Betel—Taun Bilong Gutpela Samting na Samting Nogut

SAMPELA taun i kisim biknem​—⁠o nem nogut​—⁠long rot bilong ol samting i kamap long ol. Tasol taun Betel i narapela kain, long wanem, em i bin kisim nem long rot bilong ol gutpela samting i bin kamap long en na long ol samting nogut tu. Jekop i kolim nem bilong dispela taun olsem Betel, insait bilong en i olsem “Haus Bilong God.” Tasol wan tausen yia bihain long dispela, profet Hosea i kolim dispela taun olsem “Haus Bilong Givim Pen.” Wanem samting i mekim na dispela taun i no stap moa olsem ples bilong gutpela samting​—⁠em i kamap ples bilong samting nogut? Samting i bin kamap bipo long dispela taun inap skulim yumi long wanem samting?

Namba wan taim lain bilong God i stap long hap bilong Betel, em long yia 1943 B.C.E. taim Abraham i stap laip yet. Long dispela taim ol man i save kolim dispela taun long olpela nem bilong en, olsem Lus, em nem ol Kenan i bin givim long dispela taun. Dispela taun i bin stap long ples bilong ol liklik maunten, long hap not bilong Jerusalem inap 17 kilomita. Long tingting bilong yu, tingim Abraham na Lot​—⁠Lot em i pikinini bilong brata bilong Abraham. Tupela i sanap long ples maunten klostu long Betel na lukluk i go daun long ples daun bilong Jordan long ol stretpela graun i gat gutpela gris long en. Long pasin isi Abraham i tokim Lot olsem graun i no inap long ol bikpela lain animal bilong ol. Em i tok: “Mitupela i wanblut. Nogut mitupela i kros, na nogut ol wokman bilong mitupela tu i kros. Lukim bikpela hap graun i stap. Mobeta yu makim wanpela hap bilong yu yet, na yu lusim mi na yu go long en. Sapos yu laik i go long han sut, orait mi ken i go long han kais. Na sapos yu laik i go long han kais, orait bai mi go long han sut.”​—⁠Stat 13:​3-​11.

Krismas bilong Abraham i winim krismas bilong Lot, olsem na em inap long go pas na makim wanem hap graun em yet i laikim. Tasol em i no mekim olsem. Em i larim yangpela man Lot long kisim gutpela hap graun. Yumi ken bihainim dispela gutpela pasin bilong Abraham. Bilong mekim i dai kros, yumi ken mekim tok long pasin isi na no ken tingim ol samting bilong yumi yet tasol.​—⁠Rom 12:⁠18.

Sampela yia bihain, taim tumbuna pikinini bilong Abraham, em Jekop, i stap long Lus, em i kisim driman i narapela kain. Em i lukim “wanpela lata, as bilong en i stap long graun na het bilong en i go antap long heven. Na ol ensel bilong God i wokabaut i go antap na i kam daun long dispela lata. Na Jekop i lukim Bikpela i sanap [“antap long en,” NW].” (Stat 28:​11-​19; skelim wantaim Jon 1:​51.) Dispela driman i gat bikpela insait bilong en. Ol ensel Jekop i lukim ol bai helpim em bambai truim i ken kamap bilong dispela tok promis God i bin givim long Jekop i tok long lain tumbuna pikinini bilong em. Jehova i sanap antap long dispela lata na dispela i makim olsem em bai stiaim ol dispela ensel long mekim dispela wok.

Jekop i pilim tru dispela samting i bin kamap, i makim olsem Jehova bai sambai long em. Taim em i kirap long slip, em i kolim dispela ples olsem Betel, olsem “Haus Bilong God,” na em i tok promis long Jehova olsem: “Olgeta samting yu givim long mi, bai mi tilim long 10-pela hap na givim wanpela hap long yu.”a (Stat 28:​20-22) Em i save olgeta samting em i kisim em i kam long han bilong God, olsem na em i laik givim bikpela hap i go bek long God bilong kamapim tenkyu bilong em.

Ol Kristen long nau ol tu i gat ol ensel i helpim ol. (Song 91:11; Hibru 1:​14) Long rot bilong pasin bilong “tenkyu moa yet long God,” ol tu i ken kamapim klia olsem ol i pilim tru olgeta gutpela samting ol i bin kisim.​—⁠2 Korin 9:​11, 12.

Bihain, ol tumbuna pikinini bilong Jekop i kamap olsem wanpela bikpela lain. Taim ol i kirap mekim wok bilong kisim graun Kenan, gopas bilong ol, em Josua, em i pait na daunim king haiden bilong Betel. (Josua 12:⁠16) Long taim bilong ol Hetman, profet meri Debora i save sindaun long hap klostu long Betel na em i givim tok bilong Jehova long ol Israel. Taim Samuel i stap hetman bilong ol Israel, planti taim em tu i save go long Betel bilong harim kot bilong ol.​—⁠Hetman 4:​4, 5; 1 Samuel 7:​15, 16.

