Tok Bilong Yu i Gat As Bilong En

TAIM yu kamapim wanpela tok, i stret ol man i ken askim olsem: “Dispela tok i tru olsem wanem?” “I gat wanem as na mi ken bilipim tok bilong em?” Yu stap olsem tisa, olsem na yu mas bekim ol dispela askim o helpim ol man long painim bekim bilong ol dispela askim. Sapos dispela hap tok yu mekim em i bikpela samting bilong helpim tok yu mekim, orait yu mas kamapim ol strongpela as na ol i ken bilipim. Dispela bai helpim yu long mekim tok i pulim tingting bilong man.

Aposel Pol i bin mekim tok i save pulim tingting bilong ol man. Em i laik senisim tingting bilong ol man em i toktok long ol, olsem na em i kamapim tok i strongim tok bilong em, na i stori long olsem wanem dispela tok i tru, na em i wok strong long kirapim ol long harim tok. Em i stap olsem gutpela piksa yumi ken bihainim. (Ap. 18:4; 19:8) Tasol sampela man husat i save gut long mekim toktok ol i save mekim tok i pulim tingting bilong man bilong giamanim ol. (Mt. 27:20; Ap. 14:19; Kl. 2:4) Ol bai kirap na kamapim wanpela tok o tingting i no tru, o ol bai kisim ol tok long ol man o buk i wanbel long tingting bilong ol, o ol bai kamapim ol tok i no gat as tru bilong en, o ol i no stori long ol tok i no wanbel long tingting bilong ol, o ol bai kirapim ol man long bihainim tingting nating bilong bel, na ol gutpela tingting nogat. Yumi mas was gut na abrusim ol dispela pasin.

Tok Bilong God i As Bilong En. Yumi no ken lainim ol man long ol tok bilong yumi yet. Yumi laik tokim ol man long ol samting yumi lainim long Baibel. Ol buk samting lain wokboi i gat gutpela tingting i bin kamapim i bin helpim yumi tru long skulim ol man. Ol dispela buk i save kirapim yumi long skelim gut ol tok bilong Baibel. Orait nau yumi stiaim ol narapela i go long Baibel, tasol i no bilong kamapim olsem tok bilong yumi i stret, nogat; yumi laik bai ol yet i ken lukim ol tok Baibel i kamapim. Yumi wanbel long tok Jisas Krais i mekim taim em i beten long Papa bilong em: “Tok bilong yu i tru olgeta.” (Jo. 17:17) God Jehova em i Man bilong wokim heven na graun, na em i gat bikpela save moa, winim olgeta man. Sapos yumi laik bai tok bilong yumi i gat as bilong en, orait tok bilong em long Baibel i mas i stap olsem as bilong tok yumi mekim.

Ating sampela taim bai yu toktok wantaim ol man i no save tumas long Baibel o ol i no ting em i Tok Bilong God. Yu mas tingting gut olsem yu bai kamapim ol tok bilong Baibel long wanem taim na olsem wanem. Tasol kwiktaim yu mas traim long kirapim ol long tingim Baibel, em Tok Bilong God yet.

Yu ting yu ken kolim tasol wanpela skripsa i stret long samting yu stori long en na dispela em inap? Ating nogat. Ating yu mas skelim ol ves i stap klostu long dispela skripsa bilong kamapim klia olsem skripsa yu ritim i helpim tok yu mekim. Sapos skripsa i kamapim wanpela stiatok, tasol ol ves i stap klostu i no stori long dispela samting, ating yu mas kamapim sampela skripsa moa i stret long samting yu stori long en na bai odiens i ken bilip olsem Baibel i as bilong tok yu mekim.

Taim yu laik kamapim wanpela skripsa bilong helpim tok bilong yu, no ken skruim sampela tingting bilong yu yet long en. Ritim gut. Ating skripsa i stori antap antap long samting yu stori long en. Tasol bilong tok bilong yu i ken pulim tingting bilong man, em i mas lukim olsem skripsa i kamapim as na samting yu stori long en i tru.

Ol Narapela Tok i Helpim Tok Yu Mekim. Sampela taim, em i gutpela long kamapim tok bilong sampela narapela buk samting ol man i bilip long en bilong helpim ol long luksave olsem tok bilong Baibel em i stret.

