Helpim Ol Narapela Long Kam Long Ol Miting
1 “Olgeta pren i stap klostu . . . em ol i gat laik long kam long ol miting, mipela i laik singautim yupela i kam.” Kirap long taim ol i putim dispela toksave long nius Zion’s Watch Tower long Novemba 1880 na i kam inap long nau, ol Witnes Bilong Jehova i amamas tru long singautim ol manmeri i kam bung bilong kisim skul long Baibel. (KTH 22:17) Dispela em i wanpela bikpela hap wok bilong lotu i tru.
2 Em i Bikpela Samting Long Kam Bung: Yumi kisim ol gutpela samting taim yumi bung wantaim kongrigesen. Bai yumi save gut moa long gutpela God bilong yumi, em Jehova. Long kongrigesen yumi bung wantaim bambai Jehova i ken “skulim” yumi. (Ais 54:13) Oltaim oganaisesen bilong em i save kamapim ol gutpela tok bilong skulim yumi long Baibel, na dispela i save mekim na yumi go klostu long em na i helpim yumi long bihainim “olgeta tingting bilong God.” (Ap 20:27; Lu 12:42) Ol miting i save lainim yumi long pasin bilong skulim ol man long Tok Bilong God. Taim yumi harim gen ol tok bilong Baibel, dispela i helpim yumi long pas gut wantaim ol narapela na wantaim Jehova yet. Taim yumi bung wantaim ol man i save laikim God, dispela i save strongim bilip bilong yumi.—Ro 1:11, 12.
3 Singautim Ol Long Kam: Taim yu mekim namba wan stadi wantaim ol Baibel-stadi, singautim olgeta long kam long ol miting. Givim em pepa bilong singautim ol man i kam long ol miting. Bilong kirapim em long tingim ol miting, kolim wanpela tok i kamap long miting long wik i go pinis na i bin strongim yu, na kolim sampela tok bai kamap long miting bihain. Stori long Haus Kingdom em wanem kain ples, na stori gut long em long wanem hap Haus Kingdom i stap.
4 Sapos sumatin i no kam long namba wan taim, orait wok yet long singautim em long kam. Lusim sampela minit long olgeta wik bilong stori long em long oganaisesen bilong yumi i save wok olsem wanem. Mekim wok long buklet Mekim Wok Bilong God na video Jehovah’s Witnesses—The Organization Behind the Name— sapos yu gat dispela video—bilong helpim em long save gut long yumi na ol miting bilong yumi. Kisim sampela pablisa i go wantaim yu bilong sumatin i ken kisim save long ol. Taim yu beten, tok tenkyu long Jehova long oganaisesen na stori olsem em i bikpela samting long sumatin i mas bung wantaim dispela oganaisesen.
5 No ken surik long helpim ol nupela man i laik harim tok long bung wantaim yumi. Taim ol i kirap laikim tru Jehova, dispela bai kirapim ol long bihainim ol tok ol i lainim na ol bai insait long dispela oganaisesen bilong God i stap wanbel.—1 Ko 14:25.