Yu Ting Pasin Nogut Bai Pinis?

PLANTI man i wanbel long tok olsem nambawan samting i kirapim ol man long mekim nogut long ol narapela, em pasin bilong tingim ol yet tasol. Inap planti yia pinis dispela pasin i kamap strong moa yet. Planti manmeri i redi long mekim wanem wanem samting ol ken mekim bilong kamapim laik bilong ol, na planti taim dispela i kamapim pasin nogut tru. Ol wan wan man inap mekim, tasol sampela taim em wanpela lain olgeta i mekim.

I olsem laip bilong ol man i no bikpela samting moa. Sampela man i amamas long mekim nogut long ol narapela. Ol i kisim amamas long mekim olsem, kain olsem sampela raskol em ol i tok ol i save mekim nogut long ol narapela bilong kisim amamas tasol. Na olsem wanem long planti manmeri em pasin bilong ol long laikim ol muvi bilong pait na bagarapim man i save kirapim ol kampani long wokim planti kain muvi olsem? Sapos olgeta taim ol man i lukim kain pasin olsem long ol muvi na nius samting, bihain ol i no inap pilim moa olsem em i samting nogut tru.

Taim man i kisim nogut tru long han bilong narapela, dispela inap bagarapim tingting na bel bilong em na kirapim em long mekim wankain pasin long ol narapela. Noemí Díaz Marroquín, wanpela tisa long National Autonomous University of Mexico i stori long pasin bilong kros pait olsem: “Kros pait em wanpela pasin ol man i lain long mekim, em olsem pasin bilong yumi . . . Yumi lain long pait na bagarapim man taim ol manmeri yumi stap namel long ol i larim tasol dispela pasin na strongim yumi long bihainim.” Olsem na ol man i kisim nogut long han bilong narapela, ol yet inap kirap na mekim nogut long narapela, na ating ol bai mekim long wankain pasin.

Ol lain i save dring planti alkohol o kisim drak, ol tu inap kirap na mekim nogut tru long ol narapela. Na tingim tu ol lain i kros long gavman i no helpim ol rabisman. Bilong kamapim ples klia tingting bilong ol, sampela i save mekim nogut tru long ol narapela na helpim ol teroris, na planti taim ol man i no gat asua ol i kisim bagarap.

Tasol ating yu laik save: ‘Ol man i lain long mekim nogut tru long ol narapela long save bilong ol yet tasol? Wanem samting i as bilong ol pasin nogut bilong nau?’

Husat Tru i As Bilong Pasin Nogut?

Baibel i tok Satan i save stiaim ol man bilong dispela graun, em i “giaman god bilong dispela graun.” (2 Korin 4:4) Em i save tingim em yet tasol na em i strong long mekim nogut tru long ol narapela​—i no gat narapela man long heven na graun i kain olsem em. Jisas i tok stret taim em i tok em i “man bilong kilim ol man i dai” na “papa tru bilong pasin bilong tok giaman.”​​—Jon 8:​44.

Kirap long taim Adam na Iv i sakim tok bilong God, ol manmeri i bin stap aninit long strong bilong Satan. (Stat 3:​1-7, 16-​19) Inap 15 handet yia bihain long namba wan man na meri i lusim Jehova, sampela ensel i bikhet na tanim i kamap man. Ol i mekim maritpasin wantaim ol meri na kamapim wanpela lain hapkas em ol i traipela man tru, nem bilong ol em Nefilim. Wanem samting i narapela kain long ol? Nem bilong ol i bekim dispela askim. Mining bilong en em “man i mekim ol narapela i pundaun.” Ol i man bilong pait na bagarapim man. Ol i kirapim ol manmeri long mekim pasin nogut na pasin pamuk em Bikpela Tait tasol inap pinisim. (Stat 6:​4, 5, 17) Dispela Bikpela Tait i bagarapim ol Nefilim, tasol ol papa bilong ol i kamap spirit gen na go bek long ples spirit.​​—1 Pita 3:​19, 20.

Laik bilong ol dispela bikhet ensel long bagarapim ol man i bin kamap ples klia long taim bilong Jisas, long stori bilong mangi i gat spirit nogut. Planti taim dispela spirit nogut i sakim em nogut tru na tromoi em i go daun long paia na long wara tu bilong bagarapim em. (Mak 9:​17-​22) I klia tru olsem ol “spirit nogut” i save bihainim pasin nogut bilong bos bilong ol Satan, em dispela man i no save sori liklik long ol manmeri.​​—Efesus 6:​12.

Long nau, ol spirit nogut i wok yet long kirapim ol man long bagarapim ol narapela, olsem Baibel i bin tok profet: “Long taim bilong las de planti hevi nogut tru bai i kamap. Ol man bai i laikim ol yet tasol . . . Ol bai i litimapim nem bilong ol yet na hambak nabaut . . . Ol bai i no tok tenkyu. . . . Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol.”​​—2 Timoti 3:​1-5.

