Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Ogas 29, 2005. Wasman skul bai mekim riviu inap 30 minit long ol tok i bin kamap insait long skul long wik i kirap long Julai 4 i go inap long Ogas 29, 2005. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-7.]
PASIN BILONG TOKTOK
1. Olsem wanem yumi ken ‘isi isi long olgeta man na larim ol i lukim gutpela pasin bilong yumi’ taim yumi tokim ol long ol samting yumi bilip na wet long en? Bilong wanem dispela i bikpela samting? (Fl. 4:5; Jem. 3:17) [3, be p. 251 par. 1-3, na blok] Yumi soim pasin bilong isi long ol man taim yumi tingim ol i bin i go bikpela olsem wanem, na sindaun bilong ol, na tingting i stap long bel bilong ol. Yumi mas bungim pasin bilong yumi long bilip strong na givim bel long mekim wok wantaim pasin bilong skelim gut ol samting, na larim man i kamapim tingting bilong em taim i stret long mekim olsem, dispela tu i soim olsem yumi isi long man. Dispela pasin i bikpela samting, long wanem, sapos yumi kamapim strong tok long pasin antap, ol man i harim tok ol bai pasim tingting na bel bilong ol na ol bai i no amamas long harim tok.
2. Yumi mas save i gat taim i stret long bihainim laik bilong narapela na i gat taim we i no stret long mekim olsem. Olsem wanem dispela save inap helpim yumi long stap gut wantaim ol narapela? [5, be p. 253 par. 1-2] Tru ating yumi gat planti tok bilong kamapim ples klia olsem tok bilong yumi i stret, tasol sampela taim i gutpela yumi no strong long mekim olsem. Taim yumi no bekim ol tok kranki man i mekim, dispela i opim rot long yumi toktok long samting em inap helpim man. Na tu, taim yumi tingim olsem Jehova i inapim ol man long tingim wanem samting ol i laik mekim, dispela bai helpim yumi long save olsem yumi bihainim laik bilong narapela o nogat. (Jos. 24:15; Snd. 19:11)
3. Bilong wanem pasin bilong mekim gutpela wok long ol askim i bikpela samting taim yumi helpim ol narapela long skelim gut long tingting ol samting yumi stori long en? [6, be p. 253 par. 3-4] Taim yumi mekim gutpela wok long ol askim, dispela i larim ol man long kamapim bel bilong ol na skelim gut long tingting ol samting yumi stori long en. Yumi no ken mekim olgeta toktok na bekim olgeta askim yumi givim man, nogat. Yumi ken mekim wok long ol askim bilong helpim man long wokim tingting na kisim gut insait bilong tok yumi mekim. (Lu. 10:25-37)
4. Yumi mas tingim wanem ol samting bilong mekim tok i pulim tingting bilong man? [7, be p. 255 par. 1-4, na blok; p. 256 par. 1, na blok] Ol man i harim tok bilong yumi bai i no inap bilipim o bihainim tok yumi mekim sapos ol i no bilip olsem tok yumi mekim em i tru. Olsem na yumi mas kamapim tasol tok em Baibel i as bilong en. (Jo. 17:17) Yumi mas kamapim ol tok i helpim ol tok yumi mekim. Na yumi no ken tok tasol olsem samting yumi toktok long en em i tru, yumi mas kamapim ol strongpela as na ol i ken bilipim tok yumi mekim na yumi mas tingim olsem i stret ol man i ken kamapim askim olsem: “Dispela tok i tru olsem wanem?”
5. Sapos yumi tingting long mekim wok long ol narapela tok bilong helpim ol man long luksave olsem tok bilong Baibel i stret, orait yumi mas tingim wanem samting? [8, be p. 256 par. 3-5, na blok] Ol tok bilong sampela narapela buk samting ol man i bilip long en em yumi kamapim i mas soim olsem tok bilong Baibel i stret wantaim ol samting ol man i lukim. Em i mas stret wantaim samting yumi laik bai tok i mekim na em inap helpim ol lain i harim tok bilong yumi. Yumi mas kamapim Tok Bilong God na bihain yumi ken kolim sampela tok bilong saiens o sampela tok bilong ol saveman bilong helpim tok bilong yumi.
