Long nau, kongrigesen Kristen i stap long olgeta hap bilong graun i olsem “haus” bilong God, na em i “strongpela pos i karim tok tru.” (1 Ti 3:15) Long dispela rot God i givim olgeta samting long yumi bambai yumi ken kisim laip oltaim. Olsem na ‘olgeta lain manmeri i mas kam bung long en’ sapos ol i laik stap amamas taim Kindom bilong God i bosim graun.—Ais 2:2.
2 Dispela “haus” i gat olsem 69,000 kongrigesen long en, ol i stap long 229 kantri. Ol dua bilong ol Haus Kingdom bilong olgeta hap bilong graun i op na 4 milion wokman i singaut: “ ‘Yu kam.’ . . . Man i laik dring, em i mas kam na kisim wara bilong givim laip.” (KTH 22:17) Planti manmeri i bin harim dispela tok na ol i amamas long bihainim. Sampela narapela i bin harim na bel bilong ol i laikim liklik, tasol ol i no kam yet long haus bilong Jehova olsem bung wantaim kongrigesen Kristen. Ol i sot long samting bilong spirit na kongrigesen Kristen inap long helpim ol. (Mt 5:3) Yumi stap long taim i gat planti hevi nogut tru, na pinis bilong dispela pasin i wok long kam hariap. Sapos yumi les o yumi no givim bel long God, bagarap inap painim yumi. Bikpela samting, ol manmeri i mas “go klostu long God” na go klostu moa long oganaisesen bilong em. (Je 4:8) Yumi ken helpim ol olsem wanem?
3 Stiaim Ol i Go Long Oganaisesen: Kirap long taim yumi autim tok long ol man long namba wan taim yumi mas stiaim ol i go long oganaisesen. Tru yumi yet inap long painim ol skripsa na kamapim insait bilong ol as tok bilong Baibel, tasol yumi no as bilong ol dispela save. Olgeta save yumi kisim yumi bin kisim long oganaisesen, long rot bilong lain gutpela wokboi ol i givim ‘kaikai long taim bikman i makim.’ (Mt 24:45-47) Ol nupela i mas save lotu i tru i no yumi, o kongrigesen bilong yumi, nogat. I gat wanpela oganaisesen, wanpela sosaiti i save daun long God na em i stap long olgeta hap bilong graun, na Jehova i save stiaim dispela oganaisesen.
4 Ol tok bilong soim rot long yumi i kam long Jehova, em yet i bin promis long skulim na stiaim yumi. (Sng 32:8; Ais 54:13) Planti tok bilong skulim yumi, yumi kisim long rot bilong ol buk na magasin samting. Sapos yumi helpim ol nupela long save ol buk na magasin i bikpela samting, na ol i laikim ol olsem samting bilong soim rot bilong laip long ol, bai ol i amamas long kaunim na bihainim tok bilong dispela buk samting. Taim yumi tilim na mekim wok long ol buk na magasin samting yumi mas mekim long pasin i strongim ol man long bilip long ol dispela buk samting. Dispela i lainim ol nupela long tingim oganaisesen olsem gutpela samting bilong helpim yumi na long bilip long ol samting ol i givim long yumi.
5 Tokim ol man i amamas long harim tok bilong yumi, i gat ples bung na yumi skul long en long olgeta wik. Tokim ol long ples Haus Kingdom i stap long en na long wanem taim yumi save bung. Stori long ol long olsem wanem ol miting bilong mipela i narapela kain long ol bung bilong lotu bilong ol. Mipela amamas long olgeta man i kam; mipela i no singaut long mani. Mipela i gat ol elda na wokman long lukautim ol tok bilong ol miting, tasol olgeta i gat rot long bekim sampela tok na insait long sampela tok. Mipela i amamas sapos ol famili i kam; taim mipela i toktok long Baibel ol pikinini tu i insait long dispela. Ol elda na wokman bilong kongrigesen i no pasim narapela kain klos. Mipela i no gat ol imis o kandel long Haus Kingdom, mipela putim liklik bilas nating tasol. Planti ol man i save kam ol i bilong ol hap klostu.
6 Isi Isi Lainim Ol Baibel-Stadi Long Oganaisesen: Yumi mekim Baibel-stadi bilong lainim ol man long tok i tru i stap long Baibel. Na tu, long rot bilong stadi ol i mas lain long laikim oganaisesen bilong Jehova, na yumi mas helpim ol stadi long save em i bikpela samting long stap insait long dispela oganaisesen. Bikpela wok Jisas na ol disaipel i bin mekim i kirapim ol gutpela man long wok aninit long wanpela lain i bosim ol Kristen. Taim ol man i harim tok bilong God ol i kirapim ol kongrigesen long ol ples bilong ol bilong skulim ol long olgeta wik. Taim ol man i kam bung, miting i strongim ol long samting bilong spirit na i helpim ol long sanap strong long taim hevi i painim ol. (Hi 10:24, 25; 1 Pi 5:8-10) Long taim bilong yumi Jehova i laik “bungim olgeta samting long Krais.” (Ef 1:9, 10) Olsem na nau long olgeta hap bilong graun ‘ol manmeri bilong God’ i stap insait long wanpela oganaisesen.
