Bilong Wanem Ol i Mekim Dispela Wok?
1 Baibel i tok long Krais olsem em i ‘laikim tru haus bilong God, olsem na em i wok strong long mekim dispela haus i stap gut.’ (Sng 69:9) Jisas i givim bel long lotu tru bilong Jehova, na dispela i kirapim em long putim wok autim tok i stap namba wan. (Lu 4:43; Jo 18:37) Dispela wankain pasin bilong givim bel long autim tok i tru i kamap klia long wok ol Witnes Bilong Jehova i save mekim long nau. Long yia bilong wok bilong 1996, inap 645,509 brata sista long olgeta hap i bin insait long ol wok painia long olgeta wan wan mun. Yumi dediket long God, olsem na yumi wan wan i mas beten na skelim sapos yumi inap stretim ol samting bilong yumi bambai yumi ken mekim wok painia haptaim o wok painia oltaim.—Sng 110:3; Sav 12:1; Ro 12:1.
2 Long dispela taim yumi stap long en ol manmeri i tingim tumas ol samting bilong skin, olsem na planti man i no klia gut bilong wanem sampela man i givim bel tru long mekim wok autim tok, em wanpela wok ol i no kisim mani o biknem long en. Bilong wanem ol painia i mekim dispela wok? Ol i save dispela wok i helpim ol man long kisim laip. Ol i laikim tru Jehova na ol narapela man, olsem na ol i tingting strong olsem ol i gat wok long helpim ol man long kisim laip. (Ro 1:14-16; 1 Ti 2:4; 4:16) Tupela marit i mekim wok painia i tokaut stret long dispela samting olsem: “Bilong wanem mipela i mekim wok painia? Long wanem, sapos mipela i no mekim, bai mipela i tok wanem long Jehova?”
3 Narapela sista i mekim wok painia, em i tok: “Man bilong mi em wanpela tasol nau i wok mani, olsem na mipela i skelim gut mani na bai em inap long ol samting mipela i mas kisim, na mipela i no lusim nating mani olsem bipo. Tasol Jehova i mekim gut long mipela—no gat wanpela taim mipela i sot long kaikai samting. . . . Mi painim pinis as tru bilong i stap bilong mi—mi mas helpim ol man long save olsem God tru, em Jehova, em i no stap longwe long ol man i wok long painim em.” Ol painia i save taim i sot, olsem na ol i amamas long ol liklik samting bilong skin em inap long lukautim ol taim ol i givim bel tru long kisim ol gutpela samting bilong spirit em bai i stap oltaim.—1 Ti 6:8, 18, 19.
4 Sapos i no gat wanpela samting i pasim yu, gutpela sapos yu insait long wok painia wantaim planti handet tausen ol brata sista bilong yu long olgeta hap. Long dispela rot yu ken kisim wankain amamas olsem ol i save kisim.