TOK NAMBA 1
6. Wanem samting i kamapim klia olsem Jisas i bin i stap long graun? [2, w03 6/15 p. 4-7] Ol tok bilong Jisas i bin mekim bikpela wok na senisim i stap bilong planti man tru. Josifas na Tasitus em tupela saveman i bin stap long taim bilong ol aposel, tupela i bin stori long Jisas na ol disaipel bilong em, na Plini Namba Tu em i bin stap 100 yia bihain long Krais em tu i stori long ol. Ol tok Jisas i skulim ol man long en, olsem tok em i bin mekim antap long maunten i bin mekim sampela samting long planti milion manmeri. (Mt. sapta 5–7) Stori bilong Jisas i dai long diwai i stap long Baibel em planti i no laikim, dispela i kamapim klia olsem tok Baibel i kamapim long i stap bilong Jisas na wok bilong em long autim tok em i tru. (1 Ko. 1:22, 23) Na tu, wok ol disaipel bilong Jisas i mekim maski ol man i birua long ol, dispela i helpim tok olsem Jisas i bin i stap long graun. (1 Ko. 15:12-17)
7. Olsem wanem “toktok bilong ol stretpela man i save helpim ol”? Olsem wanem “ol lain bilong ol stretpela man bai i stap gut”? (Snd. 12:6, 7) [3, w03 1/15 p. 30 par. 1-3] Ol stretpela man i save wanem pasin i stret na wanem pasin i no stret. Ol i save bihainim gutpela tingting na was gut na abrusim ol samting i laik bagarapim ol, na ol i save toksave long ol narapela na helpim ol na bai ol tu i no ken kisim bagarap. Ol i save sanap strong tu long taim hevi i painim ol.
8. Baibel i no kamapim wanpela longpela lista bilong ol samting yumi mas mekim o no ken mekim, orait olsem wanem yumi ken ‘save long laik bilong Bikpela’? (Ef. 5:17) [4, w03 12/1 p. 21 par. 2–p. 22 par. 2] Bilong save long laik bilong Jehova, dispela i makim olsem yumi mas save long ol pasin Jehova i laikim na ol pasin em i no laikim. I no gat wok long i gat lo stret o lista i stap bilong makim olgeta samting man i mas mekim. Sapos dokta i tokim man long abrusim ol kain kaikai olsem kek na aiskrim, orait dokta i no gat wok long wokim wanpela lista bilong olgeta wan wan kaikai we man i no inap kisim. Olsem tasol, taim Pol i kolim ol pasin bilong olpela bel, em i tok “ol dispela kain pasin” i pasim man long kisim ol blesing bilong Kingdom. (Ga. 5:19-23) Pasin bilong mekim wok long tingting bilong man yet i opim rot bilong em long soim olsem em i pilim tru pasin bilong God na em i laik amamasim God.
9. Ol man i stap rabis inap bihainim wanem ol stiatok bilong Baibel na dispela inap helpim ol long karim hevi bilong i stap rabis o hevi bilong mani? [6, w03 8/1 p. 5 par. 3-6] Saveman 7:12 i helpim man i stap rabis long luksave olsem tru mani i helpim sindaun bilong em, tasol pasin bilong bihainim gutpela tingting i winim mani. Pasin bilong bihainim gutpela tingting bai lukautim laip bilong yumi long nau na opim rot bambai yumi ken kisim laip i stap oltaim oltaim. Luk 14:28 i kirapim man long luksave long ol samting em i mas i gat na skelim mani bilong em gut bilong baim ol dispela samting. Namba Wan Timoti 6:8 na Matyu 6:22 i kirapim man long amamas long ol samting em i gat pinis na tingting long mekim wok bilong God na tingim laip i stap gut oltaim oltaim.