7 Taim yumi mekim Baibel-stadi long olgeta wik yumi mas skulim ol tu long ol samting bilong oganaisesen na bai ol i ken laikim oganaisesen bilong God na ol i ken insait long ol samting oganaisesen i givim long yumi bilong kisim laip oltaim. Lusim sampela minit long olgeta wik bilong stori long sampela samting long oganaisesen na wok bilong en. Yu inap painim sampela tok yu ken stori long en long Wastaua Jun 1, 1985, pes 15 inap 20. Buklet Ol Witnes Bilong Jehova Ol i Wanbel na Mekim Wok Bilong God Long Olgeta Hap Bilong Graun i stori long planti samting bilong oganaisesen na olsem wanem em i helpim yumi. Stretim rot na bai ol Baibel-stadi i ken lukim dispela video long tok Inglis, Jehovah’s Witnesses—The Organization Behind the Name, na bai ol yet i ken lukim ol wok oganaisesen i mekim. Sapos yumi kamapim sampela ekspiriens na ripot i stap long Yearbook yumi ken soim ol long wok bilong yumi long ol narapela kantri. Yumi ken mekim wok tu long ol narapela narapela buk o magasin. Insait long sampela mun isi isi yu ken stori long ol dispela samting: Bilong wanem yumi autim tok long olgeta haus, bilong wanem mipela i gat ol miting, olsem wanem mipela kisim mani bilong mekim ol wok, na stori tu long wok bilong yumi long olgeta hap bilong graun.
8 Helpim ol nupela long save gut long ol narapela Witnes, dispela i ken helpim ol tru long kisim save long kongrigesen. Olsem na sampela taim yu ken askim sampela narapela pablisa long kam wantaim yu long Baibel-stadi. Sapos yu kisim wanpela brata o sista i go wantaim yu, em i gat wankain sindaun o tingting olsem Baibel-stadi bilong yu, ating dispela i ken kirapim tru tingting bilong stadi bilong yu. Ating wanpela elda i ken go wantaim yu na bai em i ken save long stadi bilong yu. Stretim rot long wasman sekit o meri bilong em i ken go wantaim yu na stadi bilong yu bai i kisim gutpela blesing. Sapos haus bilong sampela Witnes i stap klostu yu ken stretim rot na bai narapela i ken save long narapela na dispela tu i ken strongim stadi bilong yu long go long ol miting bilong kongrigesen.
“Goan, Yumi Go Long Haus Bilong [Jehova]”
(Namba 2 Hap)
1 Kirapim Ol Nupela Long Kam Long Ol Miting: Ol man i lain nupela long tok i tru ol i mas save em i bikpela samting ol i mas go long ol miting. Yu mas traim long kirapim tingting bilong ol olsem: Stori long sampela hap bilong Wastaua yumi stadi long en long Stadi Wastaua. Tokim ol long nem bilong sampela pablik-tok i kamap. Stori long sampela bikpela tok bai yumi stadi long en long Skul Bilong Wok Autim Tok na long Buk-Stadi bilong kongrigesen. Autim tingting bilong yu long ol samting yu bin lain long en long ol dispela miting na bilong wanem yu ting em i bikpela samting long go long ol miting. Sapos yu gat ka, tokim ol bai yu kam kisim ol. O yu ken ringim ol paslain long miting, dispela tu i ken kirapim ol long kam.
2 Sapos wanpela stadi i kam long miting, mekim ol samting na bai em i ken amamas. Kisim sampela brata na ol elda tu na bai ol i ken sekan wantaim em. Sapos em i kam long Pablik-Tok yu ken askim brata i mekim tok long kam na bai stadi bilong yu i ken bungim em. Soim em ol samting long Haus Kingdom. Stori long em long ples bilong baim ol buk na magasin, ol bokis kontribusen, laibreri, na teks bilong yia. Yu ken tokim em tu olsem Haus Kingdom i no ples bilong lotu tasol, nogat, em i ples bilong stretim na mekim wok bilong autim tok long dispela hap.