Ol tok profet bilong Baibel i kamapim klia olsem bai i gat planti hevi nogut tru long taim bilong yumi, long wanem, taim Kingdom Bilong God long han bilong Krais Jisas i kamap pinis long 1914, Satan na ol ensel nogut ol i raus long heven. Baibel i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”​​—KTH 12:​5-9, 12.

Olsem wanem? Sindaun bilong ol man i no inap kamap gutpela? Díaz Marroquín, em pastaim yumi bin kamapim tok bilong em, em i tok, “ol manmeri inap lain long lusim” pasin nogut. Tasol strong bilong Satan i save stiaim ol man long nau, olsem na bilong man i ken lain long lusim pasin nogut, em i mas larim narapela kain strong, winim strong bilong Satan, i stiaim tingting na pasin bilong em. Dispela strong em wanem samting?

Senisim Pasin​​—Olsem Wanem?

Holi spirit bilong God em i nambawan bikpela strong, na em inap daunim strong bilong ol spirit nogut. Dispela strong i save kirapim ol man long laikim ol narapela na i save helpim ol long i stap gut. Bilong kisim holi spirit bilong God, ol man i laik bai God i ken orait long ol, ol i mas abrusim olgeta kain pasin i mekim nogut long ol narapela. Ol i mas mekim pasin bilong ol i kamap wankain olsem laik bilong God. Laik bilong God em wanem samting? God i laik bai yumi mas bihainim pasin bilong em inap tru long skel bilong yumi. Yumi mas tingim ol narapela olsem God i save tingim ol.​​—Efesus 5:​1, 2; Kolosi 3:​7-​10.

Taim yumi skelim pasin bilong God long mekim ol samting, yumi kisim save olsem i no gat wanpela taim na Jehova i no bin tingim ol narapela. I no gat wanpela taim na em i bin mekim pasin i no stret long wanpela man o long wanpela animal.a (Lo 22:10; Song 36:7; Sindaun 12:10) God i no laik tru long pasin bilong mekim nogut long ol narapela, na em i no laikim tru ol man i save mekim kain pasin olsem. (Sindaun 3:​31, 32) Jehova i laik bai ol Kristen i mas kamap olsem nupela man na ting pasin bilong ol arapela i winim pasin bilong ol yet na ol i mas rispek long ol. (Filipai 2:​2-4) Kristen i kamap nupela man pinis em i save ‘sori tru long ol arapela na mekim gut long ol, na daunim em yet na mekim pasin isi long ol man, na em i no belhat kwik long ol man i rongim em.’ Na tu, ol Kristen i mas laikim tru ol arapela, “long wanem, dispela em i nambawan pasin bilong mekim ol man i stap wanbel.” (Kolosi 3:​12-​14; NW) Ating yu wanbel long tok olsem dispela graun bai i narapela kain tru sapos olgeta man i bihainim ol kain pasin olsem.

Tasol ating yu laik save olsem tru ol man inap senisim pasin bilong ol o nogat. Orait, tingim Martín.b Pastaim em i save singaut bikmaus long meri bilong em long ai bilong ol pikinini bilong ol na em i save paitim em nogut tru. Wanpela taim em i paitim em nogut tru na ol pikinini i mas ran i go long ol neiba bilong kisim helpim. Sampela yia bihain, famili i kirap stadi long Baibel wantaim ol Witnes Bilong Jehova. Martín i kisim save long ol pasin em i mas bihainim na ol pasin em i mas mekim long ol narapela. Yu ting em inap senis? Meri bilong em i tok: “Pastaim man bilong mi i narapela kain taim em i belhat nogut tru. Olsem na inap longpela taim tru mipela i no bin sindaun gut wantaim. Mi tenkyu tru long Jehova long em i bin helpim Martín long senisim pasin bilong em. Nau em i gutpela papa na gutpela poroman marit.”

Tasol i no Martín tasol i bin senisim pasin bilong em. Long olgeta hap bilong graun, planti milion manmeri em ol i bin stadi long Baibel wantaim ol Witnes Bilong Jehova ol i no mekim moa pasin bilong mekim nogut long ol narapela. Tru tumas, man inap tru long senisim pasin bilong em.

