‘Yupela i Kisim Nating, Givim Nating’
“SAMTING yupela i bin kisim, em yupela i kisim nating, na i no gat pe bilong en. Olsem na yupela i mas givim nating long ol manmeri. Yupela i no ken kisim pe long en.” (Matyu 10:8) Jisas i givim dispela tok long ol aposel bilong em taim em i salim ol i go autim gutnius. Ol aposel i bin bihainim dispela tok? Yes, na ol i bihainim yet bihain long Jisas i lusim graun.
Olsem: Taim Saimon, bipo em man bilong mekim posin, i lukim aposel Pita na Jon i gat strong bilong wokim ol mirakel, em i laik baim ol long mani na ol i ken givim dispela strong long em. Tasol Pita i krosim em na i tok: “Mani bilong yu i ken bagarap wantaim yu yet! Samting God i save givim olsem presen, em yu ting yu inap baim long mani, a? Nogat tru.”—Aposel 8:18-20.
Aposel Pol i kamapim wankain pasin olsem Pita. Pol inap larim ol brata Kristen long Korin i lukautim em long mani samting. Tasol nogat, em i mekim wok bilong lukautim em yet. (Aposel 18:1-3) Olsem na em inap tokaut olsem em i bin “autim gutnius nating” long ol Korin, no gat pe.—1 Korin 4:12; 9:18.
Sori tru, planti man i tok ol i bihainim Krais ol i no mekim wankain pasin bilong amamas long “givim nating” samting. Planti bikman bilong lotu Kristendom i “ting long kisim pe tasol na ol i autim as bilong lo long ol manmeri.” (Maika 3:11) Sampela hetman bilong lotu i bin kamap maniman long rot bilong mani ol i kisim long ol sipsip bilong ol. Long 1989, wanpela evanjelis bilong Amerika i kalabus inap 45 yia. Bilong wanem? Long wanem em i bin “giamanim ol manmeri i bihainim em na kisim planti milion dola long ol na yusim sampela bilong dispela mani long baim ol haus, ka, go malolo long ol narapela hap, na baim tu haus bilong dok i gat air-conditioner long en.”—People’s Daily Graphic, Oktoba 7, 1989.
Long Gana, nius Ghanaian Times bilong Mas 31, 1990, i tok wanpela pris Katolik i kisim mani ol man i bungim long taim bilong lotu na tromoi i go bek long ol. Nius i tok: “Em i mekim olsem, long wanem, em i ting ol man i winim bikpela krismas ol i mas givim bikpela mani.” Na planti lotu i traim long kirapim lain bilong ol long insait long pilai laki samting, em lotu yet i bin kamapim bilong kisim mani.
Tasol ol Witnes Bilong Jehova i narapela kain. Ol i strong long bihainim pasin bilong Jisas na ol disaipel bilong em bilong pastaim. Ol i no gat ol pris pasto ol i mas baim bilong mekim wok. Olgeta wan wan Witnes i gat wok bilong ‘autim gutnius bilong kingdom’ long ol narapela. (Matyu 24:14) Winim 6 milion Witnes long olgeta hap i bringim “wara bilong givim laip” i go long ol manmeri, no gat pe. (KTH 22:17) Long dispela rot ol man “i no gat mani” ol tu inap kisim helpim long tok bilong Baibel. (Aisaia 55:1) Tru, ol man i givim mani long laik bilong ol yet long helpim wok bilong ol Witnes long olgeta hap, tasol ol Witnes i no save singaut long mani. Ol i wokman tru bilong God na ‘ol i no save go nabaut na mekim wok bisnis long tok bilong God,’ nogat; ol ‘i kisim dispela wok long God yet na ol i no save giaman nabaut.’—2 Korin 2:17.
Tasol bilong wanem ol Witnes Bilong Jehova i laik helpim ol narapela na ol i redi long lusim mani samting bilong ol yet long mekim olsem? Wanem samting i kirapim ol? Olsem wanem? Taim ol i givim nating ol samting bilong ol, ol i no kisim pe long hatwok bilong ol?