3 Tokim nupela man long ol samting yumi mekim long ol miting bilong yumi. Soim em long ol buk na magasin yumi mekim wok long en long miting. Na tokim em Baibel em i nambawan buk yumi mekim wok long en. Olgeta i ken mekim sampela tok long miting, ol pikinini tu. Stori long em long ol singsing na ol tok bilong singsing. Tokim em, sampela Witnes Bilong Jehova i bin kamapim ol dispela singsing na bai yumi ken mekim wok long ol long taim bilong lotu. Soim em, ol man i kam bung ol i bilong kain kain lain na ol i gat narapela narapela sindaun. Stori long gutpela pasin bilong ol. Sapos yumi mekim gutpela pasin olsem, ating dispela i strongim tru dispela stadi na bai em i laik kam gen.
4 Bilong Wanem Sampela i No Kam: Planti taim maski yu mekim planti gutpela samting, sampela stadi i no laik kam klostu long oganaisesen. No ken les kwik. Yu mas pilim tingting na hevi bilong ol. Ating inap long nau ol i ting bai ol i go lotu long ol bikpela de tasol. O sampela wanblut o pren bilong ol i putim hevi long ol. O ating ol man i stap klostu long haus bilong ol i sutim sampela tok long ol na ol i pret liklik. O sampela amamas o wok bilong dispela graun i wok long pulim ol. Ating ol dispela samting i olsem wanpela bikpela maunten long ol na ol i ting ol i no inap winim; yu mas helpim ol long kisim stretpela tingting na bai ol inap long “skelim gut olgeta pasin na kisim ol pasin i gutpela tru.”—Fl 1:10.
5 Soim ol long ol skripsa i tok yumi mas stap strong long bilip. Tokim ol klia yumi olgeta i mas kisim ol gutpela tok bilong spirit bilong strongim yumi long taim yumi bung wantaim. (Ro 1:11, 12) Jisas i bin soim yumi, maski famili i mekim nogut long yumi, yumi no ken surik. (Mt 10:34-39) Pol i tok yumi no ken sem long tokaut long ol man olsem yumi disaipel bilong Jisas. (2 Ti 1:8, 12-14) Yumi mas was gut long ol samting i laik pulim yumi na long ol samting yumi i amamas long mekim, nogut dispela i olsem wanpela umben i holimpas abus. (Lu 21:34-36) Olgeta man i laik kisim blesing i kam long Jehova ol i mas givim bel olgeta long em, ol i no ken givim hap bel tasol. (Kl 3:23, 24) Yes sapos isi isi yumi skulim ol nupela stadi long ol dispela tok bilong Baibel, dispela i ken opim rot long ol long kamap strong long ol samting bilong spirit.
6 Ol Dua i Op i Stap: Haus bilong Jehova bilong lotu i tru i go antap na winim olgeta narapela. Long 229 kantri long olgeta hap bilong graun yu ken harim dispela tok: “Kam, yumi go long . . . maunten bilong [Jehova]. . . . Bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.” (Ais 2:3) Sapos ol nupela i bihainim dispela tok bai ol i ken kisim laip. Sapos yumi stiaim ol i go long oganaisesen bilong Jehova bai yumi helpim ol tru.
[Questions for Part 1]
1. (a) Long taim bilong Devit haus bilong Jehova em i wanem samting? Na bilong wanem em i laik i go long en? (b) Haus bilong Jehova long nau em i wanem samting?
2. (a) Wanem samting i olsem haus bilong Jehova? (b) Bilong wanem ol man i mas hariap na kam long oganaisesen bilong Jehova?
3. (a) Taim yumi autim tok namba wan taim long man na em i laik harim, bilong wanem yumi mas stiaim em i go long oganaisesen? (b) Husat i helpim yumi long lotu tru long God?
4. Olsem wanem yumi ken skulim ol nupela long tingim oganaisesen olsem gutpela samting na long bilip long ol samting ol i givim long yumi?
5. Olsem wanem ol miting bilong ol Witnes Bilong Jehova i narapela kain long ol bung bilong ol narapela lotu?
6. (a) Jehova i laik mekim wanem samting long taim bilong yumi? (b) Wanem samting i bin kamap taim Jehova i bungim “olgeta samting”?
7. Isi isi long olgeta wik yumi ken lainim Baibel-stadi long wanem samting na bai em i lain long laikim haus bilong Jehova?
8. Yu ken mekim wanem ol samting bilong helpim ol nupela long laikim oganaisesen bilong Jehova?
[Questions for Part 2]
1. Olsem wanem yumi ken kirapim ol nupela long kam long miting?
2. (a) Yumi ken mekim wanem samting na bai ol nupela i amamas taim ol i kam long Haus Kingdom? (b) Yumi ken stori long ol long wanem ol narapela narapela samting i stap long Haus Kingdom?
3. (a) Yumi ken stori olsem wanem long ol nupela long pasin bilong stadi long Baibel long taim bilong miting? (b) Yumi ken tokim ol long wanem ol narapela samting?
4. Bilong wanem sampela nupela i no kam long miting?
5. Yumi mas skulim ol Baibel-stadi na ol nupela man long wanem ol tok bilong Baibel?