10. Pasin bilong Jehova long givim nating presen long ol man i mas mekim wanem long yumi? (Mt. 10:8) [7, w03 8/1 p. 20-2] Jehova i mekim pasin marimari taim em i stretim rot bilong Pikinini bilong em long i dai olsem ofa—em pe i dia tumas God i givim—bilong opim rot bilong ol man i ken kisim laip oltaim. (Ro. 3:23, 24) Dispela i mas kirapim yumi long amamas long mekim wok bilong God na bringim “wara bilong givim laip” i go long ol manmeri. (KTH 22:17; Sng. 110:3) Tru Baibel i kirapim yumi long lukluk i go “long dispela gutpela pe God i laik givim” yumi, tasol yumi mekim wok bilong Jehova, long wanem, yumi laikim tumas em na i no long wanem yumi tingim yumi yet tasol na yumi mekim wok bilong God, nogat. (Hi. 6:10; 11:6, 26)
BAIBEL RITIM BILONG WIK
11. Tupela longpela pos em ol i kolim Jakin na Boas i stap klostu long dua bilong tempel em Solomon i wokim i makim wanem samting? (1 Kin. 7:15-22) Pos i stap long han sut ol i kolim Jakin, insait bilong dispela nem em “God i kamapim.” Pos i stap long han kais ol i kolim Boas, insait bilong en em “Long strong bilong God.” Long tok Hibru ol i save ritim ol tok kirap long han sut na i go long han kais, olsem na dispela tupela pos i kamapim dispela tok ‘God i kamapim long strong bilong em.’ Dispela tupela pos i sanap nating, ol i no sapotim wanpela hap bilong tempel. I luk olsem dispela tupela pos i makim olsem God i kamapim dispela tempel long strong bilong em yet na em i orait long lotu i tru ol i mekim long tempel. [1, 1 Kin. 7:21, sta; it-1-E p. 348 par. 2; w66-E p. 32]
12. Solomon i givim 20 taun i stap long Galili olsem presen long King Hiram bilong Tair. Yu ting dispela i stret wantaim Lo Bilong Moses? (1 Kin. 9:10-13) Ol inap ting olsem Lo i stap long Wok Pris 25:23, 24 i stori tasol long ol hap graun we ol Israel i stap long en. Ating dispela ol taun em Solomon i givim long Hiram i gat ol man bilong ol narapela lain i stap long ol, maski ol i stap namel long Graun Bilong Promis. (Kis. 23:31) Pasin bilong Solomon tu inap soim olsem em i no bihainim gut Lo, wankain olsem em i bin “kisim planti hos” bilong em yet na maritim planti meri. (Lo 17:16, 17) Tasol maski wanem as na Solomon i mekim olsem, Hiram i no amamas long dispela presen. Ating ol lain bilong ol dispela taun i no lukautim gut ol dispela taun, o ol taun i no stap long gutpela hap. [2, w05 7/1 p. 29]
13. Yumi inap lainim wanem samting long dispela “profet bilong God” husat i no bin bihainim tok bilong God? (1 Kin. 13:1-25) Oltaim yumi mas bihainim stret ol pasin bilong Jehova. Oltaim yumi mas askim em long stiaim yumi, moa yet long taim yumi mas makim sampela samting long mekim long i stap bilong yumi. Yumi no ken hambak long tingting bilong yumi yet o bilong narapela husat i tokim yumi long mekim sampela samting, maski em i holim wanpela bikpela wok o em i tok em i gat bikpela wok insait long oganaisesen bilong God. [3, w05 7/1 “Tok Bilong Jehova i Gat Laip—Sampela Bikpela Tok Bilong Buk Namba 1 King”; w98 9/1 p. 23; w62-E p. 114 par. 14]
14. Long wanem rot King Asa bilong Juda i soim olsem em i gat strongpela bel? Dispela pasin bilong em inap lainim yumi long wanem samting? (1 Kin. 15:11-13) King Asa i rausim ol god giaman na ol man i mekim pasin sodom long Juda. Na em i tekewe namba long bubu meri bilong em i save lotuim ol god giaman na kukim “stingpela piksa” bilong em. Olsem tasol, yumi mas helpim lotu i tru long rot bilong wok bilong yumi long autim tok na skulim ol man, na givim baksait long ol lotu giaman. [4, w05 7/1 “Tok Bilong Jehova i Gat Laip—Sampela Bikpela Tok Bilong Buk Namba 1 King”; w93 11/15 p. 17 par. 20]
15. Olsem wanem hevi i kamap namel long King Ahap na Nabot i soim olsem pasin bilong man long sori long em yet tasol inap bagarapim em? (1 Kin. 21:1-16) King Ahap i sori long em yet taim Nabot i no laik givim gaden wain bilong em long Ahap. Meri bilong Ahap, em Kwin Jesebel, i no laik harim tok bilong Nabot na em i stretim rot bilong ol man i sutim tok giaman long Nabot olsem em i tok nogut long God na king na ol i tromoi ston long em na kilim em i dai. Olsem stori bilong Ahap i kamapim, man i larim pasin bilong sori long em yet i stiaim em, em i bihainim rot nogut. Long wanem, pasin bilong man i sori long em yet tasol, dispela pasin inap bagarapim em yet. Dispela pasin inap mekim na man i pes drai na kros, olsem King Ahap i bin mekim. Na em bai mekim na man i no inap tingim ol narapela. Man i larim dispela pasin i stiaim em, em bai i no gat stretpela tingting long ol samting i bikpela samting, na em bai i no inap skelim gut ol samting. Pasin bilong man i sori long em yet tasol inap mekim na em i go slek long ol samting bilong spirit, na taim hevi i painim em, em bai mekim pasin i no stret, na em bai lusim pasin bilong i stap klin long ai bilong God. [6, w77-E p. 547]