Bekim Tok Satan i Sutim
Laik bilong mekim ol samting Jehova i laikim em i nambawan samting i kirapim ol Kristen tru long nau—ol i no mekim bilong kisim mani, nogat. Long dispela rot ol inap bekim tok Satan i sutim long Jehova planti handet yia i go pinis. Satan i sutim askim long Jehova long Jop olsem: “Yu ting bai Jop i aninit long yu sapos em i no kisim wanpela samting long han bilong yu, a?” Satan i tok Jop i lotuim God, long wanem, Em i lukautim gut Jop. Satan i tok sapos God i tekewe olgeta gutpela samting bilong Jop, Jop bai toknogutim God!—Jop 1:7-11.
Bilong stretim dispela tok, God i larim Satan i traim Jop na em i tok: “Mi putim olgeta samting bilong en long han bilong yu.” (Jop 1:12) Wanem samting i kamap? Jop i kamapim olsem Satan em man bilong giaman. Maski wanem hevi i kamap long Jop, em i stap gut long God. Em i tok: “I go inap long taim mi dai mi no ken lusim stretpela pasin bilong mi!”—Jop 27:5, 6, NW.
Ol man long nau i lotu tru long God ol i kamapim wankain pasin olsem bilong Jop. Laik bilong kisim ol samting bilong skin i no kirapim ol long mekim wok bilong God.
Marimari Bilong God i Olsem Presen Em i Givim Nating Long Ol Man
Narapela as na ol trupela Kristen i amamas long “givim nating” samting, em ol yet i bin “kisim nating” long God. Ol manmeri i kalabus long sin na indai, long wanem, tumbuna papa bilong yumi Adam i bin mekim sin. (Rom 5:12) Jehova i mekim pasin laikim taim em i stretim rot bilong Pikinini bilong em i dai olsem ofa—em pe i dia tumas God i givim. Ol manmeri i no bin mekim wanpela samting bilong kisim dispela pe. Em presen God i givim nating.—Rom 4:4; 5:8; 6:23.
Long Rom 3:23, 24, Pol i tokim ol Kristen God i makim olsem: “Yumi olgeta man yumi bin mekim sin, na yumi no inap i stap wantaim God long heven. Tasol God i marimari long yumi, na long wok Krais Jisas i mekim bilong baim bek yumi, God i save kolim yumi stretpela manmeri. Yumi no kamap stretpela manmeri long wok yumi yet i mekim. Nogat. God i givim nating long yumi long han bilong Krais Jisas.” Ol manmeri i wet long stap oltaim long graun ol tu bai kisim presen God i “givim nating.” Hap bilong dispela presen God i givim nating long yumi em taim Jehova i tokaut olsem yumi kamap stretpela man na yumi stap olsem pren bilong em.—Jems 2:23; KTH 7:14.
Ofa Krais i givim olsem pe bilong baim bek ol man i givim rot long olgeta Kristen i ken kamap wokman bilong God na mekim wok bilong em. Aposel Pol i tok: “God i mekim mi i kamap wokman bilong autim dispela gutnius.” (Efesus 3:4-7) God i singautim ol long mekim wok bilong em long rot bilong wanpela presen em i givim nating long ol, olsem na ol wokman tru bilong God i no save ting olsem ol i mas kisim mani, olsem pe, taim ol i autim tok long ol narapela, nogat.
Laip Oltaim i As na Ol Man i Mekim Wok Bilong God?
Dispela i makim olsem God i laik bai ol Kristen i mekim wok bilong em na ol i no ken wet long kisim wanpela gutpela pe? Nogat, long wanem, aposel Pol i tokim ol wanbilip bilong em: “God em i no man nogut, na bai em i lusim tingting long ol gutpela wok yupela i bin mekim. Nogat.” (Hibru 6:10) Jehova i man bilong bihainim stretpela pasin. (Lo 32:4) Jehova “i save mekim gut tru long ol man i wok long painim em.” (Hibru 11:6) Tasol olsem wanem? Dispela promis bilong i stap laip oltaim long Paradais i as na ol man i mekim wok bilong God?—Luk 23:43.
