“Yu Inap Kamap Wanpela Gutpela Painia!”
1. Wanpela sista i pilim wanem long wok painia bilong em?
1 Wanpela sista em Kathe B. Palm, i tok: “Mi no inap painim wanpela narapela wok i mekim mi stap belgut tru na i strongim mi tru long ol samting bilong spirit.” Em i bin lusim planti yia bilong mekim wok painia na autim tok long olgeta hap bilong Sili, long Saut Amerika. Ating taim wanpela i tingim amamas ol lain insait long fultaim sevis i save kisim, na em i bin tokim yu olsem: “Yu inap kamap wanpela gutpela painia!”
2. Stori long as na yu stap belgut tru taim yu mekim ol wok bilong spirit.
2 Gutpela Rot Bilong Stap Amamas Tru: Man i stap gutpela piksa bilong yumi, em Jisas, i kisim bikpela amamas long mekim wok bilong Papa bilong em. (Jo. 4:34) Jisas i pilim tru tok em i mekim taim em i skulim ol disaipel olsem amamas tru i save kam long ol wok em man i mekim bilong lotuim Jehova. Yumi stap belgut taim yumi bisi long mekim ol wok em Jehova i orait long en. Na tu, taim yumi lusim taim, strong, na mani bilong yumi bilong helpim ol narapela, dispela i save mekim yumi amamas moa.—Ap. 20:31, 35.
3. Yumi inap kisim wanem amamas taim yumi lusim bikpela hap taim moa long wok autim tok?
3 Taim yumi lusim bikpela hap taim moa long wok autim tok, bai yumi inap kirapim na mekim planti Baibel stadi moa. Na long ol hap we i luk olsem ol man i no amamas long harim, ating bai yumi painimaut olsem i gat ol man i laik harim tok taim yumi save gut moa long mekim wok autim tok. Ol painia i ken mekim wok long save ol i kisim long Skul Bilong Wok Painia, em skul ol inap i go long en taim ol i bin painia inap wanpela yia. (2 Ti. 2:15) Taim yumi wok strong, yumi wok long planim kaikai bilong tok i tru em bihain em inap karim kaikai.—Sav. 11:6.
4. Ol yangpela em klostu nau ol bai gretiuet, ol i mas skelim wanem samting?
4 Ol Yangpela: Taim skul bilong yu i laik pinis, yu bin tingting long samting yu bai mekim long bihain? I kam inap long nau, ol wok bilong skul i bosim sediul bilong yu. Bihain long yu gretiuet, bai yu mekim wanem wok long dispela haptaim em yu bin lusim bilong mekim ol wok bilong skul? Gutpela sapos yu beten na putim mak long mekim wok painia oltaim, na yu no tingting strong tumas long painim wanpela gutpela wok mani. Save yu bai kisim—long autim long ol man bilong narapela ples, winim ol hevi bilong yu yet, kisim pasin bilong bosim gut yu yet, na mekim gut moa wok tisa—ol dispela samting bai helpim yu long laip olgeta.
5. Olsem wanem ol papamama na kongrigesen i ken strongim pasin bilong mekim wok painia?
5 Ol papamama, yupela i save kirapim ol pikinini long insait long fultaim sevis? Ol tok bilong yu na gutpela pasin bilong yu inap helpim ol long putim ol samting bilong Kingdom i stap namba wan. (Mt. 6:33) Ray i bin kirap painia taim em i pinisim haiskul, na em i tok olsem: “Mama i save tingim olsem wok painia i save kamapim bikpela amamas tru.” Olgeta insait long kongrigesen i ken strongim pasin bilong mekim wok painia long rot bilong toktok na helpim ol i givim. Jose, bilong Spen, i tok: “Kongrigesen bilong mi i tingim wok painia olsem wanpela gutpela wok tru ol yangpela i ken mekim. Gutpela tok amamas ol i mekim long wok painia na helpim ol i givim i bin mekim na mi no hatwok long kirap mekim wok painia.”