Klostu Nau Olgeta Pasin Nogut Bai Pinis

Klostu nau, Kingdom Bilong God bai bosim graun. Dispela Kingdom em wanpela gavman long heven. King bilong en Krais Jisas bai bosim ol manmeri long pasin sori. Samting dispela Kingdom i mekim pinis em olsem: Em i bin rausim Satan, as bilong olgeta kain pasin nogut, na ol ensel nogut, long heven. Klostu nau, dispela Kingdom bai inapim tru laik bilong ol manmeri i save laikim tru pasin bilong stap wanbel wantaim ol narapela. (Song 37:​10, 11; Aisaia 11:​2-5) Dispela Kingdom tasol em i rot tru bilong pinisim ol hevi bilong dispela graun. Tasol olsem wanem sapos yu kisim nogut long han bilong narapela taim yu wok long wetim dispela Kingdom?

Sapos yu bekim rong, dispela i no inap helpim yu. Dispela bai kamapim sampela hevi moa. Baibel i kirapim yumi long bilip long Jehova. Long taim Jehova i makim em bai “bekim pe long [olgeta wan wan man] inap long pasin ol i bin mekim.” (Jeremaia 17:10) (Lukim blok, “Sampela Tingting Yu Ken Bihainim.”) Tru, sapos narapela i mekim nogut long yu, yu inap kisim pen na hevi. (Saveman 9:​11) Tasol God inap pinisim olgeta kain hevi em pasin nogut, na dai tu, i kamapim. Em i tok promis pinis olsem, ol man i stap long tingting bilong em, na ol i bin i dai long han bilong ol arapela, ol bai kisim laip gen.​​—Jon 5:​28, 29.

Tru, pasin bilong mekim nogut tru long ol narapela i stap yet, tasol sapos yumi pas gut wantaim God na bilip tru long ol promis bilong em, dispela bai mekim gut bel bilong yumi. Tingim Sara. Em i no gat poroman marit, tasol em i bin mekim bikpela long tupela pikinini man bilong em na stretim rot bilong ol i kisim gutpela ediukesen. Taim em i lapun pinis, dispela tupela pikinini i lusim em; ol i no helpim em long ol samting bilong skin o lukautim em long taim em i sik. Tasol Sara, nau em wanpela Kristen, i tok: “Maski sampela taim mi bel hevi, Jehova i no bin lusim mi. Mi pilim helpim bilong em long rot bilong ol bratasista spirit bilong mi, em oltaim ol i save tingim na lukautim mi. Mi bilip tru olsem klostu nau em bai pinisim olgeta hevi bilong mi, na tu, bilong olgeta manmeri em ol i save bilip long strong bilong em na bihainim ol lo bilong em.”

Ol dispela bratasista bilong spirit Sara i stori long ol, ol i husat? Ol i wanlain Kristen, ol i Witnes Bilong Jehova. Ol i insait long wanpela bikpela lain brata i stap long olgeta hap, em ol i gat pasin sori na ol i bilip olsem klostu nau pasin nogut bai pinis. (1 Pita 2:​17) As tru bilong ol pasin nogut, em Satan, na ol man i mekim wankain pasin olsem em, ol i no ken i stap moa. Dispela haptaim we narapela i mekim nogut tru long narapela, em bai pinis. I gutpela sapos yu kisim sampela save moa long dispela samting long rot bilong toktok wantaim wanpela Witnes Bilong Jehova.

[Ol Futnot]

[Blok long pes 6]

Sampela Tingting Yu Ken Bihainim

Baibel i kamapim ol gutpela tingting yu ken bihainim taim narapela i mekim nogut long yu. Tingim olsem wanem yu ken bihainim ol dispela tok:

“Yu no ken tingting long bekim rong narapela man i bin mekim long yu. Nogat. Yu mas bilip long Bikpela bai i helpim yu.”​​—Sindaun 20:22.

“Yu no ken kirap nogut taim yu lukim gavman i putim hevi long ol rabisman, na i no stretim gut kot bilong ol na i no larim ol i sindaun gut. As bilong dispela pasin i olsem. Ol ofisa i mekim ol dispela kain pasin, ol i gat bos i save glasim ol.”​​—Saveman 5:8.

“Ol manmeri i save daunim nem bilong ol yet, em ol i ken amamas. Bai God i givim olgeta graun long ol.”​​—Matyu 5:5.

“Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.”​​—Matyu 7:​12.

“Sapos ol i mekim pasin nogut long yupela, orait yupela i no ken bekim pasin nogut long ol. Nogat. . . . Oltaim yupela i mas painim rot bilong i stap wanbel wantaim olgeta man. Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol na mekim save long ol.’ ”​​—Rom 12:​17-​19.

“Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim. . . . Em i karim pen, tasol em i no tok long bagarapim ol. Nogat. Em i putim em yet long han bilong God, em dispela Jas i save skelim stret olgeta samting.”​​—1 Pita 2:​21-​23.

[Ol Piksa long pes 7]

Jehova i bin skulim planti man long lusim pasin bilong mekim nogut tru long ol narapela