Olsem Wanem Long Pasin Bilong Ol Man?

“Bilong wanem nau long taim bilong yumi ol i mekim nogut long ol pikinini? Bilong wanem ol man i mekim nogut long ol animal? Bilong wanem i gat pasin bilong paitim na bagarapim man? . . . Bilong wanem ol man i laik pretim narapela man? Bilong wanem ol man i kisim drak? . . . Nau yumi gat olgeta samting bilong skin, olsem na bilong wanem sampela man i kirap mekim ol dispela pasin nogut em as bilong ol samting i wok long bagarapim olgeta man long nau?”

WANPELA meri i bin kamapim ol dispela askim long taim em i stap praim minista bilong Inglan. Ating planti taim yu bin mekim kain askim olsem. Olsem wanem? Yu kisim gutpela bekim bilong ol dispela askim?

Praim minista ya i stori long ol samting i bin kirapim em long mekim ol dispela askim, na em i tok: “Inap planti yia long taim mi yangpela mi mekim wok politik; mi na planti wanlain bilong mi i laik tru na tingting strong olsem: Sapos wanpela taim i kamap na bai mipela i gat gutpela haus na gutpela skul na gutpela sindaun, orait bai olgeta samting i stap gutpela, na bai mipela i no gat hatwok moa. Nau mipela i save, tingting bilong mipela i kranki. Mipela i hatwok tru, long wanem pasin bilong ol man i wok long i go nogut tru.”

Taim yumi tok long “pasin bilong ol man,” yumi toktok long “olgeta kain kain tingting na pasin em ol man i save bihainim, na ol liklik pasin bilong ol yet wan wan.” Tru tumas, ol man i gat narapela narapela kain tingting na pasin na dispela inap kamapim hevi namel long ol yet na ol wanlain na ol man bilong narapela narapela lain. Tasol olsem wanem? Pasin bilong ol man em i as tru bilong ol hevi i kamap long nau, olsem pasin bilong pait na bagarapim man, na pasin bilong pretim ol man, na wok bisnis long drak, na kain samting olsem?

Olsem wanem? Pasin bilong ol man, dispela samting tasol i bin kamapim ol dispela hevi i wok long bagarapim olgeta man? O i gat narapela samting yumi mas tingim na bai yumi ken save bilong wanem sampela man i kirap mekim ol pasin nogut na tingim ol yet tasol, maski ol inap mekim gutpela wok bilong helpim ol man? Orait, nau yumi ken stori long dispela samting.