6. Yumi inap mekim wanem sapos long nau yumi no gat laik long mekim wok painia?
6 Winim Ol Hevi: Olsem wanem sapos yu tok, ‘Mi no gat laik long painia.’ Sapos pastaim yu pilim olsem, orait beten long Jehova na tokim em long samting yu pilim. Yu ken tok, ‘Mi no save sapos wok painia i stret long mi o nogat, tasol mi laik mekim samting yu amamas long en.’ (Sng. 62:8; Snd. 23:26) Bihain, kisim tingting bilong Jehova long rot bilong Baibel na oganaisesen bilong em. Planti painia oltaim i bin “traim” painia haptaim pastaim, na amamas ol i bin kisim i kirapim ol long insait long fultaim sevis.—Sng. 34:8.
7. Yumi inap mekim wanem sapos yumi ting yumi no inap winim 70 aua long olgeta mun?
7 Olsem wanem sapos yu pilim olsem yu no inap winim 70 aua long olgeta wan wan mun? Gutpela sapos yu toktok wantaim ol painia i gat wankain sindaun olsem yu. (Snd. 15:22) Bihain, wokim sampela sediul i stret long yu. Ating bai yu painimaut olsem i no hatwok tumas long lusim ol samting i no bikpela samting na mekim wok autim tok long dispela hap taim.—Ef. 5:15, 16.
8. Bilong wanem sampela taim yumi mas skelim gen sindaun bilong yumi?
8 Skelim Gen Sindaun Bilong Yu: Sindaun bilong yumi i save senis. I gutpela long sampela taim yu skelim gen sindaun bilong yu. Olsem, klostu nau yu bai ritaia? Randy, i ritaia na em i tok olsem: “Dispela samting i mekim na mi inap kirap mekim wok painia wantaim meri bilong mi, na i opim rot long mipela inap i go na wok long hap i sot long ol man bilong autim tok. Mi kisim planti blesing long disisen mi bin wokim, tasol bikpela blesing moa em olsem maus bilong bel i stap gut.”
9. Ol marit i mas skelim wanem samting?
9 Sampela marit i bin skelim gut ol samting na ol i painimaut olsem i no gat wok long tupela wantaim i mekim wok mani fultaim. Tru, dispela inap makim olsem famili i mas lusim sampela samting bilong skin, tasol bai yu kisim planti blesing. John, em meri bilong em i bin lusim wok mani fultaim bambai em i ken mekim bikpela wok moa bilong wok autim tok, em i tok olsem: “Mi kisim bikpela amamas tru long save olsem meri bilong mi i save mekim ol wok bilong spirit long olgeta de.”
10. Wanem samting i save kirapim laik bilong ol Kristen long mekim wok painia?
10 Kamapim Pasin Laikim na Bilip: Jehova i putim wok autim tok i stap olsem nambawan bikpela wok yumi ken mekim. Klostu nau pasin bilong dispela graun bai pinis, na ol man i askim Jehova long helpim ol, em bai kisim bek ol tasol. (Ro. 10:13) Taim yumi laikim Jehova long bel olgeta na tenkyu long ol samting em i bin mekim bilong helpim yumi, dispela bai kirapim yumi long bihainim tok bilong Pikinini bilong em long givim bel long autim tok. (Mt. 28:19, 20; 1 Jo. 5:3) Na tu, yumi bilip olsem yumi stap tru long taim bilong las de, na dispela bai kirapim yumi long mekim olgeta samting yumi inap mekim long wok autim tok long dispela hap taim i stap yet, na ol samting bilong dispela graun i no stap bikpela samting long laip bilong yumi.—1 Ko. 7:29-31.
11. Yumi mas i gat wanem tingting sapos wanpela i tokim yumi olsem yumi inap kamap wanpela gutpela painia?
11 Wok painia oltaim i no makim tasol olsem yumi lusim bikpela haptaim moa long autim tok, nogat, dispela i kamapim pasin bilong yumi long givim bel olgeta long God. Olsem na sapos wanpela i tokim yu olsem yu inap kamap wanpela gutpela painia, orait tingim dispela tok olsem wanpela gutpela tok. Na tu, beten na tingting long wok wantaim ol lain husat i mekim pinis dispela gutpela wok bilong givim amamas tru.
[Rait long pes 6]
Ol papamama, yupela i save kirapim ol pikinini long insait long fultaim sevis?
[Rait long pes 7]
Jehova i putim wok autim tok i stap olsem nambawan bikpela wok yumi ken mekim.