Olsem: Ating yu ken stori long ol samting yumi inap lukim bilong kamapim klia olsem i gat Man bilong wokim yumi. O yu ken stori long ol lo i bosim dispela graun, olsem graviti, na stori olsem sapos i gat ol kain lo olsem, orait i mas i gat Man bilong kamapim ol lo. Tingting yu kamapim bai i stret sapos em i wanbel wantaim tok i stap long Baibel. (Jop 38:​31-33; Sng. 19:1; 104:24; Ro. 1:20) Dispela kain tok i gutpela, long wanem, em i soim olsem tok bilong Baibel i stret wantaim ol samting ol man inap lukim.

Olsem wanem? Yu wok long helpim man long save olsem tru tru Baibel em i Tok Bilong God? Ating yu inap kamapim tok bilong sampela saveman i tok olsem, tasol yu ting dispela i kamapim olsem tok bilong Baibel i tru? Kain tok olsem bai helpim tasol ol man husat i rispektim tok bilong ol dispela saveman. Yu ting yu inap kamapim ol tok bilong saiens bilong soim olsem tok bilong Baibel i tru? Sapos yu kamapim tingting bilong ol saientis, em ol man i no gutpela olgeta, bambai yu ken kamapim klia olsem tok bilong Baibel i tru, orait tok bilong yu bai i no gat strongpela as bilong en. Tasol sapos yu kirap kamapim Tok Bilong God na bihain yu kolim sampela tok bilong saiens i kamapim olsem tok bilong Baibel i stret, orait tok yu mekim i gat strongpela as bilong en.

Yu mas kamapim ol tok em inap kamapim klia olsem tok yu mekim i tru. Tingim odiens bilong yu na bai yu ken save hamas tok yu mas kamapim. Olsem: Sapos yu stori long taim bilong las de, olsem 2 Timoti 3:​1-5 i stori long en, ating yu bai kamapim wanpela stori bilong niuspepa samting em ol man i save long en, i makim olsem ol man i “no save long pasin bilong i stap pren.” Ating dispela wanpela stori yet inap kamapim klia olsem dispela hap bilong mak bilong las de i wok long kamap tru long nau.

Pasin bilong skelim tupela samting i wankain liklik inap helpim yu long kamapim gut olsem tok yu mekim em i tru. Pasin yet bilong skelim tupela samting wantaim i no kamapim olsem tok yu mekim em i tru; yu mas skelim dispela samting wantaim tok Baibel yet i mekim. Tasol taim yu skelim tupela samting olsem, dispela inap helpim man long luksave long olsem wanem dispela tingting i stret. Yu ken bihainim dispela pasin taim yu stori olsem Kingdom bilong God em i wanpela gavman. Yu ken tok olsem Kingdom bilong God i gat ol man bilong bosim gavman, ol man i stap aninit long en, ol lo, ol kot, na ol skul, wankain olsem ol gavman bilong ol man.

Yu ken kamapim ol stori bilong ol samting tru tru i bin painim ol man bilong soim olsem em i savepasin long bihainim ol tok bilong Baibel. Na yu ken kamapim ol samting i bin painim yu yet bilong strongim sampela tok yu mekim. Olsem: Taim yu stori long man olsem em i bikpela samting long ritim na stadi long Baibel, yu ken stori long olsem wanem dispela i bin helpim yu yet. Bilong strongim ol brata bilong em, aposel Pita i bin stori long taim bodi bilong Jisas i bin kamap narapela kain, em samting Pita i lukim long ai bilong em yet. (2 Pi. 1:​16-18) Pol tu i bin stori long ol samting i bin painim em. (2 Ko. 1:​8-10; 12:​7-9) Tasol yu no laik bai ol man i tingim yu, olsem na yu no ken stori planti taim long ol samting i bin painim yu yet.

Tingting bilong ol man na pasin ol i go bikpela long en i no wankain, olsem na ol tok samting i kirapim wanpela man long bilipim tok, ating em i no inap kirapim narapela long bilipim. Olsem na yu mas tingim tingting bilong odiens taim yu skelim wanem ol tok bai yu kamapim, na olsem wanem bai yu kamapim. Sindaun 16:23 i tok: “Man i gat gutpela tingting, em i save tingting gut pastaim na bihain em i mekim gutpela tok. Na dispela i save mekim ol man i laikim tumas long harim tok bilong en.”