Nogat tru. Wanpela as em, God yet i bin kamapim dispela laik bilong i stap oltaim long Paradais long graun. Em tasol i givim dispela tingting long namba wan man na meri. (Stat 1:28; 2:15-17) Na taim Adam na Iv i mekim sin na laip oltaim long Paradais i lus, God i stretim rot na bai ol tumbuna pikinini bilong tupela i gat rot long kisim bek dispela samting. Long Baibel God i promis olsem em “bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru.” (Rom 8:21) Em stret long ol Kristen long nau, olsem Moses bilong bipo, i lukluk i go “long dispela gutpela pe God i laik givim” ol. (Hibru 11:26) God i no givim dispela pe long yumi bilong grisim yumi. Pasin laikim i kirapim em long givim long ol man i mekim wok bilong em. (2 Tesalonaika 2:16, 17) Olsem na “yumi save laikim ol arapela, long wanem, God i bin laikim yumi pastaim.”—1 Jon 4:19.
Stretpela Laik i Kirapim Yumi Long Mekim Wok Bilong God
Tasol ol Kristen i mas skelim i gat wanem as tru na ol i mekim wok bilong God. Jon 6:10-13 i tok Jisas i wokim mirakel na givim kaikai long 5,000 manmeri. Bihain sampela i kirap bihainim Jisas, long wanem, ol i laik tasol long kisim samting. Jisas i tokim ol: “Yupela i kaikai dispela bret mi bin givim yupela na bel bilong yupela i pulap, na long dispela as tasol yupela i wok long painim mi.” (Jon 6:26) Teti samting yia bihain, sampela Kristen i dediket pinis ol tu i mekim wok bilong God na ol “i no gat stretpela tingting na ol i mekim olsem.” (Filipai 1:17) Sampela ‘i lusim stretpela tok bilong Jisas’ ol i wok long painim sampela rot bilong kisim kago long pasin bilong ol long bung wantaim ol Kristen.—1 Timoti 6:3-5.
Long nau, sapos wanpela Kristen i mekim wok bilong God, long wanem, em i laik stap oltaim long Paradais na dispela tasol i as na em i mekim olsem, ating em tu i tingting tasol long helpim em yet na em i mekim dispela wok. I no longtaim em inap pundaun long ol samting bilong spirit. Ating em bai “slek,” long wanem, em i pilim olsem pinis i no kamap hariap, ol samting Satan i bosim i wok long stap yet. (Galesia 6:9) Ating em bai bel nogut, long wanem, em i bin lusim sampela samting bilong em yet. Jisas i tokim yumi: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:37) Em nau, sapos pasin bilong laikim God i nambawan as na man i mekim wok bilong God, orait em bai mekim i go i go, i no long sampela yia tasol. Em bai strong long mekim wok bilong God i go inap oltaim oltaim! (Maika 4:5) Em i no tingting planti long ol samting em i bin lusim bilong mekim wok bilong God. (Hibru 13:15, 16) Pasin bilong laikim God i kirapim em long putim laik bilong God i stap nambawan samting long laip bilong em.—Matyu 6:33.
Long nau winim 6 milion man i lotu tru i givim ol yet bilong mekim wok bilong Jehova. (Song 110:3) Yu insait long dispela lain? Sapos nogat, orait tingim tingim long bel ol samting God i laik givim: stretpela save bilong tok i tru; (Jon 17:3) kamap fri long kalabus bilong ol bilip giaman bilong lotu; (Jon 8:32) bilip na wet long i stap oltaim. (KTH 21:3, 4) Ol Witnes Bilong Jehova i ken helpim yu long save olsem wanem yu ken kisim ol dispela samting long God—no gat pe.
[Rait long pes 22]
Nambawan samting i kirapim ol trupela Kristen long nau long mekim wok bilong God em laik bilong amamasim Jehova—ol i no mekim bilong kisim mani, nogat
[Piksa long pes 21]
Pe bilong ofa bilong Jisas em presen God i givim nating i kirapim ol Kristen long autim gutnius —no gat pe