Nau Em i Taim Bilong Autim Tok!
1 ‘Pret long God na litimapim nem bilong em.’ Ol ensel i stiaim wok bilong autim dispela tok long ‘ol manmeri bilong olgeta lain na olgeta kantri na olgeta tok ples na olgeta kain skin.’ Bilong wanem ol i autim dispela tok? Long wanem, “taim i kamap pinis bilong God i skelim pasin bilong olgeta man long kot.” Long nau yumi stap long dispela ‘taim bilong kot,’ na em bai pinis taim pasin nogut bilong dispela graun i pinis. Em i bikpela samting long ol manmeri i “lotu long God, em i bin wokim heven na graun na solwara na olgeta hul wara.” I no gat narapela wok long nau i bikpela samting olsem wok bilong autim “gutnius bilong i stap oltaim oltaim.” Yes, nau em i taim bilong autim tok!—KTH 14:6, 7.
2 Insait long tenpela yia i go pinis, ol wokman bilong Jehova i bin lusim klostu 12 bilion aua long autim tok bilong Kingdom na kamapim ol disaipel. Planti ol i bin senisim ol samting long sindaun bilong ol bambai ol i ken lusim bikpela haptaim moa long autim tok. (Mt. 9:37, 38) Olsem: Long yia i go pinis, inap 850,000 pablisa i bin mekim wok painia long olgeta mun. Ol painia oltaim i mas lusim 70 aua long olgeta mun long autim tok. Ol painia haptaim i mas lusim 50 aua.
3 Rot Bilong Mekim Wok Painia: Ol painia i save olsem “taim i sotpela nau,” olsem na ol i no kisim planti samting bilong skin. (1 Ko. 7:29, 31) Ol i painim rot na ol i no tromoi bikpela mani long baim ol samting, na long dispela rot ol i no gat wok long lusim bikpela haptaim long mekim wok mani. Olsem: Sampela i bin go na stap long haus i no bikpela tumas. Sampela narapela i bin rausim sampela kago i no gat wok tru long en. (Mt. 6:19-21) Planti taim ol painia i lusim sampela samting ol i gat laik long mekim. Ol i mekim olgeta dispela samting bilong ol i ken tingim moa na lusim bikpela haptaim moa long mekim wok autim tok. (Ef. 5:15, 16) Long rot bilong pasin bilong strong long mekim wok, na daunim sampela laik bilong ol yet, na beten askim Jehova long helpim ol, planti pablisa i bin wokim wanpela sediul i wok gut na i helpim ol long mekim wok painia.
4 Yu ting yu inap mekim wok painia? Gutpela sapos yu askim sampela painia i mekim gut wok bilong ol long olsem wanem ol inap mekim dispela wok. Autim tok wantaim ol na pilim amamas bilong ol. Skelim ol stori long ol buk na nius bilong yumi i stori long wok painia. Putim ol mak em ol inap helpim yu long winim mak bilong mekim wok painia. Sapos nau i gat sampela samting i pasim yu long mekim wok painia, kamapim dispela samting long Jehova long rot bilong beten, na askim em long helpim yu long stretim dispela samting.—Snd. 16:3.
5 Ol Blesing na Amamas: Wok painia i helpim yumi long mekim gutpela wok moa long Baibel, na long dispela rot yumi kisim bikpela amamas moa. Wanpela yangpela sista painia i tok: “Em i wanpela gutpela samting tru long mi inap mekim gutpela wok long Tok Bilong God. Taim yu mekim wok painia, yu mekim bikpela wok long Baibel. Nau taim mi autim tok long ol haus, mi inap tingim ol skripsa i stret long olgeta wan wan man bilong haus.”—2 Ti. 2:15.
6 Wok painia i lainim yumi long mekim ol samting i helpim sindaun bilong yumi. Dispela wok inap helpim ol yangpela long skelim gut taim, basetim mani, na pasin bilong stap gut wantaim ol narapela. Wok painia i mekim na planti ol i kisim pasin bilong tingim ol samting bilong spirit i bikpela samting tru. (Ef. 4:13) Na tu, planti taim ol painia i pilim strong bilong Jehova i helpim ol.—Ap. 11:21; Fl. 4:11-13.
7 Tasol ating wanpela gutpela samting bilong wok painia em olsem: Em i helpim yumi long i go klostu long Jehova. Dispela inap helpim yumi long winim ol traim. Wanpela sista i karim bikpela hevi tru, em i tok: “Taim mi mekim wok painia, mi bin go klostu tru long Jehova na dispela i helpim mi long karim dispela bikpela hevi.” Em i tok moa: “Mi amamas tru long mi bin mekim wok bilong Jehova fultaim inap bikpela haptaim long laip bilong mi. Dispela i mekim na mi inap givim mi yet bilong mekim ol gutpela wok tru.” (Ap. 20:35) Yumi tu bai kisim planti gutpela blesing taim yumi givim bel long mekim dispela wok i bikpela samting tru, em wok autim tok.—Snd. 10:22.
[Askim Bilong Stadi]
1. Bilong wanem nau em i taim bilong autim tok?
2. Olsem wanem ol wokman bilong Jehova i kamapim klia olsem ol i save taim i sot pinis?
3. Planti taim ol pablisa i mas mekim wanem ol senis bambai ol i ken mekim wok painia?
4. Yu ken mekim wanem ol samting bilong winim mak bilong mekim wok painia?
5. Olsem wanem wok painia i helpim yumi long mekim gut moa wok bilong yumi long autim tok?
6. Wok painia i givim wanem gutpela skul long yumi?
7. Olsem wanem wok painia i helpim yumi long i go klostu long Jehova?
This article is repeated again in km 3/09.