Betel i Kamap Ples Bilong Lotu Giaman

Taim lain Israel i bruk i go long tupela lain long yia 997 B.C.E. Betel i no stap moa olsem ples bilong trupela lotu. King Jeroboam i kamapim pasin bilong lotuim bulmakau long Betel​—⁠ol i ting dispela bulmakau i makim Jehova. (1 King 12:​25-29) Olsem na taim Hosea i tok profet long Betel bai bagarap, em i kolim dispela taun olsem “Bet-aven,” insait bilong en i olsem “Haus Bilong Givim Pen.”​—⁠Hosea 10:5, 8, NW.

Maski Betel i kamap pinis olsem ples bilong lotuim god giaman, ol samting i kamap long dispela ples i wok yet long skulim ol man long sampela bikpela samting. (Rom 15:⁠4) Olsem: Jehova i tokim wanpela profet, em Baibel i no kamapim nem bilong em, long lusim Juda na go long Betel na tokaut olsem bagarap bai painim ol alta na ol pris bilong dispela taun. Na Jehova i tokim em long em i no ken kaikai o dring wanpela samting long dispela ples​—⁠em i mas go bek long Juda, em sampela kilomita tasol long hap saut. Dispela profet i no pret na em i singaut long ai bilong Jeroboam, king bilong Israel, olsem alta bilong Betel bai bagarap. Tasol bihain em i sakim tok bilong God na kisim kaikai long haus bilong wanpela lapun profet long Betel. Bilong wanem em i mekim olsem? Dispela lapun profet i giaman na em i tok wanpela ensel bilong Jehova i bin tokim em long singautim wanpela wanwok profet i kam long haus bilong em na givim em sampela kaikai na wara bilong dring. Dispela profet i bin kam long Juda em i sakim tok bilong Jehova na long dispela as em i dai.​—⁠1 King 13:​1-​25.

Sapos wanpela wanbilip i tokim yumi long mekim wanpela samting yumi ting i no stret tumas, yumi mas mekim wanem? Yumi mas save olsem, maski tok yumi kisim i olsem bilong helpim yumi, em inap mekim nogut long yumi sapos em i kranki. (Skelim wantaim Matyu 16:​21-​23.) Sapos yumi beten askim Jehova long stiaim tingting bilong yumi na yumi stadi long Tok bilong em, dispela bai helpim yumi long abrusim dispela bikpela popaia tru em dispela profet yumi no save long nem bilong em i bin mekim.​—⁠Sindaun 19:21; 1 Jon 4:⁠1.

Inap 150 yia bihain long dispela, profet Amos tu i bin go long Betel bilong mekim strongpela tok profet. Amos i kamapim rong bilong ol man bilong Betel na ol i kros nogut tru, na em i kamapim rong bilong pris Amasia tu. Amasia i tokim Amos long ‘raus long Betel na go bek long Juda.’ Tasol Amos i no pret na em i tokim Amasia long ol hevi bai kamap long lain bilong dispela pris yet. (Amos 5:​4-6; 7:​10-​17) Pasin bilong Amos i kirapim yumi long tingim olsem Jehova inap strongim ol wokman bilong em i gat pasin daun.​—⁠1 Korin 1:​26, 27.

Bihain, gutpela King Josaia i brukim ‘alta long taun Betel, na kukim ples lotu long paia, na tu em i kisim pos diwai i gat piksa bilong god meri Asera na kukim long paia.’ (2 King 23:​15, 16) Ol elda long nau i ken bihainim gutpela pasin bilong Josaia olsem: Ol i mas bihainim ol tok God i save givim long ol na go pas long wok bilong helpim kongrigesen long i stap klin.

Ol dispela samting i bin kamap long Betel i kamapim klia wanem ol samting inap kamap long wok bilong mekim stretpela pasin na long pasin nogut tu, na wanem samting inap kamap long pasin bilong bihainim tok bilong Jehova na long sakim tok bilong em. Sampela yia paslain long ol dispela samting i kamap, Moses i tokim ol Israel long makim wanem rot ol i laik bihainim: “Nau mi soim yupela tupela rot. Sapos yupela i bihainim wanpela rot, yupela bai i kisim gutpela laip tru, na bai yupela i stap gut oltaim. Na sapos yupela i bihainim narapela rot, bai yupela i kisim taim nogut na bagarap, na bai yupela i dai.” (Lo 30:​15, 16) Sapos yumi tingim gut ol samting i bin kamap long Betel, dispela bai kirapim yumi long mekim wok bilong helpim “Haus Bilong God,” em ples bilong trupela lotu, na yumi no ken mekim wok bilong helpim “Haus Bilong Givim Pen.”

[Futnot]

[Piksa long pes 23]

Ol pipia ston bilong ol haus samting long Betel​—⁠em ples Jeroboam i bin kamapim pasin bilong lotuim bulmakau